Read Kosena Kárésiya 6 Bible Online

Kárésiya 6 - Kosena bible

Kárésiya 6

¹kesí kwaásiyono. keinárawapinkembo évakarawaimo sáwíꞌo kwéombo ésa kwétuwanaamba pósa keinárawapinkemba Áánútun-amankomo sintembó mirámó kwéowai kwempaꞌá arupí umátinkanaaowe. kegwáráꞌá mirá-sáwíꞌá ónááovo kárákwiyoro.

²umbai-yántááꞌó kwáyaindawai túwaꞌnaa oro. mirámó éꞌo éꞌa Ísu Káráísiti siráiniꞌa mirá ónááowe.

³úwoi-kwaasigomo anón-kwaasi únemo sínímba minímáyááó kampaꞌá simáuwaniye.

⁴kentí mayáí awánéꞌa kaweꞌ-máyáímó kwáyainaꞌo éꞌa aamoí éꞌa óꞌowiti mayáíyávéꞌa kesí mayáígó usáyaaitaraiye íma seró.

⁵amáparawaitopaꞌa umbai-yántááꞌá tínímbanivo íma ivátuweꞌa asiramái méꞌa moórá-morawai túwaꞌnaa oro.

⁶Áánútuna áséi-kwasai ísámae kwéiyowai miwítí kawe-tántááꞌá amápaꞌa taaímbai évaka-tantaaꞌa Áánútun-aai kwésimatimewaitopaꞌa tímaꞌmaeꞌa íyóro.

⁷íma kanaán-umai Áánútumba kampaꞌá simáuwanaaovo árair-aimban-ivo íma moórá-imayaa oro. kawer-ánáyúmbó úmáráawaimo ombá kawe-tómbá kwéakaraavo sáwí-anayumbo úmáráawaimo ombá sáwí-tomba kwéakaraawe.

⁸mirámó kwéomba sáwí-yantaatavesa tirááíyavaiye suꞌmai úmae kwéiyowai mirámó kwéowaina anondáma puwésa Áánútuna egwaaꞌá íma ménaaomba pósa némpaꞌa ménaaovo Áánútun-amankombo arááímo tainíꞌa úmae kwéiyowai mirámó kwéowaina anondáma aúnáiꞌa umái maíꞌmaiꞌa ónááaowe.

⁹mindáyaveta kesáá kaweꞌá úmaeta kwéiyundaya íma sívón-káínata ivátúwáano. kaweꞌó úmaetaamo kwéiyundayaamo ímo sívón-káínataamo tuwétaamo éta naaén-kanaamo tínímba kaweꞌ-méyántá maéta ménaumne.

¹⁰mindáyaveta túwaꞌnaa onda-ámbó kwáyáimbo éta amáparawai kaweꞌá umáíya túwaꞌnaa ono. Áánútun-aaiyavesamo árairemo kwésewaiseya mimbórá-ákúníꞌa umái méta túwaꞌnaayaamo ónaundaya mindá anón-tantaaꞌan-iye.

¹¹ayááíráꞌá kemá Póro anón-auvaivimba agaimaráúmpo awánéꞌa kwenayáánaviꞌan-iye seró.

¹²évakarawai sésa suwánésa anón-kwaasiman-owe sígwáe kwésewai keinárawatavesa sésa túraꞌa kárámai araaꞌéna oro kwésewana miwí tááigo keinárawaꞌa kwétavisiye. Ísu Káráísiti keinárawatavaiye séna taairaꞌá pukáiye-aine suꞌmaimo senkákáí évakarawai ísámai sáwíꞌa umátínkáasino. ímo sáwíꞌo umátinkanaaontavesa sésa túraꞌa kárámai araaꞌéna oró-áínkwáráꞌá kwésewe.

¹³túraꞌa kárámai araaꞌéna orómó kwésewai Mósesimo siráin-amaamba íma amápaꞌa kwégwaraawe. kentúraꞌo araaꞌénamo mósá úmaranaaontavesa túma kárámai araaꞌéna ígwáe kwésewe.

¹⁴miwí mirá kwésevo kemá Póro mimbórá-áímbá mósá maréꞌa Ísóigo Ísu Káráísiti kentááyáváíyé séna taairaꞌá pukáiye-aimba mósá kwémaraumne. Ísu Káráísiti kentááyáváíyé séna pukáintaveꞌa púwón-kwaasimo marapá-tántáátávésamo ímo imáyáamo ontembá marapá-tántáátávéꞌa íma imáyáa éꞌa úwoisamban-iye kwésunda póna mintántáákó kembá íma kwétavisiye.

¹⁵moóráwaimo áúraꞌo kárámaimo araaꞌéna ínanamo moóráwaimo ímo áúraꞌo kárámaimo araaꞌéna ínanamo ínímba mindá íma anón-tantaaꞌan-ivo Áánútu aúná-kwaasiraaniꞌo umásínkaraimba mindá anón-tantaaꞌan-iye.

¹⁶simátimunda-aimbo kwaꞌmaé iyíyanamo éna Áánútu paru umái arumbá umátinkena kwená kwaási amápaꞌa mirá umátinkaniye.

¹⁷Ísun-aai simátimewandarakemba sínkamuwana avimá sineꞌá kwáyáintaveꞌa Ísu Káráísitina mayáí-kwáásí óne kwésevo moórá-umbai-yantaaꞌa íma síméro.

¹⁸kesí kwaásiyono. Ísóigo Ísu Káráísiti keinárawate ména úwoi kwétuwaꞌnaa-isaꞌa árair-aimban-iye séꞌa námúnaa kwésune. kemá Póro súnda-aimba ánásaiye.