Read Kosena aantá-kwaasi 17 Bible Online

aantá-kwaasi 17 - Kosena bible

aantá-kwaasi 17

¹Pórowe Sáírásiye kwésarai Ámpíporisi-naopaꞌa Ápóróniyaa-naopaꞌa kóyaatesarai Tésárónaikaa-naopaꞌa kuyaná mindáópaꞌa Yútaa-kwaasiti monoꞌ-námbá kwáyowana

²Póro úntemba Yútaa-kwaasi monor-áímbá kwésunkaꞌa monoꞌ-náúmpáꞌá uména Áánútun-aai aúváí-kwandaaivinken-aimba simátimumba monor-áímbó ísáan-kanaaraꞌa kaumboráꞌá simátimena

³séna aúváí-kwandaaivinkemba séna Áánútumo usásinankaiwaimba áíꞌa índaiꞌa umánkaiyana puwéna usásinaniye siráimba mináínkóná ááimba avoraꞌá simátimune. mináímbá Ísuntavesa siráawe Póro súwasa

⁴isésa Yútaa-kwaasi évakaꞌa mináíntávésa áraire sésa Póronte Sáírásinte tínaaemba kwarésa Kíríki-kwaasi Áánútuna imáyáa mósá márówaiye sáwívar-inimba túwíꞌa kwáyon-ininte miráumai-sawiva-kwaasi kwakáawe.

⁵kwárówasa Yútaa-kwaasi tuwánésa tirumbá sáwíꞌa úwasa sésa mináímbá kwáráavo sésa sáwí-kwaasi kavóná-kwaasi tirówasa torupamái mésa ááiꞌa tiyánáe sésa imáyáa tímúwasa Yésónona naambá taúkúmaresa Póronte Sáírásinte tayátoꞌmaeta amápa-kwaasi túrankaꞌa aaivintá maitinkánáisaiye sésa tivakáá umbá

⁶íma máyóyasa Yésónowe Ísun-aai ísówai évakare tavisímaesa mindáópaken-kawaa-kwaasitopaꞌa mátinkesa anónkaꞌa sésa Pórowe Sáírásiye sáwí-aimba kwémaresarai amápaꞌ-maravaꞌa kwétesarai ívéꞌa maankákwáráꞌá kentáásí naaópaꞌa tamáyaayana

⁷Yésóno kwená naaúmpaꞌa matínkaraiye. Árómáani-aiva-kawaanakona ámáámba karésa sésa kentááráꞌó kárákwiraiwai Ísuman-iye kwésewe suwasá

⁸amápa-kwaasiye kámááni-kawaa-kwaasiye isésa tirumbá sáwíꞌa úwasa ááiꞌa tiyáí-ímáyáá uwasá

⁹kawáá-kwáásí Yésónompi kwimái évaka-kwaasiyavai sésa óntamba simíyata ayútínkáanaꞌa tiꞌmátuwaaro suwasá óntamba tímúwasa ayútínkówasarai kurááiye. Pérea-naopaꞌa kuráan-kwasai.

¹⁰ayútínkówasarai kuyasá noꞌwáániꞌa únkaꞌa Ísun-aai ísówai Póronte Sáírásinte tínkamovo sésa tiꞌmárówasarai Pérea-naopaꞌa kweémesarai kuyambá Yútaa-kwaasiti monoꞌ-náúmpáꞌá umésarai Ísun-aai simátímúyasa

¹¹minkwáásíyómbá íma Tésárónaikaa-kwaasiraamba ésa kawer-ímáyáá kwéesa Póron-aai kaweꞌá umái isésa aasiyaasi-táwai Áánútun-aai aúváí-kwandaaivimba awánésa sésa Póro áraira kwési. kampará kwésiyo sésa aasiyaasi-táwai Áánútun-aai aúváí-kwandaaivimba táámpamai awánomba

¹²Yútaa-kwaasi sáwívarawai Ísun-aaiyavesa áraire suwasá Kíríki-inimba túwíꞌo kwáyon-inimba sáwívaꞌa Ísun-aaiyavesa áraire suwasá Kíríki-kwaasi sáwívarawai Ísun-aaiyavesa áraire suwasá

¹³Póro Pérea-naopaꞌa Áánútun-aai kwésimatimiyemo sun-áímbá Yútaa-kwaasi Tésárónaikaavaken-kwaasi isésa Pérea-naopaꞌa tésa miwítí imáyáa tayavisimái suwasá isésa Póromba áwááꞌa aéésa ááiꞌa tiyamánkai-imayaa uwasá

¹⁴avekáámbá Ísun-aai ísówai Pórontavai inkámóvo sésa uwí-nómpáꞌá kumuwó suwaná kumúwasarainivo Sáírásiye Tímótiye mindáópaꞌa úwoi máyóyasa

¹⁵Póromba áíꞌmaesa kumeémesa Áténesi-naopaꞌa móruna auwésa kuntauwerésa miwítí naaópaꞌa iyésa Sáírásinte Tímótinte usimátimesa sésa avekáán-umai kesópaꞌa kúmókaiyo Póro siyé usimátímakaawe. Póro Áténesi-naopaꞌa mérain-kwasai.

¹⁶Póro Áténesi-naopaꞌa kuména Sáírásinte Tímótinte kwétimuꞌmarena awánómba mindáópaken-kwaasi sáwívaꞌa kampar-ísóí úmakesa miwán-áwíꞌa mósá kwémarowana Póro tuwánéna arumbá umbaí tówana

¹⁷Yútaa-kwaasiti monoꞌ-náúmpáꞌá uména Yútaa-kwaasiye óꞌonkaa-kwaasi Áánútuna imáyáa mósá márówaiye usimátimena Áánútuna áséi-kwasai usimátimena aasiyaasi-táwai mindáókona marupáꞌá máyón-kwaasi Áánútun-aai simátímaꞌmaena iyúwasa

¹⁸Épíkúriyaan-aai ísámai kuwáíyé Sítóikin-aai ísámai kuwáíyé Póronopaꞌa tésa kwesimán-kwesiman-esa évakarawai sésa aaiyé símaena nááín-kwaasi nóine kwésiyo suwasá évakarawai sésa óꞌom-bapaken-isoigontavena kwésiye sumbá Póro Ísun-aai séna pukáimpinkemba usásinkaiye simátímakaintavesa mináímbá suwasá

¹⁹Póromba áíꞌmaesa kawáá-kwáásímó torupamái mésamo évakar-aimbo simáímo kawer-un-áyámpáꞌá áwíꞌa Áríópagasi-ayampaꞌa Póromba áíꞌmaesa máankesa sésa aúná-aimbo kwésimatimenda-aimba simásímínata ísáano.

²⁰kesáá mináíntá isáúnda mináínkó áꞌoran-ivo ókwaraꞌa mináínkóná ááimba simásímínata ísáano sésa

²¹Áténisi-naopaken-kwaasiye óꞌom-bapaken-kwaasi mindáópaꞌa tamáyón-kwaasiye aasiyaasi-táwai torupamái mésa aúná-aine suꞌmai kwésewe. mindáyavesa mináínkóná ááimba simásímínata ísáano siráawe.

²²suwaná Póro usásinena Áríópagasivaꞌa torupamái máyón-kwaasiyavena séna Áténisi-naopaken-kwaasi ísáaro. monotávéꞌo asiramáímo máyáawai áꞌa tuwánaraumne.

²³kentí naaópaꞌa kwénaaeꞌa tuwánáúnaꞌa évaka-tantaaꞌa úmakeꞌa miwán-áwíꞌa mósá kwémaraamba tuwánaraumne. óntan-taareiraꞌa aúváíma agaimaréna séna íma awánáúnda-isoigontavai maanóntán-tááréímá úmakaumne agaimaréna siráimba úwaꞌa awánaraumne. minísóígómbá íma awánaan-isoigon-aai simátimune.

²⁴kwemá kwíyómba maramá mimpímbá kwáyáin-tantaaꞌa úmarena amápa-tantaakaꞌa kárákwirena íma kwaási úmakaan-daumpaꞌa méraiye.

²⁵kweyááma kwaásimo máyáawaina ááinkoma póna tááma kwétimena amápa-kwaasiraꞌa kárákwiyena kwempímbá ímo ááimo ánkaraiwaima póna íma kwaási kwembá áwaꞌnaa owáímán-iye.

²⁶Áánútu aivaꞌá moórá-kwaasi úmakowasa kwempínkémbá óꞌon-oꞌon-kwaasi sáwívaꞌa paáruresa amápaꞌ-maravaꞌa kóyáwé uráawe. Áánútu kwená imáyáavinkemba amápaꞌ-marama taaín-timena amápa-kwaasiti kanaamá makáiye.

²⁷kembá sivakáá-umai suwánaigwae séna Áánútu mirá uráiye. kwemá íma némpaꞌa máyáivo egwaaꞌá máyáimba póta awánanaundayaawe.

²⁸moóráwai séna kwemá máyáísata póta kesáámá máyaumne siráiye. keinárawapinkemba moóráwai agaimaréna séna áraiꞌa kwená iyámpóíya úne agaimaréna siráiye.

²⁹Áánútuna iyámpóíya póta kwaásimo kentí imáyáavinkembo óntambo úmaken-tantaatavetaamo éta kesivowéyá íma sénaumne.

³⁰ááémo miwímó mésamo sáwíꞌo umbá Áánútu miwíyávéna íma sáwívar-aimba siráivo ívéꞌa amápaꞌ-mapaken-kwaasiyavena séna sáwí-amba tuwéꞌa kesópaꞌa teró Áánútu kwésiye.

³¹kwená imáyáavinkemba amápa-kwaasi aaivimbá maitinkánín-kanaama tíníye. aaivimbó maisinkánín-kwaasiya áꞌa usásinankaraiye. pukáimpinkemba usásinankaraimba pósa áraiꞌa kwemá aaivimbá maisinkáníntaaniye sénááowe Póro siráiye.

³²pukáimpinkemba usásinankaraiyemo súmba isésa évakarawai akáꞌáámba suwasá évakarawai sésa moórá-tawaimo índa simásímínata ísáano suwaná

³³Póro tiyuwéna kóúwasa

³⁴évakarawai kwenánaaemba kwaꞌmaésa kwésa kwenáái isésa Ísun-aaiyavesa áraire sumbá miwívínkémbá moóráwai áwíꞌa Táyónisi kwemá Áríópagasi kánísóronaꞌa úwana moórá-ininko áwíꞌa Tamarísiye minkáéꞌnárai umái évakarawaivi kwimái Ísun-aaiyavesa áraire sésa kwempáꞌá tiráawe.