Read Kosena aantá-kwaasi 27 Bible Online

aantá-kwaasi 27 - Kosena bible

aantá-kwaasi 27

¹súwana Vésétasi toꞌmayaa éna séna Ítári-maravaꞌa Árómáa-naopaꞌa nompí-sípívímbá kwígwáe séna Póronkwara évakar-anda-kwaasigwaraꞌa moórá-kwaasigontavai kárákwimae kwínkwáe séna méankowana minkwáásígó áwíꞌa Yúríyasi kwemá Árómáani-aiva-kwaasigona i-kwáásítí kawáánákómbá méankowana

²moórá-nompi-sipi Átámítivakemba kwáyowana Ésiyaa-maragona awámpákáꞌ-náópaꞌa kónáe súwata mindómpí-sípívímbá usáateta Másétóniyaa-maravake Tésárónaikaa-naopaken-kwaasi áwíꞌa Árísítakasi kwesé usáateta kweémeta

³usá aaváyaavimba Sáítóni-naopaꞌa marapáꞌá kunásávaawananaya Yúríyasi Póromba arumbá umánkena séna úwoi ená kwaási kotuwánenasa ímo tokénda-yantaaꞌa áméro súwana mirá úwata koyauweréta

⁴mindómpí-sípívímbá usáateta kwégowananaya úndá toréna nompí-sípí tátoꞌmarowana íma kúwata nonavuvumpaꞌá kwáyom-barago áwíꞌa Sáíparasi-marama kwáyopaꞌa mináyámpáꞌá úndá íma torówata mivátá kweémeta

⁵Sírísiyaa-maravaꞌa Pámpíriyaa-maravaꞌa kóyaaiteta Árísiyaa-maravaꞌa Máíraa-naopaꞌa marapáꞌá kunásávaawananaya

⁶moórá-nompi-sipigo Arekesándiyaavake-sipigo Ítári-maravaꞌa kónáe sú-sipigo kwáyowana i-kwáásítí kawáánákó awánéna mindómpí-sípívímbá mósinkaraiye.

⁷mósinkowata kówándaya sáwíyan-unda toréna mindómpí-sípígó íma aíntówata évakaꞌ-noꞌwaamba kwaéta mirá úmaeta Náítasi-naor-egwaata kówándaya anón-unda toréna nompí-sípí aiꞌá tosétuwowata sínaaempakenta koyauweréta nonavuvumpaꞌ-márágó áwíꞌa Kíríti-maravaꞌa úndá íma torópaꞌa kweémeta ayááíváꞌ-márámá áwíꞌa Sáómóni-maravaꞌa kóyaaiteta

⁸uwí-nónawampakavamba suwesaraayáváí úmaeta kweémeta Árásea-naokona egwaaꞌá kawe-kwáúné supaꞌá

⁹ayáátáákaꞌa komáyaawananaya aivaꞌ-mónó-káwáánákó Yútaa-kwaasiti anóm-bonoꞌ-naumpaꞌa avumpin-dáúmpáꞌá kwéiyun-kanaa ánásowana minkánáá úndá toráí-kánáá uwí-nónkó tuvántááva kwéuwasa inkaisésa íma nompí-sípívímbá kwénaaun-kanaa túwana Póro imáyáa éna simátimena séna

¹⁰ívétaamo nompí-sípívímbó kónaundayaamo sáwí-yantaaꞌa kesinetá paáriniye. íma náaindaane suꞌmainivo nompí-sípíyé kwaásiye aúyoranaaowe. mináímbá kemá áꞌa ísaraunda póta aáno ménaumne Póro súwana

¹¹i-kwáásítí kawáánákó Póron-aai íma iséna nompí-sípímó avúsúmai kúwain-aaiye misípígó avowán-ááiye suꞌmai iséna Póron-aaiyavai íma áraire-imayaa úmba

¹²misípígó kwáyompaꞌa úndámo toráí-kánáá íma kaweꞌá ún-ayampaꞌa mésa sáwíva-kwaasi sésa tuwéta Víníki-naopata komáyáananaya úndá toráí-kánáá ánásainata kónaumne sumbá Víníki-naopaꞌa Kíríti-maravaꞌa kwáyon-daopaꞌa kaweꞌ-nónkwaumpaꞌa ímo úndámo torón-kwaumba kwáyowasa mináímbá siráawe. anón-unda torówana uwí-nónkó aíntásarain-kwasai.

¹³suwaná tiyáánepakemba sáwíyan-unda torówasa awánésa sésa Víníki-naopata kónaumne sésa nompímbó túwówanamo tátoꞌmatuwe máyon-anda mósá tavisimái kwémaresa uwatá Kíríti-maragona uwí-nónawampakavanta kówándaya

¹⁴Kíríti-maravakemba anón-unda toréna

¹⁵mindómpí-sípí tátorowana íma aíyámbaꞌmai kúwana avúsúmae nááún-tamayoꞌa tuwówana úndáo kweyááríkaꞌa améntamaena kúwana

¹⁶nonavuvumpaꞌá sáwíyam-barago áwíꞌa Kóta-mara kwáyowana úndá íma kwétoropata kówándaya tínaaempaꞌo kárárumakesamo tavisímaesamo íyú-sipi tavisimái

¹⁷anó-sipivimba marésa anó-sipi tawísívo sésa ándánei asááumai kawer-úmárówana Árípiyaa-mara-ayampaꞌa uwí-nómpímbá nonáámááí-omaꞌa kwáyowasa minómákáꞌá aiꞌá máikwiyivo sésa úndáo avúsúmai kwégon-ampanta ayúꞌmai móruna márówana kwempaꞌá kúwana

¹⁸usá aaváyaavimba minúndá paaí kwétorowasa óísamba taaímbai uwí-nómpáꞌá kwétuwesa

¹⁹usá aaváyaavimba misípívímbó mayáímó máyón-kwaasi mayáí-yántááꞌá nompáꞌá kwétuwowana

²⁰minánón-úndá paaí kwétorowata ayáátáákaꞌa aaváúmá oꞌá íma awánéta sípígomo kwínín-amba íma awánéta imáyáa éta kentáásí maráyá íma awánaandaya maavátáyá ánásanaumne-imayaa uráundayaawe.

²¹imáyáa ówándaya ayáátáákaꞌa toómbá íma kwénowana Póro túrankaꞌa taména séna Kíríti-maravaꞌa kwéteta seéwánda íma kesáái ísaraawe. isékai sáwíꞌo ií-yántááꞌó náaindaambo tuwáí íya awánáúsino.

²²ánivo tirumbá asiramái máéro. nompí-sípíyé suꞌmai sáwíꞌa ínívo kwaási íma puwónaundayaawe.

²³Áánútuna imáyáa mósá kwémaraunda ívéꞌ-noꞌwaamba kwemá kwená kwayóꞌnáꞌá aiꞌmáráísana kwíyómpakemba kesópaꞌa kumbéna

²⁴séna Póroo asiramái maiyó. emá Árómáani-kamaani-aiva-kawaanakonopaꞌa kwinaná enáái isáníye. Áánútu embá kaweꞌá umánkáimba póna esémo kwégon-kwaasi kárákwiyinasa íma puwónááowe siráiye.

²⁵mindáyavai asiramái máéro. simásímíntemba Áánútu mirá ínímba áꞌa isáúmne.

²⁶úndáo nompí-sípí améntayuwainata nonavuvumpaꞌá maragóná awámpátá kónaumne Póro siráiye.

²⁷súwana uwí-nómpímbá áwíꞌa Étériyaa-nompimba sísamaivakemba éíyaimba kumbaimái-noꞌwaamba úndá toréna améntámaena kúwasa noꞌwáán-avuntamba sípivim-bayai-kwaasi sésa maragóná egwaatá kwégumne sésa

²⁸ándá-ayairaꞌa umbaimó tón-tantaaꞌa aríkwímakesa nompímbá tuꞌmái tavisimái awánomba mindónkwááúmbá ayáátáákaꞌa 120-raꞌa kwáyowasa kwégwesa óꞌa móyuꞌmai awánomba ákíraꞌa 90-raꞌa úwasa

²⁹maragóná awámpáꞌá óntamba kwáyaindaraꞌa tuvamúnavo sésa táátavai ésa éíyain-anda ayútúwówana ánaaempakemba nompímbá kuména tátorowasa avekáá iraráínata nóin-tantaara kwáyáiya awánanae sésa

³⁰nompí-sípívím-báyáí-kwáásí imáyáa ésa aúpáꞌá kónaumne-imayaa ésa kampaꞌá sésa aipakén-ándá ayútuwanae sésa sáwíya-sipi nompáꞌá móruna túwówana

³¹Póro i-kwáásíyé miwítí kawáánákóntáváíyé séna sípivim-bayai-kwaasimo ímo anó-sípívímbó máésamo ésamo amápaꞌa ánásanaaowe Póro súwasa

³²i-kwáásí sáwíya-sipigona ándá káráyuwowana kóuraiye.

³³kóúwana sáwíyankaꞌa irataróꞌa Póro séna sísamaivakemba éíyaimba kumbaimái-noꞌwaamba kánoꞌa méꞌa íma toómbá náráavo ívéꞌa toómbá naaró.

³⁴kemá asiramái simátimeꞌa séꞌa toómbá néꞌa túma kaweꞌá ínaꞌa méꞌa íma ánásanaaowe

³⁵Póro simásuwena amápa-kwaasi túrankaꞌa toómbá mairéna Áánútuntavena súwi séna toómbá topámbai nówasa

³⁶awánowana tirumbá kaweꞌá úwata toómbá naáwándaya

³⁷mindómpí-sípívímbá sáwíva-kwaasi 276 kwaasi máyaawanda-kwaasi toómbá naáwánanaya

³⁸símúꞌa vówanaya misípí umbaí tówasa mimpímbó kwáyon-tomba áwíꞌa úwíti-tomba nompímbá maisuꞌmárówana etóyóí úwata maémaumne. nonkó tuvántáávanena misípí tawísíyukain-kwasai.

³⁹máyaawananaya irataróꞌa úwasa awánomba íma awánom-barama kwáyowasa awánomba miváꞌá nonkó irówana kaweꞌ-nónaamaai kwáyowasa awánésa sésa meivátá íyónanaya kaweꞌ-nónaamaaivaꞌa póna sípigo úwoi iyíníye sésa

⁴⁰sípigombo tátorain-anda káráyuwowana nompáꞌá kumúwasa avúsúmaesa nááún-tamayokaꞌa kárárumaron-anda ayútuwesa aipaꞌá ampantá aríkwímaresa úndáomo kweyááríkaꞌa avúsínata nonáámááívaꞌa kónáe sésa

⁴¹kuwaná nompímbá nonáámáái-omaꞌa kwáyowana mimpímbá misípígó aiꞌá mááritowana nonkó áyámivaꞌa tuvántáávanemena tawísíyukaiye.

⁴²tawísíyuwowasa i-kwáásí sésa ándá-kwaasi nombá tuvámbai kóvainivo tínkamonae suwaná

⁴³i-kwáásítí kawáánákó Póromba áwaꞌnaa ena séna íma tínkamoro simásuwena séna nombó tuvámbaimo kaweꞌó uréwai nompímbá ásávareꞌa tuvámbaeꞌa aápaꞌa koró.

⁴⁴évakarawai ímo nompímbó tuvámbai awánarewai nompí-sípígóná taai-ayáí mairéꞌa minkáꞌá tátokeꞌa avúsúmaeꞌa aápaꞌa koró súwata mirá éta amápa-kwaasiya kaweꞌá umáíya aápata kóyo uráundayaawe.