Read Kosena 1 Kórínti 1 Bible Online

1 Kórínti 1 - Kosena bible

1 Kórínti 1

¹kemá Póro maanáímbá agaimaráúmpo ísáaro. Áánútu kwená imáyáavinkemba kembá aantá-kwaasi-iꞌa umái ításinkena séna Ísu Káráísitin-aai kosimátímaꞌmae naauwó séna siꞌmákaiye. kentáásí kwaási áwíꞌa Sósénisintaveꞌa súnana maanáúváímá kwéagayaiye.

²Áánútuna kwaási Kórínti-naopaꞌa máyáawai ísáaro. Áánútu kwendéí-íꞌa umátínkaraisaꞌa Ísu Káráísitiye tarúmaimo máyáawai ísáaro. amápaꞌ-maravakewai Ísóigo Ísu Káráísitimpaꞌa námúnaa kwésewaiye keináraware Áánútu ítátinkaraiye. Káráísiti miwíráꞌá kárákwiraiwai éna kentáárákwáráꞌá kárákwiraiye.

³Áánútu kentáásivowe Ísóigo Ísu Káráísitiye úwoi túwaꞌnaa ésarai paru kwéumatinkaayantaveꞌa námúnaa kwésune.

⁴keinárawataveꞌa ísámai aasiyaasí Áánútumpaꞌa súwi kwésune. Áánútu Ísu Káráísitina mayáíyávéna imáyáa éna kwétuwaꞌnaa-imba mindáyaveꞌa Áánútumpaꞌa súwi kwésune.

⁵Ísu Káráísitiye tarúmaimo máyáantavena Áánútu kaweꞌó umátínkáimba keinárawapimba anómba uráintaveꞌa póꞌa kwenáái iséꞌa kaweꞌá umái kwésimatimewe.

⁶Ísu Káráísitin-aai simátímakaunata tirumpimbá tátokeꞌa asiramái méꞌa póꞌa kwenáái kaweꞌá umái kwésimatimeꞌa

⁷Ísóigo Ísu Káráísitimo marapáꞌó kumínímba amuꞌmaréꞌa máyáamba Áánútun-amanko kwétimin-asirayamba maimái tátokaawe.

⁸asiramátínkávaꞌa iyínana póna naaén-kanaamo Ísóigo Ísu Káráísitimo kumínín-kanaa tínana kempímbá sáwí-aimba íma kwéniye.

⁹Áánútu sinteníꞌo kwéena kwenááninko kentáásí Ísóigo Ísu Káráísitinte tarútinkaindayavena tááyaraimba sinteníꞌo kwéiwai póna mirá uráiye. taaín-taimba uráan-kwasai.

¹⁰kesí kwaásiyono. kentáásí Ísóigo Ísu Káráísitina asirayámbá símakaintaveꞌa asiramái kwésimatimune. mimbórá-áímbá séꞌa íma taaínkaariꞌa éꞌa mimbórávímbá méꞌa mimbórá-ímáyáá éꞌa mimbórá-máyáí máyáaro.

¹¹keinárawatopakemba moórá-ininko áwíꞌa Kórówina akúmpákén-kwáásí évakarawai tasimásimesa sésa keíyái aaisan-áímbá kwésesa taaínkaar-umai máyáawe tasimásimakaawe.

¹²mináísán-áínkóná ááimba évakarawai séꞌa Póro kentáásí anóndaꞌan-iye sewaꞌá évakarawai séꞌa Ápórosi kentáásí anóndaꞌan-iye sewaꞌá évakarawai séꞌa Pítaa kentáásí anóndaꞌan-iye sewaꞌá évakarawai séꞌa Ísu Káráísiti kentáásí anóndaꞌan-iye kwésewe.

¹³Ísu Káráísiti mimbóráwáí anóndaꞌa máyáivo íma taaínkaaꞌa umái máéro. kemá Póro íma keinárawataveꞌa imáyáa éꞌa taairaꞌá pukáumne. íma kentávéꞌa ísámai nombá pékaavo Ísuntaveꞌa ísámai nombá pékaawe.

¹⁴évakarawai séꞌa Póro kentáásí anóniꞌa índayavena nombá pésinkaraiye sevó séꞌa sáwívarawai íma nombá pétinkaraunda mindáyaveꞌa Áánútumpaꞌa súwi kwésune. keinárawapinkemba íma sáwívarawaiman-ivo kae-kwáásí túwíꞌa Kárísipasiye Káyásiye minkáéꞌnáraiye suꞌmai nombá pétinkeꞌa sáwívarawaimo ímo pétinkaraundayaveꞌa Áánútumpaꞌa súwi kwésune.

¹⁶ánivo moóráwai áwíꞌa Sétevanasiye kwená akúné nombá pétinkeꞌa imáyáa éꞌa áꞌowima íma pétinkaraumne.

¹⁷Ísu Káráísiti íma simásimena séna nombá pétinkamae naauwó íma simásímakaivo áséi-kwasai simátímaꞌmae naauwó séna siꞌmákaiye. Ísu Káráísiti taairaꞌá pukáin-ainkona ááimba íma ísáavo séꞌa Káráísitin-aai avoraꞌá kwésimatimeꞌa kwaásiti kawer-ímáyáávínkén-áímbá íma séꞌa tavisí-áímbá íma kwésimatimeꞌa avoraꞌá Káráísitin-aai kwésimatimune. Ísumo pukáimba Áánútuna asirayánkómán-iye kwaasái.

¹⁸sáwíꞌo umáímo kwémaewaina aambó kwégwaraawai Ísu Káráísitimo kwaásiyavenamo imáyáa éna pukáin-aintavesa sésa úwoi-aimban-iye kwésevo Áánútunopaꞌo kwégon-amba kwégwaraundawaiya mináíntávéta séta Áánútu kwésuwaꞌnaa in-ásíráyámbá iyéyá kwésune.

¹⁹sáwíꞌo umáímo kwémaewaina aambó kwégwaraawaiyavena Áánútun-aai aúváívimba agaimaréna sénamarapá-kwáásí kawer-ímáyáámán-iye kwésen-imayaa ánásasuweꞌa óꞌon-oꞌon-imayaagwara-kwaasiti imáyáa maitiyuwánaumne agaimaréna siráiye.

²⁰marapá-tántáátávésa kawer-ímáyáá kwéowaiyavena Áánútu séna minímáyáá úwoisan-tantaaꞌan-iye siráiye. kawer-ímáyáágwáráwáí íma aivaꞌá kwíyasa pósa ámáámbo ísaraawai íma aivaꞌá kwíyasa pósa marapá-tántáátávésa kwaasái símae kwénaaowai íma aivaꞌá kónááowe.

²¹Áánútu kawer-ímáyáá éna séna marapá-kwáásí miwítí kawer-ímáyáávínkémbá íma kanaán-umai kesí ááimba suwánanaaowe súmbanivo imáyáa éna séna kesááiyavesa áraire síyawai sáwíꞌo umáímo máyáampinkemba iyátinkanaumne Áánútu súwata mináséí-kwásáí kwésimatimunasaya évakarawai úwoi-aimban-iye kwésewe.

²²Yútaa-kwaasi sésa ímo awánaanda-iꞌo inatá Ísu Káráísitin-aaiyavesa áraireya sénaumne sewasá Kíríki-kwaasi kawer-ímáyáámán-iye kwésen-imayaa kwéavakaa-ombanivo

²³kesáá Ísu Káráísitimo kentááyávénamo imáyáamo énamo pukáin-ainta kwésimatimunasaya Yútaa-kwaasi mináímbá isésa Ísu Káráísitin-aai tínaaemba kwéumamewasa Kíríki-kwaasi mináímbá Áánútuna kawer-ímáyáávínkén-áímbá isésa úwoi-aimban-iye kwésewata

²⁴Yútaa-kwaasivinkene óꞌonkaa-kwaasivinkene Áánútu ításinkaraiwaiya séta Áánútuna kawer-ímáyáávínkémbá Ísu Káráísiti pukáisana Áánútuna asirayánkó sáwíꞌo umáíyaamo máyaundavinkenta kwéiyasinkaintaawe.

²⁵marapá-kwáásí sésa Áánútuna imáyáa úwoi-imayaaman-iye kwésen-imayaao kawer-ímáyááó póna kwaásiti kawer-ímáyááómbá usáyaaitaraiye. kwaási sésa Áánútu aamoisayámbá iyémó kwésen-aamoisayanko kwaásiti asirayámbá usáyaaitaraiye.

²⁶kesí kwaásiyono. Áánútumo kwená kwaási-iꞌo umátínkaronkaꞌa máyówaina ááimba imáyáa oro. keinárawapimba marapá-kwáásí túrankaꞌa kawer-ímáyáágwárá-kwáásí íma sáwívaꞌa máémba moórá-mora-umai méꞌa marapá-kwáásí túrankaꞌa asirayán-kwáásí íma sáwívaꞌa máémba moórá-mora-umai méꞌa marapá-kwáásí túrankaꞌa túwíꞌo kwáyon-kwaasi sáwívaꞌa íma máémba moórá-mora-umai méraawe.

²⁷marapá-kwáásí sésa úwoi-kwaasiman-owe kwésen-kwaasivinkemba Áánútu kwená kwaási-iꞌa umái ítátinkena marapákén-káwér-ímáyáágwárá-kwáásí Áánútuna kwaási tuwánésa sésa kentáásí kawer-ímáyáá úwoisamban-iye sénááontavena Áánútu mirán-kwáásí ítátinkaraiye. marapá-kwáásí sésa aamoisayán-kwáásímán-owe kwésen-kwaasivinkemba Áánútu kwená kwaási-iꞌa umái ítátinkena marapákén-ásíráyánkwárá-kwáásí Áánútuna kwaási tuwánésa sésa kentáásí asirayámbá úwoisamban-iye sénááontavena Áánútu mirán-kwáásí ítátinkaraiye.

²⁸marapá-kwáásí sésa úwoi-kwaasiman-owe sésa simái sáwíꞌa kwéumatinkaawaiye ímo méraawaiye Áánútu kwená kwaási-iꞌa umái ítátinkaraiye. marapá-kwáásí sésa anón-kwaasiman-owe kwésen-kwaasi ánásanaaontavena úwoi-kwaasivinkemba Áánútu ítátinkaraiye.

²⁹Áánútu aúrankaꞌa miwí kentúwíꞌa íma mósá maránááontavena úwoi-kwaasivinkemba Áánútu ítátinkaraiye.

³⁰Áánútu Ísu Káráísitinte tarútinkaraisaꞌa máyáawana póna Ísu Káráísiti kentáásí kawer-ímáyááóná ááiniꞌa Áánútu umánkaraiye. Ísu Káráísiti pukáintavena Áánútu kwenaúrankaꞌa arupíya umásinkenaya kwená kwaási-iꞌa umásinkenaya sáwíꞌo umáíyaamo máyaundavinkenta maisiyuwéna siráisata máyaumne.

³¹mináíntávéna naaóváꞌá Áánútun-aai aúváívimba agaimaréna sénamoóráwaimo kesúwíꞌo mósá maránáe sénamo énaíma mirá éna Ísóigo áwíꞌa mósá maráíno agaimaréna siráiye.