Read Kosena Árómáa 3 Bible Online

Árómáa 3 - Kosena bible

Árómáa 3

¹ímo óꞌonkaavimban-ivo Yútaa-kwaasivimba nóran-kawe-tantaara paáruraiyo. túmo kárámaimo araaꞌénamo uráamba mindá nóran-kawe-tantaara paáruraiyo sembó

²sísaa íyaꞌo éꞌa anondá séꞌa kawe-tántááꞌá paáréna aivaꞌá Yútaa-kwaasi Áánútun-aaimo tátoranaaontavena simátímakaiye sénaumne.

³simátímakaimbanivo évakarawai Áánútuntavesa íma imáyáa ésa kwenáái íma kwétaagwiyavowe. mirá kwéovo Áánútu íma mirá éna kwemó siráintemba kwéena simái asirámakainiꞌa kwéiye.

⁴kwaási kampar-áímbá kwésevo Áánútu árair-aine suꞌmai kwésiye. Áánútuntavena simái aúváí-kwandaaivimba agaimaréna sénaenááigo árair-aine suꞌmai isasá kwaásiísaraawe. íma kanaán-umai aaivimbá mayankánááovo enááigo amápa-kwaasitáái kwéusayaaitaiye agaimaréna siráiye.

⁵kesáámó sáwítaamo úndavinkemba Áánútuna kaweꞌ-máyáí avoraꞌá kwégwaintaveta sáwíta kwéunanaya Áánútu sáwí-meyamba símímba sáwíꞌa kwéiyeya íma seno. mirán-áímbá kwaásiti imáyáavinkemban-ivo íma miráyá seno.

⁶Áánútumo ímo arupí umáímo ménaraankasi naaémba amáparawaimo máyáawaina ááintavena íma tísaa isinó.

⁷moórá-aimba ísáaro. kesáámó kampar-áímbó súndavinkemba Áánútuna árair-aimba avoraꞌá paárisana kwenáwíꞌa mósá anómba kwéiyintaveta kesáámó sáwíꞌo kwéundayavenaya Áánútu aaivimbá maisínkáimba sáwíꞌa kwéiyeya íma seno.

⁸mirán-kámpár-áímbó kwésemba mimpínkémbá sésa kesáámó sáwíꞌo kwéundaya mimpínkémbá kawe-tántááꞌá paárínana Áánútu áwíꞌa iyíníye íma mirán-áímbá seró. évakarawai kesúwíꞌa sáwíꞌa umásinkanaaontavesa kentávésa kampaꞌá sésa mirán-áímbá kwésiye kwésevo Áánútu miwí aaivimbá maitinkéna arupí umái sáwí-meyamba timíníye. amáparawai íma arupí umái máyáan-kwasai.

⁹kemá Póro mináímbá imáyáa éꞌa séꞌa Áánútu aúrankaꞌa íma maarán-iye. Yútaa-kwaasiya kawe-kwáásíyá únasaya óꞌonkaa-kwaasi sáwí-kwaasi owémá íma mirán-ivo kéꞌnaan-aimba séꞌa sáwí-imayaago amáparawai tátokaiye kwésune.

¹⁰mindáyavena Áánútun-aai aúváívimba agaimaréna sénaÁánútu aúrankaꞌa amáparawai íma arupí umái máyáawe.

¹¹ánivo amáparawai arupí ií-yántááꞌá íma kaweꞌá umái kwéawanesa Áánútuwe maénáe íma kwésewe.

¹²amáparawai Áánútumba tínaaemba umámesa sáwí-amba kwarésa kaéꞌnáeꞌa ésa íma kaweꞌá kwéowe.

¹³kwaásimo puꞌmáímo kaviraantembá miwí tááigo mirá kwéisasa kampaꞌá kwésimatiyuwaawana miwí tááigo kwaaivainkómó kwaásimo vaintembá kwéisasa

¹⁴anómba simái sáwíꞌa umátinkesa

¹⁵ááéma tínkamowasa púwówai mésa

¹⁶kwénaaopaꞌa tíꞌa úniꞌa umái umbai-yántááꞌá timésa

¹⁷íma paru umátinkesa

¹⁸Áánútu áároi íma inkaisésa ivátuwesa máyáawe agaimaréna siráiye.

¹⁹Áánútu amápaꞌ-maravaken-kwaasiyavena ámáámba séna mináímbá kwáráaro siráimbanivo araaiséta amáparawaiya Áánútu aúrankaꞌa sáwíꞌa éta súnda arupí umáíya máyaumneya íma áraiꞌa kwésune.

²⁰Áánútumo siráin-amaamba kwáyáísata amáparawaiya íma áraiꞌa séta amápar-amaamba kwégwaraundaya póna Áánútu kentááyávéna séna arupí umái máyáawe síníye sénaundaya kampar-áímbá sénaundayaawe. ámáámba kwéiseta sáwíꞌa uráumneya kwésundayaawe. Ísun-aaiyavai áraire sewáí Áánútu arupí umátínkáin-kwasai.

²¹Áánútu aúná-amba agaráásinkenaya Áánútu aúrankaꞌo kwaásimo arupí kwéumatinkain-amba agaráásinkenaya kwemó siráin-amaamba íma imáyáa éna minámbá agaráásínkaraiye. mináíntávésa naaóváꞌá Mósesiye Áánútun-aai simátímakowaiye minámbá paáriniye-aimba simátimesa agaimakáawe.

²²kwaási Ísu Káráísitavesa sésa áraiꞌa kentáásí sáwí-imayaavinkemba iyásínkaraiye kwésewana miwíyávéna Áánútu séna arupí umái máyáawe kwésiye. Ísu Káráísitin-aaiyavesa áraire sésa kwenkáꞌá agevamái máyáawai Áánútu arupí kwéumatinkaimba mimbórá-ámbá kwáyáiye.

²³amáparawai sáwíꞌa ésa Áánútumbo arááímo kwétainiꞌo umáímo ménaesamo ombá ívéꞌa íma miráumai máyáawana póna

²⁴Áánútu úwoi túwaꞌnaa ena arumbá umátínkáísana Ísu Káráísiti miwítí sáwí-imayaagomo tátokaimpinkembo iyátinkena Áánútu aúrankaꞌa arupí umátinkanintavena pukáiye.

²⁵Áánútu séna sáwíꞌo kwéom-beyamba maitiyuwáníntavena Ísu Káráísiti puwínana kwená naaemá kumíníye siráimba mináíntávéta séta áraiꞌa mirá kwéiye kwésundayavenaya kentáásí sáwí-meyamba kwémaisiyuwaiye. ááémo sáwíꞌo uráamba Áánútu íma ááéma sáwí-meyamba tiména kwemá arupí kwéimba awánanaaontavena séna naaémba Ísu Káráísiti puwéna miwítí sáwí-meyamba maitiyuwáníye siráiye.

²⁶ívéꞌa Áánútu arupí kwéimba awánanaaontavena kwaásimo sáwíꞌo kwéontavena imáyáa éna maará kwéiye. Ísu Káráísiti miwítí sáwí-meyamba kwémaitiyuwain-aintavesa áraire kwésewai Áánútu kwenaúrankaꞌa arupí kwéumatinkaiye.

²⁷miráumai kesúya maé iyónaundaya kentáávímbá íma kwáyáiye. kentáásí kaweꞌ-máyáíyávéna ímanivo Ísu Káráísitin-aaiyaveta áraire súndayavena mindáwe suꞌmaiyavena Áánútu kwenaúrankaꞌa arupí kwéumasinkaintaawe. miráumai kesúya maé iyónaundaya kentáávímbá íma kwáyáiye.

²⁸simátimunda árair-aimban-iye. Áánútuna ámáánta kwégwaraundayavenaya ímanivo kwenááiyaveta áraire súndayavenaya Áánútu kwenaúrankaꞌa arupí kwéumasinkaintaawe.

²⁹íma Yútaa-kwaasiye suꞌmainovo óꞌonkaa-kwaasigwaraꞌa túwaꞌnaa íníntavena Áánútu máyáiye.

³⁰mimbóráwáí Áánútu ména Yútaa-kwaasiya kwenaúrankaꞌa arupí umásinkenaya óꞌonkaa-kwaasigwaraꞌa mirá kwéumatinkaiye.

³¹kwenááiyaveta áraire séta kwenkáꞌá agevamái máyaundayavenaya Áánútu arupí kwéumasinkaisata miráumai Áánútuna ámáámba íma tuwéta minámáánkóná ááimba awánéta kwégwaraumne.