Read Kosena 1 Kórínti 2 Bible Online

1 Kórínti 2 - Kosena bible

1 Kórínti 2

¹kesí kwaásiyono. kentópaꞌo koméꞌa Áánútun-aai paárurain-aimba kosimátimewandaraꞌa kesúwíꞌa maé iyígwáe-aimba íma simátimeꞌa Áánútun-aai avoraꞌá simátímakaumne.

²ááéma imáyáa éꞌa séꞌa kentópaꞌa komáénda íma mirám-baaran-tantaakona imáyáa éꞌa simátimeꞌa Ísu Káráísitintaveꞌa imáyáa éꞌa kentááyáváíyé séna taairaꞌá pukáin-aine suꞌmai imáyáa éꞌa kosimátimenaumne séꞌa

³kentópaꞌa komáéwandaraꞌa sááꞌa kwégowaꞌa tavaravamá kwéuwaꞌa aamoisayán-kwáásí méꞌa

⁴aaimó simátimewandaraꞌa Áánútun-aaiyavesamo áraire síyawaina ááimba íma kwaásiti kawer-ímáyáávínkémbán-ivo Áánútuna asirayámpínkémbán-iye séꞌa simátimeꞌa Áánútun-amankona mayáíyé asirayáné agaráátinkááwánaꞌa awánaraawe. Áánútuna kawer-ímáyáágóná kwaasái.

⁶Áánútuntaveꞌa asiramái máyáawaiyaveꞌa kawer-ímáyáávínkémbá kawer-áímbá kwésimatimune. minkáwér-ímáyááó marapá-kwáásívínkéné marapáꞌó kárákwiraawaimo ánásanaaowaivinkene ímanivo

⁷minkáwér-ímáyááó Áánútumpakemban-iye. Áánútu maramá íma urónkaꞌa séna toꞌmayaa éꞌa naaémba paáronana mindáꞌá kaweꞌá umátinkainasa ságayan-ayampaꞌa ménaaowe siráimba kentááyávéna séna minkáwér-ímáyáá aúpáꞌá makáimba póna kwáyowasa

⁸marapáꞌó kárákwiraawai íma kaweꞌá umái ísaraawe. ísaresaraai Ísóigo óꞌoran-aainkwarawaimba taairaꞌá íma tuvúwúwana pukáisino.

⁹mináíntávéna naaóváꞌá Áánútun-aai aúváívimba agaimaréna sénaÁánútu toꞌmayaa umái kwembó tirumbó ámén-kwaasi timíníye. túrandei íma awánésa tááꞌa íma isésa íma imáyáa uráan-tantaaꞌa Áánútu toꞌmayaa úmakaimba timíníye agaimaréna siráiye.

¹⁰ánivo Áánútu kwenamankómbá aiꞌmarówana keséya ména Áánútumo toꞌmayaa úmakainta agaráásínkaraintaawe. Áánútun-amanko amápa-tantaaꞌa awánéna Áánútumo kwenarumpimbó imáyáa éna toꞌmayaa úmakaimba awánaraiye.

¹¹kwaásimo ombá moóráwaina imáyáa íma kwéawanaivo kwenamankówé suꞌmai kwéawanaiye. miráumai Áánútuna imáyáa íma kwéawanaavo kwenamankówé suꞌmai kwéawanaiye.

¹²Áánútu marapákén-ásíráyámbá íma siménaya kwenamankómbá aiꞌmarówana keséya ména asirayámbá símakaiye. Áánútumo toꞌmayaa umáímo kwésiminta awánanaundayavenaya kwenamankómbá aiꞌmarówana keséya kumbáyáiye.

¹³mináíntá kwésimatimunda íma kwaásiti kawer-ímáyáávínkén-áímbán-ivo Áánútun-amanko simásímakain-ainta kwésimatimune. Áánútun-amankomo tirumpimbó máyáin-kwaasiyaveta Áánútuna árair-ainta kwésimatimune.

¹⁴Áánútun-amankomo tirumpimbó ímo máyáiwai kwemó kwétimin-tantaaꞌa íma kanaán-umai kwémaesa mintántáátávésa sésa úwoisamban-iye kwésesa marapá-kwáásí Áánútun-amankomo kwétimin-tantaaꞌa íma kanaán-umai kwéisaavo Áánútun-amankomo tirumpimbó máyáiwaiye suꞌmai mintántááꞌá isésa kawe-tántááꞌán-iye kwésewe.

¹⁵Áánútun-amankomo tirumpimbó máyáiwai kanaán-umai amápa-tantaakona ááimba taaínkaar-umai sáwí-aaine kawer-ááíné kwéisaavo marapá-kwáásí Áánútun-amankomo tirumpimbó máyáiwai tuwánésa miwítí mayáígóná ááimba íma kwéawanaawe.

¹⁶naaóváꞌá Áánútun-aai aúváívimba agaimaréna sénaÍsóigomo imáyáamo kwéimba íma ísáamba pósa íma kanaán-umai kwená imáyáa arupí kwéumankaawe agaimaréna siráimbanivo Áánútun-amankomo sirumpimbó máyáiwaiya Ísu Káráísitina imáyáaya kwéisaumpo marapá-kwáásí kentáásí mayáígóná ááimba íma kwéawanaawe.