Read Kosena 1 Kórínti 11 Bible Online

1 Kórínti 11 - Kosena bible

1 Kórínti 11

¹Ísu Káráísitimo uráintemba mirá kwéumpo kemó úndantemba keinárawaꞌa mirán-oro. Áánútuntavai imáyáa ésa torupamái máyómba aarai tiꞌnónkáꞌá káátaraan-kwasai.

²kentávéꞌa imáyáa úmae iyéꞌa simásímakain-aimbo simátímakaunda-aimba kwétaagwiyavontaveꞌa aamoí kwéumatinkaumne.

³simátíménda ísáaro. Káráísiti amáparawairaꞌa kárákwiyisasa kwaaimó ombá tuwainímbáákaꞌa kárákwiyowana Áánútu Káráísitinkaꞌa kárákwiraiye.

⁴miráumai Áánútuntavesa imáyáa ésa torupamái máyáamba kwaaimá námúnaa kwésesa Áánútun-aai kwésimatimemba tiꞌnónkáꞌó kánumoꞌo káátaresamo ésa Káráísiti áwíꞌa sáwíꞌa ónááowe.

⁵torupamái máyáamba aaraimá námúnaa kwésesa Áánútun-aai kwésimatimemba tiꞌnónkáꞌó ímo káátaresamo ésa tuwaiꞌmáá túwíꞌa sáwíꞌa ónááovo aarai tiꞌnónkáꞌá káátaraamba tuwánésa tuwaiꞌmááꞌa kárákwiraawe kwésemba mindáyavesa tiꞌnónkáꞌó ímo káátaresamo ésa tuwaiꞌmáá túwíꞌa sáwíꞌa ónááowe. sáwíꞌo on-ínímbó tigaeyáváí ígwáe sésamo tiꞌnóntáumo káráyuwaantemba tiꞌnónkáꞌá íma káátaraan-inimba sáwí-ininkaamba ésa pósa tigaeyáváí kwéowe.

⁶aaraimó tiꞌnónkáꞌó ímo káátaresamo ésa tiꞌnóntáu káráyuwaaro kwésune. ánivo tiꞌnóntáumo káráyuwaamba tigaeyáváí ésa pósa tiꞌnónkáꞌá káátaaro.

⁷Áánútu asirayánkwáráwáí amápa-tantaakaꞌo kárákwiraiwaimo inteníꞌa kwaaí mirá ésa pósa torupamái máyáamba tiꞌnónkáꞌá íma káátaraawe. Áánútu tuwaiꞌmáákaꞌa kárákwiraisasa tuwaiꞌmááꞌo onteníꞌa aaraí ésa pósa torupamái máyáamba tiꞌnónkáꞌá káátaraawe.

⁸Áánútu aivar-ínímbá awaikó arausandéí úmakaivo kwaaí íma aaraigó arausandéí úmakaiye.

⁹kwaaigó aaraigónkáꞌá ménintavena íma úmakaivo aaraigómá kwaaigónkáꞌá ménintavena Áánútu úmakaiye.

¹⁰mindáyavaiye kwíyómpaken-kwayoꞌnarawa túrankaꞌa máyáantavaiye aarai tiꞌnónkáꞌá káátaaro. tuwánésa sésa tuwaiꞌmááꞌa kárákwiraawe sénááowe.

¹¹ánivo Ísóigo aúrankaꞌa máyáamba aaraí kwaaí tiráváyáawasa pósa íma keyáá kwémaewe.

¹²Áánútu aivar-ínímbá kwaaigó arausandéí úmakaisasa aaraí mésa kwaaí matínkáawasa kwémaemba Áánútu amápa-tantaakona ááimban-iye.

¹³Áánútuntavesa imáyáa ésa torupamái máyáamba aarai tiꞌnónkáꞌó ímo káátaresa námúnaa kwésemba kanaawáꞌi. íya kanaán-iyo. imáyáa oro.

¹⁴kwaásiti ááimba imáyáa éꞌa séꞌa kwaaí miwí tiꞌnóntáu ayáátáákaꞌo kwáíntavesa tigaeyáváí owasá

¹⁵aaraí kentí ayáátáá-tiꞌnontauyavesa aamoí kwéomba Áánútu tímakaisana tiꞌnóntáugo tiꞌnómayaankaꞌa kwégaataiye kwésewe.

¹⁶keinárawapinkembo évakarawaimo tiꞌnónkáꞌó káátamakaantavesamo narúꞌnárúr-áímbó síyaꞌo éꞌa séꞌa kesáá Áánútuna kwaásiya torupamái máyaunasaya óꞌon-oꞌon-daopaꞌa Áánútuna kwaási torupamái máyáamba mirá úndayaanivo óꞌon-aaimba íma kwáyáiye sénaumne. Ísóigontavai imáyáa ésa aráá-tomba naráan-kwasai.

¹⁷sáwíꞌo kwéon-aintaveꞌa simátíménda ísáaro. Áánútuntaveꞌa imáyáa kwéeꞌa torupamái máyáamba íma moórá-morawai kaweꞌá kwéumatinkeꞌa sáwíꞌa kwéumatinkaawe.

¹⁸torupamái máyáampinkembo taaínkaar-umaimo máyáan-aimbo sewaꞌó isáúnda árair-aimban-iye.

¹⁹taaínkaar-umai méꞌa évakarawai óꞌon-imayaa owasá évakarawai óꞌon-imayaa kwéowaꞌa árair-aimbo sen-kwáásí kwéisaawe.

²⁰torupamái máyáamba séꞌa aráá-tomba nánaumne sembánivo Ísóigontaveꞌa íma imáyáa éꞌa aráá-tomba néꞌa

²¹évakarawai kentí naaúmpakembo maimaéꞌo tiráan-tontaveꞌa imáyáa éꞌa kwénaawasa toómbó ímo makáawai táái kwétinkaisasa évakarawai uwoꞌaóꞌ-nómbá kwénesa uwoꞌaóꞌá kwéowaꞌa mirá kwéomba aráá-tomba sáwíꞌa umái kwénaawe.

²²mirámó kwéomba toómbá íma taaínkaar-eꞌa toómbó ímo makáawai timéꞌa sáwíꞌa umátínkáawasa tigaeyávésa ombá mindáyaveꞌa íma aamoí kwéumatinkaumpo sáwíꞌa kwéowe. kentí naaúmpaꞌa toóné noné násuweꞌa torupamái méꞌa Ísóigontaveꞌa imáyáa éꞌa aráá-tomba naaró.

²³Ísóigo simásímakaimba simátímakaunda maarán-áímbán-iye. moóráwai Yútási Ísóigo Ísumba kwená namuro-kwáásíráꞌá íma agaráátínkaronkaꞌa mindóꞌwáámbá Ísu Káráísiti toómbá maisoréna

²⁴Áánútumpaꞌa súwi séna topaména séna mindá kesúman-ivo keinárawataveꞌa ísámai kesúma ayúꞌmaranaumne. miráumai kentávéꞌa imáyáa kwéeꞌa námae íyóro súwasa

²⁵toómbá násúwówana pérétimo mayóntemba ándá-aran-domba kwáyon-anaveumba maisoréna séna mindá kesí naaemán-iye. kesí naaemá keinárawatavena kumínímba póna Áánútu kesé tarúmai máyáawe séna mináúná-áímbá simái tarúmakaiye. maandómbó kwénaamba kentávéꞌa imáyáa kwéeꞌa námae íyóro Ísu Káráísiti siráiye.

²⁶mintóné mindóné kwénaamba kentááyávéna Ísóigo pukáiye-aimba kwésimatimewe. mirá úmae kwéiyiyana Ísóigo marapáꞌá kumíníye.

²⁷miráumai Ísóigontavesa imáyáa ésa aráá-tomba nánáe sésa ombá aivaꞌó ímo kawer-ímáyáámó ésamo úwoimo aráá-tone ándá-aran-done nésamo imáyáamo ésamo úwoisamba iyémó sésamo ésa Ísóigo áúwe naaewé sáwíꞌa íyana sáwí-meyamba tinkáníye.

²⁸mindáyavesa máyáawaina ááimba kawer-ímáyáá ésa taaímbai ísáíyuwesa sáwíꞌo umáímo máyáamba kawer-ímáyáá ésa aráá-tomba nánááowe.

²⁹Ísu Káráísiti kentááyáváíyé séna pukáin-ainkona ááimbo ímo imáyáamo urésamo úwoimo mintóné mindóné kwénaambo éꞌa kesávésa aaivimbá kwíyana Áánútu sáwí-meyamba timíníye.

³⁰keinárawapinkemba évakarawai mirá éꞌa Ísu Káráísiti kentááyáváíyé séna pukáimba íma imáyáa éꞌa aráá-tomba úwoisamba iyé-ímáyáá kwéomba póꞌa évakarawai aamoisáyán-kwáásí máéwasa évakaꞌa tíꞌa iwáí máéwasa évakaꞌa pukáawe.

³¹ánivo máyaundawaina ááimbo imáyáamo kaweꞌó étaamo taainétaamo sáwíꞌo kwéunda arupí kwéundarakaiya Ísóigo sáwí-meyamba íma símísino.

³²ánivo Ísóigo arupí umásinkanintavenaya sáwí-meyamba kwésiminta póna marapá-kwáásímó sáwí-meyambo kwaíkwaiꞌo íním-beyambo timíndaraꞌa miwísé sáwí-meyanta íma simíníntaawe.

³³kesí kwaásiyono. mináíntávéꞌa imáyáa éꞌa toómbá néꞌa Ísóigontaveꞌa imáyáa éꞌa aráá-tomba nánááontaveꞌa torupamái máyáamba moórá-morawai ténááontaveꞌa timuꞌmaréꞌa méꞌa aráá-tomba naaró.

³⁴tááimo kwétinkainaꞌo éꞌa kentí naaúmpaꞌa toómbá násuweꞌa torupamái méꞌa toómbá nánááowe. mirámó íyanamo éna Áánútu sáwí-meyamba íma timíníye. óꞌon-aintavaigwaraꞌo agaimái sísaa-uraan-aimba kentópaꞌa kweémeꞌa koméꞌa simátimenaumne.