Read Kosena Évésasi 5 Bible Online

Évésasi 5 - Kosena bible

Évésasi 5

¹Áánútu arumbá kwétimisaꞌa kwená iyámpói ontávéꞌa póꞌa kwemó intembá miráumai kwéeꞌa

²moórá-morawaivimba kentirumbá kwétimeꞌa máéro. Ísu Káráísitimo kentáávímbó arumbó kwésimenayaamo énamo kentáásí sáwí-imayaamo maisiyuwáníntavenayaamo puwúwanamo Áánútumo aamoimó uráintemba moórá-morawaivimba kentirumbá tíméro.

³Áánútuna kwaási ontávéꞌa áwáyo-tantaare sáwíꞌo iíyé túran-andawe únavo séꞌa mirán-tántáákón-áái íma seró.

⁴sáwí-aine uwoꞌaór-áíné akáꞌáán-aine súnavo séꞌo Áánútumpaꞌo súwimo sénááomba mindá kaweꞌá íníye.

⁵áraiꞌa áwáyo-tantaaꞌo kwéowaiye sáwíꞌo kwéowaiye túran-anda kwéowaiye mirámó kwéon-kwaasi Ísu Káráísitiye Áánútuwe kárákwirayapaꞌa íma mésa túran-anda kwéowai marapá-tántáátávésa aamoí ésa íma Áánútuntavesa aamoí kwéowai Káráísitiye Áánútuwe kárákwirayapaꞌa íma ménaaowe.

⁶mirá-sáwíꞌó kwéon-tantaatavesamo sénááomba kampaꞌá simátíyúwáivainivo kárákwiyoro. Áánútun-aai ísámai sáwíꞌa kwéowai mirá-sáwí-áímbá kwésemba póna Áánútu áwááꞌa sínívo kárákwiyoro.

⁷mirámó kwésewaise íma méꞌa miwí íma kwáráaro.

⁸ááéma túnkon-ayampaꞌa máyómbanivo ívéꞌa Ísóigona kwaási ontávéꞌa ságayan-ayampaꞌa máyáamba póꞌa ságayan-kwaasi-iꞌa umái máéro.

⁹ságayan-ayampaꞌo méꞌo éꞌa arupí umái kaweꞌá umái méꞌa árair-aimba simái méꞌa

¹⁰imáyáa éꞌa séꞌa Ísóigo aamoí ínkwáe-iꞌa úne séꞌa mirán-oro.

¹¹túnkain-ayampaꞌa máyáawai íma áúgwaraꞌ-mayai kwémayaavo íma miwísé mirá éꞌa avoraꞌá simátimeꞌa séꞌa sáwíꞌa kwéowe séꞌa aúpáꞌó kwéombo séꞌo éꞌa tigaeyávéꞌa ónááovo avoraꞌá simátimeꞌa séꞌa sáwíꞌa kwéowe séꞌa

¹³avoraꞌá agaráátinkaiyasa mintántáákóná ááimba awánasuwesa koyauwerésa

¹⁴ságayan-ayampaꞌa taménaaowe. mindáyavesa sésatuúmó kwaésamo pukáaraꞌnaraambo umáímo mémpinkemba usásinewana Káráísitisán-kamátinkaniye kwésewe.

¹⁵mindáyaveꞌa kárákwiyeꞌa sáwí-imayaamo umáímo máyáawaimo ontembá íma éꞌa kawer-ímáyáá umái máéro.

¹⁶ívéꞌa kentáásópaꞌa umbai-yántááꞌá kwáyáintaveꞌa Áánútunopaꞌa ténááontaveꞌa úwoi maúnavo séꞌa Áánútuna mayáí máyáaro.

¹⁷mindáyaveꞌa íma sáwí-imayaa éꞌa Ísóigombo arááímo kwétainiꞌa umái máéro.

¹⁸mindáyaveꞌa sáwíꞌa ónááovo uwoꞌaóꞌ-nómbá néꞌa uwoꞌaóꞌá únavo séꞌa Áánútun-amanko kentáávímbá anómba umásinkainkwae séꞌa máéro.

¹⁹keinárawapimba Áánútun-aai aúváívimba agaimakáan-aimba séꞌa monor-ímá séꞌa Ísóigontaveꞌa tirumpimbá aamoí kwéeꞌa imá seró.

²⁰Ísóigo Ísu Káráísitina asirayántávéꞌa imáyáa kwéeꞌa amápa-tantaataveꞌa Áánútu kentáásivompaꞌa súwi símae íyóro. aarakwátí kwaasái.

²¹keinárawaꞌa Ísu Káráísiti áwíꞌa mósá kwémareꞌa Ísuna akúníꞌa umái méꞌa minákúmpákén-kwáásí táái ísáaro.

²²aaraiyómbá ísáaro. Ísóigon-aaimo kwéisaanten-umai kentuwaiꞌmáá táái ísáaro.

²³Ísu Káráísitimo kwená kwaásiraꞌo kárákwirainten-umai kwaaimá kentuwainímbáákaꞌa kárákwiyoro. Káráísiti kwená kwaási kawer-ámpáꞌá métínkaraiye.

²⁴Ísu Káráísitina kwaásimo kwenááimo ísáanten-umai aaraimá amápa-tantaataveꞌa kentuwaiꞌmáá táái ísáaro.

²⁵Ísu Káráísitimo kwená kwaásimo arumbó timénamo miwíyávénawe simáímo pukáinten-umai miráumai kwaaimá kentuwainímbááꞌa tirumbá tíméro.

²⁶Ísu Káráísiti kwená kwaási nondéí kaweꞌá umátinkena kwenááinei Áánúntundei-iꞌa umátinkanintavena

²⁷kwená kwaási kaweꞌá ésa miwívímbá sáwí-aimba íma kwáyainasa kasenkuíꞌa umái óꞌoran-kaweꞌa umátinkanintavena pukáiye.

²⁸miráumai Ísu Káráísitimo kwená kwaásimo arumbó tímíntemba kwaaimá kentuwainímbááꞌa tirumbá tíméro. kwaási kentúyavesamo imáyáa onten-umái kentuwainímbááti imáyáa oro. tuwainímbááti imáyáamo kwéowai kesáváí-ímáyáágwáráꞌá kwéowe.

²⁹kwaási kentúwawaatavesa íma tíyántavesa ésa kaweꞌá umái kárákwiresa toómbá námaesa kwéiyowe. kesáá Káráísitina kwaási éta kwenáúwawaakaamba únanaya póna kwemá miráumai kentááráꞌá kaweꞌá umái kárákwiraiye.

³¹naaóváꞌá Áánútun-aai aúváívimba agaimaréna sénamindáyavena kwaaigómó imbá anóvowitiyuwéna awainínkóe tágárotamaimimbórá-túmá maꞌmái kwémaeiye siráiye.

³²mináímpímbá moórá anón-aimba kwáyáísana mináínkóná ááimba maarán-iye. Ísu Káráísitiye kwená kwaásiye moóráiꞌa umái máyáawe siráiye-imayaa kwéune.

³³íma mindáyavenawe suꞌmai siráivo keinárawaꞌo kesáváí-ímáyáámó ontembá kentuwainímbááti imáyáa oro. aaraiyómbá kentuwaiꞌmáá táái ísáaro.