Read Kosena Vírípai 4 Bible Online

Vírípai 4 - Kosena bible

Vírípai 4

¹kesí kwaásiyono. kentí imáyáa kwéunda-kwaasiyomban-owe. Áánútun-aai kosimátímakaundarakemba Áánútunopaꞌa tiráantavena sirunkó kaweꞌá kwéisaꞌa kotuwánanae séꞌa kwéune. Ísóigoe tarúmaimo máyáamba asiramái máéro.

²kemá Póro kaer-ínínkáí túwíꞌa Yótiyaawe Síntikite asiramái simátimeꞌa séꞌa Ísóigontavekai imáyáa ékai aaisan-áímbá ivátuwekai mimbórá-ímáyáá okaiyó kwésune.

³kesémo mimbórá-máyáímó kwémayaandawai simáménda isaaó. minkáér-ínínkórásáráí áséi-kwasaiyavesarai súwaꞌnaa urááyamba po minínínkáí túwaꞌnaa inasaráí aaisan-áímbá ivátuwesarai mimbórá-ímáyáá okaiyó kwésune. minínínkáíyé moóráwai áwíꞌa Kérémentiye évakarawaiye áséi-kwasaiyavesa kesé asirayám-báyáí kwémaesa aúnáiꞌa umái maíꞌmaiꞌa ónááowai miwí túwíꞌa Áánútu kwená aúváí-kwandaaivimba agaimakáiye.

⁴Ísóigoe tarúmaimo máyáamba aasiyaasí tirunkó aamoí íno. ókwaraꞌa mináímbá séꞌa tirunkó aamoí íno kwésune.

⁵paru umái méꞌa túwaꞌnaa íyamba amáparawai tuwánanaaowe. Ísóigo sáwíyankaꞌa marapáꞌá kumíníye.

⁶amápa-tantaataveꞌa íma anón-imayaa éꞌa Áánútumpaꞌa áísaa eꞌa námúnaa séꞌa súwi seró.

⁷mirámó íyanamo éna Áánútu paru umátinkaniye. Áánútuna parugómá amápa-parugomba usáyaaitaraiye. Ísu Káráísitiye tarúmaimo máyáamba mimpárúgó tirumpiné imáyáarare kárákwiyiniye.

⁸kesí kwaásiyono. senda-áímbá ísáaro. árair-aine aiva-tántááré arupí-yantaare kaweré suꞌmai ií-yántááré aamoí kwéon-tantaare kasenku-yántááré kawer-áímbó kwésen-tantaare áwíꞌo mósá kwémaraan-tantaare miráumai-yantaataveꞌa imáyáa úmae íyóro.

⁹simátímakaunda-aimba kwéiseꞌa tátoꞌmai kaweꞌá úmae íyóro. mayáímó mairáunda suwánaraavo mirá úmae íyóro. mirámó íyanamo éna Áánútu paru umátinkena keinárawate méniye. súwaꞌnaa owe séna Póro súwi siráin-kwasai.

¹⁰ááéma kentávéꞌa imáyáa uráamba súwaꞌnaa ónááon-amba íma kwaémáímbanivo ívéꞌa kwésuwaꞌnaa-on-amba kwáyáísaꞌa kwésuwaꞌnaa-owana sirunkó aamoí kwéisaꞌa Ísóigompaꞌa súwi kwésune.

¹¹ímo makáunda-yantaatavena íma sirunkó sáwíꞌa kwéiye. sáwíva-tantaaꞌo makáunda-tawai kanaawé séꞌa sáwíva-tantaaꞌo ímo makáunda-tawai úwoi kanaán-iye kwésune.

¹²ímo makáunda-yantaakona aambá áꞌa awánéꞌa makáunda-yantaakona aambá áꞌa awánéꞌa kwéunana Áánútu imáyáa símísana sirunkó kaweꞌá kwéisaꞌa máyaumne. amápa-tantaaꞌa kesópaꞌa tiráimba évaka-tawai toómbá maréꞌa évaka-tawai kánoꞌa maéꞌa évaka-tawai sáwíva-tantaaꞌa maréꞌa évaka-tawai íma sáwíva-tantaaꞌa maréꞌa miráumai méꞌa kanaán-iye séꞌa máyaumne.

¹³Ísu Káráísiti asirayámbá símakaisaꞌa amápa-tantaaꞌo kesópaꞌo tiráimba asirayánkwáráꞌá tokéꞌa máyaumne.

¹⁴ánivo umbai-yántááꞌó kesópaꞌo tiráimba keinárawaꞌa súwaꞌnaa uráamba kaweꞌá uráawe.

¹⁵aivaꞌá áséi-kwasai kosimátímaꞌmaeꞌa kwéiyeꞌa kentí maramá Másétóniyaa-marama tuwéꞌa óꞌon-oꞌom-baravaꞌa kosimátímaꞌmaeꞌa kwénaaunda-kanaavimba keinárawaꞌa Vírípai-naopaken-kwaasiye suꞌmai kwésuwaꞌnaa-eꞌa évaka-tantaaꞌa násímakaawe. Áánútuna kwaási óꞌon-daopimpakewai íma násímún-aimba ísaraawe.

¹⁶Tésárónaikaa-naopaꞌa komáyaawanda-kanaavimba évaka-tawai keinárawapinkemba évakarawai timéꞌa tiꞌmárówasa mánásímakaawe.

¹⁷nááwiya mánásimenaao-imayaa íma kwéunda póꞌa násimiyawai Áánútu kaweꞌ-méyámbá timínda-meyanko iyíníye-imayaa kwéune.

¹⁸Épavarotaitasimba améꞌa aiꞌmárówana másímakain-tantaaꞌa arááꞌa makáumne. másímakain-tantaaꞌa Áánútumba ámakaamba áséi-kwiyumba iséna aamoí kwéin-tantaakaamba makáumne.

¹⁹Ísu Káráísitiye tarúmaimo máyáantavena kesí Áánútu amápa-tantaakona ááimba póna keinárawatavena kwembó arááímo tain-tántááꞌá timíníye.

²⁰Áánútu kentáásivowa kwená óꞌoran-aaimba kwaíkwaiꞌa ínímba árair-aimban-iye.

²¹Áánútuna kwaási Ísu Káráísitiye tarúmaimo máyáan-kwaasiyaveꞌa séꞌa kaweꞌá umái máéro kwésune. Áánútuna kwaási kesé máyáan-kwaasi keinárawatavesa sésa kaweꞌá umái máéro kwésewe.

²²Áánútuna kwaási Árómáa-naopaꞌa máyáawaiye Árómáani-kamaani anóndakona kwaásiti mayáí kwémayaawai keinárawatavesa sésa kaweꞌá umái máéro kwésewe.

²³Ísóigo Ísu Káráísiti keinárawate ména úwoi kwétuwaꞌnaa-intaveꞌa námúnaa kwésune. kemá Póro súnda-aimba ánásaiye.