Read Kosena aantá-kwaasi 16 Bible Online

aantá-kwaasi 16 - Kosena bible

aantá-kwaasi 16

¹Pórowe Sáírásiye mirá uyambá Tépi-naopaꞌa Árísitaa-naopaꞌa kuyaná moóráwai áwíꞌa Tímóti mindáópaꞌa ména Ísuna aampaꞌá kwéguwai úwana anówama Ísuna aampaꞌá kwégun-inimba Yútaa-inimba úwana avowámá Kíríki-kwaasi úwana umái máyówasa

²Árísitaa-naopakewai Áíkóniyaa-naopakewai Ísun-aai ísówai Tímóti áwíꞌa mósá makáawe.

³avowámá Kíríki-kwaasi póna áúraꞌa íma kárámai araaꞌéna urómba pósa Yútaa-kwaasi mináyámpáꞌó máyáan-kwaasi mirán-áímbá ísówana Póro séna Ísóigona mayáíráꞌá Tímótimba airánáe séna Yútaa-kwaasi aamoí ígwáe séna Tímótimba áúma kárámarena

⁴áíꞌmaena naaúwasa naaóꞌ-naoꞌa kwénaaesa aantá-kwaasiye Ísóigona kwaásiti anón-kwaasiye Yérúsaremuvaꞌa siráan-aimba Ísóigona kwaásiyavai simátímaꞌmaesa kweésa sésa mináímbá ísáaro suwasá

⁵Ísóigona kwaási Ísumpaꞌa asiramái mésa óꞌon-kwaasi simátímaꞌmaesa kuwasá isésa aasiyaasi-táwai évakarawai Ísun-aaiyavesa áraire sinté kwégwesa sáwíva-kwaasi-iꞌa uráawe. Póro kaainkáámbá awánarain-kwasai.

⁶Pórowe Sáírásiye Tímótiye Vírísiyaa-maravaꞌa Kárésiyaa-maravaꞌa kwénaaesa Ésiyaa-maravaꞌa áséi-kwasai kosimátimenae sumbá Áánútun-amanko íma kónááowe súwasa

⁷isésa kweémesa Mísiyaa-maragona oóvímbá kwésa Pítíniyaa-maravaꞌa kónáe sésa uwaná Ísun-amanko íma kónááowe súwasa

⁸isésa Mísiyaa-maravaꞌa kómaatesa kweémesa Táróasi-naopaꞌa kumbésa

⁹noꞌwáámba Póro kaainkáámbá awánówana Másétóniyaa-maravaken-kwaasigo kokuꞌá taména séna Másétóniyaavaꞌa tasúwaꞌnaa uwo asiramái súwana

¹⁰Póro kaainkáámbá awánéna simásimuwata usásineta séta Másétóniyaa-kwaasiya áséi-kwasaiya kosimátimunanaya Áánútuya kwésaayaisata Másétóniyaavaꞌa kónáeya siráundayaawe. Árítiyaama Ísumpaꞌa tiráin-kwasai.

¹¹séta Táróasi-naopaꞌa nompí-sípí tátoꞌmai usáateta kówánanaya mindómpí-sípígó apu úmaena kúwata Sámóteresi-maravaꞌa kogwaéwándaya usá aaváyaavimba kweémeta Níápórisi-naopaꞌa marapáꞌá kunásáveta

¹²minkákémbá Vírípai-naopaꞌa marapáꞌá kuráundayaawe. mindá Másétóniyaa-maravaꞌa anón-daopaꞌa Árómáani-kamaani-kwaasi kárákwiraan-daopaꞌa évakaꞌ-noꞌwaamba kógwaeta

¹³Yútaa-kwaasi monor-áímbá kwéison-kanaa túwata imáyáa éta Yútaa-kwaasi nonawámpáꞌá torupamái mésa námúnaa kwésewe séta naaópaꞌa tuwéta nonawámpáꞌá kumówándaya aaraiyómbá torupamái máyówata kumbéta simátimewanasaya

¹⁴isésa uwaná moórá-ininko Táyátaira-naopaken-ininko áwíꞌa Árítiyaama kwená mayáí óoraan-tantaaꞌa ampantaráꞌá tásuwena kwétimena óntamba kwémaena kwemá Áánútuna imáyáa éna kwenáwíꞌa mósá makón-inimba Ísóigo imáyáa amúwana Póron-aai kaweꞌá umái isówana

¹⁵minínínkógwárá kwená akúnkwáráꞌá nombá pétinkowana minínínkó séna kentáváí séꞌa Ísóigon-aaiyavena áraire séna Ísumpaꞌa asiramái máyáin-ininkoman-iye séꞌa kesí naaúmpaꞌa taménaaowe asiramái súwata kwená naaúmpata koméraumne. Pórowe Sáírásiye ándávaꞌa máyóyan-kwasai.

¹⁶moórá-arasi mayáí kwémayon-arasigomba évakarawai óntamba tuwésa meéyán-uráan-arasigomba taraváá-kwámbá kwenarumpimbá máyowana évaka-kwaasitopaꞌo naaémbo kwínín-aimba simátimuwasa óntambo ámúmba kwembó meéyámbakaan-kwaasi timúwasa maémáémbani. moórá-tawai námúnaa kwésupaꞌa kumówánanaya minárásígó suwánéna

¹⁷Póronte kenté sínaaemba kwaꞌmaéna kwégwena anónkaꞌa séna Áánútu kwíyómpaꞌa máyáiwaina mayáí kwémayaan-kwaasiman-owe. Áánútu sáwíꞌo umáímo máyáampinkemba kawer-ámpáꞌá mégwétinkain-aimba kwésimatimewaiman-owe minárásígó séna

¹⁸sáwívakaꞌa kwaꞌmaéna kwégwena mirá súwana Póro arumbá umbaí tówana mégwantena kwenarumpimbó máyon-taravaa-kwankontavena séna Ísu Káráísitina asirayámbá kwáyáintavai égési umái séꞌa minárásí auwé kóaao súwana avekáámbá auwéna kóúwasa

¹⁹minárásígómbó meéyán-uráawai awánésa tirunkó sáwíꞌa úwasa sésa íma kawer-óntámbá mayánaumne sésa Póronte Sáírásinte tiyáánkaꞌa tátoꞌmai tavisímaesa naambárupaꞌa kawáá-kwáásítópaꞌa mátinkesa

²⁰Árómáani-kamaani-kwaasitopꞌa mátinkesa sésa maandárai Yútaa-kwaasirai kentáásí naaópaꞌa sáwí-mayai kwémayaaiye.

²¹kentáásí ámáámba kwégaresarai óꞌon-ampar-amaamba kwéseye. maandáraimo séyan-amaamba íya kwaránaumpo Árómáani-kwaasiti ámáámba kwaránaumne suwasá

²²sáwíva-kwaasi taúkúmaresa anónkaꞌa símae iyésa sésa áraire suwasá kawáá-kwáásí mindáraiti unáánkwátói tarátiyuwesa sésa kunánaandei tínkamoro suwasá

²³ávááraumai tínkambaresa tavisímaesa ándávaꞌa avúsúyuwesa ándávaꞌo kárákwiron-kwaasiyavai sésa ontaráꞌá kárákwimai mindárai kaweꞌá uwo suwaná

²⁴avumpin-dáúmpáꞌá móavusuyuwena tísamairai taaí umairéna aráápamarena ándánei kárárumarowasarai méraaiye.

²⁵mésarai noꞌwáán-avuntamba Pórowe Sáírásiye námúnaa kwésesarai Áánútuna imá kwésuyasa ándávaꞌo máyón-kwaasi ísówana

²⁶avekáámbá anóm-barima tówana naamayáámbá karekóꞌa umágúwana amápar-ontama tigúwana ándávaꞌo máyón-kwaasi tíyayaampimpaken-andama kweyááríkaꞌa ayúkúwasa

²⁷ándá-naumpaꞌo kárákwirowai aúmá kwáyomba póna usásinena awánómba ontan-tigurówana usáawanena séna ándá-kwaasi kóuraawe-imayaa éna anón-kwaasigon-aaroi inkaiséna kwená taánasatama mósá taúkéna kwenáúvimba agaiváíndayavena úwana

²⁸Póro awánéna anónkaꞌa séna íma mirán-uwo. kesáámá amápata úwoiya máyaumne súwana

²⁹ándá-naumpaꞌo kárákwirowai kwená kwaásiyavai séna oómbá kúra-simero súwasa kúrar-amuwana avekáán-umai ándá-naumpaꞌa iyúmba ayántámbá kwétowana anóndaraima óye séna Póronte Sáírásinte tísamaivimba kumbaéna

³⁰usásinena tíꞌmaena máápaꞌa kumbéna séna nóra onaná sáwíꞌo umáímo máyaundavinkemba Áánútu kawer-ámpáꞌá mésinkaniyo súwasarai

³¹mindárai sésarai Ísóigo Ísu Áánútumpakemba kunkáiwain-aaiyavai áraire sinaná ewé ená akúné sáwíꞌo umáímo máyáampinkemba kawer-ámpáꞌá métinkaniye simámesarai

³²minkwáásíyómbá Ísóigon-aai simátímúyasa isésa

³³mindóꞌwáán-avuntamba ándá-naumpaꞌo kárákwirowai tíꞌmaena tirósáánumpar-avima kwésese umátiyuwena mitáwai kwesé kwená kwaásiye monoꞌ-nómbá pékaawe.

³⁴nombá péꞌmaena Póronte Sáírásinte tíꞌmaena kwená naaúmpaꞌa mátínkarena toómbá timúwasarai kwénoyasa kwewé kwená akúné Ísun-aaiyavai áraire siráamba pósa tirumbá kaweꞌá umái méraawe.

³⁵máyówasa usá aaváyaavimba Árómáani-kawaa-kwaasi i-kwáásí tiꞌmárówasa ándá-naumpaꞌa kwésa sésa mindárai ayútínkénasarai kókaiyo suwaná

³⁶ándá-naumpaꞌo kárákwirowai Pórontavai séna Árómáani-kawaa-kwaasi i-kwáásí tiꞌmárááwasa tésa sésa Póronte Sáírásinte ayútinkaao sembá pókai ayútínkáanakai tirumbá kaweꞌá ínakai kokaiyó súwana

³⁷Póro i-kwáásíyáváí séna íma kawer-áímbá sésa kempímbá íma kwáyáin-aimba simái kunánaantamba sínkamesa ándávaꞌa avúsúyukaawe. Árómáani-kwaasiti aúváíma tokáuyan-kwaasi úyambanivo sínkamomba uwóvíꞌa ésa minámáámbá káráyukaawe. ívéꞌa aúpáꞌá ayúsinkai-imayaa owakáí íma mirá óyauye-imayaa ékai Árómáani-kawaa-kwaasi kesópaꞌa tésa ontá tayisúwéwakai kóyauye Póro súwasa

³⁸i-kwáásí isésa koyauwerésa Póron-aai tasimátimesa Árómáani-kwaasiti aúvái tokááin-kwaasiye simátímúwasa isésa táátavai ésa

³⁹ándá-naumpaꞌa komésa sésa keinárai Árómáani-kwaasiti aúváíma tokááyan-kwaasi óyata íma ísareta úwoiya tínkankaunda mindá uwóvíta éta tínkankaumne sésa tíꞌmaesa máápaꞌa kumésa aánoumai sésa kentáásí naaópaꞌa tuwékai kokaiyó suwasaráí

⁴⁰Pórowe Sáírásiye ándávaꞌa tuwésarai Árítiyaana naaúmpaꞌa kuyasá Ísun-aai ísówai torupamái máyówasarai miwítí imáyáa kaweꞌá umátinkesarai tiyuwésarai kurááiye.