Read Kosena aantá-kwaasi 23 Bible Online

aantá-kwaasi 23 - Kosena bible

aantá-kwaasi 23

¹máánkarowana Póro monor-ánón-kwáásí tuwánamai kawer-éna séna kesí kwaásiyono. kemá ááégwara ívékwaraꞌa Áánútu aúrankaꞌa kaweꞌá umái méꞌa moórá-yantaaꞌa sirunkó íma umbaí kwétaiye súwana

²aivaꞌ-mónó-káwáánákó áwíꞌa Ánánáesi kwemá Pórona egwaaꞌó máyówaiyavena séna óiꞌa turáráaro súwasa mirá uwaná

³Póro kwentávéna séna empímbá sáwí-imayaa kwáyáimba póna Áánútu embá inkamíníye. emá mé imáyáa e ámáámba kwaꞌmái aaivimbá kwéankaumne séndanivo minámáámbá karé se óiꞌa turáráaro sénasa sóiꞌa turáráamba ámáámba karáane Póro súwasa

⁴kwená egwaaꞌá máyówai sésa Áánútuna aivaꞌ-mónó-káwáánákómbá simái sáwíꞌa kwéumankaane suwaná

⁵Póro séna aivaꞌ-mónó-káwáánáꞌá iyémó sewaꞌó isékai íma mináímbá súsino. Áánútun-aai aúváí-kwandaaivimba agaimaréna séna kentí kwaásiraꞌo kárákwirewai íma simái sáwíꞌa umánkáaro agaimaréna siráimba póꞌa uwóvíꞌa úne Póro siráiye.

⁶Póro simásuwena monor-ánón-kwáásí tuwánéna imáyáa éna évakarawai Sátúsi-monor-aimba sésa púwómpinkemba íma usásinanaaowe-aimba sun-kwáásí owasá évakarawai ámáán-kawaa-kwaasi owé-ímáyáá éna anónkaꞌa séna kesí kwaásiyono. kesivomá ámáán-kawaa-kwaasigo éna kembá masínkaraimba kemá ámáán-kawaa-kwaasi úne. Áánútu pukén-kwaasimo usásintinkaniyemo siráunda-aintavai ívéꞌa aaivimbá kwémaisinkaawe Póro simásuwowasa

⁷isésa ámáán-kawaa-kwaasi Sátúsi-monor-aimbo sun-kwáásí keíyái keiyai aaisambá simái taaínkaar-uráawe.

⁸Sátúsi-monor-aimbo sun-kwáásí Áánútu pukén-kwaasimo usásintinkanin-aintavesa kampar-áímbán-iye kwésesa Áánútuna kwayóꞌnárawaꞌa kwíyómpakendarawaꞌa íma máyáawe kwésesa kwaási timambá íma máyáiye suwasá ámáán-kawaa-kwaasi sésa Áánútu pukén-kwaasi usásintinkaniye. Áánútuna kwíyómpaken-kwayoꞌnarawaꞌa máyáawe. kwaási timambá máyáiye kwésuwasa mináíntáváí taaínkaar-esa

⁹aaisambá sésa ámáán-kawaa-kwaasivinkemba ámáámba sun-kwáásí usásinesa asiramái sésa kesáámó awánáúndaya Póro íma sáwíꞌa kwéivo Áánútuna kwayóꞌnákó kwembá simámakai. moóráwai kwíyómpakewai kwembá simámakaiyo. íya isáúmne suwasá

¹⁰aaisambá anónkar-anonkaꞌa siráawe. aaisambá anónkar-anonkaꞌa suwaná i-kwáásítí anóndako séna Póromba aaisan-aéémesa tavisíyapaꞌa aíyayaamba tawíyévainivo i-kwáásíyávéna séna kwaásiti avumpimbá koméꞌa koáíꞌmaeꞌa kentí naaúmpaꞌa íyóro súwasa miwítí naaúmpaꞌa móankaraawe.

¹¹móankarowana mindóꞌwáámbá Ísóigo Pórona egwaaꞌá kumbéna séna asiramái mé kentáváí Yérúsaremuvaꞌa simátímakaantemba Árómáa-naopaꞌa kosimátiminiyone Ísóigo siráiye. Póromba ámááyu-aimba siráan-kwasai.

¹²súwasa usá aaváyaavimba Yútaa-kwaasi évakaꞌa torupamái mésa Póromba ámááyu-aimba sésa tuvútuweta toónkwárá nonkwárátá nánaundayaanivo ímo tuvuwéta toónkwárá nonkwárátá íya nánaundayaawemo asiramái

¹³sun-kwáásí kae-kwááí aíyayaan-kwaasi mésa sésa

¹⁴mono-káwáá-kwáásíyé anón-kwaasiyavesa kosimátimesa sésa torupamái méta asiramái séta Póromba tuvútuweta toónkwárá nonkwárátá nánaumpo ímo tuvuwéta toónkwárá nonkwárátá íya nánaundayaawe.

¹⁵miráumai keinárawate monor-ánón-kwáásíyé Árómáani-anondakontavai kampaꞌá kosimámeꞌa séꞌa Póromba áíꞌmae kesópata tinatá áísaa umai mináínkóná ááinta isánáe sewé kosimámeꞌa seró. mináímbá isésamo aampaꞌó áíꞌmaesamo tíyata tuvuwónaundayaawe siráawe.

¹⁶suwaná Póromba ámánaako ááninko ámááyu-aimbo sumbá iséna isaaiséna i-kwáásítí naaúmpaꞌa iyéna Póromba mináímbá usimámuwana

¹⁷iséna i-kwáásítí kawáánákómbá ááyena séna mindáꞌá áíꞌmae anóndakonopaꞌa kwinaná moórá-aimba kosimámino súwana

¹⁸áíꞌmaena anóndakonopaꞌa kwéna séna ándávaꞌo umáyáin-kwaasigo áwíꞌa Póro sááyena séna minívé-kwáásí áíꞌmae anóndakonopaꞌa kwinaná moórá-aimba simámino sisaꞌá enópaꞌa áíꞌmaeꞌa túne súwana

¹⁹anóndako mindáꞌá ayáán-toꞌmaena ímo kwaásimo máyón-ayampaꞌa ánkarena áísaa ena séna nóin-ainaꞌiya sinaꞌá ísáano súwana

²⁰mindáꞌá simámena séna Yútaa-anon-kwaasiye monor-ánón-kwáásíyé moórá-aimba sésa usá aaváyaavimba enópaꞌa iyésa kampaꞌá usésa Póromba áíꞌmae kesópata kumínata áísaa umai mináínkóná ááinta isánáe kampaꞌá usénááowe.

²¹miwí táái íma isaaó. kae-kwááí aíyayaan-kwaasi asiramái sésa Póromba tuvútuweta toónkwárá nonkwárátá nánaumpo ímo tuvuwéta toónkwárá nonkwárátá íya nánaundayaawe sésa aúpáꞌá aampaꞌá kárákwiresa miwí tááiyavai owé síníyono sésa kárákwiraawe. mindáyavai miwí táái íma isaaó. minívé-kwáásígó anóndakomba mirá simámuwana

²²iséna séna simásimenda-aimba íma óꞌon-kwaasi simátime anóndakomba simámakaumne. íma siyó séna aiꞌmákaiye. Póromba áíꞌmaesa anóndakonopaꞌa kunkáan-kwasai.

²³minívé-kwáásí aiꞌmaréna i-kwáásítí kawáánákáí tááyowasarai tuyaná séna ívéꞌ-noꞌwaamba Póromba áíꞌmaekai Sísáriyaa-naopaꞌo kámááni-anondakonopaꞌa móruna aúwáakaiyo. sáwívar-i-kwaasi 200 i-kwaasi toꞌmayaa íyasa évaka-kwaasi ósin-arósáanumpimbo nááón-kwaasi 70 kwaasi toꞌmayaa íyasa sáwívaꞌa 200 kwaasi kwaantáámbó tokáan-kwaasi toꞌmayaa íyaꞌa Pórombo ayááꞌmaena kwínín-osimba toꞌmayaa umánkeꞌa ívéꞌ-noꞌwaamba Póromba kaweꞌá umái kárákwimai áíꞌmaeꞌa kámááni-anondako áwíꞌa Víríkísinopaꞌa móruna aúwáaro séna

²⁵aúvái agayéna maará simámena séna

²⁶kentáásí anón-kwaasi Víríkísi isaaó. kemá Kórótíyasa Árísiya sáwíyan-aimba simámenaumpo isaaó. kawerá umái máyaano.

²⁷Yútaa-kwaasi minkwáásí áwíꞌa Póromba tátokesa tuvuwíyanesa kwéowaꞌa Árómáani-kwaasiti aúvái tokáin-kwaasigo isaꞌá iséꞌa Yútaa-kwaasi tiyáámpinkemba tavisimái kesí i-kwáásí tiyáámpimba tinkáúnasa áíꞌmaesa migowé.

²⁸minkwáásígómbó simánkén-aimba isánáe séꞌa áíꞌmaeꞌa miwítí anón-kwaasitopaꞌa kunkáumne.

²⁹íma sáwíꞌa uráintavai isasá miwítí ámáán-aine suꞌmai simánkaraawe. kemó ándávaꞌo auwéꞌo tuvúwónanamo puwíníniꞌa íma uráiye.

³⁰Yútaa-kwaasi évakaꞌa ámááyu-aimba sewaꞌá iséꞌa enópaꞌa aiꞌmáráanasa áíꞌmaesa kumónááowe. kwembó simánkaraan-kwaasiyaveꞌa simátimeꞌa séꞌa kwembó aaivimbó mayánkáan-aimba enaúrankaꞌa simái kawer-oró. mináúváí-kwándááívímbá agaimaréna siráiye.

³¹agaimaréna súwasa i-kwáásí simátimuntemba mirá ésa mindóꞌwáámbá Póromba áíꞌmaesa kweémesa Ántípátisi-naopaꞌa kunkwaésa

³²usá aaváyaavimba i-kwáásí marapáꞌá kwénaaun-kwaasi kuntauwerésa miwítí naaópaꞌa íyúwasa ósin-arósáánumpimba kwénaaun-kwaasi Póromba áíꞌmaesa

³³kweémesa Sísáriyaa-naopaꞌa ósin-arósáánumpinkemba marapáꞌá kumbaésa mináúváí anóndakomba móru amésa Póromba aúrankaꞌa móru ánkarowana

³⁴mináúváí táámpamai iséna Pórontavai séna emá náám-baravaken-kwaasiyaꞌono súwana Póro séna kemá Sírísiyaa-maravaken-kwaasi úne súwana iséna

³⁵ánivo aaimó simánkaraan-kwaasi kumíyaꞌa isánaumne séna kwená kwaásiyavena séna Érótimo uráin-daumpaꞌa máánkareꞌa kaweꞌá umái kárákwiyoro súwasa mirá uráawe.