Read Kosena Árómáa 8 Bible Online

Árómáa 8 - Kosena bible

Árómáa 8

¹miráumai Ísu Káráísitiye tarúmai máyáawai miwítí sáwí-meyamba maitíyukaintavena Áánútu íma aaivimbá maitinkéna sáwí-meyamba íma timíníye.

²ááéma sáwíta uráundawai tátokowata puwónaundawaiya ówánanaya Ísu Káráísiti iyásínkaraisata kweséya aúnáiꞌa umáíya máyaunanaya Áánútun-amanko kárákwiyisana Áánútu aaivimbá íma maisinkénaya íma sáwí-meyamba simíníye.

³Áánútu kwená ámáámba siráimbanivo sáwíꞌa ónáe séta minámáámbá íma kanaán-umaiya kwakáunda póna minámáánkó sáwíta umáíya máyaundavinkemba íma síkaisata máyaunanaya naaémba Áánútu ááninkontavena séna sáwíꞌa kwéomba po miwíyáváí se kumpuwíníyone séna aiꞌmarówana kesáámó sáwíꞌo kwéundawaiyaamo úndanten-augwarawai maimaéna kentáásí sáwí-imayaamo maisiyuwáíndayavenaya kumpukáiye.

⁴Áánútu mirá uráimba póta sáwí-imayaayavetaamo sirááíyavetaamo kwéunda ímo mirá kwéetaamo Áánútun-amankomo siráiniꞌo kwéetaamo éta Áánútuna ámáánko siráintemba miráyá umáíya arupíya ónaumne.

⁵sáwí-imayaayavesamo tirááíyavesamo kwéowai miwítí sáwí-imayaago tátokaivo Áánútun-amankomba arááímo kwétainiꞌa kwéowai kwená kawer-ímáyáágó kwégarakwiyiye.

⁶miwítí sáwí-imayaayavesamo tirááímo kwétain-imayaawe suꞌmai kwéowai máyáawaina ááimba Áánútuna némpaꞌa maíꞌmaiꞌa ónááovo Áánútun-amankombo arááímo kwétain-imayaawe suꞌmai kwéowai paru umái aúnáiꞌa umái maíꞌmaiꞌa ónááowe.

⁷sáwí-imayaayavesa tirááíyavesa kwéon-imayaawe suꞌmai kwéowai Áánútuna ámáámba íma kanaán-umai taagwiyavésa Áánútuna namuro-kwáásíráámbá kwéowe.

⁸sáwí-imayaayavesamo tirááímo kwétainiꞌo kwéowai Áánútu íma aamoí kwéumatinkaiye.

⁹Áánútun-amankomo kentirumpimbó máyáimbo éꞌa sáwí-imayaayaveꞌo tirááímo kwétainiꞌa íma kwéeꞌa Áánútun-amanko siráiniꞌa kwéeꞌa máyáawe. Ísu Káráísitin-amanko tirumpimbó ímo máyáiwai íma kwená kwaási-iꞌa kwéowe.

¹⁰Ísu Káráísitin-amanko kentirumpimbó máyáimbo éna Áánútu kwenaúrankaꞌa arupí umátínkaraimba póꞌa kentimankó maíꞌmaiꞌa íníwai éꞌa sáwíꞌo uráantaveꞌa kentúgoma puwíníwaiman-owe.

¹¹Áánútu Ísumba pukáimpinkemba usásinankowana kwenamankómó kentirumpimbó máyáimbo éna keinárawakwaraꞌo éna puwónááompinkemba usásintinkaniye. kwenamankó kentirumpimbá máyáintavena Áánútu mirá íníye.

¹²kesí kwaásiyono. mináímbá imáyáa íyata íma kentáásí imáyáavinkeniꞌa éta Áánútun-amankombo arááímo kwétainita umáíya máéno.

¹³sáwí-imayaayaveꞌo tirááíyaveꞌo kwéombo éna Áánútu séna máyáawaina ááimba Áánútuna némpaꞌa máéro siráivo Áánútun-amankomo túwaꞌnaa ínaꞌo sáwí-imayaamo tuwéꞌo éꞌa aúnáiꞌa umái ménaaowe.

¹⁴Áánútun-amankomo kwésintembo kwégwaraawai Áánútu áánimbaaꞌan-owe.

¹⁵Áánútu kwenamankómbá aiꞌmarówana kentirumpimbá máyáiwai íma inkaisí-íꞌa umátínkáísana inkaisí-yántáákó íma tátokaisaꞌa máyáavo Áánútu áánimbaariꞌa umátínkáísaꞌa Áánútumba kwéaayeꞌa séꞌa kesivoó kwéseꞌa kwémaewe.

¹⁶kesáá séta Áánútu áánimbaata úneyaamo kwésunda Áánútun-amanko kentáásirumpimba ména séna mindá árair-aimban-iye kwésiye.

¹⁷Áánútuna iyámpói úndaya póta Áánútumo kentááyávénawe sénamo toꞌmayaa úmakaimba maimaéta Ísu Káráísitimo mayánínten-umaiya mayánaundayaawe. umbai-yántááꞌó kwempímbó kwáyontemba kentáávímbá umbai-yántááꞌá kwáyáimba póta naaémba kweséya ságayan-ayampaꞌa ménaundayaawe. Áánútu kwená óꞌora-sagayamba agaráásinkanin-kwasai.

¹⁸maarán-áímbá imáyáa éꞌa séꞌa áraiꞌa Áánútu kwená óꞌora-sagayamba agaráásinkainata mindáyaveta imáyáa kwéeta kentáávímbá kwáyáin-umbai-yantaataveta íma anón-imayaa kwéundayaawe.

¹⁹Áánútu áánimbaare ayáámúmbaareya únasaya Áánútumo tarórurain-tantaako kwaí-kwaankowe taaigówé amápa-karaan-tantaakowe kentáámó suwánanaaontavesa mósá titaagwirésa amuꞌmarésa máyáawe.

²⁰naaóváꞌá Áánútu tarórurain-tantaatavena séna kampindágwiniye séna kwená imáyáavinkemba séna íma miwítí imáyáavinkemba siráimba maarán-ímáyáá éna séna

²¹naaémba kampindáí-yántááꞌá aambá áúntinkaanana taróruraunda-yantaaꞌa óꞌa íma kampindámae iyíníye. kesí iyámpóímo iyátínkáanasamo kaweꞌó umáímo ménaaontemba mintántáákó miráumai kaweꞌá umái kwéniye Áánútu minímáyáá uráiye.

²²maarán-áíntá ísaraumne. aaraimó iyámpóímo tinkésamo eéséꞌó ontembá Áánútumo amápa-tantaaꞌo tarórurain-tantaako eéséꞌá kwéena Áánútumo paárinintavena amuꞌmaréna máyáiye.

²³íma Áánútumo tarórurain-tantaakowe suꞌmainivo kesáágwáráꞌá miráyá kwéeta Áánútumo toꞌmayaa úmakain-tantaaꞌo simíníntaveta imáyáa ónaundayavenaya Áánútu kwenamankómbá aiꞌmarówana kesirumpintá kumbáyáísata eésétá kwéeta amuꞌmaréta máyaunanaya Áánútu kwenayáámúmbaare kwenáánimbaare síkenaya aúná-kuwawaaꞌa umásinkanintaveta amuꞌmaréta máyaumne.

²⁴Áánútu kawer-ámpáꞌá mésinkonkaꞌa séta áraiꞌa Áánútuna iyámpóíya éta kweséya ménaumne séta amuꞌmaréta máyaumne. awánasuwaunda-yantaataveta íya amuꞌmaréta ímo awánáúnda-yantaataveta amuꞌmaréta ménaumpo

²⁵ímo awánáúnda-yantaataveta amuꞌmaréta méta séta áraiꞌa paáriniye séta íma sívón-káínata asiramái amuꞌmaréta ménaumne.

²⁶íma asiramái-kwaasi méta kawer-ámpátá kwégunanaya umbai-yántáákó kwétatoraisana póna Áánútun-amanko kwésuwaꞌnaa-isata nóraumaiya Áánútumba áísaa onanayá súwaꞌnaa íníyo séta sirumpintá kanagíré suꞌmai téta íma kanaán-umai aaí kwésunanaya Áánútun-amanko kentááyávéna imáyáa éna Áánútumpaꞌa aaí kwésisana

²⁷Áánútun-amanko Áánútumbo arááímo kwétain-aimba séna kwená kwaási-imayaa éna mirán-áímbá kwésimba póna Áánútu kentáásí imáyáa awánaiwai póna kwenamankómó sin-áímbá kwéisaiye.

²⁸maarán-áímbá ísaraumne. kwená kwaási-iꞌa ónaundayavenaya ítámakaisata kwená imáyáa kwéeta máyaunanaya sáwí-yantaare kawe-tántááré kesópataamo timbá Áánútu mintántááꞌá kaweꞌá kwéumasinkaintaawe.

²⁹naaóváꞌá Áánútu kwendéí-íꞌa umái ítámakowaiyavena séna kesááninkaamba ónááowe siráimba póna kwenááninko Ísu kentáásuwaao-iꞌa isatá kwenáúnavarita úne.

³⁰naaóváꞌá ítámakowaiyavenaya sááyena kwenaúrankaꞌa arupí umásinkenaya kwenááninkaaniꞌa kwéumasinkaintaawe. Áánútu arumbá kwésimenaya Ísumba aiꞌmarówana kumpukáin-kwasai.

³¹Áánútu miráumai súwaꞌnaa uráimba póꞌa imáyáa éꞌa simátíménda ísáaro. sáwíꞌa umátinkanae sésayaamo mirámó ónááomba íma kanaán-umai kentáá usáyaaitanaaowe.

³²Áánútu kwenááninkomba íma tátorena kentáásí sáwí-imayaa maisiyuwáínkwáe sénaya aiꞌmarówana kumpukáiye. mirá uráimba póna súwaꞌnaa ínín-tantaaꞌa úwoi simíníntaawe.

³³Áánútu kentáá ítámakaiwaiya kwenaúrankaꞌa arupíya umásínkarainta pósa évakarawai íma kanaán-umai aaivimbá maisinkánááontaawe.

³⁴évakarawai kentááyávésa puwígwáe sésa íma aaivimbá maisinkánááowe. Ísu Káráísiti kentááyávénaya séna puwéna usásinena Áánútu ayáánúrapaꞌa asirayán-áyámpáꞌá ména kentáá súwaꞌnaa umai Áánútumpaꞌa kwéaisaa-iye.

³⁵mirá kwéintavesa évakarawai íma kanaán-umai Káráísitiyeyaamo máyaundavakenta sírááwanaya Káráísiti kentááyávénaya íma auwinkéna kentáásí imáyáa íma kwétuwaiye. umbai-yántááꞌó kesópataamo tíndawe aosaambó kwisinkánááontaawe sáwíꞌo umásinkanaaontaawe sááimo sinkáníntaawe unáánkwátói-iyaainta ménaundayaawe évakarawaimo sínkamonaaontaawe puwónaundayaawe mirán-tántááꞌó kesópataamo tínímba Káráísitiyeyaamo máyaundavakenta íma kanaán-umai sírááwanaya Káráísiti kentááyávénaya íma auwinkéna kentáásí imáyáa íma kwétuwaiye.

³⁶naaóváꞌá Áánútun-aai aúváí-kwandaaivimba agaimaréna sénaená kwaásiya úndarakemba évakarawai kentááyávésa sésa tínkamonasa puwígwáe-imayaa úmae kwéiyowe. sipisípimo tuvúwówanamo púwíntemba kentááyávésa tínkamonasa puwígwáe kwésimae íyówe agaimaréna siráiye.

³⁷mirá-sáwíꞌó umásínkáanta íma imáyáa únanaya Ísu Káráísiti arumbá kwésimimba póna asiramásínkáísata miwí kwéusayaaitaundayaawe.

³⁸maarán-áímbá árair-aimba isaꞌá ísaraumne. Áánútu arumbá kwésimenaya Ísóigo Ísu Káráísitimba aiꞌmarówana kentááyávénawe séna kumpukáimba pósa Áánútunopaꞌo máyaundavakenta íma kanaán-umai kwésiraantaawe. puwónaundayaawe úwoi máyaundayaawe Áánútunopaꞌo máyaundavakenta íma kanaán-umai kwésiraantaawe. kwíyómpaken-kwayoꞌnaraware taraváá-kwáné ívéꞌo kwáyáin-tantaare naaémbo paárinin-tantaare kwíyómpakewaiye kwaántá-kwaasiti máápakewaiye Áánútumo tarórurain-tantaare mirán-tántáátónkó íma kanaán-umai Áánútunopaꞌo máyaundavakenta sírááwanaya Áánútu kentááyávénaya íma auwinkéna kentáásí imáyáa íma kwétuwaiye.