Read Kosena Árómáa 14 Bible Online

Árómáa 14 - Kosena bible

Árómáa 14

¹maísáaro. Ísu Káráísitin-aaiyavesa áraire kwésesamo ímo asiramáímo kwégwaraawaiyaveꞌa íma tiyuwéꞌa keséya máéro séꞌa miwítí óꞌon-oꞌon-imayaayaveꞌa íma aaisambá simái taaínaaro.

²Ísu Káráísitin-aaiyavesa áraire kwésewaivinkemba évakarawai sésa amápa-tomba kwénaundaya kanaá kwéiye sewasá évakarawai Áánútuna aampaꞌó ímo asiramáímo kwégwaraawai sésa kígauvaken-tone suꞌmai néta póí-amaꞌa íya nánaumne sewasá

³amápa-tombo kwénaawai póí-amaꞌo ímo kwénaawaiyavesa íma simái sáwíꞌa umátínkáaro. kwenááiyavesa áraire kwésesa póí-amaꞌa kwénaawaiyavena Áánútu séna kesí kwaásiman-owe siráimba pósa kígauvaken-tone suꞌmai kwénaawai póí-amaꞌo kwénaawaiyavesa sáwíꞌa kwéowe íma seró.

⁴moóráwaina mayáí-kwáásígóntávéꞌa sáwíꞌa óne íma seró. íma keinárawaꞌnein-ivo kwená anón-kwaasigondei póna kweyááríkaꞌa séna kaweꞌ-máyáí maé sáwí-mayai maé kwéone kwená anón-kwaasigo kwésiye. Ísóigo kanaán-umai áwaꞌnaa ínímba póna kaweꞌ-máyáí kwémaena asiramái méniye.

⁵évakarawai moórá-mora-tawaiyavesa sésa anóm-bonoꞌo sií-táwain-ivo amápa-tawai úwoi-kanaaman-iye sewasá évakarawai sésa amápa-tawai mimbórá-táwairaaniꞌan-iye kwésewe. amáparawai imáyáa ésa moórá-aimbo arupí-aimbo sésamo ésa mináímbá mirán-oro. évakarawai moórá-aimbo arupí-aimbo sésamo ésa mináímbá mirán-oro.

⁶évakarawai Ísóigo áwíꞌa mósá maránáe sésa moórá-tawaiyavesa anón-tawaiman-iye sewasá évakarawai Ísóigo áwíꞌa mósá maránáe sésa toómbá Áánútunopaꞌa súwi simái kwénaawe. évakarawai Ísóigo áwíꞌa mósá maránáe sésa évaka-tontavesa íma nánaumne sésa kwénaan-tontavesa Áánútumpaꞌa súwi kwésewe.

⁷métaamo puwónaundayaawe íma kendéíyáánivo Áánútundein-iye.

⁸máyaundaya Ísóigontaveta imáyáa kwéeta máyaunda póta púwóndaya Ísóigontaveta imáyáa kwéeta puwónaumne. máyaundayaawe puwónaundayaawe Ísóigondei-ita kwéune.

⁹Ísu Káráísiti pukáan-kwaasirare úwoimo súvamaimo máyaunda-kwaasirataawe kárákwiyinintavena pukéna usásinkaiye.

¹⁰mindáyaveꞌa imáyáa éꞌa Ísu Káráisitina kwaási ontávéꞌa moórá-morawaiti mayáí awánéꞌa sáwí-mayaiman-iye íma séꞌa íma simái sáwíꞌa umátínkáaro. Áánútu amáparawai máyáawaina ááimba tísaa ínínkaꞌa Áánútu aúrankaꞌa amáparawaiya máyaundayavenaya póna sísaa íníntaveꞌa mindáyaveꞌa kwaásiti mayáígómbá íma simái sáwíꞌo oró.

¹¹mináíntávéna Áánútun-aai aúváívimba agaimaréna sénaÍsóigo séna máyaundayaveꞌa séꞌa kesúrankaꞌa amáparawai kívairesa kesí imáyáa mósá marésa avoraꞌá sésa áraiꞌa emá Áánútuma óne sénááowe Áánútu siráiye agaimaréna siráiye.

¹²miráumai minkánáámó tínímba Áánútu aúrankaꞌa amáparawaiya kesáámó máyaundawaina ááinta simámenaundayaawe. kentáásí mayáígóná aambá kawer-áné suꞌmai awánésa íma sáwí-amba kwaráígwáe siráin-kwasai.

¹³mindáyaveta imáyáa kwéeta moórá-morawaiti mayáí awánéta sáwí-mayaiman-iye íma séta maarán-ímáyáá éta kesí kwaási kesí mayáí awánésa sáwíꞌa ónáe seváínivo kaweré suꞌmai ónáe séta mirá ónaundayaawe.

¹⁴Ísóigo Ísuwe tarúmai máyaunda póꞌa maarán-áímbá árair-aimba iyé-áímbá ísaraumne. amápa-tomba kwáyáimba íma sáwíꞌa isasá náíyanamo éna íma sáwíꞌa umátinkanivo kampaꞌó sésamo naananá sáwíꞌa umásinkaniye sésamo náíyanamo éna sáwíꞌa umátinkaniye.

¹⁵évakarawaimo mintómbá íma nánaumnemo sen-tómbó náíyasamo ésa mináímbó sewáí tuwánésa mintómbó náíyantavesa sáwí-amba kwaránááowe. mirámó kwéomba sáwíꞌa éꞌa tirumbá íma kwétimewe. mirán-tómbó kwénaamba miwíyáváíyé séna Káráísiti pukáiwai tuwánésa sáwí-amba kwáráavo séꞌa kárákwiyoro.

¹⁶kawe-tántááꞌán-iye séꞌo kwéomba évakarawai tuwánésa simái sáwíꞌa umásínkáavo séꞌa kárákwiyoro.

¹⁷Áánútu kentááráꞌá kárákwiraimba mirám-baaran-tone noné naawasá íma naawasamó kwéomba ímanivo Áánútu kentááráꞌá kárákwiraimba maará kwéiye. kwenaúrankaꞌa arupí umái paru umái máyaunanaya Áánútun-amanko kwésuwaꞌnaa-isana sirunkóyá aamoí kwéiye.

¹⁸mirámó kwéomba Ísu Káráísitina mayáí kwémayaawana Áánútu aamoí kwéumatinkaisasa tuwánésa sésa kaweꞌá kwéowe kwésewe.

¹⁹mindáyaveta imáyáa éta paru umái méta moórá-morawai asirayámbá timénáe séta siyáántán-kwimaiya mayáíyá máyáano.

²⁰évakarawaimo kampaꞌó sésamo mintómbá naananayá sáwíꞌa umásinkaniye sewaꞌó ombá mintómbá nánáe séꞌo néꞌo ombá tuwánésa sáwí-amba kwáráavainivo kárákwiyoro. Áánútumo kentirumpimbó kwémayaim-bayaigomba sáwíꞌa iváínivo kárákwiyoro. amápa-tombo naambá mindá kanaán-ivo évaka-tombo kwénaambo tuwánésa sáwí-amba kwáráamba sáwíꞌa umátinkaamba mindá sáwíꞌan-iye.

²¹póí-amare ándá-aran-done óꞌon-oꞌon-tone kwénaundamo suwánésa sáwí-amba kwáráavo séꞌa miwíyávéꞌa imáyáa éꞌa mintómbó kwénaamba ivátiyuweꞌa mirámó ombá kaweꞌá kwéowe.

²²mintántáátávéꞌo imáyáamo kwéomba Áánútune suꞌmai simáméro. kentirumpinkén-ímáyáánéímó kwéomba íma sáwíꞌa kwéune kwésevo kentirunkó kaweꞌá iníꞌa kwéowe.

²³évaka-tontaveꞌa kaer-ímáyáá tokéꞌa nánaum. íya nánaumno kwésewai kentirumpinkén-ímáyáágó íma naaó kwésinaꞌo néꞌo éꞌa Áánútu aúrankaꞌa sáwíꞌa ónááowe. kentirumpinkén-ímáyáágó kaweꞌán-iye ímo kwésisasamo mirámó ombá sáwíꞌa kwéowe.