Read Kosena Kórósi 2 Bible Online

Kórósi 2 - Kosena bible

Kórósi 2

¹maanáímbó simátíménda ísáaro. keinárawate Áréótísiyaa-naopakewaiye kembó ímo suwánaraawaiye anón-imayaa éꞌa námúnaa séꞌa kawerá umáíya máyaao-imayaa kwéeꞌa anóm-bayairaamba umái kwémaeꞌa

²keinárawate miwísé asiramái ménaaontavena sirááíma kwétaiye. moórá-morawaivimba kentirumbá kwétimeꞌa mimbórá-ímáyáá kwéeꞌa Áánútun-aai ísámai kaweꞌá éꞌa íma kaer-ímáyáá éꞌa asiramái ménaaontavena sirááíma kwétaiye. Áánútumo aúpáꞌó makénamo agaráátínkaraimba mináínkóná ááimba ísu Káráísitima isaná mináínkómbó kaweꞌó umáímo isánááontavena sirááíma kwétaiye.

³Áánútuna kawer-ímáyááwé kawer-áíné Káráísitimpimba kwáyáimba Káráísiti kweyáá imáyáaya símísata kwéisaumne. mináímbá isánááontaveꞌa kwésimatimune. Ísóigoemo tayarúmaimo méꞌa maíꞌmaiꞌa úmae íyóro-kwasai.

⁴évakarawai kampar-áímbá kentirumbá airaráíyaꞌa kawer-áímbán-iye séꞌa kwáráavo séꞌa mináímbá kwésimatimune.

⁵keinárawate íma méꞌa ándávaꞌa némpaꞌa máyaundanivo keinárawataveꞌa imáyáa kwéune. Ísu Káráísitin-aaiyaveꞌo asiramáímo imáyáamo kwéeꞌo mimbórá-ímáyáámó kwéeꞌo máyáantaveꞌa keinárawataveꞌa imáyáa kwéunana sirunkó kaweꞌá kwéiye.

⁶mináímbá isánááontaveꞌa anóm-bayai mairáunda póꞌa Ísu Káráisitiye taméꞌa séꞌa kentáásí Ísóigoman-iye kwésemba póꞌa kwesé tayarúmaimo méꞌa maíꞌmaiꞌa úmae íyóro.

⁷taaigó ánúꞌo maravímbó kuménamo taaimó tátoraisanamo asiramáímo kwáyáintemba Ísu Káráísiti keinárawate máyainaꞌa asiramái méꞌa kwenááiyaveꞌa áraire símae iyíyana kentirumpimbá anómba íníye. moóráwai áwíꞌa Épávarasi Ísu Káráísitin-aai simátimuwaꞌa iséꞌa asirayán-ímáyáá kwéeꞌa aamoí úmae íyóro.

⁸évakarawai kampar-áímbá simátimesa ááéraan-kwaasiti aambá kwarésa kwaántá-kwaasiti aambá kwarésa íma Ísu Káráísitin-aaivinkemban-ivo kwaásiti imáyáavinkemba úwoi-aimba pósa kampaꞌá simátiyuwesa tátoraavo kárákwiyoro.

⁹Áánútuna asirayámbá amápaꞌa Káráísitimpimba kwáyáísana kwaási kunaúkáisaꞌa

¹⁰kwesé tarúmai máyáawana asirayámbá tímísaꞌa minásíráyánkwáráꞌá kasenkuíꞌa umái máyáawe. kwemá kárákwiraawairare asirayánkwáráwáíráré amáparawairare kárákwiyena asirayámbá tímísaꞌa kasenkuíꞌa umái máyáamba póꞌa évakarawai kampaꞌá simásiyuwesa tátoraavo séꞌa kárákwiyoro.

¹¹Yútaa-kwaasiya Áánútuna kwaásiya úne séta súraꞌa kárámaiya araaꞌéna kwéumpo keinárawaꞌa íma mirá kwéovo keinárawatavena Ísu Káráísiti maará uráiye. kentí sáwí-imayaao tátokaimpinkemba iyátinkena kwenaneꞌá méaraapatinkaimba póꞌa Áánútuna kwaásin-owe.

¹²Ísu Káráísiti pukáisasa utámakaavo keinárawaꞌa nombó péráamba púwówasamo utámáráanteniꞌa kwéowe. Áánútu Káráísitimba pukáimpinkemba usásinankowaꞌa mindáyaveꞌa séꞌa áraiꞌa asirayámbá tokéna mirá uráiye séꞌa Káráísitiye tarúmai máyáantaveꞌa usásintínkáanteniꞌa kwéiye.

¹³óꞌonkaa-kwaasi ombá sáwíꞌa kwéeꞌa sáwí-imayaayaveꞌo tirááíyaveꞌo kwéon-ambo kwakáantaveꞌa Áánútuna némpaꞌa máyómbanivo Áánútu Káráísitinte tarútinkena aúnáiꞌa umátínkaraiye. kesáá Áánútuna ámáámba íma ísámai kaweꞌá kwéowananaya kesáámó sáwíꞌo ówándaya aúváívimba agaimarówana kentáásí sáwí-meyamba kentáásópaꞌa íma tíníntavena Ísu Káráísiti taairaꞌá pukáimba póna kesáámó sáwíꞌo ówándayaawe sáwí-imayaawe Áánútu maisiyuwénaya Ísu Káráísitimbo pukáimpinkembo usásinankaraintemba usásisinkenaya aúnáiꞌa umásinkenaya kentáásí sáwí-imayaayavena íma imáyáa úmae kwéiyiye.

¹⁵Ísu Káráísiti taairaꞌá pukáinkaꞌa Sáátáánigona asirayáné kwená kwayóꞌnárawati asirayáné maisuwéna usáyaaitaraimba ááiꞌo tiyésamo kwaásimo tínkankesamo tiyáántámbo taantembá Ísu Káráísiti miráumai amáparawai túrankaꞌa usáyaaitaraiye.

¹⁶Ísu Káráísitimo keinárawatavenawe séna uráintaveꞌa kampar-áímbá simásiyuwaavo séꞌa kárákwiyoro. évakarawai évaka-tomba aambá aunésa anón-kanaa aambá aunésa kwíyómbo tayain-kánáá aambá aunésa saavaatiráꞌá aambá aunésa mirán-tántááꞌá aambá áúnkaavo keinárawaꞌo mirán-tántáákómbó ímo kwaráíyasamo aaivimbó maitinkáíyamba íma ísáaro.

¹⁷mintántááꞌá aánomo paárinin-tantaakona awaaméꞌa umái agaráátínkaraimba mintántáákóná ááimba Ísu Káráísitima éna áꞌa paáruraiye.

¹⁸évakarawai kampaꞌá sésa kwaási úwoisan-tantaaꞌan-iye sésa kwíyómpaken-kwayoꞌnarawati imáyáa mósá maréꞌa aamoí oró kampaꞌá kwésemba miwí táái íma ísáaro. miwí kaainkáámbó awánaan-aimba kwésimatimesa sésa mindáyaveta amáparawai usáyaaitaraumne kwésesa miwítí sáwí-imayaavinkemba kampar-ímáyáá kwéesa miwí túma maé kwéiyesa

¹⁹Ísu Káráísiti kentááráꞌó kárákwiraiwaimba íma tátoraamba áúkaawe. aꞌnónkó amápar-auwawaakaꞌo kárákwiraisanamo ánúnkomo amápa-kuraꞌo tátokaisanamo anómbo intembá Káráísiti kwená kwaásiraꞌa kárákwimai tátokaisasa Áánútuna imáyáavinkemba anómba kwéovo minkámpá-kwáásí Káráísiti kentááráꞌó kárákwiraiwaimba íma tátoraamba áúkaawe. mindáyaveꞌa miwí táái íma ísáaro. Káráísitinte tarútinkena aúnáiꞌa umátínkarain-kwasai.

²⁰Ísu Káráísitimo pukáintemba keinárawaꞌa kwemó uráinteniꞌo uráamba kwaántá-kwaasiti aambá kwégwarowana minánkó tátokompinkemba Káráísiti iyátínkaraiye. marapákén-kwáásí aambá áúmbakaan-tontavesa sésa íma néꞌa íma uwáꞌnamai awánéꞌa íma tátoꞌmai awánaaro kwésen-aimba nóra séra kwégwaraao.

²²mináímbá kwaásiti imáyáavinken-aimba marapákén-tántááꞌá póna nánááomba úwoi násuwanaaowe.

²³mirán-áímbá kwésesa kwíyómpaken-kwayoꞌnarawati imáyáa mósá marésa karuwaaꞌá kwéesa kampaꞌá sésa kwaási úwoisan-tantaaꞌan-iye sésa kentú-augwiyaamba toró sewasá évakarawai tuwánésa kampaꞌá sésa kawer-ímáyáágwáráwáín-owe sembánivo mirán-ámbá kwáráamba sáwí-imayaayavesamo tirááíyavesamo kwéomba íma kanaán-umai maisuwáínana ánásanivo úwoi kwaíkwaiꞌa íníye. mindáyaveꞌa íma kawer-ímáyáágwárá-kwáásín-owe seró.