Read Kosena Árómáa 2 Bible Online

Árómáa 2 - Kosena bible

Árómáa 2

¹évakarawai tuwánésa sésa sáwíꞌo kwéowai sáwí-meyamba mayánááowe kwésewai simátíménda ísáaro. mirámó kwésemba keinárawakwaraꞌa mirá-sáwíꞌá kwéomba póna aaivimbá maitinkáínaꞌa sáwí-meyamba mayánááowe.

²mirá-sáwíꞌó kwéowai Áánútu aaivimbá maitinkéna sáwí-meyamba tímímba kwemó arupí umáímo mirámó kwéin-ainta ísaraumne.

³évakarawai tuwánéꞌa séꞌa sáwíꞌo kwéowai sáwí-meyamba mayánááowe kwésemba mirá-sáwíꞌá kwéomba póꞌa Áánútu aaivimbá íma maisinkéna sáwí-meyamba simíníye íma seró.

⁴sáwíꞌa kwéowana Áánútu arumbá umátinkena íma ááéma sáwí-meyamba tiména timuꞌmaréna máyáiye. mindáyaveꞌa úwoisan-tantaaꞌan-iye íma seró. sáwíꞌo kwéomba tuwéꞌa Áánútumpaꞌa ténááontavena arumbá umátinkena timuꞌmaréna máyáiye.

⁵ánivo kemá tirunté maréꞌa sáwíꞌo kwéomba íma tuwéꞌa Áánútumpaꞌa íma kwétewe. mirá-sáwíꞌá úmae kwéiyontavena Áánútumo áwááꞌo sénamo arupí-sawi-meyambo timínín-kanaa tínana Áánútu ávááraumai sáwí-meyamba timínana anómba íníye.

⁶minkánáá tínana amáparawai miwítí mayáíyávéna kaweꞌ-méyáné sáwí-meyane anondá timíníye.

⁷kaweꞌá úmae kwéiyesa sésa Áánútu kentáá súwíꞌa mósá maréna ságamasinkenaya maíꞌmaiꞌo ónaunda-ita umásinkaniye kwésewai Áánútu aúnáiꞌa umái maíꞌmaiꞌa ónááoniꞌa umátinkaniye.

⁸kesáyáváíyé suꞌmai imáyáa ésa kawer-áímbá tínaaemba umámesa sáwí-aimba kwégwaraawai Áánútu ávááraumai áwááꞌa tiyéna sáwí-meyamba timíníye.

⁹sáwíꞌo kwéowai Áánútu tíꞌa índaiꞌa umátinkena umbai-yántááꞌá tiména Yútaa-kwaasiye óꞌonkaa-kwaasiye mirá éna

¹⁰kaweꞌó kwéowai Áánútu ságamatinkena túwíꞌa mósá maréna paru umátinkena Yútaa-kwaasiye óꞌonkaa-kwaasiye mirá éna

¹¹íma taaínkaar-umai-meyamba timínívo arupí umai-meyamba timíníye.

¹²óꞌonkaa-kwaasi Áánútu naaóváꞌó Mósesimbo simámakain-amaamba íma isésa sáwíꞌa kwéontavena máyáawaina ááimba Áánútuna némpaꞌa maíꞌmaiꞌa ónááowe. Yútaa-kwaasi Áánútu Mósesimbo simámakain-amaamba isésa arááíséntavena Áánútu minámáánkóná ááinkwaraꞌa aaivimbá maitinkáníye.

¹³Áánútu Mósesimbo simámakain-amaamba isésa ímo kwaráíyanamo éna Áánútu arupí umái máyáawe íma síníye.

¹⁴Áánútu óꞌonkaa-kwaasi kwená ámáámba íma simátímakowasa miwítí imáyáavinkembo minámáámbó kwarésamo ombá minámáámbá ísaraan-kwaasiraamba kwéowe.

¹⁵mirámó kwéomba Áánútuna ámáámba miwítí imáyáavimba kwáyáísasaraamba máyáawana tirumpimbá aaí kwéna kaweꞌó ontávéna mináínkó séna kaweꞌá kwéowe séna sáwíꞌo ontávéna sáwíꞌa kwéowe kwésiye.

¹⁶moórá-kanaamo tínanamo éna Áánútu Ísu Káráísitintavena sínana kwemá kwaásiti imáyáa aúpár-ímáyáá taaímbarena aaivimbá maitinkáníye. áséi-kwasaimo kwésimatimunda mináínkwáráꞌá kwésimatimune. Yútaa-kwaasi Áánútuna ámáámba tokáundaya póna kwésuwaꞌnaa-iye siráan-kwasai.

¹⁷Yútaa-kwaasiya úne kwésewai ísáaro. Áánútu Mósesimbo simámakain-amaamba ísaraundaya póta kaweꞌá umáíya máyaundaya Áánútuna kwaásiya úne séꞌa kentúma mósá kwémaraawe.

¹⁸minámáámbá ísaraantaveꞌa Áánútumbo arááímo tainíꞌo kwéon-aimba iséꞌa kaweꞌó kwéon-tantaare sáwíꞌo kwéon-tantaare kanaán-umai taaímbareꞌa

¹⁹asiramái séꞌa kawer-ámbó ímo awánaraan-kwaasi kanaán-umai agaráátinketa túnkain-ayampaꞌo máyáan-kwaasi kanaán-umai sáma kwégamatinketa

²⁰tááꞌa íma ísáan-kwaasi kwéagaraatinketa iyámpóíraaniꞌa on-kwáásí kwéagaraatinkaundayaawe kwésewe. Áánútu Mósesimbo simámakain-amaamba ísaraantaveꞌa imáyáa éꞌa séꞌa amápar-aimba iséta árair-ainta kwésune-imayaa kwéeꞌa póꞌa mirán-áímbá kwésewe.

²¹évakarawaimo kwéagaraatinkaamba keinárawakwaraꞌa mináímbá kwáráaro. umóyámbá íma orómó kwésemba keinárawakwaraꞌa íma mirán-oro.

²²aarai-úmóyáné kwaai-úmóyáné íma orómó kwésemba keinárawakwaraꞌa íma mirán-oro. kampar-ísóígó sáwí-yantaaꞌa iyémó kwésemba keinárawakwaraꞌa sáwíꞌa kwéeꞌa minkámpár-ísóígóná naaúmpaꞌa sáwíꞌa kwéomba mindá iváꞌá túwáaro.

²³Áánútu Mósesimbo simámakain-amaanta ísaraumne séꞌa kentúma mósá kwémaraambanivo minámáámbá araaiséꞌa sáwíꞌa ombá kwaási tuwánésa sésa Áánútu áwíꞌa sáwíꞌa kwéumankaawe kwésewe.

²⁴mindáyavena naaóváꞌá Áánútun-aai aúváívimba agaimaréna sénaYútaa-kwaasi sáwíꞌa kwéontavesa óꞌonkaa-kwaasituwánésa Áánútumba simái sáwíꞌa kwéumankaawe agaimaréna siráiye.

²⁵Yútaa-kwaasi ontávéꞌa túraꞌa kárámai araaꞌéna kwéeꞌa séꞌa Áánútuna kwaásiya úne kwésewai Áánútu Mósesimbo simámakain-amaamba kwáráamba Yútaa-kwaasi ombá mindá kaweꞌá kwéumatinkaivo minámáámbá íma kwáráamba Yútaa-kwaasi éꞌa túraꞌa kárámai araaꞌéna uráamba mindá íma kaweꞌá umátinkaisaꞌa úwoi-kwaasiraamban-owe.

²⁶óꞌonkaa-kwaasi íma túraꞌa kárámai araaꞌéna kwéowai Áánútu Mósesimbo simámakain-amaamba kwárááwanamo imbá Áánútu séna Yútaa-kwaasiraamba éꞌa túraꞌa kárámai araaꞌéna kwéowairaamba éꞌa kesí kwaásiraamban-owe kwésiye.

²⁷Áánútu Mósesimbo simámakain-amaamba agaimarówaꞌa Yútaa-kwaasi iséꞌa túraꞌa kárámai araaꞌéna uráambanivo minámáámbá arááíraamba pósa óꞌonkaa-kwaasi íma túraꞌa kárámai araaꞌéna kwéowai minámáámbá kwégwaraawaimo ésa aaivimbá maitinkánááowe.

²⁸túraꞌa kárámai araaꞌéna kwéowai mindáyavenawe suꞌmai íma Yútaa-kwaasi Áánútuna kwaási-uramban-ovo Áánútun-amanko miwítí sáwí-imayaa maitíyukaiwai Yútaa-kwaasi Áánútuna kwaási-uramban-owe. agaimakáin-amaanko íma mirá kwéumatinkaivo Áánútun-amanko mirá kwéumatinkaiye. mirámó kwéon-kwaasiyavesa óꞌon-kwaasi íma aamoí kwéumatinkaavo Áánútuwe suꞌmai aamoí kwéumatinkaiye.