Read Kosena Évésasi 4 Bible Online

Évésasi 4 - Kosena bible

Évésasi 4

¹Ísóigona mayáímá kwémayaundarakemba ándávaꞌa sínkaraawaꞌa méꞌa maanáímbá kwakwiyéꞌa kwésimatimune. Áánútu tááyena séna maarán-umai máéro siráivo mirán-oro.

²kentúma íma maimaé iyéꞌa paru umái méꞌa imáyáa kwéeꞌa túwaꞌnaa eꞌa sáwíꞌo umátínkáambo éꞌa íma imáyáa éꞌa úwoi túwaꞌnaa oro.

³Áánútun-amanko imáyáa tímísaꞌa mimbórá-ímáyááráꞌá méꞌa mirá éꞌa paru úmae iyónááontaveꞌa íma ivátuwaaro.

⁴Áánútun-amamba mimbórá máyáísata kesáá mimbórá-súráámbá umáíya máyaunanaya sááyaraimba póta kwesé ménaundayaveta amuꞌmaréta méta mimbórá-yántáátávéta amuꞌmaréta ménaumne.

⁵Ísóigo mimbórá máyáísana Áánútun-aaiyaveta áraire kwésunda-anta mimbórá-ámbá isaná nombó kwéveraundaya mimbórá-ámbá isaná

⁶Áánútu mimbóráwáí ména amáparawaiya kentáásivowama ména amáparawairata kárákwirena amáparawaiya kaweꞌá umásinkenaya kwená kwaásivimba máyáiye.

⁷Áánútu máyáísana Ísu Káráísiti kwená imáyáavinkemba kwená mayáíyá mayánaundayavenaya kwená asirayámpínkémbá moórá-morawaiya asirayántá símakaintaawe.

⁸mindáyavena naaóváꞌá Áánútun-aai aúváívimba agaimaréna sénasanaambó iyúnkaꞌa tátokowai tíꞌmaenaiyéna kwaási aamoi-yántááꞌá tímatukaiye agaimaréna siráiye.

⁹iyúnkaꞌo siráin-ainkona ááimba maarán-áímbán-iye. aivaꞌá marapáꞌá kunkéna

¹⁰kwíyómpaꞌa iráimba mimbóráwáímá póna amápapimpaꞌa kwená asirayámbá kwáyáiye.

¹¹aamoi-yántááꞌá tímatukaiye siráin-ainkona ááimba maarán-áímbán-iye. kwená mayáímá mayánááontavena asirayámbá kwaási timúwasa évakarawaimo timún-asirayandei aantá-kwaasiti mayáí máyówasa évakarawaimo timún-asirayandei Áánútu simátímakain-aimba simátímúwasa évakarawaimo timún-asirayandei Áánútun-aai íma ísaron-kwaasi simátímaꞌmaesa kuwasá évakarawaimo timún-asirayandei Áánútuna kwaásiraꞌa kárákwiyuwasa évakarawaimo timún-asirayandei Áánútuna aambá agaráátinkowasa miráumai Ísu Káráísitina mayáímá mairáawe.

¹²Áánútuna kwaásiya kwená mayáímá kwémaeta moórá-morawaiya túwaꞌnaa umai mimbóráíꞌa umáíya méta asiramátinkaundayavenaya asirayándéí mirá uráiye.

¹³mindáyaveta méta Áánútu ááninkon-aaiyaveta áraire kwésundayavetaawe kwembá awánamai kaweꞌá kwéundayavetaawe mimbórá-ímáyáá éta tarúmai méta sáákaevayan-kwaasi-iꞌa umái méta Káráísitinkaaniꞌa umáíya ménaumne.

¹⁴miráyáámó onasayáámó ésa iyámpóímo kampaꞌó kwésimatiyuwaantemba kentáá íma mirán-umai kampaꞌá simásiyuwanaaowe. mirám-baaran-aimba íya kwaréta kwaási sáwí-ampaꞌa métinkanae sésa sáwí-imayaavinkembo kwésiyan-aimba íma iséta mirán-áímbá íya kwaránaumpo

¹⁵árair-aine suꞌmai kwéseta kwaásiti imáyáa kwéeta amápa-tantaaꞌa sáákaevayan-kwaasi-iꞌa umái méta Káráísitinkaaniꞌa umái ménaumne. kwemá kentááráꞌá kárákwiraisata

¹⁶kesáá Káráísiti áúwawaata únana kentáásiꞌnonkaamba Káráísiti éna amápa-kuwawaakaꞌa kárákwiraiye. tiyáámba tísamaima tínúnkoma tátokaisana tiꞌnónkómó imbá amápa-kuwawaapaꞌa imáyáa tímísana tiyáánko kwená mayáí máyáísana tísamaigo kwená mayáí máyáísana mirámó kwéenamo anómbo kwéimba miráumai Káráísiti kwená kwaási imáyáa tímísasa moórá-morawai kwétuwaꞌnaa-esa kwéasiramatinkesa máyáawe. Káráísitinte tarútinkena aúnáiꞌa umátínkarain-kwasai.

¹⁷Ísóigo aúrankaꞌa asiramái simátimumpo ísáaro. Áánútuna aambó ímo kwégwaraawaimo máyáantemba íma miráumai máéro. miwímá sáwí-imayaavimba mésa

¹⁸íma ísámai kaweꞌá ésa Áánútun-aaiyavesa tirunté marésa tiꞌnómbá umbaí tamái máyáantavesa miwítí imáyáao túnkwisasa Áánútumo aúnáiꞌo kwéumatinkain-ayampaꞌa íma mésa

¹⁹sáwíꞌo kwéon-imayaawe suꞌmai ésa óꞌon-oꞌon-tantaaꞌo sáwíꞌo kwéomba aamoí ésa mirámó kwéontavesa íma tigaeyávésa kwéowe.

²⁰miwí mirá kwéombanivo keinárawaꞌa Ísu Káráísitimpaꞌa téꞌa kwená aampaꞌá kwégweꞌa

²¹kwenáái iséꞌa áraire sumbá Ísumpakemba árair-aimba simátímaꞌmaesa íyúwaꞌa ísaraawe.

²²ááéraan-imayaaomo sáwí-yantaataveꞌo tirááíyaveꞌo uwanamó kampaꞌó simátíyukaimba ivátuweꞌa

²³mirámó íyanamo éna Áánútu kentí imáyáa aúnáiꞌa umátinkena

²⁴kwembó arááímo kwétainiꞌa ónááontavena aúnáiꞌa umái Áánútunkaaniꞌa umátinkainaꞌa áraiꞌa Áánútuntaveꞌa imáyáa éꞌa arupí umái ménaaowe.

²⁵mindáyaveꞌa kampar-áímbá tínaaemba umámeꞌa kentí kwaásivimba árair-aine suꞌmai seró. Ísu Káráísitina akún-ándá póta mimbóráíꞌa umái méta póta miráyá onó.

²⁶áwááꞌo síyamba íma sáwíꞌa éꞌa ááéma paru umái méꞌa áwáá-tantaaꞌa kwaíkwaiꞌa ivó séꞌa ákíraꞌa túwáaro.

²⁷Sáátáánigo tavisínaꞌa sáwíꞌa únavo séꞌa áwááꞌo sembá ákíraꞌa túwáaro.

²⁸umóyámbó kwéowai maarán-oro. íma umóyámbá éꞌa évaka-tantaaꞌo mayánááontaveꞌa mayáímá kwémaeꞌa minkákémbá mairéꞌa ímo makén-kwaasi túwaꞌnaa eꞌa tíméro.

²⁹sáwí-aimba íma séꞌa kaweꞌó umátinkanin-aine suꞌmai séꞌa mirámó éꞌo éꞌa mináímbó isánááon-kwaasi kaweꞌá umátinkaiyasa asiramái ménaaowe.

³⁰Áánútun-amanko arumbá umbaí taiváínivo íma sáwíꞌa oro. Áánútu amápa-tantaapinkemba iyásinkanin-kanaamo tínímba Áánútun-amanko kentirumpimbá máyáintaveꞌa séꞌa Áánútuna kwaásima úne sénááontavena Áánútun-amanko arumbá umbaí taiváínivo íma sáwíꞌa oro.

³¹keinárawapimba maarán-tántááꞌó éꞌa tínaaemba umáméro. kayoráí-yántááré tirumbó sáwíꞌo iíyé áwááꞌo siíyé aaisambó siíyé simáímo sáwíꞌo umátinkaiye amápa-tantaaꞌo sáwíꞌo iíyé

³²íma mirá éꞌa tirumbá umátinkeꞌa túwaꞌnaa eꞌa Ísu Káráísitimo kentí sáwí-imayaamo maitiyúwáísanamo Áánútumo ímo anondá sáwí-meyambo tímíntemba óꞌowimo sáwíꞌo umátínkaraamba íma imáyáa éꞌa anondá sáwí-imayaa umátínkáaro.