Read Kosena Árómáa 12 Bible Online

Árómáa 12 - Kosena bible

Árómáa 12

¹kesí kwaásiyono. Áánútu ávááraumai arumbá umátínkáintaveꞌa maarán-áímbá asiramái simátimune. keinárawaꞌa kentúma Áánútumpaꞌa kwéameꞌa kwentávéꞌa imáyáa kwéeꞌa kwená mayáíyé suꞌmai kwémayaiyana aamoí umátinkaniye. mirámó éꞌo éꞌa kwená imáyáa áraiꞌa mósá maránááowe.

²marapá-kwáásímó sáwíꞌo kwéontemba íma mirá éꞌa Áánútu kwésin-aintaveꞌa owé síyana kentí imáyáa aúnáiꞌa umátinkainaꞌa aúná-kwaasiraamba umái ménaaowe. mirámó éꞌo éꞌa Áánútumbo arááímo kwétain-aimba iséꞌa Áánútumo aamoimó kwéin-aimba iséꞌa kaweꞌ-máyáí-áímbá iséꞌa kwená kasenku-ímáyáámó kwéimba isánááowe.

³Áánútu úwoi súwaꞌnaa uráintaveꞌa maarán-áímbá simátimune. kentúma íma maé iyéꞌa anón-kwaasiya úne íma seró. Áánútu túwaꞌnaa isaꞌá íma kwaásiti asirayánkáꞌán-ivo Áánútuna asirayánkáꞌá kwená mayáí kwémayaamba mindáyaveꞌa imáyáa éꞌa kentúma íma maé íyóro.

⁴kentúwawaaꞌa imáyáa oró. tíyayaanko kwená mayáí kwémayaisana moórá-mora-yantaako mirá kwéisata

⁵miráumai kesáá sáwíva-kwaasi méta Ísu Káráísitiyeya tarúmai mimbórá-kúwawaaꞌa maꞌmái máyaunanaya

⁶Áánútu úwoi súwaꞌnaa isatá moórá-morawaiya kentáásí mayáí mayánaundayavena Áánútu asirayámbá siménaya Áánútu asirayámbó timénamo kesáái simátímaꞌmae nááóromo siráinda árair-aimban-iye séꞌa mirán-oro.

⁷asirayámbó timénamo túwaꞌnaa orómó siráindawai mirán-oro. asirayámbó timénamo kesí aambó agaráátínkáaro siráindawai mirán-oro.

⁸asirayámbó timénamo asiramátínkáaro siráindawai mirán-oro. kentí náaindaambo taaímbaimo kwétimewai kaweꞌá kwéovo mirán-oro. kárákwiraawai kaweꞌá kwéovo mirán-oro. kaweꞌó kwéumatinkaawai aamoí kwéiyapakemba mirán-oro.

⁹moórá-morawaivimbo tirumbó kwétimemba íma kampaꞌá síyamba áraiꞌa tirumbá tíméro. sáwí-mayai tínaaemba umámeꞌa kaweꞌ-máyáí tátoraaro.

¹⁰Ísu Káráístina kwaási ontávéꞌa mimbórá-ákúnkááníꞌa éꞌa póꞌa moórá-morawaivimba tirumbá kwétimeꞌa moórá-morawai túwíꞌa mósá máráamba karuwaaꞌá éꞌa máéro.

¹¹Ísóigompaꞌa imáyáa kwéeꞌa íma tívón-káínaꞌa tiyáántán-kwimai Ísóigona mayáí karuwaaꞌá oró.

¹²Ísu Káráísitimo kumíníntaveꞌo amuꞌmaréꞌo máyáamba tirunkó aamoí ínana umbai-yántááꞌó kentópaꞌo kwáyáimba íma imáyáa éꞌa asiramái méꞌa Áánútumpaꞌa námúnaa símae iyéꞌa íma agándáaro.

¹³Áánútuna kwaási ímo toómbó makéwai túwaꞌnaa eꞌa namu-kwaasímó tíyaꞌo éꞌa toómbá naambá tíméro.

¹⁴sáwíꞌo umátínkáawaiyavaꞌa Áánútuntaveꞌa sáwíꞌa umátinkaao íma séꞌa kaweꞌá umátinkaao seró.

¹⁵aamoimó kwéowaise kegwáráꞌá aamoí oró. iviꞌó kwétaawaise kegwáráꞌá iviꞌá taaró.

¹⁶mimbórá-ímáyáá umái méꞌa anón-kwaasiya úne íma séꞌa moórá-morawai túwaꞌnaa eꞌa úwoi-mayaigwaraꞌa máyáaro. kesáváí-ímáyáámó ombá keyáá kawer-ímáyáágwárá-kwáásíyá úne íma seró.

¹⁷sáwíꞌo umátínkarewaꞌo éꞌa anondá íma mirá umátínkáaro. kwaási túrankaꞌa kaweré suꞌmai umái máéro.

¹⁸amáparawaivimba paru umái ménae séꞌa tiyáántán-kwimai miráumai máéro.

¹⁹sáwíꞌo umátinkaiyaꞌo éꞌa anondá íma mirá éꞌa méwana Áánútu anondá sáwí-meyamba timíníye. mindáyavena Áánútun-aai aúváívimba agaimaréna sénaÍsóigo séna sáwíꞌo íyawaina anondá-meyamba timénaunda mindá kendéímán-iye. sáwí-mayaiyaveꞌa meéyámbá timénaumne siráiye agaimaréna siráiye.

²⁰mináímbá imáyáa éꞌa maarán-oro. Áánútun-aai aúváívimba agaimaréna sénanamuro-kwáásímó tááimo kwétinkaimbo éꞌa toómbá tíméro. namuro-kwáásímó nontávénamo kwétinkaimbo éꞌa tíméro. mirámó íyasamo ésa sáwíꞌo umátínkáantavesa tigaemá íníye agaimaréna siráiye.

²¹sáwíꞌo kwéowaina ááimba íma usáyaaitanivo kentí kaweꞌ-máyáígó sáwí-mayaigomba usáyaaitaino.