Read Kosena Évésasi 1 Bible Online

Évésasi 1 - Kosena bible

Évésasi 1

¹kemá Póro maanáúváí agaimaráúmpo ísáaro. Áánútu kwená imáyáavinkemba kentávéna séna aantá-kwaasi-iꞌa éma Ísu Káráísitin-aai kosimátímaꞌmae naauwó séna siꞌmákaivo ísáaro. Évésasi-naopakewai Ísóigona kwaási Ísu Káráísitiye tarúmai máyáawai íma ivátuweꞌa asiramái máyáawai ísáaro.

²Áánútu kentáásivowe Ísóigo Ísu Káráísitiye úwoi túwaꞌnaa esarai paru kwéumatinkaayantaveꞌa námúnaa kwésune. Káráísitinte tarúsinkenaya ításinkarain-kwasai.

³Áánútuma Ísu Káráísiti avowámá éna Ísu Káráísitinteya tarúsinkenaya kwíyómpaꞌa kwenópakemba asirayámbá siménaya kaweꞌá kwéumasinkaisata póta kwentávéta súwi kwésune.

⁴naaóváꞌá Áánútu maramá íma tarórurainkaꞌa Ísu Káráísitiyeya tarúmaiya ménaundayavenaya kwenaúrankaꞌa kwendéí-íꞌa onanayá kentáávímbá íma sáwí-aimba kwénintavena ítámakaiye

⁵Áánútu kentááyávéna imáyáa éna naaóváꞌá séna Ísu Káráísitina mayáíyávéꞌo éꞌa kesáánimbaa kesiyáámúmbaariꞌa ónááowe séna kwená imáyáavinkemba aamoí éna mirán-áímbá siráimba póna mirá uráiye.

⁶ááninkomba arumbá ámakaiwainte tarúsinkenaya anón-kaweꞌa umásinkenaya úwoi súwaꞌnaa umásinkaraimba póta kwená ááimba óꞌoran-aaimba mósá kwémaraumne.

⁷pukáintavena sáwí-imayaaya maisiyuwénaya misáwí-ímáyááó tátokainta iyásinkenaya kentááyávéna óꞌoran-imayaa kwéimba úwoi ávááraumai súwaꞌnaa enaya póna kentáásí sáwí-imayaa maisíyukaiye.

⁹naaóváꞌá kwená kawer-ímáyáávínkémbá aúpáꞌá toꞌmayaa úmakaimba ívéꞌa kwévaarisata kwéawanaumne. Káráísiti kesí imáyáa íníye siráintemba póna

¹⁰Áánútumo siráin-kanaamo tínímba amápa-tantaaꞌo taróruraimba kwíyómpakene marapákéne komaéyamae úmarainana Káráísiti anóndako mindáraꞌa kárákwiyiniye.

¹¹Áánútu kwená imáyáavinkemba toꞌmayaa úmakaimpinkemba mirá kwéiye. imáyáa éna toꞌmayaa úmakaimba póna Yútaa-kwaasi kwená kwaási-iꞌa úndayavenaya Káráísitinte tarúsinkenaya ításinkaraintaawe.

¹²aivaꞌá Káráísitimba amuꞌmaréta máyaundawai kwená ááimba óꞌoran-aaimba isatá mósá kwémaraumne.

¹³miráumai óꞌonkaa-kwaasi árair-aimba kawer-ámpáꞌá métinkaniye mináséí-áímbá iséꞌa Ísu Káráísitin-aaiyaveꞌa áraire séꞌa kwesé tarúmai máyáamba Áánútu kesimambá timénaumne simái asirámakaintemba mirá uráimba póꞌa kwená kwaási-iꞌa umái méꞌa ísaraawe.

¹⁴Áánútun-amanko keséya máyáintaveta séta áraiꞌa Áánútu kwená kwaásiyavena simái asirámakainta kesópata tíníye. áraiꞌa Áánútu kwená kwaásiya tátokaampinkemba iyásinkanintaawe kwéseta mindáyaveta kwená ááimba óꞌoran-aaimba mósá kwémaraumne.

¹⁵agairáúnda árair-aimba póꞌa keinárawaꞌa Ísóigo Ísuwe aráápamai méꞌa Áánútuna kwaásiti imáyáa éꞌa máyáawe-aimba iséꞌa

¹⁶Áánútumpaꞌa súwi símae iyéꞌa keinárawaꞌa túwaꞌnaa umai námúnaa súnda

¹⁷Áánútumpaꞌa maarán-áíntávéꞌa áísaa une. Ísóigo Ísu Káráísiti avowámá kentáásivowama óꞌoran-aaimba kwáyáiwai kwemá kwenamambá timínana kentí imáyáa kaweꞌá umátinkena Áánútumba agaráátinkainaꞌa póꞌa kaweꞌá umái awánanaaowe.

¹⁸kentí imáyáa ságamatinkena tááyaraintaveꞌa kwesémo ménaaombo amuꞌmaréꞌo máyáantaveꞌa mindáyaveꞌa námúnaa kwésune. kwemá kwená kwaási kaweꞌó umáímo ménaaomba toꞌmayaa úmarena simái asirámakaimba awánanaaontaveꞌa námúnaa kwésune.

¹⁹kwenááiyaveta áraire kwésundawaivinta kwená asirayánkó mayáímá kwémayaimba minásíráyámbá usáyaaitarain-asirayanko isaꞌá awánanaaontaveꞌa námúnaa kwésune. Áánútu minásíráyándéí Káráísitimba pukáimpinkemba usásinankena kwenayáánúrapaꞌa asirayán-áyámpáꞌá kwíyómpaꞌa móankaraiye. minásíráyámbá kwenááiyaveta áraire kwésundawaimba símakain-asirayamba mimbórá-ásíráyámbán-iye.

²¹Káráísiti amáparawairaꞌa kárákwirena kwíyómpaꞌo kárákwiraawairare asirayánkwáráwáíráré aivaráwáíráré ívéꞌo túwíꞌo kwáyáiwairare naaémbo túwíꞌo kwéniwairare kárákwiraiye.

²²Áánútu amáparawairaꞌa kárákwiyinintavena kwembá usásinankena kwená kwaásiyavena imáyáa éna simámena séna usáyaaitayan-Isoigoiꞌa uréma amáparawairaꞌa kárákwiyuwo siráiye.

²³aꞌnómpínkén-ímáyááómó amápa-kuraꞌo kárákwiraintemba Áánútuna kwaásiya Káráísitina áúraamba únanaya kwemá siꞌnónkáámbá éna kárákwiraiye. aꞌnónkó kweyááraꞌa íma máyáísana áúwawaako íma mirá éna mimbórá-kúwawaaꞌo kwáyáintemba Káráísiti amápa-kuwawaaꞌa aaómísamai-iꞌa umásinkena kwegwáráꞌá aaómísamai-iꞌa umái máyáiye.