Read Kosena 2 Kórínti 10 Bible Online

2 Kórínti 10 - Kosena bible

2 Kórínti 10

¹keinárawapinkemba évakarawai kentávésa sésa Póro keséya taména paru umái aaí siráivo némpaꞌo máínkaꞌa asirayán-áíntá kwésimasimintaawe kwésewe. Ísu Káráísiti marapáꞌó máyonkaꞌa paru umái ména íma aaisambá siráintaveꞌa imáyáa éꞌa asiramái simátimune.

²kentópaꞌo kondá íma asiramái sénáe súndanivo imáyáa éꞌa keinárawapinkemba évakarawai kentááyávésa kampaꞌá sésa marará-kwáásíti ááimba kwégwaraawemo kwésentaveꞌa asiramái simátimenaumpo kárákwiyoro.

³marapáꞌó máyaundaya namuro-kwáásí usáyaaitanae sésamo ááiꞌo tíyáantemba íma mirá éta marapá-sáwí-yántááꞌá usáyaaitanae séta Áánútuna mayáí kwémayaumne.

⁴taáné iwevóíyé úmakesamo ááiꞌo tiyamáímo usáyaaitanaesamo ontembá íma mirá éta Áánútu asirayámbá símakaisata óꞌon-oꞌo-sawi-asirayamba kwéusayaaitaundayaawe.

⁵kentáá sááiyavesa kampar-áínéímó kwésewai tááigomba kesááigoya kwéusayaaitaiye. évakarawai miwí túwíꞌa mósá marésa Áánútun-aai ísáavo sésa simái aambá áúmbaraawata aambó áúmbaraan-aimba usáyaaiteta kentáásí imáyáago Ísu Káráísitin-aai isáínkwáe símae kwéiyundayaawe.

⁶kentáá sááiya isáígwáe séta timuꞌmaréta máyaunaꞌa mirá íyata tuwánéta kentáá sáái íma kwéisaawai sáwí-meyamba timénaumne.

⁷keinárawaꞌo máyáawaina ááimba imáyáa oró. keinárawapinkemba évakarawai sésa áraiꞌa Ísu Káráísitina kwaásiya úne sentembá kesáágwáráꞌá Ísu Káráísitina kwaásiya úmpo mindáyaveꞌa imáyáa oró.

⁸Ísóigo asirayámbá siménaya keinárawaꞌa íma sáwíꞌa umátinkanaumpo kentí imáyáa asiramátinkanaundayavenaya minásíráyámbá símakaiye. minásíráyámbó símakaimbo simátímaꞌmae iyúnda-aimba mindá árair-aimba isatá póta minásíráyámbó símakaimbo simátímaꞌmae iyúndaya mindáyaveta íma sigaeyávéta kwéune.

⁹aúvái agaimáímo timúnda íma maarán-ímáyáá éꞌa inkáíséro sénaya maanáúváí agaimái kwésimiye sevó-ímáyáá kwéeꞌa kwéagayaumne.

¹⁰évakarawai kentávésa sésa aúváímba asirayán-áímbá simásimenaya ááéma keséya taména aamoisayán-kwáásí ména úwoi-aimba simásímakaiye kwésewai

¹¹miwí maarán-áímbá imáyáa oró. kentí némpaꞌa máyaunda póta aúváívimbo simátimunda-ainta kentópaꞌo kwéta mimbórá-áímbá póta kosimátimenaundayaaniye.

¹²kentávésa mirán-áímbó kwésewai miwí túwíꞌa mósá marésa anón-kwaasiya úne sewatá íma mimbórá-kwáásíráántá umái méta miwímó máyáawaina ááimba awánéta kesáá máyaundawaina ááinta íma taainéta séta kaweꞌá umáíya máyaumne. sáwíꞌa umáíya máyaumne séta íya taainánaumne. miwí moórá-morawaimo máyáawaina ááimba tuwánésa miwítí imáyáavinkemba sésa máyaundawaina ááinta kaweꞌán-iye kwésewe. mirámó kwéomba sáwí-imayaavinkemba kwéowe.

¹³keinárawapimba Áánútumo símakainda-mayai-aimba sénaumpo ímo símakainda-aimba íma sénaumne.

¹⁴keinárawaꞌo máyáapaꞌa Áánútu íma aambá aunéna úwoi kesáái kosimátíméro simásímakaisata úwoiya Ísu Káráísitina áséi-kwasai kosimátímakaumne. mirámó uráunda Áánútu íma aambá áúnkaisata úwoiya kosimátímakaumne.

¹⁵Áánútumo aambó áúsinkaraim-bayaiyaveta óꞌon-kwaasimo mairáam-bayaiyaveta kesáá mairáumne íma séta kentáá súya maé kwéiyune. Ísu Káráísitin-aaiyaveꞌa áraire séꞌa asiramái imáyáa úmae iyónááomba timuꞌmaréta máyaunda póꞌa mirámó íyata ávááraumai túwaꞌnaa ónaundayaawe.

¹⁶mirámó íyata kanaám-póta tiyuwéta óꞌon-oꞌom-baravaꞌa Ísu Káráísitin-aai simátímaꞌmaeta naaónaumne. óꞌowimo Ísu Káráísitin-aaimo simátímaken-ayampaꞌa íma kométa kampaꞌá séta kesáá simátímakaumne séta kentáá súya maé iyónaumne.

¹⁷naaóváꞌá Áánútun-aai aúváívimba agaimaréna sénamiwí kesáváí mayáíyávésa íma túwíꞌa mósá marésa Ísóigona mayáíyávésa kwenáwíꞌa mósá máráaro agaimaréna siráiye.

¹⁸kwaási kesáváí kawe-kwáásímá úne kwésemba ímanivo Ísóigo kawe-kwáásímán-owe kwésiwai mindá Áánútu aúrankaꞌa kawe-kwáásímán-owe.