Read Kosena 2 Kórínti 3 Bible Online

2 Kórínti 3 - Kosena bible

2 Kórínti 3

¹mináímbá kwésimatimundayaveta kentáá súwíꞌa íma maé kwéiyundayaawe. évakarawai aúvái agaimái tímúwasa maimaésa mátímúwaꞌa awánéꞌa kaweꞌán-owe siráavo kesáá íma mirá éta kentáásí mayáírár-áúváí agaimaéta mátíménata awánéꞌa aamoí umásinkaigwae-ita íma kweéta íma kentáásí mayáírár-áúváí agáyáaro kwésumpo Áánútu siꞌmarówata kwená mayáíyá kwémayaumne.

²évakarawaimo óꞌowiti mayáígóná aúváímo awánésamo aamoimó umátínkáantemba évaka-kwaasi keinárawaꞌa tuwánésa sésa áraiꞌa Ísu Káráísiti Póroe mayáí kwémayaan-kwaasiye kwenté tiꞌmarówasa kwenáái tasimátímúwasa isésa áraire suwaná Káráísiti kwená kwaási-iꞌa umátinkowana Áánútu asirayánkwáráwáín-amanko miwítirumpimba máyáísasa máyáawe kwésewe. mindáyaveꞌa keinárawaꞌa Káráísiti agairáin-auvairaamba umái máyáawe. Ísu Káráísitina mayáígóná aúvái óntankaꞌo agairáin-auvairaamba ímanivo kempáꞌá kwáyáim-bayaima tuwánaantaveta aamoiyá kwéumatinkaundayaawe.

⁴Ísu Káráísiti kentáá asirayámbá kwésimisata Áánútu aúrankaꞌa asiramái méta mináíntá kwésune.

⁵kentáávímbá kesí asirayámbá íma kwáyáísata mimbáyáíyá kwémayaumpo Áánútuna asirayándéíyá mimbáyáíyá kwémayaumne.

⁶Áánútu aúná-aimba simái tarúmakain-aimba kosimátimewananaya kwenaúrankaꞌa arupí umátinkainasa ménaaontavena asirayántá símakaiye. mináúná-áímbá simái tarúmakain-aimba Áánútu Mósesimba simámakain-amaamba ímanivo Áánútun-amanko kentáásirumpimba máyáísata kwemó siráintenta kwéunda-aimban-iye. Áánútu Mósesimbo simámakain-amaamba íma kanaán-umai kwáráantavesa Áánútu aúrankaꞌa íma arupí umái mésa puwí-ámpáꞌá kwégovo Áánútun-amanko imáyáaya símísata Káráísitin-aaiyaveta áraire séta aúnáiꞌa umáíya maíꞌmaita kwéune.

⁷naaóváꞌá Áánútu Mósesimba óntan-kwandaairaꞌa siyáánkai-amaamba agaimái ámakaimba minámáámbá kwaránáe sésa umbá íma kanaán-umai kwarésa arááísuꞌmae kwéiyesa mindáyavesa puwí-ámpáꞌá kwégowe. Áánútu Mósesimbo ámáámbo simámakonkaꞌa Áánútumpakemba ságayamba paáréna Mósesi óikaꞌa ságayamba paárúwana óntan-kwandaairaꞌo siyáánkai-amaambo agaimarómba maimaéna Ísareri-kwaasitopaꞌa kumúwasa Mósesi óikaꞌa ságayamba kwéna póna túgáyáagaya úwasa íma kanaán-umai awánowana kwéna naaémba uwákuraiye.

⁸naaóváꞌá Áánútu Mósesimba siyáánkai-amaamba simámakonkaꞌa Áánútuna ságayamba paárúmbanivo ívéꞌa Áánútu kwenamankómbá aiꞌmáráísana kwená kwaási tirumpimbá máyáiye-aimba kwévaarimba póna Áánútuna ságayamba anómban-iye.

⁹Áánútu Mósesimba siyáánkai-amaamba simámakomba pósa íma kanaán-umai kwáráantavesa puwí-ámpáꞌá kwégowe. Áánútu minámáán-áímbá paárúnkaꞌa kwená ságayamba kwáyowana ívéꞌa Áánútu kwenamankó kwenaúrankaꞌo arupí umátínkáin-aimba kwévaarisana póna kwená ságayankona asirayámbá anómba kwáyáiye.

¹⁰ívéꞌa aúná-aimba simái tarúmakain-aimba kwáyáísana usáyaaitarai-sagayankona asirayámbá kwáyáimba póta séta Áánútumo Mósesimbo siyáánkai-amaambo simámakai-sagayankona asirayámbá úwoisamba iyéyá kwésune.

¹¹Áánútu Mósesimbo simámakain-aimba kwááyu-aimban-ivo aúná-aimba simái tarúmakain-aimba kwaíkwaiꞌa ínín-aimba anón-aimban-iye. kwááyu-aimba simámakonkaꞌa ságayankona asirayámbá kwáyombanivo ívéꞌa kwaíkwaiꞌa ínín-aimba paárisana póna anó-sagayamba asirayámbá kwáyáiye.

¹²mináímbá asirayán-áímbá kwaíkwaiꞌa ínín-aimba ísaraunda póta íma sááꞌa kwégaisata asiramái mináímbá kwésimatimundayaawe.

¹³Mósesimo uráintemba íma miráyá kwéune. Mósesi Ísareri-kwaasiyavena séna kesóikaꞌo kwáyái-sagayamba uwákwimba awánaavo séna ampaantanéí óikaꞌa káátaraiye.

¹⁴Ísareri-kwaasi tááꞌnei isésa tirunté marésa maémáenkakemba pósa ívéꞌa agáyáan-kwaasi Áánútumo simáímo tarúmakon-aimba aúváívinkemba awánamai isésa mináínkóná ááimba íma kaweꞌá umái kwéisaawe. Mósesimo óikaꞌo ampaantanéí káátamakowasamo ságayambo ímo awánaraantemba ívéꞌa Áánútun-aai aúváívimba awánaamba miwítí imáyáago ítáguraisana kumayuꞌá isasá pósa mináúváígóná ááimba íma awánamai kaweꞌá kwéowe. Ísu Káráísitiye tarúmai máyáawaima Áánútun-aai aúváíma awánésa mináínkóná ááimba kaweꞌá umái kwéisaawe.

¹⁵ívéꞌo máyáan-Isareri-kwaasigwaraꞌa Áánútun-aai Mósesimo agaimakón-aimba awánaamba miwítí imáyáago ítáguraisana kumayuꞌá isasá pósa mináínkóná ááimba íma ísaraavo

¹⁶Ísóigo Ísu Káráísitinopaꞌo tembá minkúmáyú-tántááꞌá ánásainkakemba mináínkóná ááimba kaweꞌá umái kwéisaawe.

¹⁷Ísóigo Ísu Káráísitiyemo súnda kwenamankóntávéꞌa kwésune. Ísóigon-amankomo tirumpimbó máyáiwai sáwí-imayaagomo tátokaimpinkemba kwéiyatinkaisasa kaweꞌá umái kwémaewe.

¹⁸Ísareri-kwaasiti imáyáagomo ímo kaweꞌó umáímo ísaraantemba kentáásí imáyáago íma mirá isanayá Ísóigona ságayanko kentáá sáma kwégamasinkaintaawe. Ísóigo Ísu Káráísitin-amanko kentáásirumpimba ména kwenkááníꞌa umásinkenaya kwená ságayamba kwésimenaya mirá úmae kwéiyiye.