Read Kosena 1 Tésárónaika 5 Bible Online

1 Tésárónaika 5 - Kosena bible

1 Tésárónaika 5

¹kentáásí kwaásiyono. Ísóigo Ísumo kumínín-kanaama íma ísareꞌa maankwándááívímbá íma agairáumne.

²kemá ísaraamba noꞌwáámba umóyán-kwáásímó anompintumáívimbo tintenkáán-umai Ísoigo Ísumo éna miráumai kumíníye.

³kwaásimo maarámó sésamo ívéꞌa kawe-kánáávímbá aánoumai máyaumne sénááombanivo avekáámbó éna sáwí-kanaao téna tasáwíꞌa umátinkaniye. aaraigóná kanaamó tisanamó imbá iyámpói kwémarankaiye. mirámó ontembá misáwí-kánááómó éna íma asétinkainda amáparawaivimba tátoraniye.

⁴kentáásí kwaásiyono. umóyán-kwáásígómó kentí náaindaambo tamaimairáinaꞌo awánéꞌo éꞌa táátaveꞌa ónááombanivo íma túnkaimpimba máyáamba póna Ísóigo Ísumo kumínímba íma táátaveꞌa ónááowe.

⁵keinárawaꞌa sáma kaiwáí árááꞌmaaꞌa owatá kesáágwáráꞌá íma túnkaiwaindeiya úmpo sáma kaiwáíndéíya úne. íma sáátaveta ónaumne.

⁶évakarawaimo ombá Ísumo kumínín-imayaa ímo ombá tavúꞌmáímo tuúmó kwáéntenkaamba kwéovo kesáá íya miráyá éta kárákwimaiya kawer-ímáyááyá umáíya ménaumne.

⁷kwaásima noꞌwáámba tuún-kwáéwasa uwoꞌaóꞌ-nómbó kwénaan-kwaasi noꞌwáámba nésa uwoꞌaóꞌá ónááovo

⁸kesáá sáma kaiwáí árááꞌmaaꞌa póta íma miráráántá ondayá kawer-ímáyáá umáíya ménaumne. miráumai méta kweukáámbó avérimaiyaamo máyaundantemba Áánútunkaꞌa agevamái méta kwaásivimba siruntá kwétimeta máyaumne. kweuꞌnéímó súwawaaꞌo ánáan-kwimaimo máyaundantemba Ísu Káráísiti kusiráníntaveta amuꞌmaréta ménaundayaawe.

⁹Áánútu kwená kwaási-ita umásínkaraimba kentáásí sáwí-mayairakemba Áánútu áwááꞌa simásinkanintavena ímanivo Ísóigo Ísu Káráísiti kentáásí sáwí-mayaigomo tátokaimpinkemba iyásinkenaya kawepátá mósinkanintavena Áánútu kwená kwaási-ita umásínkaraintaawe.

¹⁰Ísóigo Ísu Káráísiti kentávénáya ísámai pukáimba póta kumínataamo éta úwoimo máyaunda-kwaasigwara pukáan-kwaasigwaraꞌo éta kweséya ménaumne.

¹¹mindáyaveꞌa moórá-mora-umai túwaꞌnaa eꞌa kawer-áímbá síma-simaꞌa íyamba póꞌa asiramái ménaaowe. áꞌa kwéomba póꞌa mirá úmae iyónááowe.

¹²kentáásí kwaásiyono. moórá-aimbo asiramái simátíménda ísáaro. keinárawapimba mayáímá maésa kawer-áímbá simátimesa asiramái arupí umátinkanaaontavena Ísóigo miwí usásintinkarain-kwaasi táái taagwiyávóro.

¹³keinárawapimba miwí mayáí kwémayaantaveꞌa póꞌa miwí táái mósá maréꞌa kentirumbá kwétimeꞌa máéro. keinárawapinkemba moórá-morawai paru umái máéro.

¹⁴kentáásí kwaásiyono. asiramái súndaya kavóná-kwaasiyaveꞌa asiramái séꞌa arupí umátínkáaro. táákavuravumo íyan-kwaasi tirumbá asiramátínkáaro. aamoisayán-kwáásígwáráꞌá túwaꞌnaa oro. amápa-kwaasinamba kwempaꞌá aánoumai máéro.

¹⁵kembó sáwíꞌo umátínkéwaꞌa anondá miwí sáwíꞌa umátínkáavo séꞌa aambá áúntinkaaro. aasiyaasí miráumai keinárawate umái óꞌon-kwaasigwaraꞌa kaweꞌá umátínkáaro.

¹⁶aasiyaasí tirunkó aamoí ínaꞌa méꞌa

¹⁷Áánútumpaꞌa námúnaa símae iyéꞌa íma agándaaro.

¹⁸kentópaꞌa óꞌon-oꞌon-tantaaꞌa kawe-tántááꞌá umbai-yántáákwáráꞌá tínímba Áánútumpaꞌa súwi séꞌa máéro. mirámó ónááomba Áánútu mirá iíyávéna kwéankaiye. Ísu Káráísitiye tarúmai méꞌa Áánútumpaꞌa amápa-tantaataveꞌa súwi kwésemba Áánútu mirá iíyávéna kwéankaiye.

¹⁹Áánútun-amankomba íma aambá áúnankeꞌa

²⁰Áánútun-amankoma simátímakain-aimba kwésimatimiyaꞌa mináímbá íma tínaaemba umáméro.

²¹amápa-tantaaꞌa taaíntuweꞌa kawe-tántáákáꞌá asiramái méyatoraaro.

²²amápaꞌa óꞌon-oꞌo-sawi-yantaataveꞌa aséráaro.

²³Áánútu paru kwéumatinkaiwaina ááimban-iye. kwemá keinárawaꞌa kwendéí auráníntaveta námúnaa kwésune. Áánútu kentí imáyáaraꞌa túwawaakaꞌa timankaꞌá kárákwiyinaꞌa kaweꞌá umái ménaaomba Ísóigo Ísu Káráísiti kumíndaraꞌa íma sáwí-aimba kempímbá kwénintaveta námúnaa kwésune.

²⁴Áánútu áraikona ááimba póna kwená kwaási-iꞌa umátinkaindayavena tááyaraiwai kwemó siráinteniꞌa mirá umátinkaniye.

²⁵kentáásí kwaásiyono. Áánútumpaꞌa kentááyávéꞌa súwaꞌnaa umai námúnaa seró.

²⁶Áánútun-aaiyaveꞌa áraire kwésewai tiyáámba tíméro kwésune.

²⁷Ísóigo simásímakaintaveꞌa asiramái simátimeꞌa séꞌa maankwándááívínkén-kwásáí Áánútun-aaiyavesa áraire kwésewai amáparawai simátíméro.

²⁸Ísóigo Ísu Káráísiti aasiyaasí úwoi kwétuwaꞌnaa-intaveꞌa námúnaa kwésune. kemá Póro siráunda mináímbá kwéanasaiye.