Read Kosena Árómáa 15 Bible Online

Árómáa 15 - Kosena bible

Árómáa 15

¹kesáá Áánútuna aampaꞌá asiramáíya kwégwaraundawaiya Áánútuna aampaꞌó ímo asiramáímo kwégwaraawai túwaꞌnaa ono. sirááímo tainíꞌo kwéundayaawe suꞌmai íma imáyáa éta

²kentáásí egwaaꞌó máyáawai Áánútuna aampaꞌá asirámae kónááontaveta miwíyáváígwáráꞌá imáyáa éta túwaꞌnaa ono.

³Ísu Káráísiti íma kwesáváí-ímáyáá éna kwaásiyavena imáyáa uráiye. mindáyavena naaóváꞌá Áánútun-aai aúváívimba agaimaréna séna Káráísiti Áánútuntavena sénasimái sáwíꞌo umánkaraawai pósa kembásáwíꞌa umásínkaraawe siráiye agaimaréna siráiye.

⁴naaóváꞌá Áánútun-aai aúváívimba agaimakáamba maarán-áíntávésa agaimakáawe. súwaꞌnaa ínanaya íma ááéma sívón-káínata Áánútun-aaiyaveta asiramái imáyáa kwéeta kwesé ménaundayaveta amuꞌmaréta máyaumne. mindáyavesa aúváíma agaimakáawe.

⁵íma tívón-káínaꞌa asiramái máéro séna Áánútu kwétuwaꞌnaa-iye. Ísu Káráísitimo máyáintemba miráumai méꞌa keinárawapimba mimbórá-ímáyáá oró séna Áánútu kwétuwaꞌnaa-isaꞌa

⁶póꞌa mimbórá-ímáyáá kwéeꞌa mimbórá-áímbá kwéseꞌa Áánútu áwíꞌa Ísóigo Ísu Káráísiti avowa áwíꞌa mósá máráamba mindáyaveꞌa námúnaa kwésune. Ísu Ísareri-kwaasiye óꞌonkaa-kwaasiye túwaꞌnaa uráin-kwasai.

⁷Ísu Káráísitimo keinárawatavenamo aamoí kwéintemba keinárawapimba moórá-morawaiyaveꞌa aamoí kwéeꞌa mirámó kwéowana Áánútu áwíꞌa anómba kwéiye.

⁸naaóváꞌá Áánútu Yútaa-kwaasiya síkwáꞌnáyavenaya simái asirámarowana Áánútumo siráintembo íníntavena minásíráyán-áímbó paárinintavena Ísu Káráísiti kumbéna Yútaa-kwaasi túwaꞌnaa úwasa

⁹óꞌonkaa-kwaasi sésa Áánútu arumbá umásínkáísata kwenáwíꞌa mósá maráúmne sénááontavena Ísu Káráísiti kunkáiye. mináíntávéna Áánútun-aai aúváívimba agaimaréna sénaóꞌonkaa-kwaasivimba máyaunda enáwíꞌa mósá maréꞌa monor-ímó kwésunda enáwíꞌa mósá kwémaraumne agaimaréna súwana

¹⁰moórávaꞌa agaimaréna sénaóꞌonkaa-kwaasiyono. Áánútumo ítámakaiwaiye tirunkógwáráꞌá aamoí íno agaimaréna súwana

¹¹moórávaꞌa agaimaréna sénaóꞌonkaa-kwaasiyono. Ísóigo áwíꞌa mósá máráaro. amáparawaise kwenáwíꞌa mósá máráaro agaimaréna súwana

¹²Áánútun-aai simátímakowai áwíꞌa Áísáya agaimaréna sénaTévíti avowa áwíꞌa Yési kwenándárakemba moóráwai paárínana óꞌonkaa-kwaasiraꞌo kárákwiyinintavena Áánútu usásinankainasa kwembá amuꞌmarésa ménaaowe agaimaréna Ísu Káráísitintavena siráiye.

¹³kwesé ménaaomba amuꞌmaréꞌa máéro séna Áánútu kwétuwaꞌnaa-iye. kwesé aráápamai máyáantavena paru umátinkena tirumbá kaweꞌá umátínkáísana kwenamankó asiramátínkávaꞌa kwéiyisaꞌa kwesémó ménaaomba amuꞌmaréꞌa máyáamba mindáyaveꞌa námúnaa kwésune. Áánútuna mayáí kwémayaundayavai aamoí kwéune siráin-kwasai.

¹⁴kesí kwaásiyono. imáyáamo kwéunda-aimbo simátíménda ísáaro. kawe-kwáásí-úramba póꞌa kawer-ámbó kwégwaraan-aimba amápaꞌa iséꞌa kanaán-umai kwéagaraatinkaawe. keinárawataveꞌa mirán-ímáyáá kwéune.

¹⁵maanáúváívímbá évakar-aimba asiramái simátimunda mináímbá imáyáa ónááontavena íma sááꞌa kwégaisaꞌa súne. óꞌonkaa-kwaasivimba Ísu Káráísitina mayáí mayánaundayavena Áánútu siꞌmákaimba póna íma sááꞌa kwégaisaꞌa asiramái maanáúváívímbá simátimune. Áánútuntaveꞌa séꞌa maanóꞌónkáá-kwáásí ená kwaási owaná enamankó ená kwaási-iꞌa umátínkaraiye senaná Áánútu aamoí íníntaveꞌa kenáái áséi-kwasai kwésimatimune.

¹⁷Ísu Káráísitiye tarúmai méꞌa Áánútuna mayáí kwémayaundayaveꞌa aamoí kwéune.

¹⁸Ísu Káráísiti asirayán-ímáyáá símísaꞌa óꞌonkaa-kwaasi Áánútun-aaiyavesa áraire sénááontaveꞌa mayáí miwívímbá mairáunda mináímbá íma sááꞌa káínaꞌa póꞌa simátíménda ísáaro. aaí kwésimatimeꞌa mayáí kwémayaunda

¹⁹Áánútun-amanko asirayámbá kwésimisaꞌa óꞌon-oꞌom-bayai ímo awánaraam-bayai maimaéꞌa kuráumne. Yérúsaremu-naopakemba óꞌon-oꞌon-daopaꞌa kwénaaeꞌa Káráísitin-aai áséi-kwasai simátímaꞌmaeꞌa iyéꞌa Írírikamu-maravaꞌa kuráumne.

²⁰kemá séꞌa naaóꞌ-naoꞌa Ísu Káráísitin-aaimo ímo ísaraan-daopaꞌa áséi-kwasai kosimátimenae. kosimátímakaan-kwaasivimba íma kosimátimenaumpo óꞌon-daopimpaꞌa kosimátímaꞌmaeꞌa naaónaumne séꞌa mináséí-kwásáí ímo ísaraan-kwaasivimba kosimátímakaumne.

²¹naaóváꞌá Áánútun-aai aúváívimba mirán-áímbá agaimaréna sénaímo simátíméwasamo ísaraawai naaémba Áánútuna aambá awánanaaowe. ímo ísaraawai naaémbaÁánútun-aai isánááowe agaimaréna siráimba póꞌa Ísu Káráísitin-aaimo ímo ísaraan-kwaasivimba kosimátímakaumne. Árómáa-naopaꞌa kónáe siráin-kwasai.

²²ímo ísaraan-kwaasi áséi-kwasai kwésimatimundaraꞌa kentópaꞌa kónáe séꞌa úmae iyúnda simátimunda-mayaigo sáwívakaꞌa kembá tátokaiye.

²³kentópaꞌa kónáe séꞌa úmae iyúnda sáwívar-ima maisuwéꞌa íma kanaán-umai kwégundayaveꞌa ívéꞌa maandáópímpáꞌá kesí mayáí ánásasuweꞌa

²⁴kentópaꞌa kónáe-imayaa kwéune. Sépéni-maravare séꞌa kwégweꞌa kentí naaópaꞌa kotuwánéꞌa komáyáanaꞌa súwaꞌnaa íyaꞌa Sépéni-maravaꞌa kónaumne.

²⁵aivaꞌá Yérúsaremu-naopaꞌa Áánútuna kwaási kotúwaꞌnaa ónaumne.

²⁶Áánútuna kwaási Másétóniyaa-maravakewaiye Ákáyaa-maravakewaiye sésa ayawaí taisasá Áánútuna kwaási Yérúsaremu-naopakewai toómbá íma makáawai túwaꞌnaa ónáe sésa miwítí óntamba torupámakaamba pósa simíyaꞌa maimaéꞌa Yérúsaremuvaꞌa kwéꞌa mátimenaumne.

²⁷miwítí imáyáavinkembo mirámó kwéomba mindá kaweꞌán-iye. Yútaa-kwaasi óꞌonkaa-kwaasi Ísu Káráísitin-aai kosimátímakaamba pósa imáyáa ésa miwítí óntamba Yútaa-kwaasi toómbá íma makáawai kwétimemba mindá kaweꞌá kwéovo mirán-oro.

²⁸torupámakaan-ontamba maimaéꞌa kweémeꞌa amáparawai mátímatuweꞌa Sépéni-maravare séꞌa kwégweꞌa kentí naaóꞌa kóméꞌa minkákémbá Sépéni-maravaꞌa koónaumne.

²⁹kentí naaópaꞌa komáyáanana Ísu Káráísiti ávááraumai kaweꞌá umátinkaniye-imayaa kwéune.

³⁰kesí kwaásiyono. kentáásí Ísóigo Ísu Káráísitintaveꞌa imáyáa éꞌa Áánútun-amanko arumbá kwéumasinkaintaveꞌa imáyáa éꞌa asiramái simátimeꞌa séꞌa Áánútumpaꞌa námúnaa kwésumpo keinárawakwaraꞌa súwaꞌnaa umai asiramái námúnaa seró kwésune.

³¹Yérúsaremu-naopaꞌa kónaunda Yútiyaa-ayampaken-Yutaa-kwaasi Ísu Káráísitin-aaiyavesa íma áraire kwésewai sínkamovo séꞌa súwaꞌnaa umai námúnaa seró. miváꞌá Áánútuna kwaási máyáawai túwaꞌnaa on-óntántávésa aamoí ónááontaveꞌa námúnaa seró.

³²mimbáyáí ánásasuwaanana Áánútumo owémó sínaꞌo éꞌa aamoí éꞌa kentópaꞌa kweémeꞌa kotuwánéꞌa aúnáiꞌa umái ménaumne.

³³Áánútu paru kwéumasinkaiwaiya keinárawate máyáiye séꞌa námúnaa kwésunda árair-aimban-iye.