Read Kosena aantá-kwaasi 8 Bible Online

aantá-kwaasi 8 - Kosena bible

aantá-kwaasi 8

¹Sítívenimbo tuvúmba Sóro arunkó aamoí úmbanivo évakarawai Áánútun-aaiyavesamo asiramáímo máúwai Sítíveni áúma maimaé máutesa anón-iviꞌa tombánivo Sóro Ísuna aampaꞌó kwéguwai tínkambai ánásanae séna kúmba naaúmpimpakemba aarakwáꞌá koyavisimái ándávaꞌa tíyupaꞌa kúwasa Yérúsaremuvaꞌa Ísuna aampaꞌó kwéguwaima aivaríꞌa umái sáwíꞌa umátinkowasa kóyáwé uwasá aantá-kwaasiye suꞌmai Yérúsaremuvaꞌa máyówasa óꞌon-kwaasi Ísuna aampaꞌó kun-kwáásí Yútiyaa-ayampaꞌa Sámériyaa-ayampaꞌa kóyáwé uráawe. Sámériyaavaꞌa áséi-kwasai kosimátímakaan-kwasai.

⁴Ísuna aampaꞌó kwéguwai kóyáwé ésa Ísuna áséi-kwasai kosimátímaꞌmaesa kurá.

⁵Vírípi Sámériyaa-naopaꞌa kúmba kosimátimena séna Áánútumo usásinankaiwai amuꞌmaráúndawaiyaamo áꞌo kunkáimba kwemá Ísuman-iye

⁶Vírípi simátimumba kaweꞌá umái ísówana ímo awánarom-bayai mayówasa awánowana

⁷taraváá-kwámbá tirumpimbá máyówaiyavena aaí súwasa taraváá-kwámbá kwááꞌa tumásuwesa kóuwasa kwaási kaweꞌá umái máyówana aíyayaamba pukón-kwaasi asóvamatinkowasa kaweꞌá umái mésa

⁸Sámériyaavaken-kwaasi ávááraumai tirunkó kaweꞌá umái méraawe.

⁹Sámériyaa-naopaꞌa moóráwai áwíꞌa Sáímoni ména anón-kwaasi úne séna pukaaꞌá agaimaéna kwéiyuwasa táátavai kwéesa

¹⁰anón-kwaasiye úwoi-kwaasiye kwená mayáí awánésa kwenaráái kwégwaresa sésa Áánútuna asirayánkóe kwená asirayánkóe moóráiꞌa uráiye kampaꞌá suwaná

¹¹ayáátáákaꞌa pukaaꞌá agaimaéna kwégum-bayai mayówasa kwenaráái kwégwaresa táátavai uráambanivo

¹²naaémba Vírípi Áánútuna áséi-kwasai kosimátimena Áánútu kwená kwaási kwégawaain-kanaama kosimátimena Ísu Káráísitin-aai kosimátimuwasa isésa sésa árair-aimban-iye suwaná Vírípi minákwáꞌá nombá pétinkowana

¹³Sáímoni kwegwáráꞌá áraire súntavai Vírípi nombá pérankowana Vírípiye kwénaauwana ímo awánóm-bayai mayówana awánéna áátavai uráiye.

¹⁴mirámó Sámériyaavaꞌo kwéumba Yérúsaremuvaꞌa aantá-kwaasi mésa Sámériyaavaken-kwaasi Áánútuna áséi-kwasai isésa mináímbá méyatokaan-aimba isésa Pítaante Yóninte tiꞌmárówasarai kweémesarai

¹⁵Sámériyaavaꞌa komésarai Ísuna aampaꞌó kwéguwaiyavai ísámai námúnaavinkemba sésarai Áánútun-amankomba mayánááowe sirááiye.

¹⁶Vírípi nombá pétinkaronkaꞌa Ísóigo Ísuntavena ísámai nombá pétinkowana Áánútun-amamba íma marómba pósarai Pítaae Yóniye námúnaavinkemba sésarai

¹⁷tiyáámba tátoroyana Áánútun-amanko tirumpimbá kumúwasa mairáawe.

¹⁸aantá-kwaasirai tiyáámba tátoroyana Áánútun-amanko tirumpimbá kumbaúwasa máyómba Sáímoni awánéna asirayámbá meéyámbaranae séna Pítaante Yóninteyavena séna óntamba maékai

¹⁹minásíráyámbá simékaiyo. óꞌon-kwaasi siyáámba tátoraanana Áánútun-amanko tirumpimbá kumbaínkwáe súwana

²⁰Pítaa séna Áánútu úwoi kwétimin-tantaatavai óntandei meéyán-ónáe sénda po ená óntankwaraꞌa esé iravímbá ánásayaaoiye.

²¹Áánútu aúrankaꞌa ená imáyáa íma arupí imbá po maambáyáí kenkáísí mayáí íma súwaꞌnaa íníyone.

²²ená sáwí-imayaagomba ánaaemba umásuwe Ísóigomba áísaa inaná ená sáwí-imayaagona anondá mayauwáníye.

²³Áánútu íma asirayámbá ámakaintavai enarumbá sáwíꞌa umásinkaanana ená sáwí-imayaao anómba éna embá tátokaiye Pítaa súwana

²⁴Sáímonima Pítaante Yóninteyavena séna súwaꞌnaa ékai Ísóigomba námúnaavinkemba áísaa íyana emó sénda misáwí-yántááꞌá íma kempáꞌá tíno Sáímoni siráiye.

²⁵súwasarai Pítaae Yóniye Ísóigon-aai simátimesarai Ísuwe naaémáúyan-aimba simátimesarai Yérúsaremuvaꞌa kónáe sésarai aampaꞌá kweémesarai Sámériyaa-ayampaꞌa naaóꞌ-naoꞌa Áánútuna áséi-kwasai kosimátímaꞌmaesarai kurááiye. Vírípinte Ítíópiyaavaken-kwaasintei kwaasái.

²⁶mindárai Yérúsaremuvaꞌa kuyaná Vírípi Sámériyaavaꞌa máyomba moóráwai anón-kwaasi Ítíópiyaa-maravakewai éna Ítíópiyaa-kwaasiti kawáá-ínínkó áwíꞌa Káándásina óntankaꞌa kárákwirowai Áánútuna imáyáa éna Yérúsaremuvaꞌa kweémena Áánútu áwíꞌa mósá maréna koyauweréna kwená káárivimba anóm-poigo tavisímaena kún-kaarivimba kúmba Ísóigona kwayóꞌnáꞌá kwíyómpakewai Vírípintavena séna usásine Yérúsaremuvakemba Kásaavaꞌa kwégon-ampaꞌa kwaaó súwana iséna usásinena minámpáꞌá kweémena kavóná-maravaꞌa kúmba Ítíópiyaa-maravaken-anon-kwaasi kwená káárivimba kweémena aúváí-kwandaaivimba awánéna naaóváꞌá Áánútun-aai simátímakowai áwíꞌa Áísáya agaimakón-aimba awánómba

²⁹Áánútun-amanko Vírípintavena séna kwená káárigona egwaaꞌá kwaaó súwana

³⁰isaaísena kúmba Áísáya agaimakón-aimba táámpamai kwésuwana Vírípi iséna áísaa ena séna mináínkóná ááimba kwéisaano súwana

³¹áꞌa moóráwai simásiminimba póꞌa isánaumpo kesí káárivimba usáataao súwana Vírípi minkáárívímbá usáatena umaúwana

³²mináúváí-kwándááívínkén-áímbá táámpamai sénasipisípi áyáumo karánáesamo owanamó ímo kwááꞌo tintembá minkwáásígó íma aaí siráiye. sipisípi tuvuwónáesamo owanamó ímo kwááꞌo tintembá minkwáásígó íma aaí siráiye.

³³kwenáwíꞌa móruna tuwésa sáwíꞌa umái aaivimbá mayánkaraawe. kwená kwaási sáwí-mayai mairésa tuvuwówana marapáꞌá máyáin-kanaama ánásaraiye. mindáyavesa miwítí sáwí-mayai íma kanaán-umai avoraꞌá simátimenaaowe agaimaréna siráiye.

³⁴Ítíópiyaavaken-kwaasi mináímbá táámpamai simásuwena Vírípintavena áísaa ena séna Áánútun-aaimo simátímakowai nááwantavena mináímbá siráiyo. kwesávéna sirái. óꞌowantavena siráiyo súwana

³⁵Vírípi Áánútun-aaimo aúváívinkembo táámpamaimo simámakainten-umai Ísuna áséi-kwasai kwésimamena

³⁶aampaꞌá kuyambá nombá kwáyopaꞌa kwésarai uyaná Ítíópiyaavaken-kwaasigo séna nombá kwáyáínkaꞌa pésinkainkwae séꞌa únana nóinko aampimbá ítáraiyo súwana [

³⁷Vírípi séna Ísumpaꞌo arumbó amé kwenááiyavai áraire simáímo maínaꞌo éꞌa nombá pérankanaumne súwana Ísu Káráísintaveꞌa áraiꞌa Áánútu áánimban-iye kwésune séna]

³⁸káárimo maisoréna kúwaintavena séna káári tátoraao súwana iséna tátorowasarai Vírípiye Ítíópiyaavaken-kwaasiye nompímbá kumbésarai Vírípi nombá pérankowasarai

³⁹úwoivaꞌa íyúyana Áánútun-amanko Vírípimba kunáíꞌmaena kóúwana Ítíópiyaavaken-kwaasi awánómba íma máyombanivo aamoí untávaꞌa kwená naaópaꞌa kúmba

⁴⁰Áánútun-amanko Vírípimba kunáíꞌmaena Ásátóti-naopaꞌa máánkarowana Vírípi mináyámpáꞌ-náópaꞌa Áánútuna áséi-kwasai simátímaꞌmaena Sísáriyaa-naopaꞌa kuráiye.