Read Kosena 1 Kórínti 14 Bible Online

1 Kórínti 14 - Kosena bible

1 Kórínti 14

¹kwaásimo tirumbó tímén-amba asiramái kwaréꞌa Áánútumo kwétaain-timin-asirayamba mayánáe séꞌo Áánútumo simátímakain-aimbo kwésimatimemba anón-tantaaꞌa imbá póꞌa minásíráyámbá mayánáe seró.

²Áánútun-amankomo asirayámbó kwétimisasamo óꞌon-aimbo ímo ísaraan-aimpinkembo kwésemba íma kwaásiyavesa kwésevo Áánútuntavesa sésa kwaásimo mináínkóná ááimbo ímo ísaraantavesa kwaásiyavesa íma kwésewe. Áánútun-amanko asirayámbá kwétimisasa aúpár-áímbá kwésevo

³évakarawai Áánútumo simátímakain-aimbo kwésimatimemba asiramái arupí umái kaweꞌá kwéumatinkaamba mindáyaveꞌa séꞌa Áánútumo simátímakain-aimbo kwésimatimemba anón-tantaaꞌa imbá póꞌa minásíráyámbá mayánáe seró kwésune.

⁴óꞌon-aimbo ímo ísaraan-aimpinkembo kwésewai kesávésa simái kwéasiraavo Áánútumo simátímakain-aimbo kwésimatimewai Áánútuna kwaási amápaꞌa asirayámbá kwétimewe.

⁵Áánútun-amankomo asirayámbó kwétimisaꞌo óꞌon-aimbo ímo ísaraan-aimpinkembo sénááomba siráái kwétaivo Áánútumo simátímakain-aimbo kwésimatimen-asirayamba maéꞌa simátimenaaomba ávááraumai siráái kwétaiye. torupamái máyáamba óꞌon-aimbo ímo ísaraan-aimpinkembo kwésemba mináímbó kwántámai síníwaimo ímo ménamo simátiminasamo ésa mináínkóná ááimba íma kaweꞌá umái íséwana mináínkó íma túwaꞌnaa íníye. miwí tááigo íma túwaꞌnaa íníntavesa Áánútumo simátímakain-aimbo kwésimatimewasa avoraꞌá kwésimatimentavesa miwí óꞌon-aimbo ímo ísaraan-aimpinkembo kwésewai usáyaaitaraawe.

⁶kesí kwaásiyono. kentópaꞌa koméꞌa óꞌon-aimbo ímo ísaraunda-aimpinkembo sendamó éꞌa íma isáíyana kesááigo íma túwaꞌnaa ínívo Áánútumo paárurain-ainaꞌi. ímo ísaraunda-aimbo Áánútu simásímakain-ainaꞌi. Áánútumo simásímakain-ainaꞌi. Áánútuna aambó kwáráan-ainaꞌi. mirán-áímbó avoraꞌó simátíméndamo éꞌa isáíyana kesááigo túwaꞌnaa íníye.

⁷ontóímó ímo kaweꞌó umáímo sínasamo ésa íma ísámai kaweꞌá ónááovo kaweꞌó umáímo sínasamo ésa ísámai kaweꞌá ónááowe.

⁸moóráwaimo ímo kaweꞌó umáímo aayamáímo sínasamo ésa íma isésa tayorupanááowe.

⁹miráumai torupamái máyaiyampimba óꞌon-aimbo ímo ísaraan-aimpinkembo síyaꞌo éꞌa mináínkóná ááimba íma isánááomba keáínkáámbá sénááowe.

¹⁰amápaꞌ-maravaꞌa sáwíva-kwaasi mésa óꞌon-oꞌon-aimba kwésemba mináínkóná ááimba kwáyáivo

¹¹moóráwai kwenááivinken-aimba sínaꞌa séꞌa imáyáa éꞌa óꞌon-daopaken-kwaasiye senaná kentávéna imáyáa éna óꞌon-daopaken-kwaasiye síníye. mirámó kwésen-ainko íma túwaꞌnaa íníye. miráumai torupamái máyáamba óꞌon-aimbo ímo ísaraan-aimpinkembo kwésemba mináínkó íma túwaꞌnaa íníye.

¹²Áánútun-amankomo kwétaain-timin-asirayamba mayánááomba aamoí éꞌa póꞌa Áánútuna kwaási kaweꞌá umátínkáin-asirayamba tiráái kwétainaꞌa mairéꞌa Áánútuna kwaási kaweꞌá umátínkáaro.

¹³mindáyaveꞌa óꞌon-aimbo ímo ísaraan-aimpinkembo kwésewai Áánútumpaꞌa áísaa íyana mináímbó kwántámaimo simátimenaaontavena asirayámbá timíníye.

¹⁴Áánútun-amankomo asirayántáámó símakaisataamo óꞌon-aimbo ímo ísaraunda-aimpinkembo Áánútuntaveta námúnaa kwésundaya sóikakenta kwésumpo kentáásí imáyáao úwoisankaamba umái kwémaiye.

¹⁵mindáyaveta maaráyá ónaumne. Áánútun-amankomo asirayántáámó símakaimba óꞌon-aimbo ímo ísaraunda-aimpinkenta Áánútumpata námúnaa séta kentáá sááivinkenkwarata sénaumne. óꞌon-aimbo ímo ísaraunda-aimpinken-ima séta kentáá sááivinken-igwarata sénaumne.

¹⁶óꞌon-aimbo ímo ísaraan-aimpinkembo Áánútumpaꞌa námúnaa kwéseꞌa kwenáwíꞌa mósá máráamba moóráwaimo úwoi-kwaasimo miráwaina ááimbo ímo awánaraiwaimo keinárawaꞌo torupamáímo máyáampimbo ménamo éna kwésen-ainkona ááimba íma ísaraindayavena póna íma kanaán-umai áraitavaiye síníye.

¹⁷óꞌon-aimbo ímo ísaraan-aimpinkembo Áánútumpaꞌo námúnaamo kwésemba kaweꞌán-ivo mináínkóná ááimba íma ísaraindawaimba mináínkó íma asirayámbá amíníye.

¹⁸óꞌon-aimbo ímo ísaraan-aimpinkembo kwésemba évaka-tawai kwésevo kemá óꞌon-aimbo ímo ísaraunda-aimpinkembo kwésunda sáwíva-tawai kwéseꞌa mindáyaveꞌa Áánútumpaꞌa súwi kwésune.

¹⁹ánivo Áánútuna kwaási torupamái máyáamba óꞌon-aimbo ímo ísaraunda-aimpinkembo ayáátáár-aimbo kwésunda sáwíyan-tantaaꞌan-ivo ísaraan-aimpinkembo asirayámbá timínín-aimbo ákí-aimbo kwésunda mindá anón-tantaaꞌan-iye.

²⁰kesí kwaásiyono. iyámpóímo ímo kawer-ímáyáámó ontembá íma mirá éꞌa táákaevayan-kwaasimo onten-ímáyáá oró. umarambó ímo sáwí-imayaamo ontembá mirán-oro.

²¹naaóváꞌá Áánútun-aai aúváí-kwandaaivimba agaimaréna sénaÍsóigo séna kesí kwaási kesáái íma ísaraamba póꞌa simátimenaumne. óꞌon-aimbo kwésewai simátíménasa miwí tááivinkemba simátimesa sáwíꞌa umátinkaiyasa pósa kentávésa íma imáyáa ésa kesáái íma isánááowe agaimaréna siráiye.

²²naaóváꞌá Áánútu mirá éna kwená kwaási kwenáái ímo ísarowai kwená asirayámbá agaráátinkomba awánaraantemba Áánútun-aaiyavesa íma áraire kwésiyawai óꞌon-aimbo ímo ísaraan-aimpinkembo kwésen-aimba isésa sésa Áánútuna asirayámpínkémbá kwésewe sénááowe. ánivo Áánútu simátímakain-aimba kwésimatimemba Áánútun-aaiyavesa áraire kwésiyawai isésa sésa Áánútuna asirayámpínkémbá mirá kwésewe sénááowe. ánivo Áánútun-aaiyavesa íma áraire kwésiyawai isésa íma mirán-áímbá kwésewe.

²³Áánútuna kwaási torupamái máyaiyampimba amáparawaimo óꞌon-oꞌon-aimbo ímo ísaraan-aimpinkembo síyasamo úwoi-kwaasimo Áánútun-aaiyavesa ímo áraire síyan-kwaasimo usávéꞌmaimo isésamo ésa maawí uwoꞌaó-kwáásímán-owe sénááowe.

²⁴ánivo amáparawaimo Áánútumo simátímakain-aimbo avoraꞌó síyasamo úwoi-kwaasimo Áánútun-aaiyavesa ímo áraire síyan-kwaasimo usávéꞌmaimo isáíyanamo éna mináínkó tirumbá airaráínasa sáwíꞌa uráumne sésa

²⁵miwítí aúpá-sáwí-ímáyáá avoraꞌá mémaresa Áánútu aúrankaꞌa kívairesa kwená imáyáa mósá marésa sésa áraiꞌa keinárawapimba Áánútu máyáiye sénááowe. Áánútuntavai imáyáa ésa torupamái maíyankaꞌa arupí umái máéro siráin-kwasai.

²⁶kesí kwaásiyono. kemó súnda-ainkona ááimba maarán-áímbán-iye. Áánútuntaveꞌa imáyáa éꞌa torupamái maíyankaꞌa moóráwai maarán-íyá sénaumne sínana moóráwai Áánútun-aaivinken-aimba simátiminana moóráwai Áánútumo agarááránkaraimba simátiminana moóráwai óꞌon-aimbo ímo ísaraan-aimpinkemba sínana moóráwai mináímbó kwántámai sínaꞌa miráumai Áánútuna kwaási asirayámbá kwétimentavai mirá úmaeꞌa íyóro.

²⁷óꞌon-aimbo ímo ísaraan-aimpinkembo sénááombo éꞌa kaumbo-káé-kwaasiye suꞌmai séꞌa aivaꞌá moóráwai sínda kwántámai simásuwainana kwenánaaemba moóráwaimo sínda kwántámai simásuwainana kwenánaaemba moóráwaimo sínda kwántámai simásuwainaꞌa mirá sénááovo

²⁸mináímbó kwántámaimo síníwaimo ímo máyainaꞌo éꞌo óꞌon-aimbo ímo ísaraan-aimpinkembo kwésewai amáparawai túrankaꞌa íma séꞌa imáyáavinkemba Áánútuntaveꞌa seró.

²⁹Áánútumo simátímakain-aimbo kwésimatimemba kaumbo-káé-kwaasimo usásimbaimo kwésimatimemba évakarawai iséꞌa mináímbá taaímbai kwéisaawe.

³⁰mináímbó ísáan-kwaasivinkembo Áánútumo moóráwaimbo simáminanamo éna kwésimatiminda-kwaasigo kwenáái ánásainana moóráwai usásinena simátiminiye.

³¹Áánútumo aaí simátímakaiwai amápaꞌa séꞌa moórá-morawai moórá-mora-tawai símae iyéꞌa póꞌa amáparawai iséꞌa asirayámbá mayánááowe.

³²Áánútumo simátímakain-aimbo kwésimatimewai kwésemba kentí imáyáarare suꞌmai kwégarakwiyovo mirán-oro.

³³kawer-ímáyáámó kwéeꞌo paru umáímo máyáamba Áánútumba aráái kwétaivo simátímén-aimba kárákwiyoro. Áánútuna kwaási amápaꞌ-naopaꞌo torupamáímo máyáamba maará kwéowe.

³⁴torupamái máyáampinkemba aaraí íma aaí kwésewe. Áánútun-aai aúváí-kwandaaivinkembo siráintemba aaraí íma kárákwiyonaaowe.

³⁵mindáyaveꞌa torupamái máyáampinkemba aaraí aaí sevó sésa moórá-ainkona ááimba tísaa ónáe sésamo ésa miwítí naaúmpaꞌa tuwaiꞌmááꞌa tísaa ónááowe.

³⁶kentí imáyáavinkembo mirámó kwéomba Áánútun-aai keinárawapinkene suꞌmai íma paáruraisaꞌa keináraware suꞌmai ímanivo óꞌon-oꞌom-baravaken-kwaasigwaraꞌa ísaraavo miwímó torupamáímo mésamo ontembá mirán-oro.

³⁷keinárawapinkemba évakarawai kesávésa sésa Áánútumo siráin-aimba ísaraundawai úne kwésiyawaiye évakarawai kesávésa sésa Áánútu asirayámbá símakaiwai úne kwésiyawaiye mirámó kwésewai maanáúváímó agaimáímo timúndavimba awánéꞌa séꞌa mináímbá Ísóigo asiramái siráin-aimban-iye sénááovo

³⁸maanáúváímó agaimáímo timúndamo ímo iséꞌo éꞌa miwí tááigwaraꞌa íma ísáaro.

³⁹kesí kwaásiyono. Áánútumo simátímakain-aimbo simátimemba asirayán-ímáyáá éꞌa simátímaꞌmae iyéꞌa óꞌon-oꞌon-aimbo ímo ísaraan-aimpinkembo kwésemba íma aambá áúmbaraaro.

⁴⁰ánivo amápar-aimbo kwésemba íma sáwívar-aimba séꞌa paru umai arupí umai máéro.