Read Kosena 1 Tésárónaika 3 Bible Online

1 Tésárónaika 3 - Kosena bible

1 Tésárónaika 3

¹kentávékai ávááraumai imáyáama kwéekaimanivo maankákáí maékai keinárawaꞌa óꞌopaꞌa máyáantavekai Áténesi-naopaꞌa keiráí maékai

²Tímótimba aiꞌmarááwáyana kentópaꞌa kuráiye. Tímóti kentáásí kawe-kwáásí póna kwesé keséya Áánútuna mayáíyá kwémayaunanaya póna Ísu Káráísitina áséi-kwasai simátímaꞌmaena kwégwiye. kotirávayainaꞌa Áánútunkaꞌa agevamái asiramái meígwáe séꞌa Tímótimba aiꞌmarááwánana kuráiye.

³Áánútun-aai ímo ísááwai sáwíꞌa umátinkaiyaꞌa Áánútumba aúwáavo séꞌa Tímótimba aiꞌmarááwánana kuráiye. Áánútu séna kesááimo ímo ísááwai sáwíꞌa umátinkanaaowe siráimba pósa kentáá sáwíꞌa kwéumasinkaamba áꞌa ísaraawe.

⁴keinárawate maéwándarata séta sáwíꞌa umásinkanaaowemo siráundaya ívéꞌa magwévaarisaꞌa kwéawanaawe.

⁵kemá imáyáama éꞌa Sáátáánigo séna Áánútumba auwésa kesáái isáígwáe siráintaveꞌa mirá uráawe. Áánútunkaꞌa agevamái máyáao séꞌa kentáái isánáe séꞌa Tímótimba aiꞌmarááwánana kentópaꞌa kuráiye. kentópaꞌa mayáímá komayááwánda áúgwaraꞌ-mayaima mairáunda ívéꞌa mimbáyáígón-áúma íma kwáívo séꞌa Tímótimba aiꞌmarááwánana kuráiye.

⁶Tímóti kentópaꞌa koména koyauweréna kesópaꞌa téna keinárawatavena séna Áánútumpaꞌa tirumbá kwétimesa kwenkáꞌá agevamái asiramái máyaawe séna áséi-kwasai tasimásímakaiye. keinárawaꞌo kentávéꞌo séꞌo kawer-áímbá kwésiyemo senkwáráꞌá tasimásímakaiye. kesáámó sétaamo keinárawaꞌa kotuwánanaemo súnaꞌo kentááyávéꞌo tatuwánanaemo senkwáráꞌá tasimásímakaiye.

⁷Áánútun-aai kwésimatimundarakemba évakarawai sáwíta umásínkáankaꞌa Áánútun-aaiyavesa áraire sésa kwenkáꞌá agevamái asiramái máyáan-aimba tasimásímakaimba póna sirávayai-aimba tasimásímakaiye.

⁸Ísóigompaꞌa tarúmaimo asiramáímo máyáan-aimba iséta póta kawetá umái máyaumne.

⁹Áánútunkaꞌa asiramái máyáawata póta Áánútunopata kentáásirunko kaweꞌá kwéisata Áánútumpata súwi kwésune.

¹⁰keinárawatopaꞌo kónaunda-amba Áánútu kwiꞌmaráníntaveta eénáínkaꞌa aaváyaaraꞌa Áánútumpata asiramái áísaa úmae kwéiyune. Áánútun-aaiyaveꞌa áraire séꞌa kwenkáꞌá agevamái máyáambanivo moórávaꞌa kwéyuwaantaveta kotúwaꞌnaa ónáe séta Áánútumpaꞌa asiramáíya kwésune.

¹¹námúnaa kwésundaya pósarai Áánútu kentáásivoe Ísu kentáásí Ísóigoe umái kentópaꞌo kónaunda-amba kwisinkáyááoiye.

¹²námúnaa kwésundaya póna kesiruntá ávááraumai tímakaundanten-umai Ísóigoma imáyáa timínaꞌa moórá-mora-umai ísámai kentirumbá kwétimeꞌa amápa-kwaasivimba kentirumbá kwétimeꞌa ménaaowe.

¹³mirá íyana Áánútu kentirunkómbá asiramátinkainaꞌa Ísu kentáásí Ísóigomo kwená kwaásiyemo kumíndaraꞌa Áánútu kentáásivowa aúrankaꞌa kaweꞌá umái maíyana sáwí-aimba kempímbá íma kwénintaveta námúnaa kwésune.