Read Kosena Vírípai 1 Bible Online

Vírípai 1 - Kosena bible

Vírípai 1

¹kemá Póro maanáímbá maanáúváívímbá agaimaráúmpo ísáaro. Tímóti kesé máyáísakai Ísu Káráísitina mayáí-kwáásíráí úye. Vírípai-naopakewai Ísóigona kwaási Ísu Káráísitiye tarúmai máyáawaiye keinárawakaꞌa kárákwiraawaiye kwétuwaꞌnaa-owaiye maanáímbá ísáaro.

²Áánútu kentáásivowae Ísóigo Ísu Káráísitiye úwoi túwaꞌnaa esarai paru kwéumatinkaayantaveꞌa námúnaa kwésune.

³keinárawataveꞌa imáyáa únda-tawai Áánútumpaꞌa súwi kwésune.

⁴keinárawataveꞌa Áánútumpaꞌa námúnaa súnda-tawai aasiyaasí sirunkó kaweꞌá kwéiye.

⁵aivaꞌá Áánútuna áséi-kwasai simátimunaꞌa iséꞌa súwaꞌnaa umai kwésimatimaꞌmae kwéiyeꞌa ívékwaraꞌa kwésimatimentaveꞌa mindáyaveꞌa Áánútumpaꞌa súwi kwésune.

⁶Áánútu kentirumpimbá kaweꞌ-máyáígóná ááimba ásámai maimaé kwéiyena ívékwaraꞌa kwéiyimba póna Ísu Káráísiti kumínda-tawai minkáwéꞌ-máyáí ánásaniye. mináímbá ísaraumne.

⁷Ísu Káráísitin-aai simátímakaundarakemba ándávaꞌa sínkaraawaꞌa máyaundavakenkwaraꞌa áséi-kwasai kwésimatimeꞌa miwí táái anondá kwésimatimunana Áánútu úwoi kwésuwaꞌnaa-ena keinárawakwaraꞌa úwoi kwétuwaꞌnaa-isaꞌa póꞌa Áánútu kentirumpimbá kaweꞌ-máyáí maimaé kwéiyiye-imayaa únda mindá kaweꞌán-iye. kentí imáyáa kwéundayaveꞌa mirán-áímbá kwésune.

⁸imáyáamo tímakaunda íma kesí imáyáavinkene suꞌmainivo Ísu Káráísitina imáyáavinken-aimba tímakaunda árair-aimba isaná Áánútu suwánaraiye.

⁹maanáíntávéꞌa Áánútumpaꞌa námúnaa simátinkanaumne. imáyáa tímaꞌmae kwénaaeꞌa kawe-tántááꞌá awánéꞌa kaweríꞌa éꞌa

¹⁰amápa-tantaaꞌa taaínkaaꞌa éꞌa kawe-tántááꞌá awánéꞌa kawer-ámbá kwaréꞌa Ísu Káráísiti kumínda-tawai kaweꞌá umái méwana kentí sáwí-meyamba íma kwáyainana

¹¹Ísu Káráísiti imáyáa timínaꞌa kawer-úramba umái méwasa tuwánésa mirámó íyamba Áánútu áwíꞌa mósá marésa súwi sénááontaveꞌa mindáyaveꞌa námúnaa kwésune.

¹²kesí kwaásiyono maísáaro. umbai-yántááꞌá kesópaꞌa tiráimba mindáyavesa sáwíva-kwaasi áséi-kwasai ísaraawe.

¹³Ísu Káráísitin-aai simátímakaundarakemba ándávaꞌa sínkaraawasa kenkáꞌá kárákwiraawaiye évakarawaiye Ísu Káráísitin-aai ísaraawe.

¹⁴ándávaꞌa máyaunda mindáyavena Ísóigo kentáásí kwaási sáwívaꞌa asirayámbá tímísana íma tááꞌa kaisasá Áánútun-aai asiramái kwésimatimaꞌmae kwégowe.

¹⁵súwíꞌa kwáyáintavesa évakarawai tirumbá sáwíꞌa ésa kentávésa kwenáwíꞌa kumíníye sésa Ísu Káráísitin-aai kwésimatimembanivo évakarawai kawer-ímáyáávínkémbá Káráísitin-aai kwésimatimewe.

¹⁶áséi-kwasai simátimeꞌa miwí táái anondá sénaundayavena Áánútu owé sisasá ándávaꞌa sínkaraawe. ándávaꞌo máyaunda-aimba évakarawai isésa imáyáa umásinkesa Ísu Káráísitin-aai kwésimatimewe.

¹⁷évakarawai íma kawer-ímáyáávínkémbán-ivo sáwí-imayaa tokésa sésa Ísu Káráísitin-aaimo simátíméndamo ésa kesúya maé iyónááowe sésa Ísu Káráísitin-aai kwésimatimewe. kentávésa sésa ándávaꞌa ména isáínana arunkó umbaí táníye sésa Káráísitin-aai kwésimatimewe.

¹⁸mindáyaveꞌa íma anón-imayaa kwéune. kawer-ímáyáávínkémbá Káráísitin-aai kwésimatimewana sirunkó kaweꞌá kwéivo sáwí-imayaa tokáawaigwaraꞌa Káráísitin-aai kwésimatimewana úwoi sirunkó kaweꞌá kwéiye.

¹⁹Áánútumpaꞌa námúnaa kwésewana póna Ísu Káráísitin-amanko kwésuwaꞌnaa-isasa ayúsinkanaaombo isáúnda sirunkó kaweꞌá kwéiye.

²⁰sínkamiyara puwónaum. úwoi ménaumno. mindáyaveꞌa timuꞌmakéꞌa námúnaa séꞌa Ísu Káráísitintaveꞌa íma sigaeyávéꞌa éꞌa íma sááꞌa káínaꞌa asiramái Ísu Káráísiti áwíꞌa mósá maránaumne. mirá úmae kwéiyundantemba Káráísiti áwíꞌa mósá maránaumne súne.

²¹marapáꞌó máyaundamo éꞌa Ísu Káráísiti áwíꞌa mósá maránáe séꞌa máyaundanivo puwéꞌo kwíyómpaꞌo iyónda marapáꞌó máyaandawaimba usáyaaitanaumne.

²²marapáꞌó úwoimo méꞌo éꞌa áúgwaraꞌ-mayai mayánaumne. úwoimo máéndayavena siráái táínana puwónaundayavena siráái táínana mirá ínaꞌa mirámó ónaundawaimba íma ísaraumne.

²³minkáér-ímáyááó kembá kwétavisiye. puwéꞌa kwíyómpaꞌa Káráísitiye ménaundayavena usáyaaitarain-tantaaꞌa póna siráái kwétaivo

²⁴marapáꞌó maúndamo éꞌa kaweꞌá umái kembá túwaꞌnaa únda póna kaweꞌá íníye.

²⁵mináímbá árair-aimba isaꞌá isáúnda póꞌa marapáꞌá méꞌa keinárawate koménaunda Áánútun-aaiyaveꞌa áraire símae íyónana tirunkó kaweꞌá ínímba mináímbá ísaraumne.

²⁶keinárawate ókwaraꞌa koménaundayaveꞌa kentávéꞌa imáyáa éꞌa Ísu Káráísiti áwíꞌa mósá maránááowe.

²⁷moórá-aimba asiramái simátíménda ísáaro. kaweꞌá umái méꞌa Ísu Káráísitina áséi-aimba mósá maráíyasa tuwánanaaowe. mirámó íyaꞌo éꞌa maankáꞌá méꞌa isánaumno. kentópaꞌa koméꞌa tuwánanaumo. íma isáúmne. maarán-áímbá isánaundayavaiye séꞌa kwésimatimune. mimbórá-ímáyáá éꞌa asiramái méꞌa tiyáántámba kwimái asiramái méꞌa áséi-kwasai simátímaꞌmaeꞌa kwíyasa mináíntávésa évakarawai áraire sénááowe.

²⁸kentí namuro-kwáásí túrankaꞌa íma moórá-yantaatavena tááꞌa kánímba pósa keinárawatavesa sésa Áánútu kwená aampaꞌá mótínkaraisasa máyáawe-imayaa ésa kesávésa Áánútuna némpata maíꞌmaita kwéune-imayaa ónááowe.

²⁹Áánútu imáyáa tímísaꞌa Ísu Káráísitin-aaiyaveꞌa áraire siráawe. Áánútu íma tíyótaasa isaꞌá keinárawaꞌa Ísu Káráísitina kwaási-iꞌa onkákémbá tíꞌo iníꞌa kwéumatinkaawe.

³⁰ááéma Ísu Káráísitina mayáí siyáántámbo kwimáímo mayááwánda áꞌa suwánaraamba ívékwaraꞌa mirámó únda kwéiseꞌa tiyáántámba kwimái kwémayaawe.