Read Kosena Kárésiya 4 Bible Online

Kárésiya 4 - Kosena bible

Kárésiya 4

¹simátíménda-aimba ísáaro. moóráwai puwéna kesááninko kesí náaindaamba mayáníye siráinana kwemá aanávó póna iyámpói máyaindayavena úwoi-kwaasiraamba umái máyainasa

²avowámó simátímakainda-kwaasi kwená náaindaankare miníyámpóíráré kárákwirewana avowámó siráintemba anón-éna mindááíndáámbá mayáníye.

³ááéma kesáá miráumai iyámpóíraamba umái méta kwaántá-kwaasiti aambá kwégwaraawananaya minkwáántá-kwáásí tááigo kentáá tátokowana

⁴Áánútumo siráin-kanaa túwana ááninkomba aiꞌmarówana marapáꞌá kumúwana moórá-ininko maránkarowana Áánútu Mósesimbo simámakain-amaamba kwégwarena ména

⁵minámáánkó kentáá tátokaimpinkemba iyásinkanintavenaya Áánútuna iyámpóí-ita umásinkanintavenaya mirá uráiye.

⁶Áánútu keinárawaꞌa kwená iyámpóí-iꞌa ontávéna ááninkon-amaankomba aiꞌmarówana kentirumpimbá kumbáyáimba póꞌa Áánútuntaveꞌa kesivowé kwésemba

⁷mindáyaveꞌa kwaántá-kwaasi tááigo íma tátokaiwai éꞌa Áánútu áánimbaariꞌa ombá póna áánimbaatavenamo toꞌmayaa uráin-tantaaꞌa timíníye. Póro Kárésiyaa-kwaasiyavai anón-imayaa uráin-kwasai.

⁸ááéma íma Áánútunopaꞌa téꞌa ísaraamba kampa-tántááré kwaántá-kwaasiti imáyáawe mósá makáawana minímáyááó keinárawaꞌa tátokaimbanivo

⁹ívéꞌa Áánútumpaꞌa tiráawana keinárawaꞌa kwemá kwétuwanaisaꞌa nóra éra úwoisan-tantaare aamoimó tain-tántááré miváꞌá tirumbá kwantéꞌa minkwáántá-kwáásítí imáyáa mósá maréꞌa miwítí mayáímó kwémayaantaveꞌa owé kwéseo.

¹⁰ánivo évaka-tawaiye évaka-kwiyone évaka-tawaimo toómbó kwénaantavaiye évakar-iye mintántáákóntávéꞌa kampaꞌá séꞌa anón-kanaawe kwéseꞌa anón-imayaa kwéomba

¹¹keinárawapimba maseꞌmasááꞌa kwéowanaꞌa sáwíva-tantaakwara Áánútun-aaigwaraꞌa kwétatoraawana póna kesí mayáígó íma áúgwaraꞌ-mayaima iyé-ímáyáá kwéunana sirunkó umbaí kwétaiye.

¹²kesí kwaásiyono. asiramái simátíménda-aimba ísáaro. kembó tátokain-amba tuwéꞌa keinárawakaamba umái máyaumpo keinárawaꞌa kembó tátokain-amba tuwéꞌa kenkááníꞌa oro. keinárawapimba komáyaawanda íma sáwíꞌa umásínkówana

¹³síꞌa úmbanivo íma kówanda méꞌa áséi-kwasai simátimewanaꞌa ísaraawe.

¹⁴sáwí-siꞌo úmba kesúma sáwíꞌa úwaꞌa mirá-síꞌó úwain-aaroi íma inkaiséꞌa siyuwéꞌa kaweꞌá umái kárákwiraawe. kwíyómpaken-kwayoꞌnarawaraꞌi. Ísu Káráísitiyaꞌiyo. komáyowaꞌo kárákwiraantemba kenkáꞌá miráumai kárákwireꞌa

¹⁵súwaꞌnaa ékai túramba píꞌmai símakaasino. kaweꞌá umái kárákwireꞌa aamoí umásínkaraambanivo ívéꞌa mirán-áámóí-yántááꞌá íma kwáyáimba nóintavaiyaꞌiyo.

¹⁶árair-aimbo simátímakaundayaveꞌa kentávéꞌa kesí namuro-kwáásí iyé-ímáyáá kwéowe.

¹⁷Ísu Káráísitina áséi-kwasaigomba kwaéꞌnáeꞌa kwéowai sáwí-imayaavinkemba kentirumbá kwéairaresa sésa kwenáái ísáavainivo kesááiya isáígwáe sésa kentirumbá kwéairaraawe.

¹⁸kawer-ámpáꞌá métinkanae sésamo kentirumbó airaránááombo éna mindá kaweꞌán-iye. kemó keinárawapimbo maéwándawe moórá-naopaꞌo tamáyaundawemo kawer-ámpáꞌá métinkanaemo síyanamo éna kaweꞌán-ivo miwí áséi-kwasaigomba kwaeꞌnaér-esa kentirumbá kwéairaraawe.

¹⁹kesí iyámpóíyono. aaraimó iyámpóímo tínkáawanamo umbai-yántááríꞌo intembá keinárawataveꞌo imáyáamo únda sirunkó umbaí kwétaivo Káráísitinkaaniꞌo ónááomba minúmbáí-yántááꞌá ánásaniye.

²⁰anón-imayaa éꞌa keinárawapimba koméꞌo aaimó simátimenaunda kaweꞌá umái isánááon-imayaa kwéunana sirunkó aamoí kwéiye. Ékaante Séraanteyavai kwántámai-aimba siráin-kwasai.

²¹keinárawapinkemba évakarawai séꞌa Mósesi siráin-amaamba kwaráúndaya Áánútu aamoí umásinkaniyemo kwésewai minámáánkóná ááimba íma kaweꞌá umái kwéisaavo simátíménda ísáaro.

²²naaóváꞌá Áánútun-aai aúváívimba agaimaréna séna Ááváramu kaer-íyámpóí tinkómba moórá-iyampoi kwayór-ínínkó ánkarowana moórá-iyampoi aivar-ínínkó ankówana

²³kwayór-ínínkóná iyámpói miwítí imáyáavinkemba ánkaraivo aivar-ínínkóntávéna Áánútu séna iyámpói ankáníyone simái asirámakonkaꞌa ánkaraiye.

²⁴mináínkómbó kwántámai-aimbo sendá ísáaro. mindá kaer-áímbá simái tarúmakaiye. moórá-aimba Árépiyaa-maravaꞌa Sáínai-omapaꞌa Áánútu Mósesimbo simámakain-amaamba póna moórá-ininko áwíꞌa Éka kwayór-ínímbá póna kwenárááꞌmaaꞌa kwayó-kwáásí pósa ámáánko tátokaipaꞌa máyáawe. mináínkóná ááimba maarágwáráꞌá éna Yérúsaremu-naopaꞌa marapáꞌá kwáyáin-daopaꞌa isasá mindáópaken-kwaasi ámáánko tátokaipaꞌa máyáawe.

²⁶ánivo moórá-aimba simái tarúmakain-aimba maarán-áímbán-iye. aúná-naoꞌa Yérúsaremuvakaan-daoꞌa kwíyómpaꞌa kwáyáipaꞌa ámáánko kwaási íma tátokain-daopaꞌan-iye. ánivo mináínkóná ááimba maarágwáráꞌá éna Áánútun-aaiyaveta áraire súndawaiya kentáá sinówaraamba uráiye.

²⁷mináíntávéna Áísáya Áánútun-aai aúváívimba agaimaréna sénaageínínkó iyámpóímo ímo ánkarainda-ininko arunkó kaweꞌá íno. aúkain-ininko árááꞌmaaꞌa sáwívaꞌa maíyasa kwaaigwárár-ínínkó árááꞌmaaꞌa sáwíyamba ménaaomba póna ímo áíꞌo kwéinanamo iyámpóímo ánkarainda-ininko arunkó kaweꞌá ísana aamoí kwéiye agaimaréna siráiye.

²⁸kesí kwaásiyono. Áánútu Áísákaamba ankáníyone simái asirámakainkaꞌa ánkaraintemba keinárawatavena Áánútu simái asirámakainkaꞌa póꞌa kwená iyámpóín-owe.

²⁹naaóváꞌá anóvowiti imáyáavinkemba ánkaron-iyampoigo éna Áánútun-amaankona imáyáavinkemba ánkaron-iyampoigomba sáwíꞌa umánkaraimba pósa mirán-kwáásí mésa mirá-sáwíꞌá kwéowe.

³⁰naaóváꞌá aúváívimba agaimaréna sénakwayór-ínínkónté ááninkonte tiꞌmaraaó. tivowámá puwínda aivar-ínínkó ááninko kwená náaindaamba mayánímbanivo kwayór-ínínkó ááninko íma mayáníye agaimaréna siráiye.

³¹kesí kwaásiyono. kesáámá íma kwayór-ínínkó áráámaata úmpo aivar-ínínkó áráámaata úne.