Read Kosena aantá-kwaasi 22 Bible Online

aantá-kwaasi 22 - Kosena bible

aantá-kwaasi 22

¹Póro simátimena séna kesívárawaisai kesivoísáíyo aaí simátínkáamba anondá mináímbá sénaumpo ísáaro séna

²Ípírun-aimpinkemba súwasa miwí tááivinken-aimba pósa isésa aaisékésa kwenáái kaweꞌá umái ísówana Póro séna

³kemá Yútaa-kwaasi úne. kesinó Sírísiyaa-maravaꞌa Táásási-naopaꞌa masinkówaꞌa anón-éꞌa Yérúsaremuvaꞌa Kámérierinopaꞌa tamáyaawanana kentáá síkwáꞌnái ámáámba asiramái simásímaꞌmaena iráiye. maankáꞌó máyáan-kwaasimo Áánútuntavaimo asiramái máyáantemba Áánútun-aai asiramái méꞌa méyatokaumne.

⁴Ísuna aampaꞌá kun-kwáásí sáwíꞌa kwéumatinkeꞌa tavisímaeꞌa ándávaꞌa aarai-kwaaí mátínkaraumne.

⁵ááéma aivaꞌmónó-káwáánákówé monor-ánón-kwáásíyé aúvái simésa Támásikasi-naopaꞌa Yútaa-kwaasi maimaé mátimiyo suwaꞌá Ísuna aampaꞌá kun-kwáásí kotíꞌmaeꞌa Yérúsaremuvaꞌa ándávaꞌa mátinkanae séꞌa Támásikasi-naopaꞌa kuráumne. ááémo mináúváímó símakaan-kwaasi kotísaa eꞌo éꞌa kentáváí áraiꞌa kwésiye seró.

⁶ánivo aampaꞌá kweémeꞌa Támásikasi-naopaꞌa egwaaꞌá kówánana kwáyáꞌwái kwíyómpakemba ságayamba tawáonkaan-tantaaꞌa tuwówana kuména súgáyáagaya úwaꞌa

⁷marapáꞌá tuvamówánana aaiyé suꞌmai kwéisaawanana sááyena séna Sóroo nóra séwa kembá sáwíꞌa kwéono súwaꞌa

⁸emá nááwa kwéseno séwánana kemá Násáretivakewaima Ísuma únama sáwíꞌa kwéumasinkaane súwasa

⁹kesémo máyón-kwaasi ságayamba awánésa kwésimasimun-aimba íma kaweꞌá umái ísówaꞌa

¹⁰áísaa eꞌa séꞌa Ísóigoo ke nóra ónaumno séwánana Ísóigo séna usásine Támásikasi-naopaꞌa kwinaná moóráwai Áánútumo embó ámakaim-bayai-aimba simámino súwana

¹¹ságayanko súgáyáagaya úwaꞌa íma kwéawanaawanasa kesé kwénaaun-kwaasi siyáán-toꞌmaesa Támásikasi-naopaꞌa kuráawe.

¹²kuwaná moóráwai áwíꞌa Ánánáesi Áánútun-aaiyavena asiramái ména kentáásí ámáámba kwéisowasa Yútaa-kwaasi Támásikasi-naopakewai kwenáwíꞌa mósá makówai

¹³kesópaꞌa téna kesí egwaaꞌá taména séna Sóroo kesí kwaásiyo. óꞌomba kaweꞌá umái aúramba awánaniyone súwaꞌa avekáámbá súramba awánamai kaweꞌá ówánana

¹⁴séna kentáá síkwáꞌnási Ísóigo embá usásinankaintavai kwená imáyáa kwaráníyone. kwená kawe-kwáyónáꞌá awáné kwenáái isé ónda po kwenáái kwaráníyone.

¹⁵awánáánda-yantaa isáánda-yantaaꞌa amápa-kwaasi simátímaꞌmae naaíníyone.

¹⁶íma úwoi maé usásine Ísóigo Ísumba ááyenana ená sáwí-imayaa mayauwáína Ísuntavai ísámai monoꞌ-nómbá peraaó Ánánáesi simásuwowaꞌa mirá uráumne.

¹⁷mirá éꞌa koyauweréꞌa Yérúsaremuvaꞌa taméꞌa anóm-bonoꞌ-naumpaꞌa Áánútumpaꞌa námúnaa kwéseꞌa kaainkáámbá awánaawanana

¹⁸Ísóigo simásimena séna Yérúsaremuvaꞌo máyáan-kwaasi kesáái simátímínasa íma kaweꞌá umái isánááovo avekáámbá usásine maankáꞌá tuwaaó Ísóigo súwaꞌa

¹⁹Ísóigoo monoꞌ-náúmpímpáꞌá kwénaaeꞌa enááiyavai áraire sen-kwáásí tátoꞌmai tínkambai tavisímaeꞌa ándávaꞌa mátíyukaunda áꞌa suwánaraawe.

²⁰Sítíveni enáái simátímakaiwaimba tuvúkáankaꞌa kemá méꞌa sirunkó kaweꞌá kwéuwaꞌa tuvúkáan-kwaasiti paákár-únánkwátóiraꞌa kárákwiraawanasa tuvúwúwana pukáiye séwánana

²¹Ísóigo séna aiꞌmáráana usásine nánkaꞌa óꞌonkaa-kwaasi kesáái simátímaꞌmae naauwó Ísóigo siráiye Póro siráiye.

²²Póro súwasa naaémbo sún-aintavesa áwááꞌa sésa anónkar-anonkaꞌa kwésesa áíkeꞌa tuvuwíyana puwíno. mirán-kwáásí íma maambáráváꞌá méniye

²³anónkar-anonkaꞌa kwésesa miwítí unáánkwátói ayúkésa awáávána kwéesa ovaí káúresa óipaꞌa kwéiyaata uwaná

²⁴Árómáani-anondako i-kwáásíyávéna séna áíꞌmaeꞌa kentí naaúmpaꞌa íyóro súwasa mirá uwaná séna Pórombo áwírukuꞌa náíyana Yútaa-kwaasi tááigona ááimba sínata ísáano súwasa

²⁵Póromba ándánei asááúmankesa áwírukuꞌa nánáe sésa uwaná i-kwáásítí kawáánáꞌá máyowana Póro kwentávéna séna kemá Árómáani-kwaasiti aúváí-kwandaai tokáundawaimba ímo sísaa ombá aaivimbó maisinkésamo súwírukuꞌa nánááon-imayaa kwéomba pósa ámáámba karésa uwóvíꞌa ónááomba pósa íma úwoi súwírukuꞌa nánááowe Póro súwana

²⁶iséna kwená anóndakomba kosimámena séna minkwáásí Árómáani-kwaasiti aúváí-kwandaai tokáiwaimban-ivo nóra ónaumno súwana

²⁷anóndako iséna Póronopaꞌa téna séna Árómáani-kwaasiti aúváí-kwandaai tokáano súwana owé súwana

²⁸anóndako séna kemá anón-ontamba kwétuweꞌa mináúváí-kwándááí maimái tokáumne súwana Póro séna kesivo tokáimba póꞌa kegwáráꞌá úwoi tokáumne súwasa

²⁹áwírukuꞌa nánáe sun-kwáásí mináímbá isésa nénkaꞌa kuwaná anóndakogwaraꞌa áátavai éna séna Árómáani-kwaasiti aúváí-kwandaai tokáiwaimba asááúmankaunda uwóvíꞌa úne séna áátavai uráiye. Póromba monor-ánón-kwáásítópaꞌa máánkarain-kwasai.

³⁰áátavai éna usá aaváyaavimba anóndako séna Yútaa-kwaasi Pórombo simánkáan-ainkona ááimba síyaꞌa isánáe séna mono-káwáá-kwáásíyé monor-ánón-kwáásíyávéna séna torupamái méwaro séna i-kwáásíyávéna Póro ayáámpinken-anda ayútuwaaro súwasa ayútuwowana áíꞌmaena torupamái máyónkaꞌa máánkaraiye.