Read Kosena 1 Kórínti 4 Bible Online

1 Kórínti 4 - Kosena bible

1 Kórínti 4

¹keinárawaꞌa kentááyávéꞌa imáyáa éꞌa séꞌa Káráísitina mayáí-kwáásí ésa Áánútumo aúpáꞌó makáimba agaráátinkena séna mináímbá simátímaꞌmae nááóro. mimbáyáíráꞌá kárákwiyoro siráiwai owé-ímáyáá oro.

²moóráwaina mayáíráꞌá kárákwiraiwaimo sisasamó ontembá mirán-oro.

³Áánútuna mayáíráꞌá kárákwiraundawaiyaveꞌa keinárawaraꞌo óꞌowiyaꞌo séꞌa kaweꞌ-máyáíyáꞌi. sáwí-mayaiyaꞌiyo séꞌo kwésemba íma anón-imayaa éꞌa kesí mayáíyávéꞌa íma awánéꞌa kaweꞌ-máyáíyáꞌi. sáwí-mayaiyaꞌiyo kwésune.

⁴kesirumpinkén-ímáyááómó sénamo kaweré suꞌmai uráanemo sínímba kaweꞌ-máyáíyáꞌi. sáwí-mayaiyaꞌiyo-aimba íma kendéímán-ivo Ísóigondei póna kwésuwanaiye.

⁵mindáyaveꞌa Ísóigomo ímo kunkáindarare Ísóigomo siráin-kanaamo ímo tiráindarare íma taaínkaareꞌa sáwíꞌan-owe. kaweꞌán-owe íma seró. Ísóigomo kumíndaraꞌa kwaásiti aúpár-ímáyááwé kwaásiti ááine paárínana mitáwai Áánútu kwaásiti kaweꞌ-máyáíyávéna kaweꞌán-owe síníye.

⁶kesí kwaásiyono. arupí ónááontaveꞌa simátímakaunda-aimba Ápórosiye kesémo siráunda íma kenkáíráíyé suꞌmainivo amápa-kwaasiyavaigwaraꞌa siráumne. Áánútun-aai aúváí-kwandaaivimba agaimarésa siráantemba mirán-oro. moórá-anondako áwíꞌa maé iyéꞌa moórá-anondako áwíꞌa simái sáwíꞌa kwéomba kentúma maé kwéiyomba mirá ímo oráámbá kwéowe.

⁷keinárawaꞌa íma usáyaaitaraawain-ovo mirámó kwéon-kwaasi-iꞌa Áánútu umátínkaraiye. Áánútu mirán-kwáásí-íꞌa umátínkaraivo kentúma íma maé iyéꞌa séꞌa kesáá keyááríkata mirán-kwáásíyá máyaumne íma sero.

⁸keinárawaꞌo maarán-áímbó sembá kampaꞌá séꞌa kawe-kwáásí-íꞌa umáíya máyaumne. íma Ápórosiye Pórowe simásímakaayan-imayaavinkemban-ivo kentáásí imáyáavinkenta Áánútuna imáyáa iséta mindáraiya usáyaaitaraumne kampaꞌá kwésewe. keinárawaꞌo usáyaaitaraankakai keiráígwáráꞌá miráumaiya usáyaaitauyasino. sáwí-yantaakomba usáyaaitaigwae séꞌa súnda íma usáyaaitaraawe.

⁹imáyáamo únda Áánútu kwená aantá-kwaasiya amápa-kwaasi tínaaempata sínkarainta tínkamowasamo púwón-kwaasimo kwaási túrankaꞌo mótinkesamo tínkankaantemba kwíyómpaken-kwayoꞌnarawa túrankare kwaási túrankare Áánútu kentáá mirá umásínkaraintaawe-imayaa kwéune.

¹⁰Ísu Káráísitin-aaimo kwésimatimundayavesaya sésa sáwí-imayaagwara-kwaasin-owe kwésevo keinárawaꞌa kesávéꞌa séꞌa Ísu Káráísitiye tarúmaiya méta kawer-ímáyáágwárá-kwáásíyá úne kwésewe. kesáá aamoisáyán-kwáásíyá únaꞌa keinárawaꞌa kesávéꞌa séꞌa asirayán-kwáásíyá úne-imayaa owáímá póꞌa kentúwíꞌa maé iyéꞌa kesúwíta kwétuwaawe.

¹¹Áánútuna mayáí maimaé kwénaaundaya ááéwe ívére nontáváíyé toóntáváíyé sáái kwésinkaisata íma naambá makéta íma kawer-únáánkwátói makáunasaya kwésinkamowata

¹²toómbá íma úwoi mayánaundayaveta anóm-bayai kwémaeta óntamba kwémayaunasaya simáímo sáwíꞌo kwéumasinkaanta Áánútu kaweꞌá umátinkaniye-aimba kwésimatimunasaya sáwíꞌo kwéumasinkaanta asiramái méta íma ivátuwaunasaya

¹³kentáá súwíꞌa kumínkwáe sésa kampar-áímbá kwésemba anondá kawer-áímbá kwésimatimunasaya ááéwe ívére kentááyávésa sésa ovairáán-kwáásín-ovo miwí táái íma ísáaro kwésewe.

¹⁴kesí iyámpóíyone séꞌa imáyáa kwéundawai tááko pééi sínaꞌa iséꞌa kaweꞌá ónááontaveꞌa maanáúváí kwéagayaumne.

¹⁵Káráísitina kwaási owasá sáwívarawai Ísu Káráísintin-aai kwésimatimemba íma sáwívarawai kentivoísái máyáavo aivaꞌá Káráísitin-aai simátimewanaꞌa Káráísitiye tarúmai máyáantaveꞌa keyáá kentivomá úne.

¹⁶mindáyaveꞌa kwakwiyéꞌa séꞌa kemó úndantemba mirán-oro kwésune.

¹⁷mindáyaveꞌa moóráwaimba Tímótimba aiꞌmáráanana kentópaꞌa kweémena kwíníye. kwemá Ísóigoema tarúmai máyáiwai íma siyuwéna asiramái ména kesááninkaamba umái máyáiwai kwená imáyáa kwéundawai kentópaꞌa kwéna Ísu Káráísiti aúrankaꞌo máyaunda-aine Áánútuna kwaási naaóꞌ-naoꞌa máyáawai kwésimatimunda-aine kosimátimena kemó máyaundanten-umai máéro-aimba kosimátiminiye.

¹⁸keinárawapinkemba évakarawai sésa Póro úwoi aúváívinken-aimba kwésivo kentáásopaꞌa aaimó simásimindayavenaya íma tíníye kwésemba kentúma maé iráawe.

¹⁹ánivo Ísóigomo owémó sínaꞌo éꞌa sáwíyankaꞌa kentópaꞌa kwéꞌa túmo maé iráawai siráan-aine suꞌmaiyaveꞌa íma kónaumpo miwítí asirayámbá Áánútunopakenaꞌiyo. awánaandayaveꞌa kónaumne.

²⁰Áánútumo kentááráꞌó kárákwiraimba maarán-iye. íma aaineiyé suꞌmai kárákwiraivo Áánútuna asirayánkáꞌó kwémaewai miwíráꞌá kárákwiraiye. mindáyaveꞌa Áánútuna asirayánkárá máyáa. íya Áánútuna asirayánkárá máyáao séꞌa kotuwánanaumne.

²¹imáyáa oro. keinárawatopaꞌo ímo kuráandaraꞌo sáwí-imayaamo tuwéꞌo kaweꞌó umáímo méwaꞌa kentí imáyáa éꞌa paru umáíya koménaumne. ímo mirámó uréwaꞌo éꞌa asiramái arupí koumátinkanaumne. mindáyaveꞌa imáyáa oro.