Read Kosena aantá-kwaasi 9 Bible Online

aantá-kwaasi 9 - Kosena bible

aantá-kwaasi 9

¹minkánáámá Sóro Ísóigona aampaꞌá kwéguwaiyavena arumbá sáwíꞌa éna tínkamonae síma-simaꞌa kwéena aivaꞌ-mónó-káwáánákónópaꞌa

²koáísaa ena séna aúvái agaimái símínaꞌa maimaéꞌa Támásikasi-naopaꞌo Yútaa-monoꞌ-naumpimpaꞌo máyáan-kwaasiti anón-kwaasi mátíméno súwana owé séna mináímbá agaimaréna séna Sóro Ísuna aampaꞌá kwégwiyawai tivakáá-umai tuwánéna tátoꞌmai tíꞌmaena teémena Yérúsaremuvaꞌa ándávaꞌa mátiyuwaniye séna agaimaréna súwana

³Sóro mináúváí maimaéna kweémena Támásikasi-naopaꞌa egwaaꞌá kúmba kwíyómpakemba ságayamba tawáonkaan-tantaaꞌa tuwówana kuména aúgáyáagaya úwana

⁴tuvamúwana aaigówé suꞌmai séna Sóroo nóra séwa kembá sáwíꞌa kwéono súwana

⁵emá nááwa seénó súwana kemá Ísuma súmpo kembá sáwíꞌa umásinkaampo

⁶usásine Támásikasi-naopaꞌa koménana moóráwaimo síndantemba mirán-uwo súwasa

⁷Sóroemo kun-kwáásí íma aaí sumbá mésa íma kwaási aneꞌá kwéawanesa aaimó súne suꞌmai ísówana

⁸Sóro usásinomba aúramba íma kaweꞌá umái awánówasa kwaási ayáán-toꞌmaesa Támásikasi-naopaꞌa máánkarowana

⁹kaumbo-nóꞌwáámbá ména íma aúramba awánéna toómbá nombá íma naráiye.

¹⁰Sóro kaumbo-nóꞌwáámbá kwaúwana moóráwai Támásikasivaꞌa ména Ísuna aampaꞌá kúwai áwíꞌa Ánánáesima aúramba karákéna kaainkááníꞌa umái awánómba Ísóigo simámena séna Ánánáesiyo súwana wó séna Ísóigoo kemá úne súwana

¹¹usásine aampaꞌá kwaaó. minánkó áwíꞌa apumó uráin-ampaꞌa kuré Yútásina naaúmpaꞌa kwée moóráwai Táásási-naopakewai áwíꞌa Sóromba koawánaao. kwe námúnaa kwésiye.

¹²kaainkááníꞌa awánarainkaꞌa moóráwai áwíꞌa Ánánáesi téna aneꞌá tátoraisana aúramba kaweꞌá umái awánaraiye Ísóigo súwana

¹³Ánánáesi séna Ísóigoo sáwíva-kwaasi kwenáái simásímakaawe. Yérúsaremuvaꞌa ená kwaási sáwíꞌa umátínkarain-aimba simásímakaawe.

¹⁴aivaꞌ-mónó-káwáánákó aúvái agaimái ámísana ená imáyáa mósá máráan-kwaasi ándávaꞌo tiyuwáíndayavena Támásikasivaꞌa tiráiye súwana

¹⁵Ísóigo séna kesí mayáí áménana kesáái kosimátin-tasimatimba óꞌon-daopaken-kwaasiye kawáá-kwáásíyé kesí kwaási Ísareri-kwaasiye kosimátin-tasimatimba ínímba po usásine kwenópaꞌa kwinaná

¹⁶kesí mayáí Sóro kwémayainasa kwaási sáwíꞌa umánkanaaowe. mindáyaveꞌa ke agaráárankanaumne Ísóigo siráiye.

¹⁷súwana Ánánáesi iséna kwéna sún-daumpaꞌa uména Sóro aneꞌá ayáámba tátorena séna Sóroo kesí kwaásima óne. aampaꞌá kwéte Ísóigo Ísumba awánaraandawaima siꞌmáráísaꞌa túne. aúramba kaweꞌá umái awánenana Áánútun-amanko arupimbá anómba umánkaindayavena siꞌmáráísaꞌa túne súwana

¹⁸Sóro aúrampinkemba amanonoí tákúwana aúramba kaweꞌá umái awánéna usásinowana Ánánáesi monoꞌ-nómbá pérankowana

¹⁹toómbá násuwena áúgoma kaweꞌá úwana méraiye. Sóro Támásikasivaꞌa simátímakain-kwasai. Sóro Támásikasivaꞌa évakaꞌ-noꞌwaamba kwaéna Ísuna aampaꞌá kwéguwaise ména

²⁰avekáán-úwana monoꞌ-náúmpáꞌá uména Ísun-aai simátimena séna áraiꞌa Ísuma Áánútu áánimban-iye súwasa

²¹kwenáái ísón-kwaasi táátavai ésa moórá-morawai tísaaisaa esa sésa Yérúsaremuvaꞌa Ísuna imáyáa mósá máráan-kwaasi tínkamin-kwaasiman-iye. Ísuna imáyáa mósá máráan-kwaasi tíꞌmae ándávaꞌa mono-káwáá-kwáásíráꞌó mátinkanae séna maankáꞌó tiráin-kwaasiman-iye. Ísumpaꞌa téna máyáiye sésa táátavai uráawe.

²²suwaná Sóro asiramái simátímaꞌmae iyéna séna áraiꞌa Áánútumo usásinankaiwaimba amuꞌmaráúndawaiya Ísuman-iye séna kwenááigo iyúwasa Támásikasivaken-Yutaa-kwaasi isésa kwembá íma anondá simámakaawe.

²³íma anondá simámúmba sáwívaꞌ-noꞌwaamba kwaésa torupamái mésa Sórona ámááyu-aimba sésa

²⁴tuvuwíyanesa noꞌwáámba kwáyáꞌwái Támásikasi-naokona óntan-kurigona aaumémpaꞌa mésa ontaráꞌá takárákwi-karakwi kwéuwana moóráwai ámááyu-aimba sumbá kosimámuwasa

²⁵moórá-noꞌwaamba Sóron-aai isésa Ísuna aampaꞌá kwéguwai Sóromba powaivímbá áítumai óntan-kurigona avaapimbá túsúyuwesa ándára tátoresa túwówana kumeémena marapáꞌá móruna tuwéna kóuraiye. Sóro Yérúsaremuvaꞌa komérain-kwasai.

²⁶Sóro Yérúsaremu-naopaꞌa kweémena kwéna séna Ísuna aampaꞌá kwégowaise koménaeꞌa kúne súwasa miwí sésa Ísun-aai íma ísaraiwai kampar-áímbá kwésiye sésa kwenáároi inkáísúwana

²⁷moóráwai áwíꞌa Páánápáasi Sóron-aai iséna kaweꞌá úwana áíꞌmaena aantá-kwaasitopaꞌa kwéna Sóron-aai kosimátimena Sóro Támásikasi-ampaꞌo kwégwenamo Ísóigombo awánówana aaí simámakain-aimba simátimena Sóro Támásikasi-naopaꞌo Ísun-aaimo asiramáímo simátímaꞌmaena kuráin-aimba simátimuwasa

²⁸isésa áraire suwaná Sóro miwísé ména Ísuna asirayámbá kwáyowana Yérúsaremu-naopaꞌa Ísun-aai asiramái kosimátin-tasimatin-ena

²⁹óꞌon-Yutaa-kwaasi Kíríki-kwaasi tááivinkemba kwésen-kwaasi simátimuwasa aaí kwésima-kwesiman-esa tuvuwónáe sésa

³⁰ámááyu-aimba sumbá Ísuna aampaꞌá kuwáí isésa Sóromba áíꞌmaesa kweémesa Sísáriyaa-naopaꞌa máankesa sésa Táásási-naopaꞌa kwaaó sésa aiꞌmárówana mindáópaꞌa kóuraiye.

³¹kóúwasa Ísuna aampaꞌó kun-kwáásímó tínkamumba étínkówasa aánoumai kwempaꞌá maésa Yútiyaa-ayampaꞌa Káríri-ayampaꞌa Sámériyaa-ayampaꞌa Ísuna aampaꞌá kwéguwai aánoumai kwempaꞌá máyówana Áánútun-amankoma túwaꞌnaa úwasa asiramái mésa Ísun-aai simátímúwasa isésa áraire sésa mirá kwéesa sáwíva-kwaasi-iꞌa ésa Ísóigo áwíꞌa mósá marésa kwenaísamaivimba méraawe. Pítaa Árítaa-naopaꞌa kuráin-kwasai.

³²Pítaa aampaꞌá kwénaaena naaóꞌ-nao-kwaasiti naaópaꞌa kwéna Áánútuna kwaási tuwánáíndayavena Árítaa-naopaꞌa kúmba

³³moóráwai áwíꞌa Íniyasi ména aambó naaí íma naaéna avakaumboé-ima maisuwéna naaúmpare suꞌmai ména kwégwauwana

³⁴Pítaa awánéna séna Íniyasiyo Ísu Káráísiti asóvamankaivo usásinke ená kwandaaí arusaaó súwana usásinkwena kúwasa

³⁵Árítaa-naopaken-kwaasiye Séróno-naopaken-kwaasiye amápaꞌa awánésa Ísóigompaꞌa tésa méraawe. Pítaa Yópaa-naopaꞌa kuráin-kwasai.

³⁶Yópaa-naopaꞌa moórá-ininko ména áwíꞌa Tápítaama póna Kíríki-kwaasi tááivinkemba mináwíꞌa Tókáasiye kwésuwana kwemá Ísuna aampaꞌá kún-inimba aasiyaaí kaweꞌ-máyáí kwémaena óísamba íma makón-kwaasi kwétuwaꞌnaa úwana

³⁷áíꞌa úwana puwúwasa kwenáúma sese umásuwesa maimaésa ávúmayaatanaan-daumpaꞌa móankaraawe.

³⁸Yópaa-naopakemba Írítiyaa-naopaꞌa egwaaꞌá pósa Yópaavaken-kwaasi Ísuna kwaási Pítaa Írítiyaavaꞌa tamáyon-aimba isésa kae-kwáásí tiꞌmárówasarai Pítaamba kosimámesarai sésarai isaaisé kesópata tiyó sésa siꞌmáráawakai túye suyaná

³⁹Pítaa usásinena mindáraise kúwasa áíꞌmaesa minínímbá puwúwasa matuwé máyón-daumpaꞌa ávúmayaatanaan-daumpaꞌa íyúwasa Pítaanopaꞌa ketorínímbá tayorupamái maésa ívíꞌa tésa Tókáasi íma pukáinkaꞌa aru-símakain-unankwatoiye sésa agarááránkówana

⁴⁰awánéna séna máápa kárúwaaro súwasa kúmúwana Pítaa kívairena Ísóigompaꞌa námúnaa simásuwena mégwantena minínímbá awánéna séna Tápítaao usásinaao súwana aúramba kwégararena Pítaamba awánéna usátorauvaꞌa maúwana

⁴¹Pítaa kousásinankena Ísuna aampaꞌá kun-kwáásíyé ketoríníné tááyowasa áúvamankomba uawánésa

⁴²Yópaa-naopaꞌa kosimátímaꞌmaesa kuwasá isésa sáwíva-kwaasi Ísóigon-aaiyavesa áraire sésa kwenkáꞌá aráápamai máyówana

⁴³Pítaa Yópaa-naopaꞌa sáwívaꞌ-noꞌwaamba kwaéna moóráwai áwíꞌa Sáímoni kwená naaúmpaꞌa máyowana minkwáásígó kwaan-áúwarasinei kwená mayáí mayón-kwaasigona naaúmpaꞌa méraiye.