Read Kosena 2 Kórínti 6 Bible Online

2 Kórínti 6 - Kosena bible

2 Kórínti 6

¹Áánútuwe tágárotamai méta mayáí kwémaeta asiramái simátimeta séta Áánútu úwoi kwétuwaꞌnaa-imba póꞌa íma úwoi méꞌa kwembó arááímo kwétainiꞌa oró kwésune.

²naaóváꞌá Áánútun-aai aúváí-kwandaaivimba Áánútumo siráin-aimba agaimaréna sénaúwoi túwaꞌnaa uráunda-kanaa kentááiiséꞌa sáwíꞌo umáímo máyómpinkembotíkaunda-kanaa túwaꞌnaa uráumne Áánútu siráiye agaimaréna siráimba mindáyaveꞌa ísáaro. ívéꞌa Áánútu úwoi kwétuwaꞌnaa-in-kanaama éna sáwíꞌo umáímo máyáampinkemba kwétirain-kanaama imbá póꞌa íma úwoi méꞌa kwembó arááímo kwétainiꞌa oro.

³kentáásí mayáígómbá awánésa sáwí-amba kwáráavo séta kaweꞌ-máyáíyé suꞌmai kwémayaundaya pósa íma áraiꞌa sésa sáwí-mayai kwémayaawe kwésewe.

⁴amápaꞌ-mayai kwémayaundayaveta séta suwánésaya áraiꞌa Áánútuna mayáí-kwáásímán-owe sígwáe séta mimbáyáí kwémaeta máyaumne. umbai-yántááꞌó kentáásópaꞌo tisasamó síꞌo iníꞌo umásinkesaya sáwíꞌo umásínkáanta íma ivátuweta asiramáíya máyaumne.

⁵Áánútuna mayáíyá kwémayaundarakemba sínkambai ándávaꞌo mósinkesayaamo úkúmakesamo sáwí-aimba simánkesa mirámó kwéonta anóm-bayai kwémaeta noꞌwáámba íma suúyá kwégwaeta úwoi mayáí kwémaeta sááimo kwésinkainta íma ivátuweta asiramáíya máyaumne.

⁶kentááyávésa Áánútuna mayáí-kwáásímán-owe sénááontaveta kaweꞌ-máyáíyé suꞌmai kwémaeta kawer-ímáyáá kwéeta paru umái méta kaweꞌá kwéumatinkaunanaya Áánútun-amanko keséya máyáísata áraiꞌa miwítí imáyáa kwéeta

⁷árair-aimba kwésimatimunanaya Áánútu asirayámbá kwésimisata mirám-báyáí kwémaeta Áánútu aúrankaꞌa arupí umáíya máyaundaya mindá kweukáámbá araaꞌnaa uráunanaya sáwí-ainko kentáávímbá íma kwétisata Áánútu aúrankaꞌa arupí umáíya máyaundaya mindá iwevóíráámbá umásoketa umbai-yántááꞌó kesópataamo timbá kwéusayaaitaundayaawe.

⁸évakarawai kentáá súwíꞌa mósá máráawasa évakarawai kentáá súwíꞌa simái sáwíꞌa owasá évakarawai kawer-áímbá simásíméwasa évakarawai sáwí-aimba simásíméwasa árair-aimbo simátimundayavesaya évakarawai kentááyávésa kampaꞌá kwésewe sewasá

⁹évakarawai kaweꞌá umái suwánésaya kampaꞌá sésa úwoi-kwaasiman-owe sewasá évakarawai kentááyávésamo puwónáesa owémó kwésemba íma puwúndaya úwoiya súvamaiya máyaumpo suwánaaro. Áánútu arupíya kwéumasinkaimba íma sínkamisata kwévuwune.

¹⁰sáwíva-tantaako kentáásirumba umbaí kwétamasinkainta kentáásirumba kaweꞌá úmae kwéiyiye. kesáá óísamba íma makáundayawaiya éta Áánútun-aai sáwívarawaiya kwésimatimunasaya kaweꞌá umái kwémaewe. óísaniyaaiwai éta Áánútun-aai tátokaundayaveta kaweꞌá umáíya máyaumne.

¹¹Kórínti-naopaken-kwaasi ísáaro. kentí imáyáa éta kentáásirumpinken-aimba avoraꞌá simátímakaundaya

¹²keinárawataveta íma kayoráúnaꞌa kentááyávéꞌa kayóꞌmái máyáawe.

¹³kesí iyámpóímo simátimundantenkaamba simátimumpo kentí imáyáamo úndantemba kentáásí imáyáa éꞌa kentirumpinkén-áímbá simásíméro. Áánútuna naankaantáán-úne siráin-kwasai.

¹⁴oóꞌá tombá moórá anóm-purumakankwara moórá sáwíyam-purumakankwaraꞌa íma kwétagarotamai kwisóvo awaira-púrúmákánkáí tinumarampimbá kwímakaawasarai oóꞌá kwétoye. mirámó ontembá keinárawaꞌa Áánútun-aaiyaveꞌa áraire sewáíyé ímo áraire sewáíyé íma tágárotamai méꞌa mayáí máyáaro. arupí umái máyáawaise Áánútun-aai arááíraawaise íma kanaán-umai tágárotamai mésa mayáí kwémaraawe. ságayankwara tunígwaraꞌa íma moórávimba kwáyáiye.

¹⁵Ísu Káráísitiye Sáátáánigowe íma mimbórá-ímáyáá óyasa Áánútun-aaiyavesa áraire sewáíyé ímo áraire sewáíyé íma mimbórá-ímáyáá kwéowe.

¹⁶Áánútuna naaúmpaꞌa kwesé kwaántá-kwaasi mimbórávímbá íma ménaaowe. Áánútu asirayánkwáráwáí kentáásirumpimba máyáísata kwená naankaantáán-úne. mináíntávéna naaóváꞌá Áánútun-aai aúváívimba agaimaréna séna Áánútu sénakesí kwaásiye méꞌa miwívímbá kwénaaeꞌamiwítí Ísóigo onasá kesí kwaási-iꞌa ónááowe Áánútu siráiye.

¹⁷mindáyavena Ísóigo sénaúwoi-kwaasivinkemba tiyuwéꞌa moórá-ayampaꞌaméꞌa sáwí-mayaigomba tínaaemba umátimiyaꞌatiréꞌa

¹⁸kentivoíꞌa onaꞌá kesáánimbaaꞌakesiyáámúmbaariꞌa ónááowe. Ísóigo amápar-asirayamba tokáiwai siráiye agaimaréna siráiye.