Read Kosena Árómáa 4 Bible Online

Árómáa 4 - Kosena bible

Árómáa 4

¹Ááváramu Yútaa-kwaasiya síkwáꞌnáma kwenááimo simátíménda ísáaro.

²Áánútun-aai aúváívimba agaimaréna sénaÁáváramu Áánútun-aaiyavena áraire siróntavenaÁánútu séna arupí umái máyaane siráiye agaimaréna siráiye. Ááváramuna kaweꞌ-máyáíyávénamo Áánútumo sénamo arupí umái máyaane siráinkakai Ááváramumo kwená mayáíyávénamo áúma maéna iyúmba kwáísino. Ááváramu Áánútun-aaiyavena áraire siróntavena Áánútu séna arupí umái máyáane siráimba mindáyavena Áánútu aúrankaꞌa Ááváramu áúma maéna iyúmba íma kwáyombaniye.

⁴moórá-aimba ísáaro. moóráwaina mayáí kwémayaawana meéyámbó kwétimimba íma úwoi kwétimivo miwítí mayáí awánéna meéyámbá kwétimiye.

⁵maarán-áímbá árair-aimban-iye. kaweꞌ-máyáí kwémayaundayavena arupí umái máyáawe-aimba Áánútu íma kwésivo Áánútun-aaiyaveta áraire kwésundayavenaya Áánútu séna arupí umái máyáawe kwésiye. sáwíꞌo uráundayaamo arupí kwéumasinkainta Áánútuman-iye.

⁶Áánútu kaweꞌ-máyáímó mairáantavena íma imáyáa éna Áánútun-aaiyavesa áraire siráantavena imáyáa éna arupí umátínkáiwai miwí tirunkó kaweꞌá kwéiye. mináíntávéna naaóváꞌá Tévíti aúváívimba agaimaréna séna

⁷Áánútu sáwíꞌo uráawaiti sáwí-imayaa maitiyuwéna íma imáyáa úmae íyísana tirunkó kaweꞌá kwéiye.

⁸sáwíꞌo uráawai Áánútu íma imáyáa úmae íyísana tirunkó kaweꞌá kwéiye agaimaréna siráiye.

⁹mináímbá túraꞌo kárámaimo araaꞌénamo uráawai Yútaa-kwaasiyavenawe suꞌmai íma séna ímo túraꞌo kárámaimo araaꞌénamo uráawaiyavenagwaraꞌa Tévíti séna miwítí sáwí-imayaagwaraꞌa maitiyúwáísana tirunkó kaweꞌá kwéiye-aimba siráiye. óꞌomba mináímbá séꞌa Áánútun-aai aúváívimba agaimaréna sénaÁáváramu Áánútun-aaiyavena áraire siróntavena Áánútu séna arupí umái máyaane siráiye agaimaréna siráiye.

¹⁰Ááváramu áúraꞌa íma kárámai araaꞌéna urónkaꞌa Áánútu kwentávéna séna arupí umái máyaane séna

¹¹Áánútun-aaiyavena áraire siróntavena arupí umái máyaandawai ómpo enáúraꞌa kárámai araaꞌéna uwó súwana mirá uráiye. miráumai túraꞌo ímo kárámaimo araaꞌénamo uráawaigwaraꞌa Áánútun-aaiyavesa áraire kwésentavena Áánútu séna arupí umái máyáawe kwésiye. miwí Ááváramumo mirámó siráintemba Áánútun-aaiyavesa áraire kwésesa pósa Ááváramuntavesa kentáá síkwáꞌnáraamban-iye kwésewe.

¹²súraꞌo kárámaimo araaꞌénamo kwéundawaiya kwemá kentáá síkwáꞌnáma iyéyá kwésune. súraꞌo kárámaimo araaꞌénamo kwéundayavetaawe suꞌmai ímanivo Ááváramumo mirámó siráintemba Áánútun-aaiyaveta áraire kwésundayavetaawe Ááváramuntaveta kentáá síkwáꞌnáma iyéyá kwésune. Ááváramu áúraꞌo ímo kárámaimo araaꞌénamo urónkaꞌa Áánútun-aaiyavena áraire séna máyomba póna Yútaa-kwaasiye óꞌonkaa-kwaasiye Áánútun-aaiyavesa áraire kwésewai tíkwáꞌnáman-iye. Áánútun-aaiyavai áraire sewáí Áánútu simái asirámakaimba timínín-kwasai.

¹³naaóváꞌá Áánútu Ááváramuntavena simái asirámakon-aimba séna ewé enaísaavutantamba ónááowaiye amápaꞌ-marama kentí maramá kwáyáiye siráiye. Ááváramu Áánútuna ámáámba kwakóntavena ímanivo kwenááiyavena áraire súwana Áánútu séna arupí umái máyaane súntavena Áánútu Ááváramuntavena simái asirámakon-aimba siráiye.

¹⁴Áánútu simái asirámakon-aimba Mósesimbo simámakain-amaambo kwégwaraawaiyavena íma siráivo Áánútun-aaiyavesa áraire kwésewaiyavena siráiye. mirámó ímo uráinkakai Áánútun-aaiyavesa áraire kwésewai úwoiyavesa sesinó. Áánútu simái asirámakaimba úwoiyavena sisinó.

¹⁵ámáán-aimba kwáyáísasa arááíráantavena moórá-amba Áánútumo áwááꞌo sénamo sáwí-meyambo timínín-amba paáruraiye. ámáán-aimbo ímo kwáyáinkakai íma arááísísina. ámáán-aimba kwáyáiye.

¹⁶Ááváramu Áánútun-aaiyavena áraire siróntavena simái asirámakon-aimba siráiye. miráumai Ááváramu aísaavutantambo ónááowai Áánútun-aaiyavesa áraire sénááowai Áánútu úwoi túwaꞌnaa ena simái asirámakaimba timíníye. Áánútu Mósesimbo simámakain-amaambo ísaraawaiye suꞌmai ímanivo Ááváramumo Áánútun-aaiyavenamo áraire siróntemba Áánútun-aaiyavesa áraire kwésewai kwemá úwoi kwétuwaꞌnaa-iye. Áánútun-aaiyaveta áraire kwésundawaiya Ááváramu kentáá síkwáꞌnáraamban-iye.

¹⁷Áánútu aúrankaꞌa Ááváramu máyowana maarán-áímbá simái agaimaréna sénaóꞌon-oꞌon-kwaasi tíkwáꞌámaóne Áánútu siráiye agaimaréna siráiye. Áánútu púwómpinkembo kwéusasintinkaiwai éna kwemó aaimó sisanamó ímo kwáyáin-tantaakomo kwévaariwain-aaiyavena Ááváramu áraire siráiye.

¹⁸kwaási ímo paáronaaon-tantaatavena Áánútu Ááváramuntavena súwana Ááváramu áraiꞌa mirá íníyena siyé siráimba póna óꞌon-oꞌon-kwaasi tíkwáꞌnáman-iye. Áánútun-aai aúváívimba agaimaréna sénaenaísaavutantambo ónááowaisáwíva-kwaasi paáronaaowe agaimaréna siráimba pósa paáruraawe.

¹⁹ááéma Ááváramu anónuꞌmai karéna ména sáwívar-ima 100 ima maisuwéna máyowana awainínkó Séraa ageínímbá máyowana póna íma imáyáa éna Áánútuntavena asiramái imáyáa kwéena

²⁰Áánútu simáímo asirámakon-aintavena áraire séna íma kaer-ímáyáá éna asiramái ména Áánútu áwíꞌa mósá maréna

²¹séna Áánútumo simáímo asirámakainten-umai kanaán-umai iyámpói simíníye séna

²²miráumai Áánútun-aaiyavena áraire siróntavena séna arupí umái máyaane siráiye.

²³arupí umái máyaane siráimba íma Ááváramuntavenawe suꞌmai siráivo

²⁴kentááyávénagwaraꞌa mirán-áímbá siráiye. Ísóigo Ísumba pukáimpinkemba Áánútu usásinankaraiwain-aaiyaveta áraire súndayavenaya séna arupí umái máyáawe kwésiye.

²⁵kesáámó sáwíꞌo uráundayavenaya kentáásí sáwí-meyambo maisiyuwáníntavenaya Áánútu Ísu Káráísitimba aiꞌmarówana kuména kumpuwúwana Áánútu kwenaúrankaꞌa arupí umásinkanintavenaya pukáimpinkemba usásinankaraiye.