Read Kosena aantá-kwaasi 28 Bible Online

aantá-kwaasi 28 - Kosena bible

aantá-kwaasi 28

¹aápata kaweꞌá umáíya komáyaawanasaya mindónávúmpáꞌ-márágó áwíꞌa Mórata-marawe suwatá ísaraumne.

²aaꞌá téna táúgwiꞌa kwéuwasa mimbárávákén-kwáásí kaweꞌá umásinkesaya iramá agaisínkówata siyáánta kwégauvowananaya

³Póro irááríꞌa komaimaéna mimpímbá máagaimarowana kokoꞌá úwana kwaaivainkó téna Póro ayáánkaꞌa tauntorówasa

⁴kwaási awánésa keáímbá sésa moórá-kwaasi tuvúwísana púwísana nompí-sípívímbá timbá nonkómá íma tuvúkáimba póna ívéꞌa kwená anondáma maéna iraankavayaankó váínana puwíníye keáímbá kwésuwana

⁵Póro ayáámba tuvimpín-úwana miníráánkáváyáámbá taráꞌmaena iravímbá tuvamúwana íma Póromba áíꞌa úwasa

⁶minkwáásí Pórontavai imáyáa ésa intoráínana puwíníyo. marapáꞌá tuvaména puwíníyo-imayaa ésa ayáátáákaꞌa aúrampimba avúꞌmaresa mésa amuꞌmatuwé máyówana íma aveꞌá puwúwasa imáyáa móruna ésa sésa minkwáásí ísóigoman-iye siráawe.

⁷suwaná mimbárávákén-ánón-kwáásígó áwíꞌa Pápáriyasi kwená maramá egwaaꞌá kwáyowai kaweꞌá umásinkenaya másinkowata kwená naaúmpata kaumbo-nóꞌwáámbá kogwaéwánanaya

⁸Pápáriyasi avowámbá kokotámba ankéna ayánómbá naaegwáráꞌá kwéuwana máyowana Póro kwenópaꞌa kwéna awánéna Áánútumpaꞌa námúnaa kwésena ayáándei aneꞌá tátorowana mináíꞌá ánásowasa

⁹awánésa tíꞌo ún-kwaasi tíꞌmaesa Póronopaꞌa tuwaná miráumai asóvamatinkava kúwasa

¹⁰aamoi-yántááꞌá símúwata máyaawanasaya nompí-sípívímbá kónáe séwánda-tawaiya ímo makáawanda-yantaaꞌa símúwata kuráumne. Árómáa-naopaꞌa kuráunda-kwasaiya.

¹¹moórá-nompi-sipigo Arekesándiyaavakemba áwíꞌa keáváráwáí-ísóí-sípígó éna úndámo toráí-kánáá mimbárágóná nonkwaaúmpímbá kwáyowata kaumbo-kwíyómbá maisuwéta mindómpí-sípívímbá usáateta kweémeta

¹²Sísari-maravaꞌa Sáírákusu-naopaꞌa kwéta marapátá ásáveta kaumbo-nóꞌwáámbá kwaéta

¹³nompí-sípívímbá usáateta kwéta Árísiyamu-naopaꞌa kógwaeta usá aaváyaavimba sínaaempakenta úndá toréna siméntámenaya kwéguwata kaeꞌ-nóꞌwáámbá kógwaeta Ítári-maravaꞌa Pútíyori-naopaꞌa marapáꞌá ásávaawanasaya

¹⁴Ísun-aai ísówai máyówata kotuwánaawanasaya simásimesaya sésa moórá-sontaa keséya ménaaowe suwatá miráumaiya moórá-sontaa miwísé maéta Árómáa-naopata marapátá kówándaya

¹⁵Árómáa-naopakemba Ísun-aai ísówai kówánda-ainta isésa aampaké kotiránáe sésa Ápíyasi-naopaꞌa máákéti-marukaꞌa amápa-kwaasi kwááyumo kwaí-námbá kaumbo kwáyopaꞌa tuwaná Póro tuwánéna Áánútumpaꞌa aamoí úwana arunkó kaweꞌá uráiye. Póro Árómáa-naopaꞌa mérain-kwasai.

¹⁶Póro arunkó kaweꞌá kwéuwata Árómáa-naopaꞌa kówánanaya mindáópaken-kamaani-kwaasi Pórontavai séna íma ándá-naumpaꞌa maé úwoi-naumpaꞌa ménana i-kwáásígó enkáꞌá kárákwiyiniye súwana

¹⁷kaumbo-nóꞌwáámbá maisuwéna Póro mindáópakemba Yútaa-kwaasiti anóndarawaꞌa tááyowasa kwená naaúmpaꞌa tuwaná simátimena séna kesí kwaásiyono. Yútaa-kwaasi simái íma sáwíꞌa uráumpo kentáá síkwáꞌnái ámáámba íma káráraundanivo Yérúsaremu-naopaꞌa kembá tátoꞌmai Árómáani-kamaani-i-kwaasiraꞌa tíméwasa ándávaꞌa sínkaraawe.

¹⁸sínkaresa sínkamiyanesa kesáái avakáá-omba íma isasá ayúrankanae sewasá

¹⁹Yútaa-kwaasi mináímbá kárówaꞌa kesí ááimba íma sáwíꞌa uróntavai séꞌa Árómáani-kamaani-aiva-kawaanakonopaꞌa konaná kesáái isáníye. kesí Yútaa-kwaasi aaí simátinkanae íma súnda kesáái isáínkwáe séꞌa Árómáani-kamaani-aiva-kawaanakonopaꞌa tiráumne.

²⁰Yútaa-kwaasiya Áánútumo usásinkaiwaimbo amuꞌmakáundawain-aai séwánasa tátokesa siyáánkaꞌa asááuraamba póꞌa tááyamai tuwánéꞌa simátimenae Póro súwasa

²¹isésa miwí sésa Yútiyaavakemba Yútaa-kwaasi íma entáváí aúvái agaimái túwáawana tiráiye. íma évakarawai aaí másimasimesaya entáváí sáwí-aimba íma kwésimankaawe siráawe.

²²amápaꞌ-mapaꞌa Ísuna aampaꞌá kwégontavai sáwíꞌa kwéumatinkaamba kwéisaumpo mináímbá simásímínata ísáano siráawe.

²³simásuwesa moórá-tawai Póro simátiminin-kanaa marésa komésa minkánáá túwasa sáwíva-kwaasi Póro máyopaꞌa tuwaná aaváyaavinkemba ááimba ásárena Áánútu kwená kwaási kwégawaain-aimba simátímaꞌmaena noꞌwáámba móanasaraiye. naaóváꞌá Mósesi agaimakáin-aimpinkene Áánútun-aai simátímakowai agaimakáan-aimpinkene Ísun-aai simátímaꞌmaena iyéna Ísun-aaiyavai áraire sígwáe séna simátimuwasa

²⁴isésa évakarawai sésa árair-aine suwasá évakarawai sésa kampar-áíné suwasá

²⁵miráumai aaisankáá simái taaínkaar-uwaná Póro séna naaóváꞌá Áánútun-amanko moóráwaimba Áánútun-aai simátímakowaimba áwíꞌa Áísáyaamba simámuwana kentíkwáꞌnáyomba simátímakomba mináímbá árair-aimban-iye.

²⁶Áísáya agaimaréna sénaÁánútu séna minkwáásíyáváí kosimátime se kwéisaambanivo íma ísámai kaweꞌá kwéowe. kwéawanaambanivo íma awánamai kaweꞌá kwéowe.

²⁷miwítí imáyáao umbaí kwétaisana tááko aaimó isáíyávéna ávón-kaisaná túranko awánaiyavena ávón-kwégaivo ímo mirámó ésamo ésa tááꞌo isésamo túrambo awánésamo kesááimo isésamo miwítí sáwí-imayaaomo tuwésamo kesópaꞌo tenkákáí sáwí-imayaa maitiyuwéꞌa kaweꞌá umátinkausino Áánútu siráiye Áísáya agaimaréna siráiye. Póro simásuwena

²⁸séna kemá mirá kwéowaꞌa póꞌa simátimeꞌa séꞌa Áánútu sáwíꞌo umáímo máyáampinkemba kawer-ámpáꞌá kwémetinkain-aimba óꞌonkaa-kwaasi kosimátímakaundaya Áánútun-aai kwéisaawe

²⁹Póro mináímbá simásuwowasa [ Yútaa-kwaasi kwesimá kwesiman-esa aaisa-símaesa kóuraawe.]

³⁰kóuwana Póro mindáópaꞌa ména kaer-ímá maisuwéna kwená óntamba naankaꞌá kwétuwena máyomba sáwíva-kwaasi kwenópaꞌa tuwaná aamoí éna

³¹Áánútu kwená kwaási kwégawaain-aimba Ísóigo Ísu Káráísitin-aai simátímaꞌmaena iráiye. kámááni-kwaasi mináíntáváí íma aambá aúnúwana asiramái simátímaꞌmaena iráiye. kemá Árúku súnda-aimba ánásaiye.