Read Kosena 1 Tésárónaika 4 Bible Online

1 Tésárónaika 4 - Kosena bible

1 Tésárónaika 4

¹kentáásí kwaásiyono. moórá-ainkwaraꞌa ísáaro. Ísoigo Ísuwe tarúmaimo máyaundayaveta kwákwiyeta asiramái simátimeta séta Áánútumbo arááímo taiwáíná ááimba agaráátinkaundaya kwaꞌmaé kwégwiyana Áánútu tuwánéna aamoí umátinkaniye. mináínkóná ááimba áꞌa kwégwaraavo miráumai kwaꞌmaéꞌa koró.

²Ísóigo Ísu simásímakain-amaanta simátimewanda áꞌa iséꞌa kwégwaraawe.

³Áánútu maarámó iíyávéna kwéankaiye. keinárawaꞌa Áánútumpaꞌa téꞌa kwendéí taaúráaro. aarai-úmóyáné inaamaru-úmóyáné aséráaro.

⁴kwaaimó éꞌa aaraimó mayánááomba arupí umái máyáaro. mirámó ónááomba Áánútu mirámó iíyávéna kwéankaiye.

⁵Áánútumpaꞌo ímo tiráan-kwaasimo ontembá íma mirán-oro. póí-iyankomo kwaaván-ínímbó máráintemba íma mirán-oro.

⁶Áánútuna ámáámba miráumai kwáyáintavai aaraimó mayánááomba kentí kwaásima íma sáwíꞌa umátínkáaro. kéꞌnaamba simái ságamatimeta séta mirá-sáwí-ámpáꞌó kwíyanamo éna Áánútu umbai-méyámbá timíníye.

⁷Áánútumo kwená kwaási-iꞌo umásínkáinta kaweꞌó umáímo maíyáváíyá kwéumasinkaintaawe. íma sáwíꞌa umái mai-íta kwéumasinkaintaawe.

⁸mindáyavesa súnda-aimba isésa tínaaemba umámiyawaima íma kwaásiye suꞌmai tínaaemba umátimenaaomba pósa Áánútu kwenamambá kwétimiwainkwaraꞌa tínaaemba umámenaaowe.

⁹keinárawaꞌa kentí kwaásima Áánútun-aaiyaveꞌa áraire kwésen-kwaasi moórá-morawaivimbo kentirumbó kwétimen-aimba Áánútu agaráátínkaraimba póꞌa áꞌa mirá kwéovo moórá-morawaivimbo kentirumbó kwétimen-aimba maankwándááívímbá íma agayánaumne.

¹⁰keinárawaꞌa Másétóniyaa-ayampaken-kwaasi Áánútun-aaiyavesa áraire kwésen-kwaasivimba áꞌa kentirumbá tímakaawe. asiramái séta moórá-morawaivimba kentirumbá tímaꞌmaeꞌa íyóro kwésumpo

¹¹asiramái imáyáa kwéeꞌa paru umái méꞌa kentúraꞌa kárákwiyeꞌa toómbó mayánááontaveꞌa mayáímá máyáaro. mináímbá áꞌa simátímakaunda

¹²mirá éꞌa mayáí mayáíyaꞌa Áánútumpaꞌo ímo tiráan-kwaasi tuwánésa keinárawatavesa kawe-kwáásímá owémá sénááowe. mirá éꞌa mayáí mayáíyana íma tááin-tinkaniye. Ísóigoma kumínín-kwasai.

¹³kentáásí kwaásiyono. Áánútun-aaiyavesamo árairemo siráan-kwaasimo púwówasamo utámakaan-kwaasi tááiyaveꞌa tirunkó sáwíꞌan-ivo séta árair-aimba simátíménda ísáaro. Áánútunkaꞌo ímo agevamáímo mésamo Ísu kumíndaraꞌo pukáampinkembo usásinaiyavesamo ímo amuꞌmáráan-kwaasi tirumbá sáwíꞌa kwéivo keinárawaꞌa mirá ovó séta senda-áíntá ísáaro.

¹⁴Ísu pukáimpinkemba usásinkaintaveta áraire kwésumpo Ísun-aaiyavesamo árairemo sésamo pukáan-kwaasi Áánútu miwígwárá Ísunkwaraꞌo tiránín-aintaveta áraire kwésune.

¹⁵simátíménda-aimba Ísóigoma siráin-aimban-iye. Ísóigomo kumíndaraꞌa úwoimo túvamaimo máyáan-kwaasi pukéwai aivaꞌá íma usáyaaitanaaowe.

¹⁶Áánútuna kwayó-káwáánákó kwíyómpakewai aaí sínana Áánútuna uwírenko anónkaꞌa aaí sínana Ísóigo anónkaꞌa kwésindavinkemba kwíyómpakemba kumínímba Ísu Káráísitin-aaiyavesamo árairemo sésamo pukáan-kwaasi aivaꞌá usásinaiyata

¹⁷Ísu Káráísitin-aaiyaveta áraire sétaamo úwoimo súvamaimo máyáandawaiya kusirámbayainata ainámpímbá aivaꞌó iráawaise uyorupéta Ísóigomba uawánéta miráumai aasiyaasí Ísóigowe maíꞌmaiꞌa ónaundayaawe.

¹⁸mindáyaveꞌa síma-sima kwéeꞌa tirávaimai máéro.