Read Kosena Árómáa 7 Bible Online

Árómáa 7 - Kosena bible

Árómáa 7

¹kesí kwaásiyono. amáparawai ámáán-aimba ísaraamba póꞌa simátíménda ísáaro. úwoimo máyáankaꞌa ámáán-ainko kárákwiraimba póna puwíyamba mináínkó íma kárákwiyiniye.

²ámáánkomo siráintemba aarakwáꞌó ombá awaikómó aúvamaimo máyáinkaꞌa awainínkó kwesé tarúmai máyáísana awaikómó púwísanamo imbá tarúmaimo máyaayamba kwéanasaiye.

³awaikómó máyáinkaꞌa aaraigómó óꞌon-kwaasigoe námae kwénaaisanamo imbá sáwí-inimban-iye kwésevo awaikómó puwínanamo éna ámáánko siráintemba óꞌon-kwaasimo mayánímbo éna kanaán-iye.

⁴kesí kwaásiyono. miráumai keinárawatavenawe séna Ísu Káráísiti pukáimba Áánútumo Mósesimbo simámakain-amaamba imáyáa éꞌa Ísu Káráísitiye tarúmaimo máyáantaveꞌa pukáaraꞌnaraambo umáímo máyáamba minámáánkó íma tátokaivo Ísu Káráísitiye tarúmai máyáawe. Áánútu Ísu Káráísitimba pukáimpinkemba usásinankaraiwai Ísundei-iꞌa umái méꞌa póꞌa Áánútuna mayáí kwémayaawe.

⁵ááéma sáwí-imayaayaveta sirááíyavetaamo uráundarata íma mirán-oro siráin-amaamba iséta imáyáa éta ivátuweta sáwí-imayaayaveta sirááíyaveta éta sáwíꞌa éta puwónaunda-amba kwaréta

⁶miráyá uráunda ívéꞌa Áánútu sáwí-imayaago tátokaimpinkenta iyásínkáísanaya Áánútumo Mósesimbo simámakain-amaanko íma tátokaisata ááéraan-amba Mósesimo agaimakáin-amaankona aambá íma kwaréta aúná-amba Áánútun-amanko agaráásínkarain-anta kwégwaraumne. Áánútuna ámáámbo ímo kwáyáinkakai sáwí-mayaigona ááimba íma isáúsino siráin-kwasai.

⁷mináímbó imáyáa éꞌa simátíménda ísáaro. Áánútumo Mósesimbo simámakain-amaantaveꞌa sáwí-amaamban-iye íma seró. minámáán-áímbó ímo kwáyáinkakai sáwí-mayaigona ááimba íma isáúsino. túran-anda íma oró. minámáánkómó ímo mirá siráinkakai súran-andamo úndayaveꞌa sáwíꞌa kwéune íma súsino.

⁸minámáánkó séna túran-anda íma oró siráimba kempímbá sáwí-imayaa kwáyáimba póꞌa minámáámbá araaisénáe séꞌa súran-anda ávááraumai uráumne. minámáánkómó ímo kwáyáinkakai sáwíꞌo kwéunda íma imáyáa éꞌa sáwíꞌa kwéune súsino.

⁹ámáánko íma mirá oró siráimba íma iséꞌa kaweꞌá umái máyaumne-imayaa éꞌa méꞌa naaémba minámáámbá ísaraunda araaisénáe séꞌa arááíraunda

¹⁰mindá puwónaundawai úne. minámáámbó kwakáundarakai kaweꞌá umái máyausino. minámáámbá arááíraundawai póꞌa puwónaundawai úne-aimba ísaraumne.

¹¹minámáánkó séna íma mirá oró siráimba kempímbá sáwí-imayaago kwéna póna kampaꞌá simásiyuwaisaꞌa mináímbá araaisénáe séꞌa arááíraunda póꞌa puwónaundawai úne.

¹²miráumai Áánútumo Mósesimbo simámakain-amaan-aimba íma mirá oró-áímbá Áánútun-aai arupí-aimba kawer-áímbán-iye.

¹³minkáwér-áínkó íma puwónaundaiꞌa umásínkaraivo kesí sáwí-imayaago puwónaundaiꞌa umásínkaraiye. sáwí-imayaayaveꞌa siráái kwétaimba póꞌa minámáámbó araaisénáe séꞌo arááíraunda puwónaundawai éꞌa kesí sáwí-mayaigona ááimba ávááraumai sáwíꞌa úwaꞌa awánaraumne. minámáánkó séna íma sáwíꞌa oró siráimba póꞌa kemó sáwíꞌo uráunda kesí sáwí-imayaago anómba sáwíꞌa úwaꞌa awánaraumne. sáwíꞌo kwéundawaiya tátokain-kwasai.

¹⁴ámáámba Áánútumpakemba kunkáivo kemá marapákén-kwáásí únana sáwíꞌo kwéundawai tátokaisaꞌa minímáyáágóná mayáí kwémayaumne.

¹⁵kaweꞌó úndayavena kwésinkaisaꞌa mirá ónáe súndanivo íma mirá kwéune. sáwíꞌo úndayavena íma kwésinkaisaꞌa íma mirá ónáe súndanivo mirá kwéune. mirámó kwéunda íma kawer-ímáyáá kwéune.

¹⁶íma sáwíꞌa ónáe súndanivo mirá-sáwíꞌó kwéundayaveꞌa séꞌa Áánútu siráin-amaamba kawer-ámáámbán-iye kwésune.

¹⁷sáwíꞌo kwéunda íma kemá mirá kwéumpo sáwí-imayaago kempímbá kwáyáísaꞌa sáwíꞌa kwéune.

¹⁸marapá-kwáásí únda kanaán-umaimo kaweꞌó únda kempímbá íma kwáyáísaꞌa awánaraumne. kaweꞌó úndayavena kwésinkaisaꞌa íma kanaán-umai kaweꞌá kwéune.

¹⁹kaweꞌá ónáe séꞌa úndanivo íma mirá éꞌa íma sáwíꞌa ónáe séꞌa úndanivo úwoi sáwíꞌa kwéune.

²⁰íma sáwíꞌa ónáe súndanivo mirá-sáwíꞌá kwéunda íma kemá mirá kwéumpo sáwí-imayaago kempímbá kwáyáísaꞌa sáwíꞌa kwéune.

²¹maarán-áínkóná ááimba kwáyáiye. kaweꞌá ónáe séꞌa úndanivo sáwí-imayaago tavisímae kwéiyisaꞌa

²²kesirumpimbá Áánútuna ámáántaveꞌa aamoí kwéundanivo

²³moórá-ainkona ááimba kempímbá kwáyáísana sáwíꞌo ónáe súndawai kembá tavisisaná Áánútuna ámáámba kawer-ámáámbá póꞌa kwaránáe súndawai tavisisaná sáwíꞌo ónáe súndawai tavisimái tátokaiye.

²⁴eéséꞌá kwéunana sirunkó sáwíꞌa kwéisaꞌa máyaundayaveꞌa séꞌa sáwíꞌa kwéeꞌa puwónaundaiꞌa kwéundavinkemba nááwa siráníyono kwésunana

²⁵Ísóigo Ísu Káráísiti síráísaꞌa Áánútuntaveꞌa súwi kwésune. miráumai kesirumpinkén-ímáyáá kwéeꞌa séꞌa Áánútuna ámáámba kwaránáe súndanivo kesúgoma sáwí-imayaavinkemba sáwíꞌa kwéiye.