Read Kosena Vírípai 2 Bible Online

Vírípai 2 - Kosena bible

Vírípai 2

¹Ísu Káráísitiyemo tarúmaimo máyáamba kwemá kwétiravayaiye. Áánútumo kwenarumbó tímakaimba asirayámbá tímakaiye. Áánútun-amankomo arumbó tímakaimba moórávimba máyáawe. tirumbá umátínkávaꞌa kwénaaeꞌa túwaꞌnaa umai máyáawe. mirámó íyaꞌo éꞌa

²mimbórá-ímáyáá umái méꞌa moórá-tirumba maꞌmái méꞌa kentirumbó tímaꞌmaeꞌo naaíyamba sirunkó anón-kaweꞌa íníye.

³mayáímó kwémayaamba íma kentúma maé iyéꞌa kesúwíꞌa maimaé iyígwáe íma séꞌa Áánútu aísamaivimba méꞌa óꞌowiyaveꞌa séꞌa kentáá usáyaaitaraawe seró.

⁴íma kesáváíyé suꞌmai túwaꞌnaa eꞌa amáparawai túwaꞌnaa oro.

⁵Ísu Káráísitimo imáyáamo intembá maarán-ímáyáá oro.

⁶Ísu Káráísiti Áánúturaamba umái ména kwená asirayánkómó intembá umái ména minásíráyámbá íma tokéna

⁷ivátuwena umarankááníꞌa mórun-úwana moórá-ininko marankówana anón-éna kwayó-kwáásíráámbá umái ména

⁸kwaásiraamba umái máyowasa awánowana Áánútu aísamaivimba kumbéna puwínín-aintavena owé simái kató éna íma úwoi pukáivo sáwíꞌa ésa taairaꞌá inkamúwana pukáiye.

⁹mirá uráintavena Áánútu pukáimpinkemba usásinankena sanaan-úramba móankena amáparawai túwíkaꞌa kwenáwíꞌa anómba umánkowasa

¹⁰pósa Ísu áwíꞌo tánááombo ésa anómban-iye sésa amáparawai kívaesa kwíyómpakewaiye marapákéwáíyé kwaántái marupákéwáíyé kívairesa

¹¹avoraꞌá Ísu Káráísitintavesa sésa Ísóigoman-iye sésa Áánútumba kentáásivowa áwíꞌa mósá maránááowe. kwaásivimba sáma kamátinkeꞌa máéro siráin-kwasai.

¹²mindáyaveꞌa kesí kwaásiyo ísáaro. keinárawate máyaawandaraꞌa kesáái ísámae iráantemba ívéꞌa íma keinárawate máyaundaraꞌa kesáái iséꞌa Áánútumo sáwí-imayaao tátokaimpinkemba iyátinkena kawer-ámpáꞌó métinkarain-aimba imáyáa éꞌa kwentávéꞌa kwéeꞌa kwenáái tuwáúnavo séꞌa táátaveꞌa kwéeꞌa asiramái kwená mayáí máyáaro.

¹³Áánútu aamoimó kwéim-bayai mayánáe séꞌa kwéontavena kentirumpimbá mayáí maimaé kwéiyisaꞌa póꞌa táátaveꞌa kwéeꞌa kawer-ámpáꞌá kwaꞌmaé kwégowe.

¹⁴íma íꞌái tinkéꞌa íma aaisambá tiyéꞌa miráumai máéro.

¹⁵mirámó éꞌa kawer-úramba umái máíyana póna kentí sáwí-meyamba íma kwéniye. marapáꞌó sáwí-ambo kwarésamo kaeꞌnáéꞌo úmae nááón-kwaasivimba keinárawaꞌa Áánútuna kwaási méꞌa sáwí-imayaa kempímbá íma kwáyainaꞌa póꞌa sáma kamátinkeꞌa

¹⁶maíꞌmaiꞌo ónááon-aimba kentirumpimbá asiramái tátokaiyaꞌa póꞌa Ísu Káráísiti kumíndaraꞌa aamoí éꞌa séꞌa komáyaawanda póꞌa maíꞌmaiꞌo ónááon-aimba tirumpimbá asiramái tátoraamba póꞌa séꞌa íma úwoisan-tantaataveꞌa mayáí kwémaeꞌa méraumne sénaumne.

¹⁷Áánútuna aamoi-yántááꞌó áménteniꞌa umái kwenkáꞌá agevamái máyáawe. Áánútuntavesamo imáyáaamo ésamo ándá-aran-dombo átímaraanteniꞌa umái kembó sínkamiyanamo kesí naaemó kumínaꞌo púwónanamo éna ándá-aran-donkaamba kumíníye. mirámó ondamó éna kesirunkó kaweꞌá ínímba póna kentirunkógwáráꞌá kaweꞌá íníye.

¹⁸miráumai kesirunkómó kaweꞌó índantemba kentirunkógwáráꞌá miráumai kaweꞌá íníye. Tímótiye Épavarotaitasi miwítí kwaasái.

¹⁹sáwíyankaꞌa Tímótimba aiꞌmáráanana kentópaꞌa kwíníntaveꞌa Ísu Káráísitimpaꞌa námúnaavinkemba kwéaisaa-unda póna kentópaꞌa kuréna koyauweréna kesópaꞌa téna kentáái másimasiminaꞌa iséꞌa aamoí ónaumne.

²⁰kwesé keiráíyé suꞌmai keinárawatavekai anón-imayaa ékai sékai kawerá umái máya. sáwíra umái máyaao kwésuvo

²¹évakarawai kesáváí-ímáyááwé suꞌmai ésa Ísu Káráísitina imáyáa íma kwéowe.

²²ánivo ááninkomo avowáná mayáímó áwaꞌnaa intembá áséi-kwasaiyavena Tímóti kembá kwésuwaꞌnaa in-áímbá ísaraawe.

²³kesópaꞌo tínín-tantaaꞌa amuꞌmaꞌmái awánéꞌa Tímótimba aiꞌmáráanana kentópaꞌa kwínaꞌa

²⁴kemá sáwíyankaꞌa kentópaꞌa kónaundayaveꞌa Ísóigompaꞌa kwéaisaa-eꞌa kwéamuꞌmaraumne.

²⁵imáyáa éꞌa kesí kwaásigo áwíꞌa Épavarotaitasi aiꞌmáráanana kentópaꞌa kwíníye. mirá ónaumne kwésune. aiꞌmárówana kesópaꞌa téna kentáái másimasimena kesí umbai-máyáí tagwésuwaꞌnaa-ena kesé asirayám-báyáí kwémayaisana

²⁶áíꞌa isaꞌá kwenáái ísáawana kwemá iséna anón-imayaa éna síꞌo imbá asóvamasinkain-aimba kosimátimenae simbá póꞌa aiꞌmáráanana kwíníye.

²⁷áraiꞌa áíꞌa isaná puwíndayavena kwéisana Áánútu arumbá umánkena asóvamankaraiye. umbai-yántááꞌá kempímbá kwáyáinkaꞌa póna puwínana óꞌon-umbai-yantaaꞌa tivó séna Áánútu arumbá umásinkena asóvamankaraiye.

²⁸mindáyaveꞌa aiꞌmáráandayaveꞌa aamoí únana kentópaꞌa kwínaꞌa awánéꞌa aamoí íyaꞌa íma anón-imayaa ónaumne.

²⁹kentópaꞌa kwínaꞌa awánéꞌa aamoí umánkeꞌa Ísóigompaꞌa súwi síyana tirunkó anón-kaweꞌa íníye. mirán-kwáásí táái mósá máráaro.

³⁰íma kanaán-umai tasúwaꞌnaa ontávéna kentí anondá kwemá téna kovuwúnavo íma simbá úwoi tasúwaꞌnaa ena Ísu Káráísitina mayáí kwémayaimba puwíndayavena uráivo kwembá awánéꞌa kwenáái mósá máráaro.