Read Kosena 1 Kórínti 16 Bible Online

1 Kórínti 16 - Kosena bible

1 Kórínti 16

¹Ísóigona kwaási Yérúsaremu-naopaꞌa máyáawai toómbá íma makáawai túwaꞌnaa ónááomba óntamba torupéꞌa maarán-oro. Kárésiyaa-maravaꞌa Ísóigona kwaási máyáawai simátímakaundantemba mirán-áímbá simátimumpo mirán-oro.

²moórá-mora-sontaaraꞌa moórá-kigauvin-ontamba taaímbai Ísóigona kwaási túwaꞌnaa ónááopaꞌa maréꞌa kentí naaúmpimpaꞌa maránááomba anómba ínaꞌa naaémba kentópaꞌa komáyáanaꞌa Ísóigona kwaási Yérúsaremu-naopaꞌa máyáawai timénááon-ontamba íma avakáá-íyamba úwoi mai-timénááowe.

³keinárawapinkemba évakarawai usásintewaꞌa kentópaꞌa koméꞌa aúvái agaimái timéꞌa tiꞌmáráanasa Ísóigona kwaási Yérúsaremu-naopaꞌa máyáawai mináúváíyé torupámaranaaon-ontane maimaésa mátimenaaowe.

⁴mitáwai kemó komayánaunda-mayaimo kwáyainaꞌo éꞌa konasá miwí kesé kónááowe. Kórínti-naopaꞌa kónáe siráin-kwasai.

⁵Másétóniyaa-maravaꞌa Áánútuna áséi-kwasai simátimeꞌa naaónáe kwéunda póꞌa mirá kósimatimeꞌa kentópaꞌa komáéndama

⁶ákírara koménaum. ayáátáákara koménaumno. ímo aampaꞌó kwénaaon-kanaa uwí-nómpákén-úndámó maivaiyáíndarara óꞌon-daopaꞌa kónaumno. óꞌon-daopaꞌo kónáe onaꞌó éꞌa súwaꞌnaa íyaꞌa kónaumne.

⁷kentópaꞌo ayáátáákaꞌo koménaemo kwésunda Áánútumo owé sínaꞌo éꞌa ayáátáákaꞌa koménaumne.

⁸maankáꞌá Évésasi-naopaꞌa áséi-kwasai simátimenaunda-kwaasi sáwívaꞌa máyáamba pósa isésa áraire sésa asiramái ménaaowai máéwasa kesí mayáíyávésa aambá aunónááon-kwaasi sáwívaꞌa máyáawe. mimbáyáímó kwémayaunda toómbá ákáꞌmai Áánútuntavesa ísámai kaunánáe sésa torupaambá minkánáá íma tiráisaꞌa méꞌa mimbáyáí kwémayaunda póna mintánón-kánáá ánásainaꞌa kónaumne.

¹⁰moóráwai Tímótimo kentópaꞌo koménimba aamoí kwéeꞌa áwaꞌnaa oro. kemó úndantemba Ísóigona mayáí kwémayaivo

¹¹kwentávéꞌa úwoi-kwaasiman-iye íma séꞌa tínaaemba umáméro. keinárawaꞌo tiyuwénamo kesópaꞌo tínímba áwaꞌnaa íyana kesópaꞌa kaweꞌá umái tíno. kwesémo Ísóigona kwaási kentáásí kwaási kesópaꞌo ténááontaveꞌa timuꞌmaréꞌa máyaumne.

¹²kentáásí kwaási áwíꞌa Ápórosimba asiramái simámeꞌa séꞌa Kórínti-naopaꞌa kentáásí kwaási kwíya-tawai esé kwaaó súnda póna ívéꞌa íma kanaán-umai kwínívo aambó kwáyainanamo éna kwíníye.

¹³kentúraꞌa kárákwiyeꞌa Áánútuwe aráápamai maíꞌmaiꞌa úmae iyéꞌa íma tááꞌa káínaꞌa asiramái máéro.

¹⁴mayáímó kwémayaamba kwaásiti imáyáa umái mayáí máyáaro.

¹⁵kesí kwaásiyono ísáaro. Ákáyaa-maravaken-kwaasi Sétevanasina akúmbá aivaꞌá Áánútunopaꞌa tiráawai Ísóigona kwaási asiramái kwétuwaꞌnaa on-áímbá ísaraawe. asiramái simátimeꞌa séꞌa

¹⁶mirán-kwáásí kwésen-aimba taagwiyavéꞌa miwísé Áánútuna mayáí asirayám-báyáí kwémayaawai táái ísáaro.

¹⁷keinárawapinkemba kaumbonárau túwíꞌa Sétevanasiye Vótúnetasiye Ákáísiye mindárau kesópaꞌa tewaꞌá aamoí kwéumpo keinárawaꞌa íma amáparawai kanaán-umai kesópaꞌa tewasá mindárau kesópaꞌo tembá aamoí kwéune.

¹⁸mindárau kesí imáyáa aúnáiꞌa umásinkesa kentí imáyáagwaraꞌa mirá uráawe. mirán-kwáásí túwíꞌa mósá máráaro.

¹⁹Ésiyaa-maravaꞌa naaóꞌ-naokemba Ísóigona kwaási keinárawatavesa kaweꞌá umái máéro kwésewe. moóráwai áwíꞌa Ákwíra awainínkó Párísiraawe mindáraiti naaúmpaꞌa torupamái máyáawai Ísóigowe tarúmai máyáawai aamoí ésa keinárawatavesa kaweꞌá umái máéro kwésewe.

²⁰maankáꞌó máyáawai Ísóigona kwaási amáparawai keinárawatavesa kaweꞌá umái máéro kwésewe. moórá-morawai tiyáámba tíméro.

²¹ayááíráꞌá kemá Póro agaimaráúmpo awánéꞌa kwenayáánaviꞌa póna kwenááiman-iye séꞌa ísáaro. kemá Póro séꞌa kaweꞌá umái máéro kwésune.

²²Ísóigompaꞌo ímo tirumbó áméwai Áánútu sáwíꞌa umátinkaniye. kentáásí Ísóigo marapáꞌá kumíníye kwésune.

²³Ísóigo Ísu úwoi kwétuwaꞌnaa-intaveꞌa námúnaa kwésune.

²⁴Ísu Káráísitiye tarúmai máyáawaꞌa kembá sirumbá kwétimune. kemá Póro súnda-aimba ánásaiye.