Read Kosena Árómáa 10 Bible Online

Árómáa 10 - Kosena bible

Árómáa 10

¹maanáímbó simátíménda ísáaro. kesí kwaási Yútaa-kwaasi sáwíꞌo umáímo máyáapinkemba Áánútu iyátinkanintavena ávááraumai sirááíma kwétaisaꞌa Áánútumpaꞌa áísaa úmaeꞌa kwéiyune.

²Yútaa-kwaasi Áánútuna mayáí mayánáe sésa karuwaaꞌá kwéombanivo Áánútun-aaigona ááimba íma ísaraamba tuwánaraumne.

³Áánútumo kwenaúrankaꞌo arupímo kwéumatinkain-amba íma awánésa kampar-ántávésa árair-amban-iye sésa pósa Áánútuna árair-amba íma kwégwaraawe.

⁴ámáámba kwaráúndayavena Áánútu kwenaúrankaꞌa arupí umásinkaniye sésa Yútaa-kwaasi kwáráan-amba Ísu Káráísiti séna minámbá ánásaivo kesááiyavesa áraire sewáíyávéna Áánútu kwenaúrankaꞌa arupí kwéumatinkaimbanivo Yútaa-kwaasi minámbá íma kwégwaraawe.

⁵Áánútu Mósesimbo simámakain-amaamba kwáráananaya Áánútu arupíya umásinkaniye kwésen-aintavena naaóváꞌá Mósesi agaimaréna sénaminámáámbó amápaꞌo kwaráíyawaikaweꞌá umái ménaaowe siráiye.

⁶Áánútun-aaiyavesa árairemo kwésewaimo arupí umátínkáin-aintavena agaimaréna sénamaarán-áímbá íma seró. nááwa kwíyómpaꞌa irénawa Káráísitimba áíꞌmaena kumíníyo.

⁷nááwa pukáan-kwaasi máyáapaꞌa kuréwa Káráísitimba áíꞌmaena tíníyo. mirán-áímbá íma seró.

⁸Áánútun-aai kentirumpimbá egwaaꞌá kwáyáísaꞌa kwésewe agaimaréna siráiye. Ísu Káráísitin-aaiyaveꞌa áraire seró-áímbá kwésimatimundayaawe.

⁹mináímbá maarán-áímbán-iye. Ísu kentáásí Ísóigoman-iye avoraꞌó simátimeꞌo kentirunkákémbó séꞌo Ísu pukáimpinkemba Áánútu usásinankaraiyemo síyanamo éna sáwíꞌo umáímo máyáampinkemba Áánútu iyátinkaniye.

¹⁰Áánútun-aaiyaveta kesirumpintá áraire kwésundaya kwenaúrankaꞌa arupíya kwéumasinkaintaawe. avoraꞌó mináímbó kwésimatimundaya sáwíꞌo umáíyaamo máyaundavinkenta kwéiyasinkaiye.

¹¹Áánútun-aai aúváívimba agaimaréna sénasiráintembo íníwaimpaꞌo agevamáímo ménaaowai íma tigaeyávésa ónááowe siráiye.

¹²mináímbá amápa-kwaasi Yútaa-kwaasiye óꞌonkaa-kwaasiye Áánútu aúrankaꞌa mimbóráíꞌa kwéontavena siráiye. Áánútu amáparawairaꞌa kárákwiraiwai éna súwaꞌnaa ínkwáe sésamo simámén-kwaasi anón-kaweꞌa kwéumatinkaiye.

¹³Áánútun-aai aúváívimba agaimaréna sénaÍsóigontavesa sésa sáwíꞌo umáímo máyaundavinkemba siráníyone kwésewai amáparawai mirá íníye agaimaréna siráiye.

¹⁴Áánútu íma máyáiye-aimbo sewáímó ombá súwaꞌnaa uwo íma kanaán-umai kwésewe. Áánútun-aaimo ímo ísáawaimo ombá mináíntávésa áraire íma kanaán-umai kwésewe. Áánútun-aaimo ímo kosimátíméwasamo ombá mináímbá íma kanaán-umai kwéisaawe.

¹⁵ímo tiꞌmárááwasamo ombá íma kanaán-umai kogwésimatimewe. Áánútun-aai aúváívimba agaimaréna sénaáséi-kwasaimo kosimátíméwaiaamoí kwéumatinkaawe agaimaréna siráiye.

¹⁶mináséí-kwásáí kwéisesamanivo évakarawai arááíraawe. mindáyavena naaóváꞌá Áánútun-aai simátímakowai áwíꞌa Áísáya agaimaréna sénaÍsóigo kawer-áímbá kosimátimunasayamináíntávésa íma áraire kwésewe agaimaréna siráiye.

¹⁷Ísu Káráísitin-aaimo simátíméwasamo isésamo ombá kanaán-umai áraire kwésewe.

¹⁸Yútaa-kwaasi Ísu Káráísitin-aai áraiꞌa áꞌa ísaraawe kwésune. mindáyavena naaóváꞌá Áánútun-aai aúváívimba agaimaréna sénaamápaꞌ-maravaꞌa kwénaaesa simátímúwanamináínkó kóyáwé uráiye agaimaréna siráiye.

¹⁹Yútaa-kwaasi Ísareri-kwaasi mináínkóná ááimba áꞌa ísaraamba mindá árair-aimban-iye. naaóváꞌá Mósesi Áánútumo siráin-aimba agaimaréna sénaYútaa-kwaasi óꞌonkaa-kwaasiyaveꞌa séꞌa úwoi-kwaasiman-owe siráamba miwíyávéꞌa kesí kwaásiman-owe sénaundayaveꞌa áwááꞌa kwétiyeꞌa tirunkó sáwíꞌa umátinkaniye Áánútu siráiye Mósesi agaimaréna sirówana

²⁰naaémba Áísáya íma ááꞌa kwégowana agaimaréna séna Áánútu sénanóra simáíya Áánútumpaꞌa ténaumno-aimba íma kwésewaitopaꞌa paáruraumne. Áánútumba agaráásínkáaro-aimba íma kwésewaitopaꞌa paáruraumne séna

²¹Ísareri-kwaasiyavena séna túwaꞌnaa ónaumne séꞌa kesópaꞌa teró símae kwéiyunasa kesáái araaisésa kembá tínaaemba kwéumasuwaawe Áánútu siráiye Áísáya agaimaréna siráiye.