Read Kosena Árómáa 9 Bible Online

Árómáa 9 - Kosena bible

Árómáa 9

¹kemá Póro Ísu Káráísitina kwaásima éꞌa árair-aine suꞌmai kwésunana Áánútun-amanko kesirumpimbá ména kárákwiyisaꞌa maarán-áímbá árair-aimba kwésimatimune.

²kesí kwaási Ísareri-kwaasivinkembo kemá tiráunda isaꞌá imáyáa únana sirumbá kwéisana sirunkó umbaí támae kwéiyiye.

³miwí Ísu Káráísitin-aaiyavesa íma áraire sembá pósa árairemo sésamo kesí anondámo usámaiyanamo Áánútumo siyuwáínanamo Ísu Káráísitimo ánaaembo umásiyuwanimba mindá kanaániye kwésune.

⁴miwí kesí kwaási Ísareri-andarakewai Áánútu kwenáánimbaariꞌa umái ítámakena kwená ságayamba agaráátinkena aaimá simái tarútinkena kwená ámáámba simátimena simái asirámakain-aimba simátimena Áánútuna imáyáamo mósá kwémaraan-amba agaráátinkowasa

⁵ááéraan-anon-kwaasi miwí tíkwáꞌnáma uwaná Ísu Káráísiti iyámpói aúꞌmái miwítí ándávaꞌa kumbéna amáparawairaꞌa kárákwiyisata kwenáwíta mósá maꞌmaéta kwéiyunda mindá árair-aimban-iye.

⁶Áánútu Ísareri-andaraken-kwaasivinkemba íma amápaꞌa ítámakaivo évakarawai ítámakaimba Áánútu asirámakain-aimba arááíraiye íma seénáisaiye.

⁷Ááváramu aísaavutantamba uráawai íma amáparawain-ovo évakaꞌa Áánútuna iyámpói owaná naaóváꞌá Áánútu Ááváramuntavena séna enááninko áwíꞌa Áísákaa kwenaísaavutantamba ónááowaiye suꞌmaiyavena séna enaísaavutantamba kwéowe sénááowe Áánútu siráiye.

⁸mináínkóná ááimba maarán-áímbán-iye. Ááváramu aísaavutantamba uráawaivinkemba íma amáparawain-ovo Áánútu kesí kwaásima owémó asiramáímo siráiwaiye suꞌmai Áánútuna kwaásiman-owe.

⁹naaóváꞌá Áánútu Ááváramuntavena simái asirámakain-aimba séna súnda-kanaama tínaꞌa máyáanana Séraa inaamaí-íyámpóí ankáníye sirómba

¹⁰mináímbá kentáá síkwáꞌnáma Áísákaantavena siráiye. kwemá anón-éna aaraí mayówana awainínkó áwíꞌa Árépéka agováraer-iyampoi

¹¹íma tínkaroyasarai miníyámpóíráí íma mayáí mairóyankaꞌa

¹²Áánútu minínínkóntávéna séna ená iyámpóíraimo ésarai aivakéwáí naaén-iyampoigona mayáí mayáníye siráiye. Áánútu kwená imáyáavinkemba kwená kwaási-iꞌa umái ítámarena tááyaraivo miwítí mayáí íma awánarena tááyaraiye. miráumai naaóváꞌá séna ená iyámpóíraimo ésarai aivakéwai naaén-iyampoigona mayáí mayáníye siráiye.

¹³Áánútun-aai aúváívimba miníyámpóíráíyávéna agaimaréna sénaYákópomba ítámareꞌa Ísombasínaaemba umámune Áánútu siráiye agaimaréna siráiye.

¹⁴évakarawai mindáyavesa imáyáa ésa kampaꞌá sésa Áánútu íma arupí kwéiyemo kwésemba mindá kampar-áímbán-iye.

¹⁵naaóváꞌá Áánútu Mósesintavena sénasirumbá umátinkanae súndawaiyaveꞌa sirumbá kwéumatinkaumne. kaweꞌá umátinkanae súndawaiyaveꞌa mirá kwéune siráiye.

¹⁶miráumai kwaási tiráái kwétaintavenawe kwaási kaweꞌ-máyáí kwémayaantavenawe ímanivo Áánútu kwená imáyáavinkemba séna sirumbá umátinkanae siráintavena kwená kwaási-iꞌa umái kwéitamaraiye.

¹⁷Áánútun-aai aúváí-kwandaaivimba agaimaréna sénaMósesi máyonkaꞌa Ísípi-maravaꞌa kárákwirowai kwentávéna Áánútu séna amápaꞌ-maravaken-kwaasi kesí asirayándéímó enaneꞌó úndama awánésa kesúwíꞌa isáígwáe séꞌa embá kárákwiyi-mayairaꞌa usásinankaraumne Áánútu siráiye agaimaréna siráiye.

¹⁸miráumai Áánútu kwená imáyáavinkemba kwembó arááímo tainíꞌo énamo sirumbá umátinkanaemo simbá arumbá umátinkena kwembó arááímo tainíꞌo énamo tiruntémó máráaniꞌo imbá tiruntémá máráaniꞌa kwéumatinkaiye. Áánútu áwááꞌa tiyéna arumbá umátinkenamo in-kwásáí.

¹⁹mindáyaveꞌa imáyáa éꞌa maarán-áímbá íma seró. sáwíta kwéundaya nóra séna Áánútu aaivintá kwémaisinkaiyo. Áánútu imáyáa éna séna sáwíꞌa ónááowe siráimba mindáya sáwíꞌa kwéundayaawe. miráumai aaivimbó kwémaisinkainta mindá sáwíꞌa kwéiye mináímbá íma seró.

²⁰keinárawaꞌa úwoi-kwaasi máyáavo Áánútumo siráinda-aimba anondá íma seró. maarán-áímbá imáyáa oró. sawei-ánáveumba ombá karíꞌ-márámá mairésa sawei-ánáveumba úmaraawana misáwéí-ánáveunko íma maarán-áímbá séna nóra éra kembá mirá kwéumasinkaao íma kwésiye.

²¹sawei-ánáveumbo ombá mimbórá-káríꞌ-márámá mairésa kaer-ánáveumba úmaresa moórávimba úwoi-mayai maésa moórávimba kaweꞌ-máyáí kwémayaamba mindá miwínéímán-iye.

²²Áánútu miráráámbá kwéiye. Áánútuna asirayáné áwááꞌo kwésine awánanaaontavena sáwíꞌo uráan-kwaasimo tínkaminimba miwítí meéyámbá póna ááéma íma tínkamimba timuꞌmaréna ména naaémba tínkaminiye.

²³kentáá ítámarenaya arumbá umásínkáinta póta kweséya ságayan-ayampata méta kwená óꞌoran-kaweꞌ-mayai awánanaundayavenaya Áánútu sáwíꞌo uráan-kwaasi íma ááéma tínkamimba timuꞌmaréna máyáiye.

²⁴íma Yútaa-kwaasivinkene suꞌmaiya sááyaraivo óꞌonkaa-kwaasigwaraꞌa tááyaraiye.

²⁵miráumai naaóváꞌá Áánútun-aai simátímakowai áwíꞌa Ósíya agaimaréna sénaÁánútu séna íma kesí kwaási-iꞌa uráan-kwaasiyaveꞌa kesí kwaásiman-owe séꞌa ímo sirumbó tímakaundayaveꞌa sirumbá kwétimune sénaumne.

²⁶íma kesí kwaásiman-owe siráundavaꞌa máyáawaiyaveꞌa naaémba kesáánimbaaꞌan-owe sénaumne Áánútu asirayánkwáráwáí síníye Ósíya agaimaréna siráiye.

²⁷naaóváꞌá Áánútun-aai simátímakowai áwíꞌa Áísáya agaimaréna sénaÍsarerin-andaraken-kwaasi sáwívaꞌa ésa nonáámááíraamba umái sáwíva-kwaasi ménaaovo Áánútu íma amápaꞌa tiránívo évakaꞌa sáwíꞌo umái máyáampinkemba tiráníye.

²⁸Ísóigo amáparawai avekáán-umai aaivimbá maitinkéna sáwí-meyamba tímatuwaniye agaimaréna siráiye.

²⁹moórávaꞌa Áísáya agaimaréna sénaÍsóigo amápar-asirayambo tokáiwaimo sénamo évakarawai íma tínkamonda tiyúwáanasa mésa iyámpói tinkánááowe siráinkakai Sótómu-naopaken-kwaasiye Kómóraa-naopaken-kwaasiyemo putásaraantemba kesáágwáráꞌá miráyá úsino agaimaréna siráiye. Ísareri-kwaasi Ísun-aaiyavai íma áraire siráan-kwasai.

³⁰mináínkóná ááimba maarán-áímbán-iye. óꞌonkaa-kwaasi Áánútu aúrankaꞌa arupí umáímo máyáan-ambo ímo avakáá uráawai Ísu Káráísitin-aai isésa sésa áraire siráamba póna Áánútu kwenaúrankaꞌa arupí umátínkaraiye.

³¹miwí mirá uráavo Yútaa-kwaasi Áánútu ítámakaiwai sésa Áánútu Mósesimbo simámakain-amaamba kwáráananaya kwenaúrankaꞌa arupíya umásinkaniye siráavo Áánútu Mósesimbo simámakain-amaankona ááimba íma isésa kwenaúrankaꞌa íma arupí umái máyáawe.

³²Áánútuna ámáámba kwáráananaya kwenaúrankaꞌa arupíya umásinkaniye siráavo kwenááiyavesa íma áraire siráantavena íma arupí umátínkaraiye Áánútun-aai aúváí-kwandaaivimba Ísuntavena simái agaimaréna sénaÁánútu séna ísáaro. Sáíyono-naopaꞌa moórá-ontamba maráúnda pósa minóntánkáꞌá tísamaima turarésa tanaambá vánááowe. óntantavenamo siráintembo íníwaimpaꞌo agevamáímo ménaaowai íma tigaeyávésa ónááowe siráiye mináímbá agaimaréna siráiye. óntanemo siráimba Ísuntavena siráiye. óntankaꞌo tanaambó vaantembá Ísu Káráísitin-aai araaisésa miráumai tanaankáámbá varáꞌnaumai máyáawe.