Read Kosena 2 Kórínti 4 Bible Online

2 Kórínti 4 - Kosena bible

2 Kórínti 4

¹Áánútu aruntá kwéumasinkenaya mindáyavena kesí mayáí máyáaro séna símakaisata kwenáái kwésimatimundaya sívón-kaiye séta íma kwétuwaumpo

²kwenáái simátimenaundayaveta aúpáꞌó tigaeyávésamo kwéomba sínaaemba kwéumameta íma kampaꞌá simátiyuweta Áánútun-aaigomba kwaéꞌnáer-aimba íma simátimeta Áánútu aúrankaꞌa avoraꞌá árair-aimba simátimunasaya suwánésaya árair-aine suꞌmai kwésewe tirunkakémbá sénááontaveta Áánútu aúrankaꞌa miráyá kwésune.

³áséi-kwasai avoraꞌá kwésimatimundaya mináínkóná ááimbo ímo isésamo ésa miwímá Áánútuna némpaꞌa mésa puwí-ámpáꞌá kwégowaiman-owe.

⁴Sáátáánigo marapáꞌá kárákwiraiwai miwítí imáyáa kwétuntinkaisasa Ísu Káráísitin-aaiyavesa íma áraire kwésewe. Sáátáánigo séna Káráísitin-aaigo sáma kamátínkáivo séna miwítí imáyáa kwétuntinkaisasa Káráísitina ságayamba íma kwéawanaawe. Áánútumo máyáintemba Káráísiti miráumai máyáísana Sáátáánigo séna Káráísiti sáma kamátínkáivo séna miwítí imáyáa kwétuntinkaiye.

⁵kesáá íma anón-kwaasi úmpo Ísu Káráísitintaveꞌa kentáásí anóndakoman-iye sénááontaveta kwenáái kosimátimeta kwená mayáí-kwáásí máyaunda póta kwétuwaꞌnaa-undayaawe.

⁶ááinkaꞌa túnkuwana Áánútu sáma kaaó súwana sáma karáimba kwemá sáma kamásínkáiwaiyaaman-iye. Ísu Káráísiti óir-imayaa kwéundaya Áánútuna óꞌoran-aaimba awánanaundayavena sáma kwégamasinkaintaawe.

⁷kesáá íma asiramáíya méta áséi-kwasaiya tátokaumpo anamó kwímakaawanamo ááémo karákwintemba miráumaiya méta áséi-aimba tátokaundayaawe. suwánésa mináínkómó usáyaaitarain-asirayankomba awánésa sésa íma miwívínkémbán-ivo Áánútumpaken-asirayamban-iye sénááontaveta íma asiramáíya méta minásíráyántá tátokaumne.

⁸namuro-kwáásímó tínkamiyantavesamo úkóntemba óꞌon-oꞌon-umbai-yantaako kentáá úkúraisata tuꞌmaáꞌnámo kwáyáimpinkenta móyuweta kwégune. évaka-tawai séta nóra séta Áánútuna mayáí kwémayaumno kwéseta íma ivátá tukáumne.

⁹sáwíta umásínkáambanivo Áánútu íma siyúwáísata máyaumne. sínkamomba íma ánásasuwaawata úwoiya súvamai kwémaumne.

¹⁰Ísumbo sáwíꞌo umánkesamo inkámówanamo pukáin-ampata kwégundaya pósa Ísu maíꞌmaiꞌa isaná kwená asirayámbá kentáávímbá kwáyáiye-aimba kwéisaawe.

¹¹máyaundaya aasiyaasi-táwai séta Ísuna kwaási-iꞌa úndarakemba ívéra sínkamiyata puwónaumno kwésundaya pósa kesáá máyaundawaina ááimba Ísuma póna kentáásúma ánásani-suvimba máyáiye-aimba kwéisaawe.

¹²áséi-kwasai simátimundaya sáwíta umásinkesa sínkamiyata puwónaunda-ampata kwégundaya mindáyaveꞌa áséi-kwaasi iséꞌa aúnáiꞌa umái máyáan-ampaꞌa kwégowe.

¹³naaóváꞌá Áánútun-aai aúváí-kwandaaivimba agaimaréna sénaÁánútun-aaiyaveꞌa áraire siréꞌapóꞌa kwenáái kwésimatimune siráintemba Áánútun-aaiyaveta áraire séta kwésimatimune.

¹⁴Ísóigo Ísumba pukáimpinkemba usásinankaraiwai Ísunte tarúsinkenaya puwónaundavinkenta usásisinkenaya kentááwé keináraware síꞌmaiya kwenaúrankata sinkáníntaawe.

¹⁵mayáíyá kwémayaundaya sáwíta umásínkáambanivo túwaꞌnaa eta íma ivátuwaunasaya óꞌon-oꞌon-kwaasi Áánútumo úwoimo túwaꞌnaa in-áímbá isésa sáwívarawai Áánútumpaꞌa súwi símae iyésa kwenáwíꞌa anómba úmae kwéiyowe. Áánútuna asirayánkátá máyaunda-kwasai.

¹⁶mináímbá imáyáa kwéundaya sívón-kaiye séta íma ivátukaumne. kentáásúma sáwíꞌa úmae íyísana Áánútu kentáásí imáyáa aúnáiꞌa kwéumasinkaiye.

¹⁷kentáásópaꞌo kwáyáin-umbai-yantaataveta séta úwoisan-umbai-yantaaꞌa kwááyu kwáyáiye súnanaya naaémba minúmbái-yántáápínkémbá óꞌoran-kawe-tantaaꞌa usáyaaitaimba kwaíkwaiꞌa ínín-kawe-tantaaꞌa paáriniye.

¹⁸mindáyaveta marapáꞌó awánáúnda-yantaaꞌa íma anón-imayaa éta kwíyómpaꞌo ímo awánáúnda-yantaataveta imáyáa úmae kwéiyune. awánáúnda-yantaaꞌa kwááyu-yantaaꞌan-ivo kwíyómpaꞌa íma awánáúnda-yantaaꞌa kwaíkwaiꞌa íníye. mindáyaveta umbai-yántáátávéta séta úwoisamban-iye kwésune.