Read Kosena aantá-kwaasi 26 Bible Online

aantá-kwaasi 26 - Kosena bible

aantá-kwaasi 26

¹súwana Ágárípa Pórontavai séna ánivo simánkaraan-aimba anondá simátimiyo súwana Póro ayáámba mósá tuwéna simánkaron-ainkomba anondá síndayavena séna

²kentáásí anóndako Ágárípaao Yútaa-kwaasi simásínkaraan-aimba enaúrankaꞌa anondá sénaundayavai sirunkó aamoí kwéiye.

³Yútaa-kwaasiti ááinkwara ámáánkwaraꞌa kaweꞌá umái kwéisaandayavai sirunkó kaweꞌá kwéintavai íma sívón-kaiyé sé kesáái kaweꞌá umái isáníyone.

⁴kemá iyámpóírakemba kesí Yútaa-kwaasivimba méꞌa Yérúsaremuvaꞌa koméꞌa kemó ówándawaina ááimba Yútaa-kwaasi amápaꞌa suwánaraawe.

⁵ámáán-kawaa-kwaasiti aampaꞌá arupí umái kuráumne. ámáán-kawaa-kwaasi Áánútuna imáyáaya éta asirayán-ámpátá kwégwareta minámpáꞌá arupí umái kuráumne. Yútaa-kwaasi ayáátáákaꞌa suwánaraamba pósa sésáinasamo ésa kentáváí áraiꞌa siyé sénááowe.

⁶naaóváꞌá Áánútu kentáá síkwáꞌnáyavai árair-aimba simátímakomba paáríníntavai amuꞌmakáumnemo siráunda-aintavai aaivimbá maisínkaraawe.

⁷kentáá síkwáꞌná sísamaivakemba kaeꞌá kumbaimái-kwaasivinkemba Yútaa-kwaasi noꞌwáámba aaváyaavimba eénáínkaꞌa Áánútuna imáyáa mósá kwémaresa mináráír-áímbá amuꞌmáráantemba mirá kwéundayavai aaivimbá maisínkaraawe.

⁸Yútaa-kwaasiyono. Áánútu kwaási pukémpinkemba kanaán-umai usásintinkaniye-aintavai nóra isará íma áraire kwéseo.

⁹ááéma kemá imáyáa éꞌa Ísu Násáretivakewaina aampaꞌá kwégowai sáwíꞌa umátinkanaumne-imayaa uráumne.

¹⁰Yérúsaremuvaꞌa mirá ówánana mono-káwáá-kwáásí siꞌmárówaꞌa Áánútuna kwaási sáwívarawai tíꞌmai ándávaꞌa tínkaraawanasa tínkamiyasa púwóro sumbá kegwáráꞌá mirán-oro siráumne.

¹¹aasiyaasi-táwai monoꞌ-náúmpímpáꞌá kwénaaeꞌa Ísun-aai simái sáwíꞌa ígwáe séꞌa tínkambaeꞌa iráumne. sirunkó ikaaꞌá vówaꞌa némpaꞌ-naopimpakwaraꞌa kwénaaeꞌa tínkambaeꞌa kuráumne.

¹²anóndako Ágárípaao mindáyavai mono-káwáá-kwáásí aúvái agaimái simúwaꞌa Támásikasi-naopaꞌa maimaéꞌa kówánda

¹³kwáyáꞌwái ságayamba aaváúgómbó usáyaatarai-sagayamba tuwówana kwíyómpakemba kuména kesinepakéné kesé kun-kwáásí tinepakéné sán-kówata

¹⁴marapátá tuvamówánanaya aaiyé suꞌmai súwaꞌa isááwánana simásimena Yútaa-kwaasi tááivinkemba séna Sóroo nóintavai kembá sáwíꞌa kwéono. póímo ándámo kwímakaawanamo ayáámbo kawésíntemba emá mirá kwéone súwana

¹⁵Ísóigoo nááwaꞌono séwánana Ísóigo séna kembá Ísumba sáwíꞌa kwéumasinkaanaꞌa úne.

¹⁶usásinaao. kesí mayáí mayáínkwáe séꞌa usásinankeꞌa enaúrankaꞌa paárúnda ívéꞌo suwánáándarakemba agarááránkáanda-aimba simátímaꞌmae iyíníyone.

¹⁷aiꞌmáráana Yútaa-kwaasiye óꞌonkaa-kwaasiye simátímínasa évakaꞌa áwááꞌo aíyaꞌa miwí tiyáámpinkemba airánaumne.

¹⁸simátímínasa túnín-ampaꞌa ivátuwesa sámo kain-ámpáꞌá teró. Sáátáánigona asirayámbá tuwésa Áánútuna asirayámbá tamáyáaro. simátímínasa kesááiyavesa áraire sésa aráápamai maíyaꞌa miwítí sáwí-imayaa maitiyuwéꞌa Áánútundei-iꞌa umátinkaunda-kwaasivimba mótinkanaumne Ísu simásímakaiye.

¹⁹anóndako Ágárípaao kwíyómpakemba simásímakain-aimba íma tuwéꞌa úwoi mirá kwéune.

²⁰aivaꞌá Támásikasi-naopaꞌa simátimeꞌa naaémba Yérúsaremuvaꞌa simátimeꞌa minkákémbá Yútaa-kwaasiti maraváꞌá simátimeꞌa óꞌonkaa-kwaasiti maraváꞌá simátimeꞌa séꞌa kentí sáwí-imayaa tuwéꞌa Áánútumpaꞌa téꞌa kaweꞌ-máyáí mayáíyasa tuwánésa sésa Áánútumpaꞌa tiráawain-owe sígwáe séꞌa simátímaꞌmaeꞌa kuráumne.

²¹mindáyavai anóm-bonoꞌ-naumpaꞌa máyaawandaraꞌa Yútaa-kwaasi kembá tátokesa tuvuwónáe siráambanivo

²²Áánútu súwaꞌnaa úmaena ívékwaraꞌa kwéiyisaꞌa maankáꞌá méꞌa anón-kwaasiye úwoi-kwaasiye kesáái kwésimatimeꞌa Áánútun-aai simátímakowai agaimakáan-aimba Mósesi agaimakáin-aimba kwésimatimunda-aimba mimbórá-áímbá kwésimatimune.

²³maará sésa Áánútumo usásinankaiwaiyavesa agaimarésa sésa áíꞌa índaiꞌa íyana aivaꞌnáꞌá pukáimpinkemba usásinankaniye-aimba agaimakáamba pósa Yútaa-kwaasiye óꞌonkaa-kwaasiye pukáimpinkemba usásinkain-aimba isésa sámo kain-ámpáꞌá kwígwáe sésa agaimarésamo siráan-aimba kemá kwésimatimune Póro siráiye.

²⁴Pórombo simánkaraan-aimba anondá kwésimatimuwana Vésétasi anónkaꞌa séna Póroo uwoaóꞌá kwéone. aúváíma awánamae kwéiye po uwoaóꞌá kwéone Vésétasi súwana

²⁵Póro séna anóndakoo íma uwoaóꞌá kwéumpo súnda-aimba árair-aimba arupí-aimban-iye.

²⁶súnda-yantaaꞌa íma aúpáꞌá uráavo amápa-kwaasi táápimba siráamba egwáráꞌá mináímbá ísaraampo kemá íma inkaiséꞌa úwoi kwésimamune.

²⁷Áánútun-aai simátímakowai tááiyavai áraire kwéseno. árairemo kwésemba áꞌa ísaraumne Póro súwana

²⁸Ágárípa séna ákí-aimba simásimenda-imayaa e Ísun-aaiyavai áraire sénaumne-imayaa oónó súwana

²⁹Póro séna íma ákí-aintavai íma ayáátáár-aintavai kwésune. kembó asááuraan-andaoma íma keinárawapimba kwaínkwáe kwésundanivo Ísun-aaiyavai áraire siráundantemba kesáái kwéisaan-kwaasiye esé mirá sénááontavai Áánútumpaꞌa námúnaa kwésune Póro siráiye.

³⁰súwasa Ágárípaawe Vésétasiye Pénáisiye amápa-kwaasiye usásinesa

³¹mááꞌaruvaꞌa kumbésa keáímbá sésa íma sáwíꞌa uráintavai ándávaꞌa ankésa tuvuwíyana puwíno siráawe suwaná

³²Ágárípa Vésétasintavena séna Árómáani-kamaani-aiva-kawaanakonopaꞌa kónaumne ímo siráinkakai ayúrankaanana kówisina mináímbá siráimba po aiꞌmárénana Árómáani-kamaani-aiva-kawaanakonopaꞌa kwíno Ágárípa siráiye.