Read Kosena 1 Kórínti 6 Bible Online

1 Kórínti 6 - Kosena bible

1 Kórínti 6

¹moórá-aimbo sáwíꞌo kwéomba simátíménda ísáaro. keinárawapinkemba évakarawai sáwíꞌo ombá ímo Áánútunopaꞌo tiráan-anon-kwaasitopaꞌa mátínkareꞌa aaivimbá maitínkáamba sáwíꞌa kwéovo Áánútuna kwaásiti anón-kwaasiraꞌa mátínkareꞌa iséise éꞌa arupí umái máéro.

²naaémba Áánútuna kwaási anón-kwaasi-iꞌa ésa amápaꞌ-maravaken-kwaasi táái isésa kaweꞌ-máyáíyé sáwí-mayaiye sésa taaínkaar-esa naaémba mirá ónááovo ívéꞌa sáwíyan-aimba kanaán-umai iséise éꞌa arupí umái máéro.

³naaémba kwíyómpaken-kwayoꞌnarawa táái isánááomba mindá anón-tantaaꞌan-ivo marapáꞌó máyáan-kwaasi tááimo arupí ónááomba mindá sáwíyan-tantaaꞌan-iye.

⁴moórá-yantaaꞌo arupí ónáe séꞌo éꞌa Áánútuna kwaásivimbo túwíꞌo ímo kwáyainda-kwaasiyaveꞌa arupí umásínkáaro íma séꞌa túwíꞌo kwáyaindawaiyaveꞌa arupí umásínkáaro seró.

⁵sáwíꞌa kwéune séꞌa misáwíꞌó kwéomba ivátuweꞌa kaweꞌá ónááontaveꞌa maanáímbá kwéagayaumne. keinárawaꞌa séꞌa kawer-ímáyáágwárá-kwáásíyá úne kwésembanivo íma aaí ísámai arupí kwéumatinkaavo

⁶Áánútun-aaiyavesa ímo áraire siráawairaꞌa mátinkeꞌa séꞌa moórá-aimba arupí umásínkáaro séꞌo kwéomba mindá sáwíꞌan-iye.

⁷Áánútunopaꞌo ímo tiráan-kwaasiraꞌo mátinkeꞌa aaivimbá maitínkáamba sáwíꞌa éꞌa Áánútuna aambá íma kaweꞌá umái kwégwaraawe kwésune. kentí anón-kwaasimo ísátinkaiyan-ainkomo éna ayááímó úwoimo kwénimba mindá kítokaꞌa sáwíꞌan-ivo Áánútunopaꞌo ímo tiráan-kwaasitopaꞌo aaivimbó maitínkáamba mindá anómba sáwíꞌan-iye.

⁸mirámó ombá Áánútuna kwaási kentíváꞌawaawi sáwíꞌa kwéumatinkeꞌa kentúwíkwaraꞌa sáwíꞌa kwéowe.

⁹sáwíꞌo kwéowaimo Áánútumo kárákwiraipaꞌo ímo kónááowaimo ontembá kwéowe. kampar-ímáyáá íma éꞌa simátimunda-aimba ísáaro. aarai-úmóyáné kwaai-úmóyáné ésa marapá-tántáátávésa aamoí ésa Áánútuntavesa íma aamoí ésa kwaaí keíyái kesuwainíné sisaná kesuwairé sésa sáwíꞌa úmae nááówasa aaraí miráumai keíyái sáwíꞌa úmae kwénaaesa

¹⁰umóyámbá ombá túran-anda ésa uwoꞌaóꞌ-nómbá nésa uwoꞌaóꞌá ésa simái túwíꞌa sáwíꞌa umátinkesa kwétinkamesa umóyámbá ésa mirámó kwéon-kwaasi Áánútu kárákwiraipaꞌa íma kónááowe.

¹¹keinárawapinkemba évakarawai mirámó uráan-kwaasiraaniꞌa kwéombanivo kentáásí Áánútun-amanko Ísóigo Ísu Káráísitina asirayándéí misáwí-yántááꞌá maitiyuwéna Áánútundei-iꞌa umátinkena kwenaúrankaꞌa arupí umátínkaraiye. túwawaaꞌnei Ísóigona mayáí mayánááon-kwasai.

¹²keinárawapinkemba évakarawai séꞌa amáparitaamo kwéundaya kanaán-iye kwésevo kemá séꞌa évakariꞌo kwéomba íma kaweꞌá kwéumatinkaiye séꞌa moórá-aimba amápariꞌo kwéunda kanaán-ivo évakariꞌo kwéunda miwá kembá tátoranintaveꞌa aꞌáo kwésune.

¹³toónkó tirumpimbó kumíníntavena isaná tirunkó toómbó náníntavena kwáyáimba póna Áánútu minkáé-tántááꞌá ánásasuwaniye. mirá ínívo túwawaatavesa imáyáa ombá maarán-iye. túwawaaꞌnei aarai-úmóyámbá ónááomba ímanivo mintúwáwááꞌnéí Ísóigona mayáí mayánááowe. mirámó ónááontavena Ísóigo túwawaakaꞌa kwétuwaꞌnaa-iye.

¹⁴Áánútu Ísóigomba pukáimpinkemba usásinankaraintemba kwená asirayándéí kentáá súwawaaꞌa usásisinkanintaawe.

¹⁵kentúwawaaꞌa Káráísiti aíyayaankaambo kwéimba póꞌa eénánkáꞌó kwénaainda-ininkowe íma maéꞌa mimbórá-túmá aúꞌmái máéro.

¹⁶moóráwai eénánkáꞌó kwénaainda-ininkoe máyáimba mimbórá-túmá aúꞌmái máyááiye. mindáyavena naaóváꞌá Áánútun-aai aúváí-kwandaaivimba agaimaréna sénaminkáéꞌnárai mimbórá-túmámaꞌmái máyááiye agaimaréna siráiye.

¹⁷ánivo Ísóigoe tarúmai máyáiwai kwenamankó kwesé máyáísana mimbóráíꞌa umái máyáiye.

¹⁸aarai-úmóyáné kwaai-úmóyáné kwéomba tínaaemba umáméro. óꞌon-oꞌon-tantaaꞌo sáwíꞌo kwéomba túgo íma sáwíꞌa kwéivo aarai-úmóyámbó kwéomba túgo sáwíꞌa kwéiye.

¹⁹Áánútu kwenamankómbá aiꞌmarówana kentirumpimbá kumbáyáimba póna kentúma Áánútun-amankona naambá kwáyáimba áꞌa ísaraawe. kentúma Áánútundeima isaꞌá kesúma kendéíyáámá póta sirááímo kwétainiꞌa úwoi ónaumne íma seró.

²⁰Ísu Káráísiti keinárawatavaiye sénamo pukáimba mimbéyámbá keinárawaꞌa kwendéímán-ovo marapáꞌó máyáamba Áánútu áwíꞌa anómba úmae íyóro.