Read Kosena Kárésiya 5 Bible Online

Kárésiya 5 - Kosena bible

Kárésiya 5

¹Ísu Káráísiti séna sáwí-imayaaomo tátokaimpinkemba iyátinkanaumne séna iyásínkaraimba póꞌa keinárawaꞌa iyátínkaraindavaꞌa méꞌa moórágwaraꞌa tátoranin-ampaꞌa íma kwáráaro.

²kemá Póro simátimumpo kaweꞌá umái ísáaro. arupí umái máyáawain-owe Áánútu síníntaveꞌa túraꞌa kárámai araaꞌéna oro kwésemba mináíntávéꞌo owémó síyanamo éna Ísu Káráísiti keinárawatavaiye sénamo pukáin-anko íma túwaꞌnaa íníye.

³túraꞌa kárámai araaꞌéna orómó kwésewaiyaveꞌa avoraꞌá súmpo ísáaro. Yútaa-kwaasiti ámáámbo kwaréꞌo túraꞌo kárámaimo araaꞌénamo éꞌo éꞌa Yútaa-kwaasiti ámáámba amápaꞌa kwaꞌmaéꞌa koró.

⁴keinárawapinkemba évakarawai séꞌa ámáámbo kwaráúnda Áánútu suwánéna arupí umái máyáawain-owe síníye-imayaa kwéowai Ísu Káráísitiyemo tarúmaimo máyáamba ivátuweꞌa Áánútumo úwoi kwétuwaꞌnaa-imba tínaaemba umámakaawe.

⁵keinárawaꞌa mirá kwéovo kesáá maará éta Ísu Káráísitiye aráápamai máyaunanaya Áánútun-amanko súwaꞌnaa imbá pónaya kentááyávéna séna arupí umái máyáawain-owe sínímba amuꞌmaréta méta séta áraiꞌa mirá síníyeya kwésune.

⁶Ísu Káráísitiye tarúmaiya máyaundaya moóráwaimo áúraꞌo kárámaimo araaꞌéna ínana ímo áúraꞌo kárámaimo araaꞌéna ínanamo ínímba mindá íma anón-tantaaꞌan-ivo Ísu Káráísitiyemo aráápamaimo máyaundaya túwaꞌnaa umai máyaundaya mindá anón-tantaaꞌan-iye.

⁷Ísu Káráísitina aampaꞌá aamoí ésa kwégwaraamba moóráwai minámbá áúntuwaisaꞌa ívéꞌa Ísu Káráísitina árair-aimba íma kwégwaraawe.

⁸Áánútu kwená kwaási-iꞌa umátinkaindayavena tááyaraiwai minámbá íma áúntukaivo kwaási áúntukaawaꞌa íma kwégwaraawe.

⁹kwaási maarán-áímbá sésa kisaamó moórámo kampindaisaná amápaꞌa kwégampindaiye kwésevo kentúraꞌa kárákwiyoro.

¹⁰keináraware kesááwé Ísóigowe tarúmaiya máyaundayaveta asiramái simátimeꞌa séꞌa kemó imáyáamo úndantemba mirán-ímáyáá íyata mimbórá-ímáyáá ónaundayaawe kwésunda póna kampar-áímbá séna kentirumbá kwéairaraiwai kemá íma awánáúnda-kwaasi kwemá sáwí-meyamba mayáníye-aimba ísaraumne.

¹¹kesí kwaásiyono. évakarawai kentávésamo kampaꞌá sésa arupí umái máyáawain-owe Áánútu síníntaveꞌa túraꞌa kárámai araaꞌéna oró-áímbá kwésiyemo kampaꞌó kwésemba mináímbó paaímó kwésundarakai íma sáwíꞌa umásínkáasino. kemá simátimeꞌa séꞌa Ísu Káráísitimba taairaꞌá tuvúwúwana kentááyáváíyé séna pukáiye-aimba kwésimatimunda-aintavesa áwááꞌa kwésevo túraꞌa kárámai araaꞌéna oró-áímbó kwésundarakai íma áwááꞌa síyésino.

¹²kampar-áímbó simátimesamo kentirumbó kwéairaraawai miwí túma kárámai sáwíꞌa umásuwaaro-imayaa kwéune.

¹³kesí kwaásiyono. sáwí-imayaaomo tátokaimpinkembo iyátinkaindayavena Áánútu tááyamai mirá uráimba póꞌa áꞌa iyátinkaisaꞌa máyáantaveꞌa sáwí-yantaataveꞌo tirááíyaveꞌo kwéomba íma kwaréꞌa kwempá-kwempaꞌa tirumbá timéꞌa túwaꞌnaa umai máéro.

¹⁴mindáyavena naaóváꞌá Áánútun-aai aúváívimba agaimaréna sénakesáváí-ímáyáámó ontembá kentíkwaásiti imáyáagwaraꞌa oro agaimaréna siráiye. Áánútumo siráin-amaankona ááimba mirán-áímbán-iye.

¹⁵ánivo keinárawaꞌa keíyái aaisambá séꞌa áwááꞌa séꞌa ónááombo éꞌa sáwíꞌa umái ánásanaaovo kárákwiyoro. Áánútumbo arááímo tainíꞌo ésa sáwí-imayaagomba tirááíyavai ésa on-kwásáí.

¹⁶simátíménda ísáaro. Áánútun-amanko kwésintemba miráumai maíꞌmaiꞌa éꞌa Áánútumbo arááímo tainíꞌo éꞌo éꞌa sáwí-yantaataveꞌo tirááíyaveꞌo kwéon-ambo íma kwaránááomba mindá kanaán-ivo mirán-oro.

¹⁷sáwí-imayaayaveꞌo tirááíyaveꞌo kwéomba isaná Áánútun-amankombo arááímo tainíꞌo kwéomba isaná minkáér-ímáyááó tiyankéya kwéivo Áánútun-amankomo kentúraꞌo kárákwiraimbo éꞌa sáwí-yantaataveꞌo tirááíyaveꞌo kwéon-amba íma kwaránááowe.

¹⁸Áánútun-amankomo sintembó mirámó éꞌo éꞌa séꞌa Áánútun-amankomba arááíma tainíꞌa kwéunana póna Yútaa-kwaasiti ámáánko kembá íma tátokaiye kwésewe.

¹⁹kwaási miwítí imáyáavinkemba avoraꞌá maará kwéowe. áwáyo-tantaariꞌa ésa anómba sáwíꞌa ésa sáwíꞌo kwéon-tantaatavesa íma tigaeyávésa ésa

²⁰kígaumo umándai-yantaako áwíꞌa mósá marésa kwaántá-kwaasiyonti imáyáa mósá marésa uwaaꞌá kwévesa pukaaꞌá kwéagayesa tíyámba kwéumatinkesa aaisambá kwésesa tirumbá sáwíꞌa kwéumatinkesa áwááꞌa kwétiyesa miwí tááigo usáyaaitainkwae sésa íma tágárotamai kaweꞌá umái mésa taaínkaar-umai mésa

²¹túran-anda kwéesa uwoꞌaóꞌ-nómbá kwénesa uwoꞌaóꞌá kwéesa uwoꞌaóꞌ-nómbó nánááontavesa torupamái mésa mirán-tántááꞌá kwaásiti imáyáavinkemba kwéowaꞌa simái ságamatimeꞌa ókwaraꞌa simái ságamatimeꞌa séꞌa mirámó kwéowai Áánútumo kárákwirain-ayampaꞌa íma ménaaovo kárákwiyoro kwésune.

²²ánivo Áánútun-amanko tirumpimbá máyáiwai maará umátínkáisasa kwémaewe. tirumbá kwétimesa tirunkó kaweꞌá ésa paru umái mésa asiramái maésa íma tívón-káínasa mésa túwaꞌnaa umai kaweꞌá umátinkesa miwítí mayáí kaweꞌá umái kwémaesa

²³miwí túma íma maé iyésa miwí túraꞌa kárákwimai kaweꞌá ésa mirámó kwéowaina ááimba íma aambá áúnkaiye.

²⁴Ísu Káráísitina kwaási sáwí-imayaayavesamo tirááíyavesamo kwéon-imayaao kentáá tátoꞌmai tavisivó sésa sáwí-imayaayavesamo tirááíyavesamo kwéon-amba tínaaemba umámesa tukáawe.

²⁵Áánútun-amanko aúnáiꞌa umásínkaraisata aúnáiꞌa umái máyaunda póta kwenamankómó kwésintenta umáíya kwáráano.

²⁶kentúma íma maé iyéꞌa kesááigo usáyaaitainkwae íma séꞌa kawe-tántááꞌó índayaveꞌa íma simái sáwíꞌa oró.