Read Kosena Évésasi 3 Bible Online

Évésasi 3 - Kosena bible

Évésasi 3

¹mindáyaveꞌa kemá Póro óꞌonkaa-kwaasi Ísu Káráísitin-aai simátimewandarakemba áwááꞌa sésa ándávaꞌa mósínkarowaꞌa Ísu Káráísitina mayáí-kwáásí éꞌa keinárawataveꞌa námúnaa kwésune.

²Áánútumo úwoi túwaꞌnaa íníntavena mimbáyáí símakowana mimbáyáígó kaweꞌá kwéumatinkaimba áꞌa ísaraawe.

³Áánútumo toꞌmayaa úmakena aúpáꞌó makáimba agaráásinkowaꞌa ááéma mináímpínkémbá ákí-aimba aúváívimba agaimakáumne.

⁴ááéma Ísu Káráísitin-aai aúpáꞌá makáimba simásimuwaꞌa ísaraumne. maanáúváímó agayáúnda ísámai kaweꞌá oro.

⁵Áánútu naaóváꞌó máyówai mináímbá íma simátimena ívéꞌa Áánútun-amanko kwená aantá-kwaasiyaawe kwenáái simátíméwaiye simásímakaiye.

⁶mináséí-kwásáí maarán-áímbán-iye. Yútaa-kwaasiyaamo áséi-kwasaimo ísaraundantentaan-umai óꞌonkaa-kwaasi ísaraantavena Áánútu kaweꞌá umátínkáísasa óꞌonkaa-kwaasiye Yútaa-kwaasiye mimbóráíꞌa umái máyaundayaawe. Áánútu séna Ísu Káráísitina mayáíyávéꞌa mirá ónaumne simái asirámakaimba póna íma Yútaa-kwaasiye suꞌmainivo óꞌonkaa-kwaasiyavenagwaraꞌa simái asirámakaiye.

⁷áséi-kwasai simátimenaundayavena Áánútu úwoi súwaꞌnaa ena kwená asirayámbá siména kwená mayáí-kwáásí-íꞌa umásínkaraiye.

⁸Áánútuna kwaási kembá usáyaaitaraawaꞌa kíto-kwaasi póꞌa óꞌonkaa-kwaasi áséi-kwasai Ísu Káráísitina mayáí óꞌom-bayai usáyaaitaraim-bayai-aimba simátimenaundayavena usásisinkaraiye.

⁹Áánútu simásimena séna toꞌmayaa úmareꞌo aúpáꞌó maréꞌo mirá ónaumne siráunda-aimba simái ságamatimiyo Áánútu simásímakaiye. Áánútu amápa-tantaaꞌo taróruraiwai aivaꞌá mináímbá aúpáꞌá makáimba kwaíkwaiꞌo eémáyáimba

¹⁰ívéꞌa kárákwiraawaiye asirayánkwáráwáíyé kwíyómpaꞌo máyáawai Áánútuna kwaási tuwánésa sésa Áánútu óꞌoran-kawer-imayaagwarawain-iye kwésewe.

¹¹ááinkaꞌa Áánútu imáyáa éna toꞌmayaa éna séna mirá ónaumne séna Ísu Káráísiti kentáásí Ísóigomba imáyáa amúwana mirá uráiye.

¹²Ísu Káráísitiye tarúmaiya máyaundayavetaawe kwenááiyaveta áraire kwésundayavenawe íma sááꞌa kaisatá Áánútunopata úwoiya kwégune.

¹³mindáyaveꞌa simátimeꞌa séꞌa keinárawaꞌa áséi-kwasai simátimewandarakemba áwááꞌa sésa síꞌa iníꞌa umásínkaraavo asiramái méꞌa íma ivátuwaaro. umbai-yántááꞌó kesópaꞌo kwáyáimba kanaán-ivo úwoi aamoí oro. Káráísiti aruntá kwésimin-kwasai.

¹⁴mináíntávéꞌa imáyáa kwéeꞌa Áánútu kentáásivowa aúrankaꞌa kívaireꞌa méꞌa námúnaa kwésune.

¹⁵amápar-akumba marapáꞌá máyáawaiye kwíyómpaꞌa máyáawaiye miwítí ááimba Áánútuma isaꞌá kwenaúrankaꞌa kívaireꞌa méꞌa maarán-dámúnáá kwésune.

¹⁶Áánútun-amanko kentirumpimbá ména óꞌoran-anondako póna asirayámbá timínaꞌa asiramái méꞌa

¹⁷Ísu Káráísitin-aaiyaveꞌa áraire kwésentavena kentirumpimbá ména kwemá tirumbó kwétimewaina ááimba isaꞌá kwentávéꞌa asiramái tirumbá kwéameꞌa ménaaontaveꞌa námúnaa kwésune.

¹⁸Káráísiti amáparawaivimba arumbá kwétimimba anómba kwétimiye. Káráísiti asirayámbá timínaꞌa keináraware Áánútuna kwaásiye amápaꞌa séꞌa Káráísiti kentáávimba arumbá kwésimimba anómba kwésimimba póna íma ánásaniye sénááontaveꞌa námúnaa kwésune.

¹⁹Ísu Káráísiti amáparawaivimba arumbá kwétimimba anómba kwétimimba íya kanaán-umaiya awánasaraundayaanivo ívéꞌa kítokaꞌa awánéꞌa naaémba awánamai kaweꞌá ónááontaveꞌa námúnaa kwésune. asirayámbá Áánútumpimba anómba kwéna keinárawapimba anómba kwénintaveꞌa námúnaa kwésune.

²⁰imáyáamo kwéetaamo Áánútumbo kwéaisaa-undaya sáwíyan-tantaaꞌan-ivo kwená asirayándéímó kwésuwaꞌnaa-enayaamo kwéimba mindá usáyaaitarain-tantaaꞌan-iye.

²¹Áánútuna kwaásiya Ísu Káráísitiyeya tarúmaiya méta ívétaamo máyaunda-kwaasiye naaémbo paáronaaon-kwaasiye séta kwenáwíꞌa anómba úmae kwéiyimba árair-aimba iyéyá símae iyónaundayaawe.