Read Kosena 1 Kórínti 12 Bible Online

1 Kórínti 12 - Kosena bible

1 Kórínti 12

¹kesí kwaásiyono. óꞌon-oꞌom-bayaimo mayánááontavena Áánútun-amanko asirayámbá kwétimimba íma ísámai usúkáavo séꞌa simátíménda ísáaro.

²Áánútuna aambó ímo kwakónkaꞌa Sáátáánigo tátorena tavisúwaꞌa sáwí-amba kwaréꞌa kwaántá-kwaasi kampar-ásíráyánkwáráwáí íma aaí kwésewaiti imáyáa mósá makáamba ísaraawe.

³Áánútun-amanko keinárawate íma máyowaꞌa sáwí-amba kwakáantaveꞌa imáyáa éꞌa maarán-áímbá simátíménda ísáaro. évakaraiwaimo sésamo Ísu kárákwiraiwaima iyémó kwésemba Áánútun-amanko miwí tirumpimbá máyáiwai kwésevo évakarawaimo sésamo Áánútu Ísumba sáwíꞌa umánkaniyemo kwésemba Áánútun-amanko miwí tirumpimbá íma máyáiye.

⁴Áánútuna kwaási-iꞌo owáímá kwená mayáí kwémayaantavena Áánútun-amankoma óꞌon-oꞌon-asirayamba kwétimimba mimbóráwáí kwétimiye.

⁵Áánútuna mayáí óꞌon-oꞌom-bayai kwémayaantavesa Ísóigo Ísuntavesa ísámai mimbáyáí kwémayaawe.

⁶Áánútuna mayáí kwémayaantavena kwemá óꞌon-oꞌon-asirayamba kwétimisasa mimbáyáí kwémayaawe.

⁷amáparawai kaweꞌá umátinkanaaontavena Áánútun-amanko moórá-morawai tirumpimbá ména Áánútuna asirayámbá kwéagaraatinkaiye.

⁸Áánútun-amanko moórá-morawai kawer-ímáyáá kwétimisasa mináímbá kwésimatimewe. Áánútun-amanko moórá-morwai ímo ísaraan-aimba kwésimatimisasa kwésimatimewe.

⁹Áánútun-amanko moórá-morawai imáyáa kwétimisasa Áánútuntavesa asiramái mésa sésa áraiꞌa Áánútu siráiniꞌa íníye kwésewe. Áánútun-amanko moórá-morawai asirayámbá kwétimisasa tíꞌo imbá kwéasovamatinkaawe.

¹⁰Áánútun-amanko moórá-morawai asirayámbá kwétimisasa ímo awánaraam-bayaigwaraꞌa kaweꞌá umái kwémayaawe. Áánútun-amanko moórá-morawai imáyáa kwétimisasa Áánútu simátímakain-aimba kwésimatimewe. Áánútun-amanko moórá-morawai imáyáa kwétimisasa asirayánkómbá taainésa sésa moórá Áánútun-amankompinken-asirayamban-iye sésa moórá kwaántá-kwaasiti asirayámbán-iye kwésewe. Áánútun-amanko moórá-morawai imáyáa kwétimisasa íma ísaraan-aimpinkemba kwésewe. Áánútun-amanko moórá-morawai imáyáa kwétimisasa miwímó siráan-aimba miwígwáráꞌá íma ísaraan-aimpinkemba pósa kwántámai kwésewe.

¹¹Áánútun-amanko kweyáá kwená imáyáavinkemba mirá éna moórá-morawai óꞌon-oꞌon-asirayamba kwétimiye. Ísóigo áúwawaakaamba umáíya máyaunda-kwasai.

¹²moórá-aimba sénaumpo ísáaro. kwaási túvimba sáwíva-tantaaꞌa kwáyáimba mimbórá-áúmán-iye. mirámó intembá kesáá Ísu Káráísitina kwaásiya sáwíva-kwaasimo máyaundaya kweséya tarúmai mimbórá-kwáásíráámbá umáíya máyaumne.

¹³évakarawaiya Yútaa-kwaasiya únasaya évakaꞌa óꞌonkaa-kwaasi owasá évakaꞌa meéyámbakaawaiti mayáí kwémayaan-kwaasi owasá évakaꞌa úwoimo máyáan-kwaasi owaná Áánútu kwenamambá aiꞌmarówana kentáásirumpimba kumbéna tarúsinkenaya mimbórá-kwáásíráámbá kwéumasinkaiye.

¹⁴kesáá mimbórá-kwáásíráámbá umái máyaundaya imáyáa éꞌa maarán-áímbó simátíménda ísáaro. mimbórá kúwawaapimba sáwíva-tantaaꞌa kwáyáimba

¹⁵aísamaigomo sénamo kemá íma ayáámba únda póꞌa íma mimbórá áúvinkemba úne sínímba mimbórá áúvimba kwáyáiye.

¹⁶áákomo sénamo kemá íma aúramba únda póꞌa íma mimbórá áúvinkemba úne sínímba mimbórá áúvimba kwáyáiye.

¹⁷amápa kúwawaapaꞌo aúrane suꞌmaimo kwáyáinkakai íma ááꞌa ísáisino. amápa kúwawaapaꞌo ááre suꞌmaimo kwáyáinkakai amápa-kwiyumba íma ísáisino.

¹⁸ánivo Áánútu kwená imáyáavinkemba amápa kúwawaaꞌa úmakena amápa-tantaaꞌa kwenamááre suꞌmai maꞌmaéna kuráiye.

¹⁹áúwawaapinkembo mimbórá-yántááꞌó kwáyáinkakai áúwawaaꞌa íma kwáyáisino.

²⁰amápa-tantaaꞌa kwáyáimbanivo mimbórá kúwawaaꞌa umái kwáyáiye.

²¹miráumai aúranko ayáánkontavena íma kanaán-umai séna emó ímo máyaandarakai úwoi máúsino íma sínana aꞌnónkó aísamaigontavena íma kanaán-umai séna emó ímo máyaandarakai úwoi máúsino íma síníye.

²²miráumai túwawaapinken-tantaataveta séta aamoisayámbán-iye kwésundaya ímo kwáyáinkakai áúwawaaꞌa íma kaweꞌá umái kwáyáisino.

²³túwawaapinken-tantaatavetaamo séta úwoisamban-iye kwésundaya kaweꞌá umáíya kwégarakwiyundayaawe. avoraꞌá íma agaráátínkaraunda-yantaaꞌa aúpáꞌá makéta kwégarakwiyundayaawe.

²⁴avoraꞌá kwáyáin-tantaaꞌa íma kwégarakwiyundayaawe. áúwawaapinken-tantaako amápaꞌa kaweꞌá umái mayáí maéna moórá-mora-yantaako kwenáúra kwenauraꞌa kárákwiyinintavena Áánútu kwenamááramaaꞌa maréna úwoisamban-iye kwésunda-yantaaꞌa kwégarakwiyiye.

²⁶áúwawaapinkembo moórá-yantaakomo áíꞌo ínana amápa kúwawaapakemba áíꞌa umásaniye. áúwawaapinkembo moórá-yantaako kaweꞌó ínana amápa kúwawaapakemba kaweꞌá umásaniye.

²⁷túwawaataveꞌo súnda-ainkona ááimba maarán-áímbán-iye. keinárawaꞌa Ísu Káráísiti áúwawaakaamba umái méꞌa moórá-morawai kwenaíyayaankaane aúrankaane mirán-tántáákáámbá umái máyáawe.

²⁸Áánútu kwená kwaási moórá-morawai mayáí tiména mirám-báyáí mayánááontavena asirayámbá kwétimena kwená aantá-kwaasi aivaꞌá usásintinkena miwí tínaaemba simátímakain-aimba simátimenaaowai usásintinkena miwí tínaaemba kwená aambá agaráátinkanaaowai usásintinkena miwí tínaaemba ímo awánaraam-bayai mayánááowai usásintinkena tíꞌo kwéin-kwaasimo asóvamatinkanaaowai usásintinkena miwí tínaaemba túwaꞌnaa ónááowai usásintinkena miwí tínaaemba óꞌon-oꞌom-bayairaꞌo kárákwiyonaaowai usásintinkena miwí tínaaemba óꞌon-oꞌon-aimbo ímo ísaraan-aimpinkembo sénááowai usásintinkena mirá ónááowai usásintinkavaꞌa kuráiye.

²⁹Áánútu aantá-kwaasiti mayáí tímakaimba amáparawai íma mirám-báyáí máyáawasa évakarawai máyáawasa Áánútu simátímakain-aimba simátímémba amáparawai íma mirám-báyáí máyáawasa évakarawai máyáawasa Áánútuna aambá kwéagaraatinkaamba amáparawai íma mirám-báyáí máyáawasa évakarawai máyáawasa ímo awánaraam-bayai kwémayaamba amáparawai íma mirám-báyáí máyáawasa évakarawai máyáawasa

³⁰Áánútuna asirayándéí tíꞌo kwéimbo asóvamatinkaamba amáparawai íma mirám-báyáí máyáawasa évakarawai máyáawasa óꞌon-oꞌon-aimba ímo ísaraan-aimpinkembo kwésemba amáparawai íma mirá sewasá évakarawai sewasá mináínkóná ááimbo kwántámai kwésemba amáparawai íma mirá owasá évakarawai kwéovo Áánútu kwená imáyáavinkemba mirán-ásíráyámbá kwétimiye.

³¹Áánútu kwétimin-asirayamba mayánáemo kwésemba imáyáa éꞌa séꞌa Áánútuna mayáí usáyaaitamai-mayai mayánáemo séꞌa tiyáántán-kwimai mayáí máyáaro. mináímbá kemá imáyáa éꞌa séꞌa kawer-áímbán-ivo kwaásimo tirumbó tímémba minánkó amápar-ankomba usáyaaitaraimba minánkóná ááimba simátíménda ísáaro.