Read Kosena 1 Kórínti 3 Bible Online

1 Kórínti 3 - Kosena bible

1 Kórínti 3

¹kesí kwaásiyono. Áánútun-amankomo tirumpimbó anómbo umáímo máyáin-kwaasimo kwésimatimundantemba kentópaꞌa komáyaawandaraꞌa keinárawaꞌa íma mirá simátimeꞌa Ísu Káráísitintaveꞌo ímo asiramáímo máyón-kwaasi untávéꞌa taíntuwe-yaintuweꞌa simátímakaumne.

²umarambó asirayán-tómbó ímo tímémbo náámbo tíméntemba Káráísitin-aaima íma asirayán-áímpímbán-ivo etóyóí-aimpinkemba simátímakaumne. ááéma íma kanaán-umai ísaraantaveꞌa mirán-áímpínkémbá Káráísitin-aai simátímakaumne. ívékwaraꞌa mirán-umai méꞌa póꞌa íma kanaán-umai kwéisaawe.

³Ísu Káráísitintaveꞌa íma asiramái imáyáa kwéeꞌa marapá-tántáátávéꞌa imáyáa kwéeꞌa méꞌa tirumbó sáwíꞌo kwéumatinkeꞌo aaisan-áímbó kwésemba marapá-tántáátávéꞌa imáyáa kwéeꞌa marapá-kwáásímó máyáanten-umai mirán-umai kwémaewe.

⁴évakarawai Póro kentáásí anóndaꞌan-iye sewasá évakarawai Ápórosi kentáásí anóndaꞌan-iye kwésemba marapá-kwáásímó máyáanten-umai mirán-umai kwémaewe.

⁵kenkáí súwíꞌa mósá maréꞌa taaínkaar-umai máévainivo Áánútuna mayáí-kwáásíráíyé suꞌmai úye. Ísóigo Ápórosintavena séna kesí mayáí mayaaó séna kentávéna kesí mayáí mayaaó súwakai kwená mayáí mayááwáyaꞌa Ísóigon-aaiyaveꞌa áraire siráamba kwená mayáí-kwáásíráí úye.

⁶kígauvaꞌo ánáyumbo ontembá Ísóigon-aai simátimewanana námáimo umáímo siyútúwáantemba Ápórosi miráumai túwaꞌnaa úwana Áánútumo ánáyumbo anómbo umátínkáintemba kwemá imáyáa timúwaꞌa kwenáái tirumpimbá tátokaawe.

⁷ánáyumbo iwáíyé námáimo umátínkáiwaiye mindárai íma anón-kwaasi óívo Áánútu anómbo kwéumatinkaiwai kwemá anóndakoman-iye.

⁸ánáyumbo iwáíyé námáimo iwáíyé mimbóráíꞌa umái máyaayamba póna Áánútu miwítí mayáígóná meéyámbá timíníye.

⁹kesé Ápórosiye Áánútuna mayáí-kwáásí úyaꞌa keinárawaꞌa Áánútuna kígauraamba owatá miráyáámó úndaya Áánútundeiya úmpo mirápáꞌá kenkáíyávéꞌa íma imáyáa ombá keinárawaꞌa kwétaainaawe. íma taaínkaar-oráámbá kwétaainaawe. keinárawaꞌa Áánútumo kwéin-dankaaniꞌa kwéowe.

¹⁰Áánútu súwaꞌnaa úwaꞌa keinárawapimba mayáí mairáumne. naambó kwéon-kwaasiraꞌo kárákwiraiwaimo kawer-ímáyáámó énamo ávombo áyáíntemba Ísu Káráísitin-aaimo simátímakaunda ávonkaamba aitínkávaꞌa kówánasa minávónkáꞌó naambó kwéowai mimbáyáí kárákwiyoro.

¹¹óꞌon-avomba íma ayánááovo mimbórá-ávómbó Áánútumo áꞌo aimakáimba minávómbá Ísu Káráísitiman-iye.

¹²minávónkáꞌá naambá ónááovo évakarawaimo ésa Áánútuntavesamo ímo asiramáímo imáyáamo kwéowai kwááyu-yantaaꞌa taaineiyé owáínéíyé íyasa évakarawaimo ésa Áánútuntavesamo asiramáímo imáyáamo kwéowai asiramáímo kwaíkwaiꞌo ínín-tantaaꞌa kóri-ontandeiye óꞌon-oꞌon-ontandeiye ónááowe.

¹³Áánútuna kwaásiti mayáí naaémba paáríndaraꞌa iramó évaka-tantaaꞌo kénamo évakaꞌo ímo kaintembá Ísu Káráísitimo kumínín-kanaamo tíndaraꞌa Áánútuna kwaásiti mayáí paárínana évakaꞌ-mayai ánásainana évakaꞌ-mayai úwoi kwéniye.

¹⁴minávónkáꞌó naambó kwéomba asiramáímo kwaíkwaiꞌo ínín-tantaaꞌnei kwéowai miwítí mayáí kwáyainasa miwítí kaweꞌ-méyámbá mayánááovo

¹⁵kwááyu-yantaaꞌnei kwéowai miwítí mayáí ánásainasa mimbáyáígóná meéyámbá íma maésa miwíyé suꞌmai kaweꞌá umái ménaaoawe. kwaásiti náaindaambo kágwisasamo miwíyé suꞌmaimo kaweꞌó umáímo máéntemba miwí mirá ónááowe.

¹⁶keinárawaꞌa ímo taaínkaar-umaimo máéraamba taaínkaar-umai kwémáémbanivo Áánútun-amanko kentirumpimbá máyáimba Áánútuna monoꞌ-nánkáámbá kwéomba imáyáa oro.

¹⁷Áánútuna monoꞌ-námbá aokaꞌ-námbá isaꞌá keinárawaꞌa mindánkáámbá owasá évakarawaimo keinárawaꞌo sáwíꞌo umátinkaawaꞌo sáwíꞌo umáímo máyáambo éna Áánútu miwí ánásasuwanimba ímo taaínkaar-oráámbá kwétaainkaar-owe.

¹⁸kentí imáyáao kampaꞌá simátiyúwáívo séꞌa kárákwiyoro kwésune. marapá-kwáásí túrankaꞌa kawer-ímáyáágwárá-kwáásíyá úne kwésewai Áánútu aúrankaꞌa kawer-ímáyáá ónááontavesa marapákén-káwér-ímáyáá íma aiva-tántááꞌán-iye seró kwésune.

¹⁹marapá-kwáásí kawer-ímáyááwémó kwésen-imayaayavena Áánútu séna sáwí-imayaaman-iye kwésiye. mináíntávéna naaóváꞌá Áánútun-aai aúváívimba agaimaréna sénamarapá-kwáásí miwítí imáyáa mósá kwémaraawana Áánútu sisaná miwítí imáyáao kampaꞌá kwésimatiyuwaiye agaimaréna súwana

²⁰moórávaꞌa agaimaréna sénakawer-ímáyááwémó kwésen-imayaayavenaúwoi-imayaawe Ísóigo siráiye agaimaréna siráimba

²¹mindáyaveꞌa kwaásimo kwéowain-auma íma maé íyóro. amápa-tantaaꞌa túwaꞌnaa ínímba kwáyáiye.

²²kemá Pórowe Ápórosiye Pítaawe túwaꞌnaa ínímba ónaundaya máyaumne. marawé amápa-tantaaꞌo kwáyáine úwoimo ménaaonaꞌi. puwónááonaꞌi. mindá túwaꞌnaa ínímba kwáyáiye. ívéꞌo kwáyáin-tantaare naaémbo paárinin-tantaakwarare mindá túwaꞌnaa ínímba kwáyáiye

²³keinárawaꞌa Káráísitina kwaási owaná Káráísiti Áánútundeiman-iye.