Read Kosena 1 Kórínti 15 Bible Online

1 Kórínti 15 - Kosena bible

1 Kórínti 15

¹kesí kwaásiyono. áséi-kwasai kosimátímakaunda-aimba moórágwaraꞌa simátíménda ísáaro. mináséí-kwásáíyávéꞌa áraire séꞌa tátokeꞌa asiramái máyáawe.

²asiramáímo tátoꞌmae iyéꞌo éꞌa kawer-ámbá kwaꞌmaé iyónááovo tóikakene suꞌmai áraire siráambo éꞌa kawer-ámbá íma kwaꞌmaé iyónááowe.

³aivaꞌá Áánútu mináímbá simásimuwaꞌa kembá simátímakaunda anón-aimba póna Ááúnútun-aai aúváí-kwandaaivimba agaimarésa siráantemba sáwí-imayaaya maisiyuwáníntavena Ísu Káráísiti puwúwasa

⁴utámárówana kaeꞌ-nóꞌwáámbá kwaúwana Áánútu pukáimpinkemba usásinankaraiye. mináímbá Áánútun-aai aúváívimba agaimarésa siráawe.

⁵Ísu Káráísiti pukáimpinkemba usásinena Pítaa aúrankaꞌa paáréna kwená kwayó-kwáásí túrankaꞌa paáréna

⁶moórá-tawai sáwíva-kwaasi kwesé kwénaauwai 500 kwaasi túrankaꞌa paáruraiye. minkwáásívínkémbá sáwívarawai úwoi túvamai máyáawasa évakarawai pukáamba minkwáásí túrankaꞌa paáréna

⁷Yémési aúrankaꞌa paáréna kwená aantá-kwaasi amáparawai túrankaꞌa paáréna

⁸naaémba kemá Póro kesúrankaꞌa paáréna Ísu Káráísiti kwená kwaási-iꞌa umásinkainkwae-imayaa íma uráunda kembá kwená kwaási-iꞌa umásínkaraiwai súrankaꞌa paáruraiye.

⁹ááéma Ísu Káráísitina kwaási sáwíꞌa umátínkaraunda póꞌa Ísóigona aantá-kwaasivinkemba kemá kíto-kwaasi úne. íma kanaán-uraunda pósa kentávéꞌa Ísóigona aantá-kwaasima óne sembá uwó-áímbá kwésewe-imayaa kwéune.

¹⁰ánivo Áánútu úwoi súwaꞌnaa uráimba póꞌa Áánútumo kesáái simátiminkwae séna siꞌmákaiwai ówánana kwemá úwoi súwaꞌnaa úwaꞌa íma úwoi méꞌa asirayám-báyáí mayááwánana kesí mayáígó óꞌowiti mayáígómbá usáyaaitaraivo keyáá mimbáyáí íma mayááwánana Áánútu súwaꞌnaa ena kesé máyowaꞌa mimbáyáí mairáumne.

¹¹kemó áséi-kwasaimo simátimewanda-aimba iséꞌa miwímó simátímún-aimba mimbórá-áímbá póꞌa iséꞌa áraire siráawe. púwón-kwaasi usásinanaaon-kwasai.

¹²Áánútu Ísu Káráísitimba pukáimpinkemba usásinankarain-ainta simátimundaya keinárawapinkemba évakarawai séꞌa púwón-kwaasi íma usásinanaaowe kwésemba nóra séra kwéseo.

¹³púwómpinkembo ímo usásinanaaonkakai Áánútu Ísu Káráísitimba pukáimpinkemba íma usásinankaraisino.

¹⁴Áánútumo Káráísitimbo pukáimpinkembo ímo usásinankarainkakai simátimunda-ainta úwoisankaamba umágwisaꞌa minúwóísánkáán-áíntávéꞌa áraire sesinó.

¹⁵púwómpinkembo ímo usásinanaaonkakai Áánútu Káráísitimba pukáimpinkemba íma usásinankaraisino. Áánútu Káráísitimba pukáimpinkemba usásinankaraiyemo simátimundaya ánivo mináímbó kampar-áímbó inkákáí Áánútumo uráintaveta kampar-áíntá simátiyuwausino.

¹⁶púwómpinkembo ímo usásinanaaonkakai Áánútu Káráísitimba pukáimpinkemba íma usásinankaraisino.

¹⁷Áánútumo Káráísitimbo pukáimpinkembo ímo usásinankarainkakai úwoi-aintaveꞌa áraire sewaná sáwí-imayaa kempímbá úwoi kwáyáisino.

¹⁸moórá-ainkwaraꞌa simátimenaumne. Áánútumo Káráísitimbo pukáimpinkembo ímo usásinankarainkakai Káráísitiye tarúmaimo mésamo pukáawai pukáampinkemba íma usásinesa Áánútuna egwaaꞌá íma maésa sáwí-ayampaꞌa máésino.

¹⁹marapáꞌá máyaundaraꞌa séta púwóndavinkemba usásineta kwíyómpaꞌa Ísu Káráísitiye ménaundaya amuꞌmaréta máyaumne-aimbo kampar-áímbó súndarakaiya marapá-kwáásí kentáá suwíráái sésa tirumbá umásínkáasino.

²⁰árair-aimba maarán-áímbán-iye. Áánútu Ísu Káráísitimba pukáimpinkemba usásinankaraiye. púwón-kwaasivinkemba aivaꞌá kwemá usásinkaimba pósa naaémba púwón-kwaasi usásinanaaowe.

²¹aiva-kwáásígó áwíꞌa Áándamu kwemá sáwíꞌa uráimba pósa púwón-amba amáparawai kwégwaraavo moórá-kwaasigo áwíꞌa Káráísiti kwemá kaweꞌá uráimba póna amáparawai púwómpinkemba usásintinkaniye.

²²amáparawai Áándamun-aísaavutantamba uráundawai póta kwévuwundayaanivo Ísu Káráísitina kwaásiya póta púwóndavinkemba usásinanaundayaawe.

²³Áánútu siráin-kanaa tínata púwóndavinkemba usásinanaundayaawe. aivaꞌá Áánútu Káráísitimba pukáimpinkemba usásinankaraimba póna Káráísiti marapáꞌá kumíndaraꞌa Áánútu Káráístina kwaásiya púwóndavinkemba usásisinkainanaya

²⁴mindá ánásainda-kanaa Ísu Káráísiti kárákwiyinana Áánútu sínana Káráísiti kwená namuro-kwáásí usáyaaitena óꞌowimo sáwí-mayairaꞌo kárákwiraam-bayaiye óꞌon-oꞌo-sawi-asirayane ánásasuwena púwón-amba ánásasuwena mirámó índa kwená namuro-kwáásítí asirayámbá ánásasuwena Áánútuntavena séna kesivoó amápa-tantaakaꞌa kárákwiyuwo síníye.

²⁷Áánútun-aai aúváí-kwandaaivimba agaimaréna sénaÁánútu kwembá amápa-tantaaꞌausáyaaitamai-iꞌa umánkaraiye agaimaréna siráivo Káráísiti Áánútumba íma usáyaaitaniye. Áánútu sínana Káráísiti amápa-tantaaꞌa usáyaaitaniye.

²⁸Áánútu Káráísitimba amápa-tantaaꞌa usáyaaitamai-iꞌa umánkaraindaraꞌa Káráísiti Áánútu ááninko Áánútuntavena séna emá amápa-tantaaꞌa usáyaaitamai-iꞌa umásinkaandawai po kenkáꞌá kárákwiyiniyone sínana Áánútu amápa-tantaaꞌa kárákwiyiniye.

²⁹évakarawai sésa púwómpinkemba íma usásinanaaowe kwésembanivo pukáan-kwaasiyavesa imáyáa ésa monoꞌ-nómbá pékaawe. púwómpinkemba íma usásinanaaowe-aimbo árair-aimbo inkákáí pukáan-kwaasiyavesa íma imáyáa ésa nombá péráasino.

³⁰púwóndavinkembo ímo usásinanaetaraiya moórá-mora-naopaꞌa sínkamonae kwéompaꞌa áséi-kwasai kosimátímaꞌmaeꞌa íma nááúsino.

³¹kesí kwaásiyono. keináraware kewé kentáásí Ísóigo Ísu Káráísitiye tarúmai méta keinárawataveꞌa aamoí kwéunda mirámó áraiꞌo úndantemba aasiyaasi-táwai imáyáa éꞌa séꞌa ívékaamba sínkamiyaꞌa púwóno-imayaa kwéunda mindágwaraꞌa árair-aimban-iye.

³²púwómpinkembo ímo usásinanaaonkakai kemá kwaásiti imáyáavinkemba séꞌa aváá-kwánkómó kwaási vándaivo sésamo kwáráantemba kembá miráráámbó kwéumasinkaamba maankáꞌá Évésasi-naopaꞌa máyaunda anón-umbai-yantaaꞌa kesópaꞌa tisaꞌá anóm-bayai kwémayaunda úwoiyaveꞌa kwéune súsino. púwómpinkembo ímo usásinanaaonkakai kwaásiti imáyáavinkemba kwésentemba mirá séta aaváyaa puwónaunda póta ívéꞌa kawe-tómbá néta sirááímo táínda-ita ónaumneya súsino.

³³púwómpinkemba íma usásinanaaowe kwésemba minkámpár-áíntávéꞌa árair-aimban-iye sevó séꞌa simátíménda-aimba iséꞌa kárákwiyoro. évakarawai áraiꞌa sésa sáwíꞌo kwéon-kwaasiyemo máyáambo éꞌa kawer-ámbá ivátuweꞌa sáwí-amba kwaránááowe kwésevo

³⁴púwómpinkemba íma usásinanaaowe minkámpár-áíntávéꞌa sáwí-imayaawe sáwí-mayaiye ivátuweꞌa kawer-ímáyáá oró. mirá ónááontaveꞌa séꞌa keinárawapinkemba évakarawai Áánútunopaꞌa íma tiráawe kwésune. púwómpinkembo usásinanaaomba kwíyómpaꞌo ménaaon-kuwawaaꞌan-iye kwaasái.

³⁵púwómpinkemba íma usásinanaaowe-imayaa éꞌa sísaa eꞌa séꞌa púwón-kwaasi nóra umáíya usásinesawa nóran-tuwa maꞌmái usásinanaaoo-aimbo

³⁶sísaa omba sáwí-imayaavinken-aimban-iye. puwíyampinkembo usásinanaaomba maaráráámbá uráivo iséꞌa kígau-anayumpaꞌa imáyáa oro. ayumbá uꞌmáráawana mináyúnkó ímo úwoi áruma kwiréna aáyánkarena naaémba áruma kwégwiraiye.

³⁷toómbá ákákesa naíyampinkemba íma óꞌa kwéuꞌmaraavo ayumbá mairésa kígau úmáráawana óꞌomba áruma kwikéna kwéiyiye.

³⁸Áánútu sisaná moórá-mora-anayumpinkemba áruma kwikéna kwéanon-imba Áánútu kwená imáyáavinkemba amápa-tomba áꞌon-aꞌon-augwara-tomba makáivo

³⁹amápaꞌo máyáamba mimbórá kúwawaaꞌa íma maréna kwaási óꞌon-kugwaraꞌa tinkéna kwaí-kwaamba óꞌon-kugwaraꞌa maréna numamá óꞌon-kugwaraꞌa maréna noyááꞌa óꞌon-kugwaraꞌa makáiye.

⁴⁰kwíyómpaꞌa óꞌoran-tantaaꞌa kwáyáísana marapáꞌá óꞌoran-tantaaꞌa kwáyáísana kwíyómpaꞌo kwáyáimpimba óꞌoran-kanaagune kwáísana maramó kwáyáinkaꞌa óꞌoran-kanaagune kwáísana

⁴¹aaváúvímbá óꞌora-sagayamba kwáísana kwíyómpimba óꞌora-sagayamba kwáísana okómpímbá óꞌon-oꞌo-sagayamba kwáísana mirá umásaraiye.

⁴²mirámó intembá púwómpinkembo usásinanaaomba maará ónááowe. púwómbo kwéutamaraan-kuwawaaꞌa ánásanivo mimpínkémbá usásinanaaon-kuwawaaꞌa kwaíkwaiꞌa íníye.

⁴³kwéutamaraan-kuwawaaꞌa aamoisáyán-kúwawaaꞌa sáwí-kuwawaaꞌan-ivo púwómpinkemba usásinanaaon-kuwawaaꞌa asirayán-kúwawaaꞌa kawe-kúwawaaꞌan-ivo

⁴⁴kwéutamaraan-kuwawaaꞌa marapáꞌó máyáan-kuwawaaꞌan-ivo púwómpinkembo usásinanaaomba kwíyómpaꞌo ménaaon-kuwawaaꞌan-iye. marapáꞌó máyáan-kuwawaaꞌo intembá kwíyómpaꞌo ménaaon-kuwawaaꞌa kwáyáiye.

⁴⁵mindáyavena naaóváꞌá Áánútun-aai aúváí-kwandaaivimba agaimaréna sénaÁánútu aiva-kwáásígó áwíꞌa Áándamumba umánkaraimba úwauwa kwéena maínin-kwaasi umánkaraiye agaimaréna siráiye. naaén-kwaasigo áwíꞌa Ísu Káráísiti kwaásimo aúnáiꞌo umáímo maíꞌmaiꞌo ónááon-amba kwikáiwai paáruraiye.

⁴⁶kwíyómpaꞌo ménaaon-kuwawaaꞌa íma aivaꞌá paáruraivo marapáꞌó máyáan-kuwawaaꞌa aivaꞌá paáruraiye.

⁴⁷Áánútu aiva-kwáásígómbá maranéí úmarowana naaén-kwaasigo Ísu Káráísiti kwíyómpakemba kunkáiye.

⁴⁸Áándamumbo maranéímó úmakain-kuwawaaꞌo kwáyáintemba amápa-kwaasi mirán-kúwawaaꞌa kwáyáivo Káráísiti kwíyómpaken-auwawaaꞌo kwáyáintemba kwená kwaási mirán-kúwawaaꞌa kwéniye.

⁴⁹Áánútumo maranéímó úmakain-kwaasiraambo úndantenta Káráísiti kwíyómpakewai intentá ónaumne.

⁵⁰kesí kwaásiyono. simátimeꞌa séꞌa Áánútumo kwíyómpaꞌo kárákwiraipaꞌa marapákén-kúwawaakwaraꞌa íma máyaiyana kwaíkwaiꞌo ínín-tantaaꞌo kwáyaindavaꞌa ánásanin-tantaako íma mimpímbá kwéniye kwésune.

⁵¹Áánútumo aúpáꞌó makénamo agaráátínkarain-aimbo simátíménda ísáaro. amápata íma puwéta úwoi méta súwawaata óꞌon-kuwawaata auvínínta

⁵²mimbórá-táwai kwíyómpakemba uwíremba sínana avekáámbó tawáombo intembá avekáámbá púwón-kwaasi usásintinkainasa maíꞌmaiꞌa íyata súwawaata óꞌon-kuwawaata auvíníye.

⁵³marapáꞌó máyaunda-suwawaata puwónaunda-suwawaatan-ivo kwíyómpaꞌo ménaunda-suwawaata íma puwónaunda-suwawaata auvíníye.

⁵⁴marapáꞌó máyáan-kuwawaaꞌa púwón-kuwawaaꞌan-ivo kwíyómpaꞌo ménaaon-kuwawaaꞌa íma puwín-kúwawaaꞌa auvíndaraꞌa Áánútun-aai aúváívimba agaimaréna siráin-aimba paáriniye. maará sénapúwón-amba ánásainana maíꞌmaiꞌa ónááon-ankopúwón-ankomba usáyaaitaniye agaimaréna súwana

⁵⁵moóráwai sénapúwón-anko íma usáyaaitaraimba póna púwón-ambo sáwíꞌo umátínkáin-asirayanko ánásaniye agaimaréna siráiye.

⁵⁶Áánútuna ámáámba ísáeꞌmaimo túwáan-imayaao tátokaiye. mirámó kwéontavena púwón-ambo sáwíꞌo umátínkáin-asirayanko tátokaivo

⁵⁷Áánútu púwón-amba kentáá usáyaaitamai-iꞌa kwéumasinkaintaawe. kentáásí Ísóigo Ísu Káráísiti púwón-ankona asirayámbá ánásena usáyaaitaraimba póna Áánútu mirá kwéumasinkaisata súwi kwésune.

⁵⁸mindáyaveꞌa kesí kwaási asiramái méꞌa íma tívón-káínaꞌa Ísóigona mayáí maimaé iyéꞌa íma ivátuwaaro. Ísóigona mayáí kwémayaamba íma úwoi-mayaiman-ivo áúgwaraꞌ-mayaima kwémayaavo maimaé íyóro.