Read Kosena aantá-kwaasi 5 Bible Online

aantá-kwaasi 5 - Kosena bible

aantá-kwaasi 5

¹Páánápáasi minóntámbá tímúwasarai moóráwai áwíꞌa Ánánáesi awainínkó áwíꞌa Sáváerae mésarai moórá-marama óꞌon-kwaasi kwétimesarai óntamba mairésarai

²taaináyauyo-aimba awainínkómbá simámuwana mirá íníyone súwana minóntámbá taaínkaar-urena évakaꞌa kwesáváí maéna évakaꞌa maimaéna aantá-kwaasi mói tiména kampaꞌá séna amápaꞌa timúne súwana

³Pítaa séna Ánánáesiyo Sáátáánigo áísaa umai isánáe sintáváí owé se mararákén-óntámbá amápaꞌa timúne siráanda Áánútun-amankomba kampaꞌá simáukaane.

⁴mimbárámá ená maramá isa tuwé óntamba mairé ená óntamba isa évakaꞌa timé íma sáwíꞌa éma mararákén-óntámbá évakaꞌa timúne íma sénda amápaꞌa timúne séndama sáwíꞌa ómpo íma kwaásiye suꞌmai kampaꞌá simátíyukaampo Áánútun-amankomba kampaꞌá simáukaane Pítaa súwana

⁵Ánánáesi iséna puꞌmaéna tuvamúwasa mináímbá ísaraan-kwaasi ávááraumai táátavai uwasá

⁶ívé-kwaasi tésa puwúmba taasááúmaesa maimaésa máutaraawe.

⁷máutaawana awainínkó sáwíyankaꞌa ména awaikómó puwún-aimba íma ísarena Pítaa-iyaitopaꞌa túwana

⁸Pítaa séna keináraiti mararákén-óntámbá amápara símakaiyo súwana minínínkó séna owé amápaꞌan-iye kampaꞌá súwana

⁹Pítaa séna enawaikóe esé mimbórá-ímáyáá ékai Ísóigon-amankomba kampaꞌá simáuꞌmai awánayae sirááiye. enawaiꞌó mágwéutaan-kwaasi tésa embá tamaimaésa máutanaaowe Pítaa súwana

¹⁰puꞌmaéna Pítaa aísamaivimba tuvamúwasa ívé-kwaasi tésa puwúmba taawánésa maimaésa awaikómbó utamánkópaꞌa máutowasa

¹¹Ísóigona kwaásiye óꞌon-kwaasiye isésa táátavai uráawe. óꞌon-oꞌom-bayai kaweꞌ-máyáígóná kwaasái.

¹²aantá-kwaasi kwaási túrankaꞌa óꞌon-oꞌom-bayai kaweꞌ-máyáímá maimaésa íyúwasa Ísuna aampaꞌá kwéguwai anóm-bonoꞌ-namba Sórómoni áúgwimai úmakopaꞌa aasiyaaí torupamái kwémauwasa

¹³óꞌon-oꞌon-akwaꞌa sáwívaꞌa Ísóigon-aaiyavesa áraire sésa miwísé torupamái maémáémbanivo óꞌon-kwaasi tuwánésa sésa kawe-kwáásín-owe sésa táátavai ésa íma miwísé torupamái máyówasa

¹⁵aantá-kwaasimo uráamba isésa tíꞌo ún-kwaasi tuvaipímbá taagwiyaꞌmaésa naambáruꞌa mátinkesa sésa Pítaa kwénaaena amankóꞌnaanko taaugwétáínasa asóvaigwae suwasá

¹⁶óꞌon-oꞌon-daopakemba tíꞌo ún-kwaasigwara tirumpimbá taraváá-kwámbá máyon-kwaasigwaraꞌa tíꞌmaesa Yérúsaremu-naopaꞌa mátínkówana Áánútu Pítaamba áwaꞌnaa úwasa amápaꞌa asóvasaraawe. kawáá-kwáásí aantá-kwaasi sáwíꞌa umátínkaraan-kwasai.

¹⁷mirá kwéuwana aivaꞌ-mónó-káwáánákóe kwená kwaási Sátúsi-monor-aimbo sun-kwáásíyé sésa amáparawai íma kentáásiraaima kwáráavo aantá-kwaasi tirááíma kwáráawe sésa tíyántavai ésa

¹⁸tátoꞌmai ándávaꞌa tiyúwówana

¹⁹mindóꞌwáámbá kwáúnkaꞌa Ísóigona kwayóꞌnákó kwíyómpakendako ontamá tisuwéna tíꞌmaena máápaꞌa móruntinkena séna

²⁰anóm-bonoꞌ-naumpaꞌa uméꞌa aúná-amba kwaási kaweꞌá umái maíꞌmaiꞌa ónááon-ankona ááimba usimátíméro súwasa

²¹isésa irataróꞌa anóm-bonoꞌ-naumpaꞌa umésa mináímbá simátímakaawe. anóm-bonoꞌ-naumpaꞌa moórávaꞌa kwésimatimuwasa moórávaꞌa aivaꞌ-mónó-káwáánákóe kwená kwaásiye tésa ándá-kwaasi táái isánáe sésa Ísareri-anon-kwaasi tááyowasa tésa monoꞌ-nánkár-í-kwáásíyávésa sésa aantá-kwaasi ándávaꞌa máyáavo kotíꞌmaeꞌa teró suwasá

²²kumbá íma máyówasa koyauwerésa tésa sésa

²³ándá-namba ontamá umásuwesa i-kwáásí ontaráꞌá máyáawata onta tisuwéta awánáúndaya íma máyáawata úne suwasá

²⁴mono-káwáá-kwáásíyé monoꞌ-nánkáꞌó kárákwirowaiye isésa táátavai ésa sésa mindá nóraya ónaundayaꞌiyo simásuwesa sáwívar-imayaa kwéuwana

²⁵moóráwai téna séna ándávaꞌa mátíyukaan-kwaasi anóm-bonoꞌ-naumpaꞌa mésa kwésimatimewaꞌa tuwánáúmne súwasa

²⁶monoꞌ-nánkáꞌó kárákwirowaiye kwembó áwaꞌnaa un-kwáásíyé kotíꞌmaesa kwempaꞌá tésa sésa úwoi-kwaasi miwí táái isésa sínkamovo sésa kwempaꞌá

²⁷tíꞌmaesa aaimó isáí-kwáásítópaꞌa mátínkówana aivaꞌ-mónó-káwáánákó

²⁸séna áꞌa simátimeta séta minkwáásígón-áái kwenáwíkaꞌa íma simátímaꞌmaeꞌa koróyá siráundaya isaꞌá áꞌa simátíméwasa Yérúsaremuvaken-kwaasi amápaꞌa ísáyaraawaꞌa ke kampa-kúvímbá sinkéta minkwáásí tuvúkáawe kwésewe aivaꞌ-mónó-káwáánákó súwasa

²⁹Pítaa-iyai óꞌon-aanta-kwaasiyonkwaraꞌa sésa Áánútun-aai aivar-áínkómá póna kwaási tááigomba usáyaaitaraimba póta kentááiya íya iséta Áánútun-aaiya iséta miráyá ónaumne.

³⁰keinárawaꞌa Ísumba taairaꞌá inkámúwana puwúwana kentáá síkwáꞌnáona Ísóigo Áánútu Ísumba pukáimpinkemba usásinankena

³¹séna anón-kwaasi póna sáwíꞌo umáímo máyáampinkemba kawer-ámpáꞌá métinkaniye séna ayáánúrapaꞌa asirayán-áyámpáꞌá móankena Ísareri-kwaasi kentí sáwí-imayaa tuwéꞌa Áánútunopaꞌa tíyana kentí sáwí-imayaa maitiyuwáníye séna Áánútu Ísumba pukáimpinkemba usásinankena ayáánúrapaꞌa asirayán-áyámpáꞌá móankaraiye.

³²mináímbá iséta kaweꞌá umáíya kwésimatimunanaya Áánútun-amanko mináímbá kaweꞌá umái kwésimatimiye. Áánútuma kwenáái ísámai kaweꞌá kwéowai kwenamambá kwétimisana Áánútun-amanko mináímbá kwésimatimiye aantá-kwaasi siráawe.

³³simásúwówasa aaimó isáí-kwáásí isésa tirumbá sáwíte úwasa tínkamonae-imayaa uwaná

³⁴miwítí avumpinkémbá moóráwai usásinena ámáán-kawaa-kwaasigo áwíꞌa Kámérieri kwemá usásinena miwí táái káráyuwena kwemá Áánútun-aai aúváí-kwandaaivinkemba aasiyaasí simáti simati kwéuwasa kwenáwíꞌa mósá makáawai kwemá usásinena aantá-kwaasiyavena séna sáwíyankaꞌa máápaꞌa kumónááowe súwasa máápaꞌa kúmúwana

³⁵séna Ísareri-kwaasiyono. minkwáásíyáváí mirá ónáemo síyamba kakaariyá íma mirá éꞌa ísáíyuweꞌa mirán-oro.

³⁶ááéma moóráwai áwíꞌa Tiutaásí usásinena séna anón-kwaasi únda póꞌa kesirááíye séꞌa kwaránááowe súwasa sáwíva-kwaasi 400 kwaasi kwarówana moóráwai Tiutaásímbá tuvuwúwana puwúwasa kwembó kwaꞌmaésamo nááún-kwaasi kóyáwé ésa kwená mayáí ivátukaawe.

³⁷minkákémbá túwíꞌo aawásó-tawai moóráwai Kárírivakewai áwíꞌa Yútási usásinena tááyowasa sáwíva-kwaasi kwenarááíma kwaꞌmaésa kwéguwana moóráwai tuvuwúwana puwúwasa kwembó kwaꞌmaésamo nááún-kwaasi kóyáwé umáguraawe.

³⁸mindáyavai imáyáa éꞌa minkwáásíyómbá íma ándávaꞌa mátiyuweꞌa tíyúwéwasa máéro. miwítí mayáígóná ááimbo marará-kwáásítí imáyáavinkembo énamo éna ánásaniye.

³⁹miwítí mayáígóná ááimbo Áánútuna imáyáavinkembo ínaꞌo éꞌa íma kanaán-umai karánááovo úwoi kwaíkwaiꞌa íníye. Áánútumpakembo ínaꞌo éꞌa minkwáásí sáwíꞌo umátinkeꞌo éꞌa Áánútunkwaraꞌa sáwíꞌa umánkanaaowe Kámérieri súwasa aaimó isáí-kwáásí isésa kwenááiyavesa owé sésa

⁴⁰aantá-kwaasi tááyowasa íyúwasa túwírukuꞌa nésa asiramái sésa Ísun-aai kwená asirayámbá íma simátíméro sésa tiꞌmákaawe.

⁴¹tiꞌmárówasa kwéesa tigaeyáváí uráasina Áánútu imáyáa timúwana tirunkó kaweꞌá úwasa sésa Áánútu asirayámbá símakaisata Ísuntaveta asiramáíya máyaundaya pósa síꞌo iníꞌa umásínkáantaanivo sirunkó kawetá isatá máyaumne aantá-kwaasi simásuwesa

⁴²aasiyaasi-táwai anóm-bonoꞌ-naumpaꞌa kwaásiti naúmpimpaꞌa Ísuna áséi-kwasai simátímaꞌmaesa kwénaaesa Áánútumo usásinankaiwai Yútaa-kwaasiya kwéamuꞌmaraundayawai kwemá Ísuman-iye sésa simátímaꞌmaesa kuráawe.