Read Kosena 2 Kórínti 8 Bible Online

2 Kórínti 8 - Kosena bible

2 Kórínti 8

¹kesí kwaásiyono. Másétóniyaa-maravaꞌo naaóꞌ-naoꞌa máyáawai Áánútuna kwaási kwemá kwétuwaꞌnaa-in-aimba simátimenaumpo ísáaro.

²anón-umbai-yantaaꞌa miwítópaꞌa téna kwétavisisasa íma ivátuwesa Áánútuntavena tirunkó kaweꞌá úmae íyísasa miwí kesáváí óísaniyaain-kwaasi máyáantavesa íma imáyáa ésa Yútiyaa-maravaꞌa Ísóigona kwaási máyáawaiyavesa imáyáa ésa sáwíyan-oisamba makáampinkemba sáwíva-tantaaꞌa torupásuwesa túwaꞌnaa uráawe.

³árair-aimba simátimune. miwí sésa maarán-tántááꞌá kanaán-umai timénaumpo óꞌomba torupamái timénáe sésa miwítí imáyáavinkemba mirá ésa sáwívaꞌa tímakaawe.

⁴kentááyávésa asiramái símae iyésa sésa Yútiyaa-maravaꞌa Ísóigona kwaási máyáawai timénáe sétaamo únda aamoí kwéune siráawe.

⁵imáyáawe suꞌmaimo únda-yantaare suꞌmai íma tímakaavo óꞌon-oꞌon-tantaakwaraꞌa timésa aivaꞌá Ísóigontavesa sésa ená kwaási-iꞌa umáíya méta ená mayáíyá kwémayaumne sirésa Áánútuna imáyáavinkemba kentááyávésa sésa Áánútuna mayáí simásimiyata keinárawate mayánaumne sésa

⁶maankáꞌá Másétóniyaa-maravaꞌa máyáawai mirán-áímbá siráamba póta Táításimba simámeta séta Yútiyaa-maravaꞌa Ísóigona kwaási túwaꞌnaa ónááom-bayai Kórínti-naopaꞌa koááimba ásáre tayauweré kuré túwaꞌnaa inasá torupamái maráíyana ánásaino Táításimba simámakaumne.

⁷óꞌon-oꞌom-bayai kaweꞌá umái kwémaraawai éꞌa Áánútun-aaiyaveꞌa asiramái imáyáa kwéeꞌa kwenáái kaweꞌá umái kwésimatimeꞌa kwenááigona ááimba kaweꞌá umái kwéiseꞌa karuwaaꞌá éꞌa kwétuwaꞌnaa-eꞌa kentirumbá kwésimeꞌa mirámó kwéon-kwaasi ontávéta simátimeta séta Yútiyaa-maravaꞌa Ísóigona kwaási máyáawai túwaꞌnaa ónááomba kaweꞌá umái timénááowe kwésune.

⁸maankáꞌá Másétóniyaa-maravakewai Yútiyaa-maravaꞌa Ísóigona kwaási máyáawaiyavesa imáyáa ésa kaweꞌá umái tímakaan-aimba timénaunda mirán-oro íma kwésumpo timénááo. íya timénááoo séꞌa kentirunkómbá tísaa umai kwéisaumne.

⁹kentáásí Ísóigo Ísu Káráísiti úwoi kwétuwaꞌnaa-imba ísaraawe. kwíyómpaꞌa óꞌoran-kaweꞌa umái máyomba keinárawatavena imáyáa éna kwíyómpaꞌa tuwéna kaweꞌá umái ménaaontavena úwoi-kwaasiraamba umái marapáꞌá kumbéraiye.

¹⁰kéꞌnaan-aimba kesí imáyáavinkemba súmpo ísáaro. ááéma Áánútuna kwaásivinkemba keinárawaꞌa aivaꞌá séꞌa torupamái timénáe séꞌa ááimba aséꞌa moórá-ima maisukáavo ívéꞌa mimbáyáí ánásasuwaaro.

¹¹ááéma karuwaaꞌá umái toꞌmayaa éꞌa ívéꞌa karuwaaꞌá éꞌa sáwíva-tantaaꞌo makáawai sáwívaꞌa maráíyasa sáwíyambo makáawai miráumai maráíyasa miráumai maráíyana ánásaino.

¹²sáwíva-tantaaꞌo máráane sáwíyambo máráane Áánútu tuwánanivo timénáemo síyan-tantaaꞌa sáwíva-tantaapinkemba sáwívaꞌa maréꞌa sáwíyampinkemba sáwíyamba maréꞌa timénááomba Áánútu awánéna kanaán-iye síníye.

¹³túwaꞌnaa ónááomba íma amápaꞌa tuꞌmái ánáseꞌa kesávéꞌa kwémareꞌa oró.

¹⁴ánivo ívéꞌa makáan-tantaaꞌa kwáyáintaveꞌa mimpínkémbá timéꞌa naaémbo ímo maránááomba miwí keinárawaꞌa túwaꞌnaa ónááomba mimbóráíꞌa umái ménaaowe.

¹⁵miráumai naaóváꞌá Áánútun-aai aúváívimba agaimaréna moórá-tonko áwíꞌa máána-tone sénatoóntávéna séna sáwívaꞌa túkúmai kwénowai tímúꞌa vówasa íma arááꞌa márówasa sáwíyamba túkúmai kwénowai tímúꞌa vówana íma táái tínkaraiye agaimaréna siráiye. miráumai ívéꞌa makáan-tantaaꞌa kwáyáintaveꞌa mimpínkémbá timéꞌa naaémbo ímo maránááomba miwí keinárawaꞌa túwaꞌnaa ónááowe. Táítási Kórínti-naopaꞌa kuráin-kwasai.

¹⁶Áánútu Táításimba imáyáa ámísana kemó túwaꞌnaa úndantemba kwegwáráꞌá túwaꞌnaa ónáe kwésisata mindáyaveꞌa Áánútumpaꞌa súwi kwésune.

¹⁷Táításimba simámeta séta kotúwaꞌnaa inasá Yútiyaa-maravaken-kwaasi túwaꞌnaa ónááontavesa évaka-tantaaꞌa torupamái maránááowe súndayavenaya aamoí éna kwená imáyáavinkenkwaraꞌa séna óꞌa miwísé koménaumne Táítási siráiye.

¹⁸Táításimba aiꞌmáráandaraꞌa moórá-kwaasigwaraꞌa aiꞌmáráanana kwesé kwíníye. kwemá áséi-kwasai simátímaꞌmae kwénaaisasa naaóꞌ-naokemba Ísóigona kwaási kwenáwíꞌa mósá kwémaraawai kwemá Táításiye kwíníye.

¹⁹Ísóigona kwaási naaóꞌ-naokemba kwembá usásinankesa sésa esé mimbáyáí mayaaó sewaná keséya kwénaaena túwaꞌnaa únda-mayaiya kwémayaisasa kentáásí mayáígómbá awánésaya sésa toómbá íma makáan-kwaasi kwétuwaꞌnaa-owe kwésesa Ísóigo áwíꞌa mósá kwémaraawe.

²⁰mimbáyáímó kwémayaundaya sáwíꞌan-owe seváíyé séta

²¹Ísóigo aúrankare kwaási túrankare mimbáyáí kaweꞌá ónáe séta naaóꞌ-naoꞌa kwénaaeta torupámáráan-ontantomba maimaéta ímo makáan-kwaasi túwaꞌnaa ondayávéta kwénaaumne.

²²minkáéꞌnáraimo tiꞌmáráandaraꞌa moóráwainkwaraꞌa aiꞌmáráanana kwéna kaumbosé koínímba kwembá sáwíva-tawai áísaa umai awánanae súndaya kwétuwaꞌnaa-in-kwaasigo isatá awánaraumne. keinárawaꞌa kaweꞌó umáímo máyáan-aimba iséna póna kotúwaꞌnaa ónáe siráiye.

²³Táításin-aai súnda kesé tágárotamai ména túwaꞌnaa índayavena kesé mayáí kwémayaiye. kwesémo koóyááoiyan-kwaasi táái súnda mimbáyáí mayáyááoiyantavesa naaóꞌ-naokemba Ísóigona kwaási keinárai usásintinkaraayasarai Ísu Káráísiti áwíꞌa mósá kwémaraaiye.

²⁴mindárau kentópaꞌa komáyaiyaꞌa kentirumbá tíméro. kentúmo maé kwéiyundayavesamo sésa áraiꞌa kaweꞌá umái máyáawe kwésesa naaémba naaóꞌ-naoꞌa Ísóigona kwaási kosimátímaꞌmae naaíyasa kentáái isánááowe.