Read Kosena 2 Kórínti 5 Bible Online

2 Kórínti 5 - Kosena bible

2 Kórínti 5

¹kentáásúma kwááyu-nankaa-suwawaata isatá minkúwawaakwarata marapátá méta maarán-áímbá kwésune. maankwááyú-námbá tawísígwinata Áánútumo kwíyómpaꞌo úmakain-daumpaꞌa ménaundayaawe. mindámbá kwaási íma úmakaan-damban-ivo Áánútu kwená imáyáavinkemba úmakaimba kwaíkwaiꞌa ínín-damba mindá kwíyómpaꞌo ménaunda-kuwawaaꞌan-iye.

²marapáꞌó máyaundaya anón-imayaa éta kwíyómpaꞌo ménaunda-kuwawaata simínkwáeya kwéseta

³maarán-áímbá íma séta puwéta súwawaar-íyaainkaanta umáíya máyaumne íma kwésumpo maarán-áímbá séta kwíyómpaꞌo ménaunda-suwawaata naankáántá ónáeya kwésune.

⁴kentáásúma kwááyu-nankaamba isatá máyaundaya umbai-yántááꞌá kwáyáintaveta anón-imayaa éta marapá-súwawaataamo tuwánaunda-aimba íma séta kwíyómpaꞌo ménaunda-suwawaata mayánaunda-ainta kwésune. miráyá ónaunda marapáké-súwawaakaanta aúkáinata maíꞌmaita ónaumne.

⁵miráyáámó ónaundayavenaya Áánútu kentáá toꞌmayaa éna kwenamankómbá aiꞌmarówana kentáásirumpimba kumbáyáísata mindáyaveta toꞌmayaa umásínkarainta mirá íníye kwésundayaawe.

⁶Áánútu kwenamankómbá aiꞌmarówana kentáásirumpimba kumbáyáintaveta kentáásí imáyáa asiramáíya máyaumne. marapáꞌó máyaundaya Ísóigo Ísu Káráísitiyeya íma kwíyómpakaaniꞌa umáíya máyaundayaawe.

⁷ívéta marapáꞌá máyaundaya kwenaneꞌá íma kwéawaneta kwenááiyaveta áraire séta kwenkáꞌá agevamáíya méta

⁸kentáásí imáyáa asiramáíya méta puwétaamo kwíyómpaꞌo Ísóigo Ísu Káráísitiyemo métaaraiya aamoí úsino.

⁹maankáꞌó máyaundayaawe kwíyómpaꞌo uménaundayaawe Áánútumbo arááímo kwétainiꞌa ónáe súndaya póna aamoí umásínkáisintaawe.

¹⁰amáparawaiya Ísu Káráísiti aúrankaꞌa máyáananaya kesáámó máyaundawaina ááintavena sísaa ena marapáꞌó máyáamba kaweꞌó kwéowai kaweꞌ-méyámbá tiména sáwíꞌo kwéowai sáwí-meyamba timínímba póta kwembó arááímo kwétainiꞌa ónáeya kwésune. Ísuwemo tarúmaimo máyaundaya aúnáiꞌa umáíya máyaunda-kwasai.

¹¹Ísóigo máyaundawaina ááimba sísaa íníntaveta kwentávéna sááꞌa kwégaisata kwenópaꞌa tígwáe séta kwaási kwétavisundayaawe. Áánútu máyaundawaina ááinta suwánaisaꞌa keinárawatemo máyaundawaina ááinta kwésuwanaamba kaweꞌá kwéiye kwésune.

¹²kentáá súwíꞌa íma maé kwéiyundanivo máyaundawaina ááintaveꞌa aamoí ónááontaveta máyaundawaina ááinta kwésimatimune. aamoí éꞌa kentááyávésamo sáwí-aimbo kwésen-kwaasi táái kanaán-umai anondá simátimenaaontaveta máyaundawaina ááinta kwésimatimune. minkwáásí paáká-túwawaare suꞌmai tuwánésa kawe-kwáásímán-owe sésa tirumpin-ímáyáá íma awáresa kawe-kwáásímán-owe kwésewe.

¹³évakarawai kentááyávésa uwoꞌaóꞌá kwéowe kwésewata kanaán-iye séta Áánútuntaveta imáyáa éta miráyá kwéunasaya évakarawai kentááyávésa kawer-ímáyáágwárá-kwáásímán-owe kwésewata kanaán-iye séta keinárawataveta imáyáa éta miráyá kwéune.

¹⁴amáparawai sáwíꞌo kwéomba mimbéyámbá maésa púwóvo séna Ísu Káráísiti mimbóráwáí kentááyávénawe séna pukáimba póta Káráísiti arumbá kwésimiwaina mayáíyé suꞌmaiya kwémayaumne.

¹⁵amáparawaiya sáwí-imayaago tátokaimpinkemba iyásinkanintavena Ísu Káráísiti pukáimba póta kentáámó sirááímo kwétainiꞌa íma kwéeta kwembó arááímo kwétainiꞌa kwéeta máyaumne. mirámó ónaundayavenaya kentááyávénawe séna puwúwana Áánútu usásinankaraiye.

¹⁶ááéma marapáꞌó máyáan-kwaasiti ááimba kwaréta évakarawaiyaveta kawe-kwáásímán-owe séta évakarawaiyaveta sáwí-kwaasiman-owe siráumpo ívéꞌa íma miráyá kwéseta ááéma marapáꞌó máyáan-kwaasiti ááimba kwakáunda Káráísitintaveta úwoi-kwaasiman-iye siráundaya ívéꞌa íma miráyá kwésune.

¹⁷mindáyaveta Ísu Káráísitiyemo tarúmaimo máyaundaya aúnáiꞌa umáíya méta ááémo uráundanten-imayaa íma éta ívéꞌa aúná-imayaa umáíya máyaumne.

¹⁸Áánútu mirá kwéivo ááéma Áánútuna namuro-kwáásíráámbá umáíya máyaawananaya Áánútu kesí kwaási-iꞌa umái maígwáe séna Ísu Káráísitimba aiꞌmarówana kentááyávénawe séna kumpuwówana kwená kwaási-iꞌa umásinkenaya séna kesí kwaási-iꞌa ígwáe-aimba kosimátíméro séna siꞌmákaisata mimbáyáíyá kwémayaumne.

¹⁹mináínkóná ááimba maarán-áímbán-iye. Ísu Káráísiti amáparawaiyavenaya imáyáa éna pukáimba mindáyavena Áánútu imáyáa éna kwaásimo sáwíꞌo kwéomba íma aaivimbá kwémaitinkaivo kwená kwaási-iꞌa kwéumatinkena kentááyávénawe séna kesí kwaási-iꞌa ígwáe-aimba kosimátíméro séna siꞌmákaisata kwésimatimune.

²⁰kesáá Ísu Káráísitina aantá-kwaasiya únanaya simásímísata keinárawaꞌa kwésimatimundayaawe. Áánútu keinárawatavena asiramái siráisata siráin-ainta kwésimatimune. Káráísiti pukáintavena Áánútuna namuro-kwáásíráámbá umái máyáampinkemba kwená kwaási-iꞌa kwéumatinkaivo kwenááiyaveꞌa owé seró.

²¹Ísu Káráísitimpimba sáwíꞌo ií-áímbá íma kwáyowana Áánútu kesáámó sáwíꞌo únda-aimba kwempíntá ámakaiye. Káráísitiye tarúmaiya méta Áánútu aúrankaꞌa arupí umáíya ménaundayavenaya Áánútu mirá úwana Káráísiti kesáámó sáwíꞌo únda-aimba maimaéna mindánankwaraꞌa pukáimba póna Áánútu kwená namuro-kwáásírááníꞌa umáíya máyaundawai kwená kwaási-iꞌa kwéumasinkaiye.